احنا في موبيزل بنفضل الاندرويد اكثر من موبايلات ابل .. لكن كان لازم اننا نشتري ونقدملكم مراجعة iPhone 14 Pro الجديد .. بالرغم من سعره اللي مش منطقي .. وهنقارنه مع iPhone 13 Pro اللي فات وكمان مع Galaxy S22 Ultra .. ونصيحتي ليك لو عايز تشتري موبايل من ابل خلي حد يجيبه لك من بره .. بلاش تشتري من هنا.
التصميم :-
اول لما شوفت الـiPhone 14 Pro على الواقع لاقيت انه نسخة من iPhone 13 Pro بدون إختلاف .. لو شوفت الظهر بتاعهم من بعيد مش هتقدر تفرق بينهم .. يمكن عدسات الـ14 برو اكبر شوية ولوجو ابل أكبر.
وطبعًا احنا اكيد عارفين ان نقطة التصميم بتفرق مع 80% من الناس اللي بتشتري موبايلات ايفون .. لكن المره دي مفيش فرق بين الجيل اللي فات والجيل الجديد .. الفرق المره دي هيكون في تصميم الشاشة.
احنا بنفضل نسخة Pro علشان حجمها بيكون منطقي أكثر من الـPro Max .. وزن الموبايل 206 جرام والموبايل مسكته في الإيد متوازن ولطيفة جدًا وتقدر تستخدمه بإيد واحدة بسهولة.
طبعًا لازم تشتري جراب علشان الكاميرا الكبيرة .. لو الموبايل وقع منك هتتكسر بسهولة .. وده ميمنعش ان الموبايل مقاوم للماء والغبار بشهادة IP68 لعمق 6 متر لمدة 30 دقيقة.
الشاشة :-
شاشة الموبايل بحجم 6.1 بوصة من نوع OLED بتردد بيوصل لـ120 هيرتز .. مع سطوع بيوصل لـ2000 شمعة ودعم للـAlways On Display والـDynamic Island الجديدة.
بمقارنة الشاشة الجديدة مع الجيل اللي فات هنلاقي ان في تطورات فعلًا واضحة .. أولها السطوع اللي بيوصل لـ2000 شمعة واللي حسن من سطوع الشاشة تحت الشمس بشكل ملحوظ عن الجيل اللي فات .. بغض النظر عن إستهلاك البطارية الشديد لما ترفع السطوع .. إلا انها ميزة مهمه، وتتفوق على Galaxy S22 Ultra.
تاني حاجه جديدة بالمقارنة مع الجيل اللي فات هي دعم الـAlways On Display .. الموبايل بيقفل على نفس شاشة الـLock Screen لكن بسطوع أقل .. بيعرضلك صورة ثابته او عشوائية مع الساعة والتاريخ وشوية Widgets تقدر تختارها بنفسك .. وكمان بيعرضلك الإشعارات .. لكن إستهلاك البطارية معاها مش أفضل حاجه.
الحاجه الأخيرة اللي بتميز الجيل الجديد عن الجيل اللي فات هي الـDynamic Island .. وهي لطيفة جدًا من ناحية انها بتتفاعل معاك كويس وبتشتغل بسلاسه اوي وفعلًا مفيدة وبتسهل الإستخدام .. لكن في مقابل وهو انك علشان دائمًا بتستخدمها الكاميرا السيلفي هتكون مش نظيفة وهتحتاج تمسحها كويس قبل ما تصور.
والحاجه اللي عملت جدل كبير هي شكل قطع الشاشة اللي بيظهر لما تبقى عامل Full Screen وبتتفرج على فيديو .. احنا مقدرناش ناخد عليها بصراحة .. خاصًة لو انت متعود على الشاشة الكاملة او النوتش التقليدي .. لكن هي أذواق وفي ناس كتير تقبلتها قبل كده في موبايلات اندرويد وفي ناس كتير هتتقبلها في ايفون 14 برو عادي.
الأداء :-
ايفون 14 برو بيجي بمعالج قوي جدًا وهو A16 Bionic بتكنولوجيا 4 نانو ميتر .. المعالج فعلًا قوي جدًا .. لكن كده كده الأداء مكانش أزمة في الجيل اللي فات .. وفضل ثابت لحد النهارده .. فا مش هتحس بفرق في الأداء بين الجيل اللي فات والجيل الجديد .. التطوير على جانب الأداء مش هيظهر غير لو انت قاصد تجيب أقصى أداء.
تجربة الألعاب أكيد ممتازة ومفيش فيها أي مشاكل.
عوامل الأمان وعناصر اخرى :-
عندك Face ID سريع جدًا ويُعتمد عليه .. والصوت عظيم جدًا ومحترم وعالي جدًا .. أعلى حاجه بسيطة من ايفون 13 برو اللي فات .. وأعلى بفرق مش قليل عن Galaxy S22 Ultra.
مدى الـWi Fi بقى أحسن حاجه بسيطة اوي في iPhone 14 Pro عن الجيل اللي فات.
البطارية :-
بطارية الموبايل بتيجي بسعة 3200 مللي امبير .. مفيش فرق كبير بين أداءها الفعلي على مدار اليوم عن ايفون 13 برو القديم .. خاصًة لو مشغل Always On Display ممكن ايفون 14 برو يقعد وقت أقل.
أما بالنسبة للشحن فا لسه المدخل من نوع Lightning .. شحنت بشاحن 20 وات وشحن في ساعة ونص تقريبًا .. وقت طويل شوية لإن الموبايل بعد 80% بيكون بطيء جدًا في الشحن.
الكاميرات :-
العدسة الأساسية بدقة 48 ميجا بيكسل بفتحة عدسة F/1.8 فيها مثبت بصري .. العدسة الثانية للزوم بدقة 12 ميجا بيكسل بفتحة عدسة F/2.8 بتعمل زوم 3X حقيقي وبيوصل لـ15X مع مثبت بصري .. والأخيرة 12 ميجا بيكسل بفتحة عدسة F/2.2 وهي Ultra Wide .. والكاميرا السيلفي بدقة 12 ميجا بيكسل فتحة عدسة F/1.9.
لما قارنت مع ايفون 13 برو لاقيت بشكل مبدئي ان مفيش تغيير كبير .. لكن لما شوفت بورترية 3X لاقيت إختلاف في طريقة معالجة لون الجلد اللي بقى واقعي أكثر في ايفون 14 برو .. والتفاصيل أكثر والـSharpness أعلى .. والميزة الجديدة البورترية الـ2X في الـ14 برو بتقدملك Look ممتاز مظبوط جدًا.
لما حاولت أصور صورة 2X بالـ14 برو وأظبطها 2X برده في ايفون 13 برو لاقيت إختلاف واضح في البعد البؤري بيتترجم لإختلاف في عرض الشخص اللي بيتصور .. علشان كده دي احسن ميزة اتضافت لـ ايفون 14 برو .. لكن لو هتصور مباني او مناظر طبيعية مش هتحس بفروقات كبيرة بين الموبايلين.
والزوم كمان لسه أخرة 15X ومفيش فرق في الزوم البعيد بين ايفون 14 برو والجيل اللي فات .. وبالنسبة للتصوير في الإضاءه الضعيفة هتلاقي تفوق الـ14 برو بفرق واضح في التفاصيل.
بالنسبة للسيلفي فا هو كان حلو في iPhone 13 Pro .. ولسه ممتاز في ايفون 14 برو .. مفيش فرق كبير في التصوير الـOutDoor إلا لو السيلفي فيه أكثر من شخص .. الـFocus هيظبط أكثر في الـ14 برو .. كمان لون الجلد أفضل وتفاصيله فيها تحسن بسيط اوي في الـ14 برو.
لما تدخل InDoor هتلاقي فرق التفاصيل يبان أكثر لصالح ايفون 14 برو علشان فتحة العدسة الأوسع .. والفرق مش بيبقى كبير غير لما تقلل الإضاءه .. هتحس ان صور 14 برو واقعية أكثر وتفاصيلها أكثر.
شوف تجربة تصوير الفيديوهات في فيديو المراجعة !
سعر iPhone 14 Pro :-
- سعر نسخة 128 جيجا في مصر يبدأ من 32000 جنية مصري
الموبايل سعره برده بيبدأ من 1000 دولار للنسخة الـ128 جيجا وهي أقل نسخة .. انا بنصحك لو هتجيبه تجيب 256 جيجا على الأقل .. وبنصحك تشتريه من بره علشان الأسعار اللي هنا مش منطقية.
الرأي النهائي :-
نقاط تفوق iPhone 14 Pro على الجيل السابق :-
- التصوير البورترية الـ2X
- التصوير الليلي اتحسن كتير
- ثبات تصوير الفيديوهات بقى أفضل
- الـFocus في السيلفي أفضل
- شاشة سطوعها أعلى
- معالج أقوى حاجه بسيطة
- ميزات الشاشة Always On Display و Dynamic Island
اعتقد الأراء هتكون منقسمة .. جزء شايف ان ايفون 14 برو موبايل ممتاز بيقدم أسرع معالج وأسلس Animation مع أعلى سطوع شاشة وأحسن تجربة تصوير فيديوهات .. وجزء شايف ان الموبايل مش بيقدم جديد عن ايفون 13 برو بخلاف شكل الشاشة اللي هيشوفوه مجرد قطع سخيف في الشاشة.
Comments