ايه اللي ممكن موبايل إقتصادي بسعر 1000 جنيه يقدمهولك ؟ تصميم شيك .. ولا شاشة كبيرة .. ولا بطارية تكمل اليوم ؟ ديه أول مرة في موبيزل نجرب موبايل إقتصادي أوي كده .. الموبايل ده من شركة ايتل وإسمه Itel P36 .. في مقالة النهاردة هنعمل مراجعة كاملة للموبايل ده.
الفئة الإقتصادية بتاعت الـ1000 جنية .. مُهمة عند كتير من الناس اللي عاوزين يمسكوا موبايل أندرويد شكله حلو و فيه المميزات البسيطة الي موجودة في موبايلات 2020 .. فهل الـP36 من أيتل هيقدر يقدملك مميزات حقيقية بالسعر ده ولا لأ ؟
التصميم :-
نقطة التصميم هي أحسن حاجه في الموبايل ده .. أول ما تشوفه من بعيد هتلاحظ إنه موبايل قيّم ومُستحيل تتوقعله السعر بتاعه .. لان الموبايل فيه تدرج في لون الظهر مع نقشة على ظهر الموبايل ليها صوت كده لما تمشي إيدك عليك.
وكمان في إنعاكسات بتحصل على ظهر الموبايل مع تغير الضوء عليه .. وكمان شكل مُربع الكاميرات هيديلك انطباع إنك ماسك موبايل غالي .. وأهم من ده البصمة الخلفية اللي موجوده في موبايل إقتصادي بالسعر ده.
طبعًا أكيد مش محتاج اقولك إن الظهر والفريم من البلاستيك .. الزراير بتاعته متينه وكويسة .. وعمومًا انا راضي جدًا عن الـFinish النهائي بتاع الموبايل ده.
الموبايل جاي بـ3 ألوان .. البنفسجي وده نسائي اكتر .. الأزرق المُتدرج وده من وجهة نظري أشيك لون .. واللون الكحلي او الـDeep Blue وده لون فخم جدا.
الموبايل تخانته معقولة، حوالي 8.6 ملم ووزنه مقبول برده، حوالي 190 جرام .. هو كبير شوية علشان شاشته الكبيرة .. وأعتقد ديه حاجة مُستخدم الفئة الإقتصادية دي هيحبها جدًا.
مفيش تنازل في محتويات علبة الموبايل بالرغم من سعره .. وهتلاقي جراب شفاف بس مش بلاستيك طري .. هتحسه ناشف كدا شوية .. علشان يحميلك ظهر الموبايل.
الشاشة :-
وديه تاني ميزة في الموبايل ده .. لإنه بيجي بشاشة كبيرة بحجم 6.5 بوصة .. والشاشة دي بتيجي بتصميم النوتش الـWater Drop وبدقة HD+.
مُستخدم الفئة الإقتصادية بيحب دايمًا الشاشات الكبيرة .. وطبعًا طبيعي جدًا دقة الـHD+ في الفئة دي، اكيد مش هنستنى شاشة FHD+ بالسعر ده.
طبعا تجربة الشاشة هنا مش مُرضية لو هتقارنها بموبايلات أغلى .. إنما هتبقى مقبولة على موبايل بـ1000 جنيه .. الألوان عادية وممكن تحسها بهتانة شوية .. زوايا الرؤية مش حلوة .. والسطوع تحت الشمس مقبول جدًا .. طبيعي بالسعر ده.
مفيش حساس للإضاءة .. وبالتالي هتحتاج تتحكم في درجة سطوع الشاشة بإيدك على حسب المكان اللي انت هتتواجد فيه.
والموبايل بيجي في العلبة فيه سكرينة ممكن تركبها مؤقتًا لحد أما تشتريله سكرينة.
الأداء :-
وهنا هتيجي الأزمة .. الموبايل جاي بمعالج إقتصادي “بحت”، يمكن إنت أول مرة تسمع عنه .. هو اسمه UNISOC SC7731E .. مُعالج رُباعي النواة بتردد 1.3 جيجا هيرتز وبمعمارية قديمة 28 نانو.
محقق Score او نتيجة قليلة جدًا على Antutu Benchmark .. أكيد السكور هينعكس على الأداء .. الموبايل كمان جاي بـ1 جيجا رام .. وعلشان ده عتاد إقتصادي فا الموبايل جاي بنسخة مُخففة من الـAndroid واللي إسمها Android 9 GO Edition.
وأنصحك لو هتشتري الموبايل ده، أي حاجة تسطبها عليه لازم تكون الإصدار الـLite او المُخفف زي فيس بوك لايت او ماسنجر لايت .. علشان أي حاجة مش Lite هيبقى صعب جدًا تتعامل بيها مع الموبايل ده.
مش محتاج اقولك إن الموبايل أكيد بطيء مش سريع خالص .. أي حاجة بتعملها بتستنى شوية على ما الموبايل يستجيب ليها .. لو إنت جاي من موبايل تاني Android بمعالج من 2018 ~ 2019 فا للأسف مش هتقدر تتعايش مع الأداء اللي هنا.
لكن لو جاي من موبايل بزراير أو موبايل اندرويد قديم جدا .. مُمكن تتقبل الأداء اللي هنا .. وبرده هفكرك ان الموبايل ده إقتصادي، مش مطلوب منه اداء أقوى من كده في الفئة دي.
الموبايل أول ما تشتريه هتلاقي الـTouch بيعلق .. الشركة مشكورة بعتت Software Update حل المُشكلة ديه.
طبعا الأداء الرسومي حدث ولا حرج .. صب واي تقيلة على الموبايل وللأسف فيها LAG .. وقولت اجرب ببجي لايت .. إشتغلت بس تقيلة جدًا جدًا وتجربتي ليها غير مُرضية وده منطقي، الموبايل ده غير مُناسب للألعاب وده منطقي بسبب سعر الموبايل.
عوامل الأمان وعناصر اخرى :-
وديه تالت ميزة في الموبايل ده .. لإن الموبايل فيه بصمة في الظهر .. بالسعر ده كويس إنك تلاقي بصمة .. بس بتدوس عليها ثانية وبيفتح .. والـFace Unlock موجود هنا .. بياخد ثانيتين على ما يفتح.
وهعتبر وجود عوامل الأمان ديه ميزة .. بس في نفس الوقت التجربة مش مُمتازة بسبب تأخيرهم وده طبيعي في الفئة دي.
الموبايل بيجي بـ16 جيجا بايت مساحة تخزين .. بعد ما ثبت حاجات كتير زي ببجي لايت إتبقى حوالي 7 ونص جيجا .. بس خلي بالك إن نوع الذاكرة الداخلية هنا بطيء جدًا لدرجة إن البرنامج حتى مقدرش يتعرف على نوعها وده أكيد منعكس أكتر وأكتر على اداء الموبايل.
الموبايل زي ما قولتلك مفيش فيه حساس للإضاءة .. فيه بس حساس تقارب علشان يقفل الشاشة على ودنك وإنت بتعمل مُكالمة.
الموبايل صوته عالي على سعره بس متسألش على Base او طبقات صوت ..صوت سماعات الأذن متوسط .. وصوت الـAUX مُتواضع جدًا.
بالنسبة لشبكات الإتصال .. الـWiFi هنا مُتوسط المدى .. أما بالنسبة لشبكات الإتصال .. الموبايل داعم للجيل الثالث فقط ومفيش دعم للـ4G .. والشبكة كمان أدائها مُتواضع جدًا مش أقوى حاجة خالص.
البطارية :-
وديه رابع ميزة هنا .. بطارية ضخمة بحجم 5000 مللي أمبير .. حلوة جدًا على سعر الموبايل .. هتكمل معاك متوسط 8 ساعات شاشة مفتوحة.
بس للأسف جاي معاه شاحن بقوة 5 واط فقط .. بيشحن البطارية بالكامل في 5 ساعات إلا رُبع .. وده وقت شحن طويل جدًا.
الكاميرات :-
في الموبايلات الإقتصادية متسألش عن كاميرات .. عمومًا الكاميرا الخلفية مُزدوجة .. أساسية 8 ميجا بيكسل والتانية AI او للذكاء الإصطناعي .. ومعاك فلاش قوي .. والسيلفي 8 ميجا بيكسل برده .. وسوفت وير الكاميرا فيه بورترية في الكاميرا الخلفية والأمامية.
الكاميرات أداءها مُتواضع جدًا .. لازم إضاءة عالية علشان تاخد صوره مقبولة .. بس متسألش عن ألوان بشرة او الألوان عمومًا .. والتفاصيل نوعًا ما مقبولة على سعره.
بس ابلكيشن الكاميرا بتاع الموبايل ده تقيل كده .. بياخد وقت على ما بتصور وكمان بياخد وقت أكتر على ما يفتح الصورة.
والسيلفي نوعًا ما برده مقبول طول ما الإضاءة عالية .. وبيقل جدًا مع الإضاءات الداخلية .. واكيد متستناش اداء مقبول من التصور بالليل بالموبايل ده.
بالنسبة لتصوير الفيديوهات فالموبايل ده إقتصادي جدًا .. اكيد مش هيديك تجربة تصوير فيديوهات مُميزه .. الموبايل بيصور على 1080p .. الموبايل مفيش فيه مثبت إلكتروني ومفيش فيه مايكروفون اضافي لعزل الضوضاء.
ممكن تشوف الصور والفيديوهات المتصورة بالموبايل في فيديو المراجعة في أخر المقالة.
سعر الموبايل :-
سعر الموبايل ده حوالي 1200 جنية للنسخة اللي بتيجي بمساحة تخزين 16 جيجا مع 1 جيجا رام.
وبينفع تركب كارت ميموري وشريحتين إتصال مع بعض في نفس الوقت .. وللتأكيد بس، الموبايل ده بيدعم شبكات الجيل التالت فقط.
الرأي النهائي :-
مُميزات الموبايل :-
- شاشة كبيره بتصميم الـWater Drop المُميز
- وجود بصمة مع Face Unlock
- تصميم خارجي شيك
- بطارية ضخمة جدًا
- علبة الموبايل فيها كل المحتويات من سكرينة وجراب وسماعة
ومن الأخر الموبايل ده ينفع كإستخدام ثانوي، مش اكتر من كده .. منصحش بيه حد في 2020 كموبايل أساسي .. ومنصحش حد عمومًا بموبايل 1 جيجا رام .. أنصحك تزود المبلغ اللي معاك وتجيب موبايل أعلى شوية علشان تاخد تجربة أداء مقبوله.
شركة ايتل نفسها عندها موبايل أعلى إسمه P36 Pro .. بيجي بـ32 جيجا مع 2 جيجا رام وبيدعم شبكات الجيل الرابع .. وبمعالج أحسن وبشحن 10 واط وبسعر 1470 جنية، يُعتبر منطقي أكتر من الـ Itel P36 اللي بنراجعه النهارده.
Comments