في الفترة الأخيرة كان فيه سؤال محير و كتير بيساله اشتري Realme 5 Pro ولا اشتري Xiaomi Note 8 Pro ؟
في مراجعة النهاردة هنقارن بين الاتنين و نشوف المميزات و العيوب و انت تقرر مين المناسب بالنسبة لاستخدامك.
نتكلم عن المميزات والعيوب لكل موبايل بشكل مبدائي قبل الدخول في تفاصيل المقارنة .
موبايل Realme 5 Pro :-
مميزات:
- يمكنك استنخدام كارت ذاكرة خارجي مع شريحتين الاتصال.
- سرعة شحن عالية حتى 100%بفضل خاصية VOOC.
- كاميرا الهاتف السيلفى و الخلفية تقدم اداء مميز خصوصا في الاضاءات الضعيفة.
- معالج الهاتف من نوع سناب دراجون يقدم اداء ثابت وممتاز بدون اي مشاكل.
عيوب:
- غياب لمبة الاشعارات.
- خامات تصنيع من البلاسيتك.
موبايل Xiaomi Note 8 Pro :-
مميزات:
- تصميم الهاتف شيك و فخم ومن الزجاج .
- شاشة كبيرة مع حواف كاد تكون معدومة .
- يتم شحن البطارية لـ 90% خلال وقت قصير بفضل الشاحن السريع الـ 18 واط .
- يدعم الهاتف الـ IR Blaster الخاص بالتحكم في الأجهزة الكهربائية .
- متوفر بالهاتف لمبة اشعارات .
- أول هاتف ذكي بمعالج ميديا تيك الـ G90T فهو مخصص بصفة خاصة للألعاب حيث يقدم أداء أفضل من Snapdragon 710 في الألعاب خصوصا مع التبريد المائي ولو أن التبريد المائي غير مؤثر بشكل كبير في عملية التبريد.
عيوب:
- وزن الهاتف ثقيل نوعا ماً وحجمه كبير بسبب الشاشة الكبيرة .
- بسبب قدوم الهاتف من الزجاج مما يعرضه للكسر والخدش بسهولة أكبر .
- يجب الاستغناء عن شريحة اتصال لتتمكن من استخدام كارت الذاكرة الخارجي.
- يوجد ارتفاع بسيط في درجة حرارة الهاتف في المنطقة المحيطة بالكاميرات الخلفية عند تشغيل لعبة ثقيلة مثل PUBG لمدة ساعة واكتر ولكن لا تؤثر على أداء اللعبة فيظل الأداء الرسومي ممتاز في هذه الفئة السعرية من شاومي .
- يظل بروز الكاميرات موجود حتى بعد تركيب الجراب المرفق مع الهاتف.
التصميم :-
موبايل Realme 5 Pro مصنوع من البولي كربونيت أو البلاستيك مع نقشة Diamond cut اللامعة مع اطار من البلاستيك , الموبايل مش برميم في الايد خالص .. يعني شكله من بعيد كدا بيبقا حلو بس لما تمسكه وتخبط عليه هتحس بالبلاستيك.
انما Note 8 Pro من شاومي بتصميم زجاجي فخم جدا واحساسه في الايد premium فعلا وكمان تصميمه شيك وراقي كدا شوية بدون أي فرقعة في شكل التصميم.
من الاخر كدا بتوقع الموبايل كتير من ايديك خليك في الريلمي 5 برو لأنه بلاستيك وصعب أنه يتكسر لو وقع و هيستحمل معاك ، لأن الشاومي زجاج وتقيل ممكن يتبهدل لو وقع وقعه كبيرة.
إنما لو انت بتحافظ على الموبايل يبقي خليك في الشاومي علشان فخامته فعلا صعب تلاقيها في الفئة السعرية دي.
بالنسبة للمسكة في الإيد الـ Realme يكسب لأن شاشته أصغر و وزنه أخف وبالتالي مسكته في الايد أسهل واستخدامة بإيد واحدة أسهل من النوت 8 برو اللي هتحسه كبير شوية في ايديك وهتاخد شوية ع ما تتعود على أبعاده.
وبالنسبة لبروز الكاميرات، الاتنين فيهم بروز كاميرات مش قليل يمكن زي بعض تقريبا … الفرق أن جراب الريلمي بيغطي البروز ده تماما إنما الشاومي بيبقي لسه في حته من الكاميرا صغيرة أوي بارزة حتى بعد الجراب وديه حاجة رخمة وأنصحك فعلا مستخدمتش الجراب اللي معاه ولازم تجيب جراب تخين شوية علشان عدسة الكاميرا متتبهدلش زي ما حصل لناس كتير معاهم Xiaomi Note 7.
الشاشة :-
الاتنين شاشات IPS LCD الـ Realme حجم شاشته 6.3 بوصة إنما الـ Xiaomi شاشة أكبر 6.5 بوصة الاتنين فيهم نوتش للسيلفي والاتنين بدقة FHD+.
بالنسبة للألوان وتشبعها حسيت أنها أحسن بفرق بسيط جدا في الشاومي عن الريلمي بس ما زال تفاصيل الفيديوهات افضل شوية في الريلمي من ناحية الملامح والوشوش.
إنما السطوع تحت الشمس كان واحد تقريبا في الموبايلين ومش هتحس بمشاكل معاهم.
بالنسبة للحواف حوالين الشاشة فهي أحسن شوية في الشاومي خصوصا الحافة السفلية.
والشاومي ينفع فيه تلغي النوتش من الاعدادات إنما الريلمي مينفعش.
بالنسبة للحماية على الشاشة فالريلمي بجوريلا الجيل الثالث و في العلبة عليه اسكرينة للحماية إنما الشاومي جوريلا الجيل الخامس وجاي في العلبة من غير اسكرينة.
الأداء :-
و هنا نقطة الجدل الكبيرة حوالين الموبايلين دول.
الـ Realme 5 Pro بمعالج Snapdragon 712 تكنولوجيا 10 نانو و Xiaomi Note 8 Pro بمعالج Mediatek Helio G90T بتكنولوجيا 12 نانو من الاخر في الاستخدام العادي بالنسبة لتطبيقات السوشيال ميديا و برامج عادية و مكالمات و تصفح انترنت وهكذا مش هتحس بأي اختلاف بين الاتنين لأنهم أصلا ممتازين ومش هتاخد أداء أحسن منهم حاليا في الفئة السعرية بتاعت الـ 4000 جنية.
إنما لما ندخل على الأداء الرسومي والألعاب هتلاقي الشاومي مكتسح لأنه بيشغل PUBG على Ultra HDR جرافيك وتقريبا ده أرخص موبايل شغلها معانا على الجرافيك ديه واشتغلت تمام بدون تهنيج إنما الريلمي شغلها زي باقي الموبايلات High HD.
ده غير fortnite الي شغالة بشكل رسمي على الموبايلين واشتغلت على الشاومي على جرافيك high واشتغلت بكفاءة بدون تهنيج إنما في الريلمي اشتغلت على medium جرافيك.
يعني من الاخر الأداء الرسومي أحسن بفرق محترم في الشاومي.
بالنسبة للسخونية الاتنين بيسخنوا بس الريلمي بيقدر يوزع السخونية على جسم الموبايل البلاستيكي بالكامل وبالتالي احساسك ليها بيبقا أقل وتحس أن الموبايل سخن أقل شوية من الشاومي اللي فيه السخونية بتبقا مركزة أكتر في الحتة الي جمب الكاميرا اللي فيها أنبوب التبريد وبالتالي احساسك ليها بيبقا أكبر لأن السخونية متجمعة في منطقة واحدة وبتسخن أكتر من الطبيعي حاجة بسيطة.
لو هتاخد ببرامج قياس الحرارة فالريلمي بيزيد 4 درجات والشاومي بيزيد 6 درجات بعد تشغيل ألعاب ساعة على الاتنين وكمان وصل تحديث للشاومي ظبط موضوع السخونية شوية وغالبا لسه هيوصل تحديثات تاني وتالت .. بس مع التجربة مشكلة الحرارة البسيطة مش مشكلة أصلا ومش هتمنعك من أنك تشتري الشاومي.
أداء الموبايلين في الألعاب مش بيقل بعد مرور ساعة واكتر ولا بيحصل تهنيج ولا قفل لعبة ولا الكلام ده بس الي هتحسه أن بعد نص ساعة هتلاقي الشاومي ابتدى استهلاكة للبطارية يبقا أزيد حاجة بسيطة عن الريلمي الي بيحاول يحافظ على معدل استهلاكة للبطارية.
يعني من الاخر .. أداء في برامج السوشيال زي بعض … و أداء في الألعاب الشاومي أحسن … و أداء استهلاك البطارية افضل في موبايل ريلمي بفضل معمارية المعالج الافضل.
عوامل الأمان و الخصوصية :-
الاتنين فيهم بصمة خلفية سريعة جدا ومفيش واحد اسرع من التاني.
والاتنين فيهم Face unlock سريع جدا.
مزايا أخري :-
سوفت وير شاومي بيدعم عمل نسختين من كل البرامج إنما الريلمي من برامج السوشيال بس.
عدد أيقونات الاشعارات الي بيظهر جمب النوتش أكتر في الشاومي لا وكمان موجود لمبة اشعارات مش موجودة في الريلمي.
حاجة كمان في الشاومي بتميز نفسها بيها دايما مستشعر IR اللي بيخليك تتحكم في أجهزة كتير دا مش موجودة في الريلمي.
وبالنسبة للمستشعرات فالموبايلين فيهم كل المستشعرات بوصلة و سرعة و تقارب وجيروسكوب وشغالين بكفاءة ومفيش أي مشاكل.
بالنسبة لنقطة قوة الشبكة حقيقي الموبايلين ممتازين في الشبكة منقدرش نعيب في واحد منهم بس اللي لاحظته سرعه استجابة الشبكة في الأماكن اللي شبكتها ضعيفة أسرع شوية في الريلمي و لكن الاتنين مستقرين ومش بيوقعوا شبكة ولا الكلام ده.
الصوت :-
صوت الاتنين من سماعة واحدة بس صوت الريلمي أعلى ومجسم أكتر.
صوت سماعة المكالمات عالي وممتاز في الموبايلين.
وصوت سماعات الأذن أعلى في الريلمي بفرق بسيط عن الشاومي.
البطارية :-
الريلمي 5 برو بحجم بطارية 4000 مللي امبير انما الشاومي Note 8 Pro بحجم 4500 مللي امبير.
من الارقام هتفتكر أن بطارية الشاومي أحسن .. لكن لا .. لأن المعالج بتاع الريلمي موفر أكتر فتقريبا الاتنين وي بعض مع الاستخدام التقيل للموبايلين الاتنين بيستحملوا حوالي 6 ساعات شاشة مفتوحة.
بالنسبة بقي لزمن الشحن، منفذ USB Type C في الموبايلين … بالنسبة للشاحن .. الريلمي معاه شاحن VOOC بقوة 5 فولت 4 امبير بيقدر يشحن الموبايل بالكامل لحد 100% في ساعة وربع إنما الشاومي جاي معاه شاحن سريع 9 فولت 2 امبير بيشحن البطارية بالكامل لحد 100% في ساعتين وده بسبب ان اخر 10% الشحن السريع بيفصل واخر 10% بياخد فيهم تقريبا وقت ساعة الاربع.
الساعة والربع في الشاومي بيوصلوا البطارية لحد 90%.
حاجة كمان .. الريلمي بيقدر يشحن بطاريته أسرع حتى وانت بتلعب عليه ألعاب هتحس بفرق محسوس عن سرعة شحن الشاومي وانت بتلعب عليه لا وكمان هتحس أن الحرارة أقل في الريلمي.
الكاميرات :-
الكاميرا الخلفية رباعية فى الاتنين الاساسية فى الريلمى 48 ميجا بيكسل فتحة عدسة 1.8 مع مستشعر سوني IMX 586 و الشاومى 64 ميجا بيكسل بمستشعر من سامسونج GW1 والكاميرا التانية 8 ميجا بيكسل فتحة عدسة 2.2 للتصوير الواسع Ultrawide والعدسة الثالثة 2 ميجا بيكسل للبورترية والعدسة الرابعة 2 ميجا بيكسل للتصوير الMacro فتحة عدسة 2.4 .
الاتنين بيصوروا فيديوهات 2160 بيكسل مع 30 لقطة فى الثانية و بجودة 1080 بيكسل مع 30 أو 60 لقطة فى الثانية.
بالنسبة للسيلفي .. الشاومى بيجي بجودة 20 ميجا بيكسل مع فتحة عدسة F/2.0 أنما الريلمى 16 ميجا بيكسل مع فتحة عدسة f/2.0 و تصوير فيديو بجودة 1080 بيكسل.
تجربة التصوير ممتازة على الموبايلين بصراحة .. الي لاحظته .. ان الصور الخارجة من شاومي واقعية اكتر ومفيهاش لعب كتير في الألوان على عكس الريلمي الي بيلعب شوية في الوان الصورة علشان تبقى احسن .. ده غير كمان الـ HDR احسن شوية في الريلمي عن الشاومي.
انما بالنسبة للتصوير بليل فالريلمي كان افضل بفرق بسيط عن الشاومي.
جوجل كاميرا اشتغل نسخة 6.1 على الريلمي والي بتدعم النايت مود .. انما في الشاومي النسخة الوحيدة الي اشتغلت 5.1 والي مفيهاش نايد مود .. وبالتالي الريلمي يتفوق في نقطة دعم تشغيل برنامج جوجل كاميرا الي بيطلع صور افضل بسبب استخدام معالج سناب دراجون في الريلمي.
اسعار الموبايلات :-
ريلمي 5 برو
بسعر 3800 جنيه للنسخة 128 جيجا مع 4 جيجا رام
بسعر 4700 جنيه للنسخة 128 جيجا مع 8 جيجا رام
شاومي نوت 8 برو
بسعر 3999 جنيه للنسخة 64 جيجا مع 6 جيجا رام
بسعر 4222 جنيه للنسخة 128 جيجا مع 6 جيجا رام
رأى موبيزل النهائي :-
من الأخر .. الشاومي نوت 8 برو يتفوق في نقطة الأداء الرسومي بفرق ملحوظ بفضل المعالج الاقوى وكمان التصميم الزجاجي الأفخم وكمان لمبة اشعارات ومستشعر IR وكمان شاشة أكبر لمحبي الشاشات الكبيرة وكمان كاميرا خلفية بتطلع صور واقعية أكتر في التصوير في الاضاءة العالية.
إنما الريلمي 5 برو يتفوق في أن صوته أعلى هيستحمل وقعات أكتر لأنه بولي كربونيت و النسخة ال 128 من ريلمي أرخص 400 جنية من النسخة 128 من شاومي مع مراعاة فرق حجم الرام الأكتر في الشاومي و كمان كاميرات الريلمي في الnight أو الاضاءة الضعيفة أفضل من الشاومي وكمان التجربة بتبقي أحسن كمان في جوجل كاميرا الي شغالة بكفاءة على الريلمي 5 برو ولسه مش شغال على الشاومي و كمان الشاحن السريع جدا ال VOOC بتاع ريلمي اللي أكيد أحسن من شاحن الشاومي بسبب اخر 10%.
أخر نقطة وهي .. توزيع حرارة أفضل للموبايل في ريلمي 5 برو وانت بتلعب عليه وكمان معالج سناب دراجون 712 مجربينه وعارفينه لأنه مفرقش كتير عن 710 الي شغال بقاله سنة في موبايلات كتير بدون شكاوي إنما ال Mediatek Helio G90T اللي ف الشاومي جديد ولسه مش عارفين موضوع أنبوب التبريد وتوزيع الحرارة هيوصولنا لفين بعد فترة من الاستخدام.
Comments