مراجعة Nothing Phone 1 – موبايل مُختلف في الفئة المتوسطة العُليا !

مؤخرًا الموبايلات كلها بقت شبه بعض .. والتجربة بتاعت كل شركة بقت شبه التانيه .. وده اللي خلانا نجرب موبايل جديد تمامًا من نوعه .. تركيبه عجيبه، بينور من ظهره .. عمل قلق كبير الفترة الأخيرة .. النهارده هنقدملكم مراجعة Nothing Phone 1 الجديد .. شركة Nothing هي شركة جديدة تمامًا أسسها واحد من مؤسسي شركة وان بلس.

التصميم :-

تصميم الموبايل أكثر حاجه مبهرة فيه .. الظهر الشفاف واللي بيظهر التصميم الداخلي للموبايل مع الإضاءات الـLED المتوزعة بأشكال عشوائية جميلة في الظهر.

في 10 أشكال للإضاءات اللي في الظهر مع أصوات تقدر تختار منهم وتخصصهم، تقدر تختار صوت وشكل إضاءه مُعين لكل رقم متسجل على موبايلك .. او لكل تطبيق لما يجيلك منه إشعار.

وكمان لو خليت الموبايل على الشاشة على سطح مستوي زي المكتب مثلًا .. الموبايل هيبقى صامت تلقائيًا وهيكتفي بس بإضاءه الـLED بتاعت الظهر لما يجيلك إشعار .. وكمان في لمبة حمراء تقدر تخليها تنور وانت بتصور فيديو.

الأصوات حلوة والإضاءات جميلة .. تجربة مختلفة وجريئة .. لكن مع الوقت هتزهق ومش هتركز خالص مع الكلام ده .. علشان كده مينفعش نقطة التصميم تخليك تشتري الموبايل.

الموبايل بيجي بإطار مُسطح .. بس هو عريض شوية، الفريم 8.3 مللي .. وعلشان مفيش أي إنحناءات فا انت هتحس بالتخانه بتاعت الفريم بشكل كبير .. ووزنه عادي 193 جرام، ولا تقيل ولا خفيف.

الموبايل خاماته من الزجاج مع فريم من الألومنيوم وطبقة حماية Corning Gorilla Glass الجيل الخامس على الشاشة والظهر .. الفريم الألومنيوم خامته مش أرقى حاجه، هتحس انه رخيص شوية .. الموبايل مقاوم للماء والغبار بشهادة IP53.

لو قارنت التصميم مع Galaxy A73 اللي بينافسه .. هتلاقي ان الـA73 أطول وأرفع وأخف في الوزن وشهادة حماية ضد الماء والغبار أفضل .. لكن خامات الـNothing Phone 1 تتفوق بفرق ضخم وواضح.

الشاشة :-

شاشة 6.55 بوصة من نوع OLED بدقة FHD+ بتردد بيوصل لـ120 هيرتز مع ثُقب للسيلفي على الشمال .. وبتدعم أكثر من مليار لون وبتدعم الـHDR10+.

شاشة حلوه جدًا .. حواف الشاشة متناسقة بشكل رهيب وشكلها فعلًا ممتاز .. وألوان الشاشة مُشبعة وفيها كل التقنيات المطلوبة في الفئة المتوسطة العُليا.

في نقطة ضعف رهيبة في الموبايل واللي بتخلي الشاشة متقدرش تنافس شاشات الموبايلات الرائدة .. وهي نقطة السطوع تحت الشمس .. لاحظت ان سطوع الشاشة تحت الشمس متواضع الى حد كبير.

ألوان الشاشة Warm أكثر زي شاشات موبايلات ابل .. لكن دي بتقدر تعدلها من الإعدادات لو حابب .. عمومًا الشاشة حلوه لكن مقدمتش طفرة، ولو قارنتها بالـA73 هتلاقي ان A73 أفضل في السطوع.

الأداء :-

موبايل Nothing Phone 1 بيجي بمعالج كوالكوم سناب دراجون 778G+ بتكنولوجيا 6 نانو ميتر .. وده معالج فئة متوسطة عُليا مش معالج رائد .. نوع ذاكرة التخزين UFS 3.1 من النوع السريع.

كنت اتمنى ان الشركة تقدم معالج Flagship Killer زي سناب دراجون 870 مثلًا .. ولكن الشركة معملتش كده واستخدمت معالج مستقر أكثر ومناسب كأداء للفئة المتوسطة العُليا.

الموبايل أداءه ممتاز جدًا .. مشاكل السوفت وير معظمها مش موجودة والموبايل بعد الـUpdates بقى لطيف جدًا .. أداءه حلو وسريع ونشيط طول الوقت، مش بسرعة الموبايلات الرائدة لكن أداءه عجبنا جدًا .. مقارنًة بموبايل فئة متوسطة عُليا زي Galaxy A73 .. مفيش فرق واضح في سرعة فتح البرامج، لكن تجربة الـNothing Phone 1 أسلس واسرع.

لكن برده لازم أقولك ان الموبايل مش بيقدم حاجه جديدة في جزئية الأداء .. غير بس ان السوفت وير خفيف جدًا، سوفت وير أقرب للخام .. بيقدملك سهولة وسلاسة في الإستخدام.

تجربة ببجي بتشتغل على Ultra HDR واللعبة بتشتغل كويس جدًا مع سخونة مقبولة في جسم الموبايل .. الموبايل هيقدملك أداء كويس في الألعاب زي Galaxy A73 بدون فرق يُذكر.

عوامل الأمان وعناصر اخرى :-

البصمة موجودة أسفل الشاشة .. أداءها سريع بس لازم تضغط بكامل صباعك على مكان البصمة، مينفعش تدوس دوسة سريعة .. الـFace Unlock بعد التحديثات ظبط وبيشتغل بشكل معقول .. لكنه مش الأفضل.

الموبايل بيشتغل على Android 12 بواجهة Nothing OS 1 .. هيفضل معاك لمدة 3 سنين تحديثات اندرويد ولمدة 4 سنين تحديثات أمنية .. حاجه كويسة جدًا من الشركة.

الموبايل فيه Haptic Feedback حلو جدًا .. تجربة Flagship فعلًا من الناحية دي مش هتلاقيها في أي موبايل متوسط .. في ميكروفون اضافي لعزل الضوضاء .. وفي NFC.

صوت الموبايل هنا Stereo وبصراحة صوته عالي وضخم .. مقارنًة بـGalaxy A73 فا هو أعلى .. بس لو هتقارنه بـFlagship فا هتلاقي انه اقل حاجه بسيطة.

المستشعرات كلها حقيقية وشغالة كويسة ومستشعر التقارب شغال كويس جدًا .. وشبكات الإتصال وشبكة الـWi Fi قوية جدًا جدًا ومفيش أي مشاكل في النقطة دي.

البطارية :-

البطارية بسعة 4500 مللي امبير .. أقدر أقولك ان اداءها معقول، ولا هي قوية كفاية ولا هي ضعيفة وهتدايقك في الإستخدام .. ولازم تحط في حسابك ان الإضاءات اللي في ظهر الموبايل، وكمان الـ120 هيرتز .. كل ده بيسحب من البطارية، يعني أداءها في النهاية يعتبر ممتاز والسوفت وير موفر جدًا.

بس العيب هنا ان علبة الموبايل مفيهاش شاحن للأسف .. هو بيدعم شحن سريع 33 وات بيشحن البطارية في حوالي ساعة ونص .. شاومي وريلمي في الفئة دي يكسبوا بسرعات شحن أعلى .. والميزة ان الموبايل بيدعم الشحن اللاسلكي بقدرة 15 وات وكمان بيدعم الشحن اللاسلكي العكسي.

لو قارنت نقطة البطارية مع Galaxy A73 هتلاقي انه بيقدم بطارية أكبر شوية، لكن مش معاه شاحن وأخره في سرعة الشحن 25 وات ومش بيدعم الشحن اللاسلكي.

الكاميرات :-

الموبايل بيجي بكاميرا خلفية مُزدوجة .. الأساسية 50 ميجا بيكسل بفتحة عدسة F/1.8 بمستشعر سوني IMX776 بمثبت بصري .. والثانية 50 ميجا بيكسل بفتحة عدسة F/2.2 للتصوير الواسع .. والسيلفي 16 ميجا بيكسل بفتحة عدسة F/2.5.

الموبايل بيطلع صور شبه صوت موبايلات ابل جدًا .. الـSkin Toon ودرجته الـWarm شوية اللي بتعجب ناس كتير .. أكيد مش بنفس قوة موبايلات ابل في المعالجة، لكنه بيحاول يقلد وده واضح جدًا.

مستشعر الكاميرا دوره باين جدًا في كمية التفاصيل .. وكمان التصوير في الشمس القوية بيطلعلك صور لطيفة جدًا .. لكنها مش واقعية، موبايل Galaxy A73 بيتفوق بقوة في انه بيطلعلك الصورة الأكثر واقعية.

الكاميرات الـUltra Wide ممتازة من ناحية التفاصيل والألوان، بس الزاوية بتاعتها مش واسعة أوي.

بشكل عام الموبايل أحسن شوية في الكاميرا الخلفية من Galaxy A73 .. بس لو هتقارنه مع iPhone 12 او Galaxy S21 FE هيكون أقل منهم بفرق بسيط جدًا .. هو حاجه في النص.

بالنسبة للسيلفي فا هو ممتاز جدًا .. كمية تفاصيل محترمة، ألوان معقولة جدًا .. لون بشرة مظبوط .. الموبايل بيظبط لون الجلد كويس جدًا ومش بيكون في أي عيوب في الصورة على عكس A73.

بالنسبة لتصوير الفيديوهات فالموبايل بيدعم تصوير بجودة 2160p مع 30 فريم في الثانية .. والموبايل فيه مثبت بصري .. وفيه ميكروفون اضافي لعزل الضوضاء.

سعر Nothing Phone 1 :-

السعر في الخارج :-

• نسخة 256 جيجا مع 8 جيجا رام بسعر 420 دولار

السعر في مصر :-

• نسخة 256 جيجا مع 8 جيجا رام بسعر 12 ألف ~ 14 ألف

الموبايل منزلش مصر بشكل رسمي .. لذلك هتلاقي سعره مش مستقر في المحلات .. ومفيش ضمان محلي طبعًا .. وللأسف مينفعش تركب كارت ميموري.

الرأي النهائي :-

مميزات Nothing Phone 1 :-

• ظهر زجاجي شفاف وتصميم مُختلف
• سوفت وير خفيف جدًا أقرب للخام
• شبكات ومستشعرات ممتازة جدًا
• بيدعم الشحن اللاسلكي
• كاميرات تتفوق على موبايلات الفئة المتوسطة العُليا

عيوب Nothing Phone 1 :-

• سطوع الشاشة مش الأعلى
• عمر البطارية مش قوي أوي
• مش هتلاقي قطع غيار ولا اكسسوارات بسهولة
• مش بيقدم أقوى معالج في الألعاب
• مفيش شاحن في العلبة
• شهادة مقاوم الماء ضعيفة

الموبايل بيقدم تجربة بين الفئة المتوسطة العُليا والموبايلات الـFlagship Killer .. بيقدم تجربة أحسن شوية من A73 بس في نفس الوقت أقل من موبايلات فلاج شيب قديمة.

لو عرفت تشتري الموبايل ده من بره مصر هتجيبه بسعر في حدود 8000 جنية وده سعر ممتاز جدًا .. اما لو هتشتريه من مصر بسعر كبير فكر كويس لإنك ممكن تزود شوية وتجيب iPhone 12 مثلًا.