مراجعة Oppo A53 و Oppo A73 – ازاي حققوا نجاح كبير كده ؟

النهارده هقدملكم مراجعة Oppo A53 و مراجعة Oppo A73 .. أول مرة تقريبًا نراجع موبايلات نزلت من فترة كبيرة .. اول ما الموبايلات دي نزلت معجبتناش تمامًا ومكناش بنرشحها بسبب مواصفاتها وأرقامها .. لكن لما بننزل الشارع ونشوف الناش بتشتري ايه، لاقيت إنتشار وطلب رهيب على موبايلات اوبو دي.

خاصة موبايل Oppo A53 واللي يعتبر من أكتر 5 موبايلات بيتباعوا في مصر في أخر شهرين .. فا حبيت أسيب فرصة للموبايلات دي ونجربهم ونشوف هو المستخدم ده بيدور على أيه لما بيجيب الموبايلات دي ؟ .. وبعد تجربتنا ليهم، هل هيناسبوا مين ؟ وهل رأينا هيتغير فيهم ؟ .. ده اللي هنعرفه النهارده.

مراجعة Oppo A53 :-

التصميم :-

لما تمسك الموبايل في ايدك هتلاقي خامات بلاستيكيه بالكامل .. مقبولة بالسعر بتاعه .. تدرج الظهر جميل وشكله شيك .. ولكن أنا عندي مشكلة مع لمعان ظهر الموبايلات البلاستيك الإقتصادية علشان بتكون سهله الخربشة.

ولكن أوبو حاطه جراب سيلكون محترم جدًا في علبة الموبايل علشان يحمي الموبايل بالكامل .. شكل الكاميرا الخلفية شيك ولكن الإطار النيكل اللي حواليها مش عاجبني وهي أذواق في الأول وفي الأخر.

اللي هيعجبك وزن الموبايل، 186 جرام مقبول جدًا على الأوزان اللي بنشوفها في الفئة دي قصاد البطارية الكبيرة .. والتخانة برده مقبوله جدا 8.4 ملم.

الشاشة :-

هتلاقي شاشة 6.5 بوصة IPS LCD بدقة HD+ مع ثقب للسيلفي مع تردد بيوصل لـ90 هيرتز .. ميكس غريب وعجيب بين شاشة دقتها قليلة مع تردد عالي .. أول ما تمسك الموبايل في ايدك هتحس الحافة السفلية للشاشة كبيرة نسبيًا .. ولكن طبعا شكل الثقب بتاع السيلفي مواكب ترندات الشاشات الجديدة.

المبهر ان الشاشة الوانها نقدر نقول عليها حلوة بالنسبة لانها IPS LCD .. مظبوطة جدا .. دافية شوية وبتحاول تعمل تشبع بسيط للألوان .. مقبولة جدًا من ناحية الألوان على انها IPS LCD.

سطوعها مقبول تحت الشمس مش هيضايقك .. حوالي 450 شمعة فا مفيش مشاكل خالص متقلقش من حته السطوع والكلام ده .. وانا عارف السطوع بيهم ناس كتير وبيعملهم ازمة فعشان كدا انا مهتم بيه .. والشاشة هنا بتيجي بحماية Gorilla Glass الجيل الثالث وبتيجي في العلبة متركب عليها سكرينة.

كل ده كويس ولكن تظل الشاشة بدقة منخفضة مع وجود منافسين بيقدموا شاشات FHD+ مع تردد عادي 60 هيرتز زي Redmi 9T .. لو عايز تعرف ليه اوبو استخدمت 90 هيرتز مع HD+ بس يبقى أقرا الفقرة اللي جايه.

الأداء :-

الموبايل ده جاي بمعالج سناب دراجون 460 تكنولوجيا 11 نانو .. معالج اقتصادي شوية وكسول .. أقل حاجة بسيطة في ارقام الـBenchmarks والأداء الفعلي من معالج سناب دراجون 662 .. وأكيد بـ سعر Oppo A53 فالمعالج المستخدم فيه مش افضل معالج موجود بسعره.

فعلشان كدا اوبو لعبت لعبة .. باستخدام الشاشة بدقة قليلة HD+ مع تردد عالي 90 هيرتز مع واجهتها الخفيفة الموزونة وسرعة Animations الواجهة المظبوطة .. هتحاول تحسسك ان الاداء الفعلي للموبايل معقول جدا .. يعني متحسش إنك ماسك موبايل بالمعالج الإقتصادي ده .. ولكن كل ديه احاسيس مش اكتر.

الموبايل فعلًا في الإستخدامات اليومية العادية الخفيفة صعب يهنج معاك لإنك هتلاقيه ناعم في فتح البرامج والتنقل ما بينها .. ولكن أزمة المعالج تبان اول ما تبدأ تقرص شوية في الإستخدام هتلاقيه بيقولك واحدة واحدة عليا انا مش بتاع الكلام ده.

بالنسبة للأداء الرسومي فا ببجي بتشتغل على Medium واللعبة مش ناعمة اوي وفيها بعض التقطيعات .. كول اوف ديوتي بتشتغل كويس جدًا على اعدادات جرافيك معقولة .. والموبايل مش بيسخن اوي في الإستخدام.

ملخص جزئية الأداء .. الموبايل ده مش بيقدم افضل معالج .. ولو بتدور على افضل اداء وافضل معالج فالموبايل ده مش ليك .. الموبايل ده بتاع ناس استخدامها خفيف وبيدروا على اداء ثابت مستقر حتى وان كان مش الأسرع بس من غير اي Bugs في الـSoftware .. هتبقى راضي عن أدائه طول ما استخدامك خفيف سوشيال مكالمات ومش هيقصر معاك .. ولكن لازم تنسى بقى العاب تقيلة واستخدام عنيف والكلام ده.

عوامل الأمان وعناصر اخرى :-

الموبايل فيه بصمة في الظهر .. معرفش ليه متحطتش في زرار الباور .. المهم سرعتها متوسطة مش صاروخيه ومش بطيئه .. الـFace Unlock هو اللي بطيء شوية.

الموبايل جاي بـAndroid 10 على واجهة ColosOS 7.2 الخفيفة اللي صعب تلاقي فيها Bugs .. كل المستشعرات موجودة، الضوء والتقارب وحقيقين .. الجيروسكوب مش حقيقي واداءه بيتاخر شوية.

أهم ما يميز الموبايل إنه جاي بصوت Stereo حقيقي .. بيطلع من السماعة السفلية وسماعة المكالمات .. الصوت عالي ولكنه يجي في المركز التاني بعد Poco M3 او Redmi 9T من ناحية العلو .. وفي هزه بسيطة في الظهر بتحصل لما تعلي الصوت على الاخر .. وصوت سماعة المكالمات عالي وممتاز جدًا.

والأهم بقى شبكة الاتصال .. قوية جدا جدا في الموبايل ده .. ده اقوى موبايل من ناحية الشبكة ويمكن يكون ده السر وراء نجاح موبايلات اوبو وإنتشارها في المحلات بالشكل ده.

البطارية :-

البطارية بتاعت الموبايل بحجم 5000 مللي أمبير ادائها معقول جدًا تكمل معاك 9 ساعات شاشة مفتوحة مستريح اوي.

الشاحن المرفق 18 واط .. شحن معايا البطارية في ساعتين عن طريق منفذ USB Type C .. وبرده وقت معقول جدًا مش شايف فيه اي أزمة .. عمومًا البطارية هنا كويسة هتعجبك.

الكاميرات :-

الكاميرات هي أضعف حاجه في الموبايل ده، كاميرا خلفية ثلاثية الأساسية 13 ميجا بيكسل فتحة عدسة F/2.2 مع عدسة 2 ميجا ماكرو وعدسة 2 ميجا عزل .. والسيلفي 8 ميجا بيكسل فتحة عدسة F/2.0.

ومفيش Night Mode في سوفت وير الكاميرات .. حاولت اسطب جوجل كاميرا لكن مظبطتش معايا .. الكاميرات هنا ادائها مش الاقوى لو انت بتدور على اقوى كاميرا بالسعر ده .. يعني الـGalaxy A21s ما زال اقوى في الكاميرات من الموبايل ده .. والـRedmi Note 9 كاميراته برده اقوى.

مش بقول ان الكاميرات هنا سيئة .. لا هي مقبولة في الاضاءات العالية مش تفاصيل مش الافضل .. ولكن لما الاضاءات هتقل صعب تاخد صورة مرضية بالموبايل ده.

الكاميرا السيلفي برده معالجة الألوان ضايعة و مفيش HDR شغال .. فا هتلاقي برده الصور السيلفي تقدر تتقبلها في الشمس ولكن في الإضاءات الداخلية والضعيفة صعب تاخد صورة سيلفي مرضية بالموبايل ده.

سعر Oppo A53 :-

• مساحة تخزين 64 جيجا مع 4 جيجا رام بسعر 3050 جنية
• مساحة تخزين 128 جيجا مع 6 جيجا رام بسعر 3400 جنية

وطبعًا بينفع تركب شريحتين إتصال من الجيل الرابع مع كارت ميموري بحجم 256 جيجا في نفس الوقت.

الرأي النهائي :-

مميزات Oppo A53 :-

• شاشة سطوعها كويس بمعدل تحديث 90 هيرتز
• بطارية معقولة وشاحن مقبول
• سماعات في العلبة
• صوت Stereo
• شبكة إتصال ممتازة جدًا جدًا جدًا

عيوب Oppo A53 :-

• كاميرات متواضعه جدًا سواء أمامية او خلفية
• أداء متواضع جدًا
• خامات خارجية بلاستيك لامع بيتخربش بسهولة

السر الحقيقي اللي أنا شايفه وراء إنتشار الموبايل ده هو اسم اوبو المعروف عنه انه مفيش مشاكل عيوب صناعة هتقابلك في الموبايل وده فعلا حقيقي .. وتاني اهم حاجة الشبكة اللي كلنا بنعاني منها .. وفعلا أقدر اقول بإختصار الموبايل ده بيقدم اقوى شبكة بسعره حاليًا في مصر .. ولكن هل النقطتين دول كافيين انك تشتريه ؟ معتقدش !

مراجعة Oppo A73 :-

التصميم :-

الموبايل ده تصميمه مُميز في فئته السعريه .. فريم معدني متين مع ظهر بلاستيكي ولكن عليه نقشه أكنه معمول من الجلد .. الموبايل لما تمسكه في إيدك هتحس إنك ماسك موبايل قيم.

ومع ذلك فهو من أخف الموبايلات اللي ممكن تستخدمها، وزنه 163 جرام وتخانه 7.5 ملم وده راجع لبطاريته الصغيره بس المهم انه مثالي جدًا للناس اللي بتدور على موبايل شيك، خفيف وصغير.

الشاشة :-

شاشة A73 كويسة جدًا برده .. شاشة بحجم 6.44 بوصة من نوع AMOLED بدقة FHD+ مع نوتش Water Drop للسيلفي مع تردد 60 هيرتز .. كون أن الشاشة هنا AMOLED فا دي ميزة تعوض ان الشاشة بتردد 60 هيرتز فقط .. وده يعتبر من أرخص موبايل حاليًا من اوبو بشاشة مُميزة في ألوانها المشبعة وسطوعها العالي تحت الشمس.

ومش كل الموبايلات بتقدم شاشة اموليد في الفئة دي .. انا شايف الشاشة الـAMOLED هتبقى مناسبة اكتر لأستخدام السوشيال والفيديوهات عن شاشة IPS LCD حتى ولو كان ترددها اعلى في حته الفيديوهات والسوشيال مش الاستخدام التقيل.

ولو انت هتقارن بينه وبين شاشة الـGalaxy M31 .. فا ألوان شاشة M31 احسن شوية .. ما زالت سامسونج تتفوق في شاشاتها .. وطبعا شكل النوتش الـWater Drop قديم نسبيا ولكن تقدر تتقبله .. والشاشة عليها Gorilla Glass الجيل التالت والموبايل متركب عليه سكرينه.

الأداء :-

الموبايل جاي بمعالج سناب دراجون 662 تكنولوجيا 11 نانو .. وده معالج برده مش قوي اوي .. ومقبول تحت سعر 3000 جنية ولكن الموبايل هنا في فئة سعر 3700 جنية فاكيد انا مش متقبل المعالج ده هنا اوي.

وارجع وأقولك برده واجهة اوبو الخفيفة والـAnimations السريعة المظبوطة في الواجهة هنا والـ6 جيجا رام هيدولك تجربة مش وحشة خالص .. احسن شوية من الـA53 .. ولكن ما زالت برده التجربة في الـA73 بعيده شوية عن وحوش الاداء في الفئة السعرية ديه زي Poco X3 و Realme 6.

فا أرجع وأقولك تاني .. موبايلات اوبو المتوسطة والاقتصادية مش بتاعت Gaming .. تناسب اكتر الاستخدام الخفيف .. ومش كل الناس استخدامها Gaming ومش كل الناس استخدامها مكالمات وسوشيال .. اختار احتياجك من الموبايل قبل ما تفكر تشتري !

ببجي بتشتغل على Medium برده بس الاداء معقول شوية عن A53 وتقدر تلعب عادي .. وكول اوف ديوتي بتشتغل برده كويس جدًا .. ولكن الموبايل هنا بيسخن اكتر شوية من A53 ولكن معقول مش بيولع نار ما زالت السخونية منطقية وفي المعقول.

عوامل الأمان وعناصر اخرى :-

البصمة تحت الشاشة الـAMOLED .. بص هي مش دقيقة اوي، ممكن تغلط .. بس أدائها لو حطيت صباعك في المكان الصح هيكون سريع وأحسن من بصمات سامسونج اللي تحت الشاشة .. الـFace Unlock سرعته معقولة مش بطال خالص .

هنا في Always On Display لعرض الإشعارات اللي جاتلك على الشاشة وهي مقفولة علشان الشاشة AMOLED .. ودي حاجة مهمة على فكرة ولو جربتها هتعرف قيمتها.

الصوت هنا Mono مش Stereo زي اخوه الصغير للأسف .. والصوت هنا متوسط مش عالي ومش واطي، حاجة في النص.

شبكات الـWiFi والإتصال قوية جدًا زي اخوه الصغير A53 بالظبط .. مميز جدًا في الشبكات اقوى من موبايلات شاومي وسامسونج بفرق ملحوظ.

البطارية :-

البطارية صغيرة شوية بحجم 4000 مللي أمبير .. متوسط من 5 ~ 6 ساعات شاشة مفتوحة .. مش أحسن وقت خالص لو انت من عشاق البطارية الكبيرة.

اللي هيلحق الموضوع شوية معاك الشاحن المرفق 30 واط بيشحن البطارية في اقل من ساعة وده وقت معقول جدا .. يعني نفس قوة شواحن شاومي الموجودة في نفس الفئة السعرية.

الكاميرات :-

برده الكاميرات هي أضعف حاجه في الموبايل ده .. كاميرا خلفية رباعية الاساسية 16 ميجا بيكسل فتحة عدسة F/2.2 والتانية 8 ميجا بيكسل فتحة عدسة F/2.2 للتصوير الواسع والتالتة والرابعة 2 ميجا بيكسل ملهمش لازمة .. والسيلفي بدقة 16 ميجا بيكسل فتحة عدسة F/2.0 .. وهنا في Night Mode في السوفت وير عادي جدًا.

أداء الكاميرات هنا معقول جدًا في الاضاءات العالية .. ولكن برده ما زالت التفاصيل أقل من المنافسين .. لو قارنته بالـPoco X3 او بالـGalaxy M31 هتلاقي الـA73 دايما هيخسر للأسف .. تقدر تقول الكاميرا هنا تقضي الغرض مش اكتر.

السيلفي اللي عجبني .. سيلفي محترم بمستشعر محترم بيقدر يطلع تفاصيل كويسة جدا يقدر ينافس مع M31 و X3 بقوة .. فا كويس ان السيلفي هنا حلو.

سعر Oppo A73 :-

• نسخة واحدة بمساحة تخزين 128 جيجا مع 6 جيجا رام بسعر 3700 جنية

وبيدعم تركيب شريحتين إتصال من الجيل الرابع مع كارت ميموري بحجم 256 جيجا في نفس الوقت.

الرأي النهائي :-

مميزات Oppo A73 :-

• شاشة AMOLED كويسة بسطوع عالي تحت الشمس
• تصميم خفيف شيك وتقفيل ممتازة
• مساحة ورام معقولين
• كاميرا سيلفي كويسة
• شاحن مرفق سريع 30 واط
• في سماعات أذن في العلبة
• شبكة ممتازة هي الأفضل وسط المنافسين

عيوب Oppo A73 :-

• أداء متواضع مش الأفضل
• كاميرا خلفية متواضعه ولا يدعم تصوير 4K
• حجم البطارية صغير نسبياً

ونصيحة في الأخر .. لو عايز تجيب موبايل من اوبو في الفئة دي علشان الأسم والخامات والإنتشار، فا أنصحك تجيب Oppo Reno 3 بسعر حوالي 4200 جنية وهتاخد معالج أحسن وكاميرات أحسن بكتير وهتاخد 8 جيجا رام.