شركة اوبو بقى ليها منطق غريب في تسعير موبايلاتها .. هي شايفه إنها بتعمل موبايل مفيش فيه مشاكل .. وشايفها إنها تحط السعر اللي هي عايزاه، ما هي معندهاش مشاكل بقى .. بقالنا فترة بنجرب موبايل اوبو الجديد في الفئة المتوسطة Oppo A92 .. اللي هو التطوير بتاع الـA9 2020 .. الموبايل اللي حقق مبيعات ضخمة جدًا .. واللي خلى اوبو تتجرأ جدا في تسعير الـA92.
التصميم :-
التصميم بالكامل بخامات من البلاستيك .. وده شيء منطقي بالنسبة لأوبو .. لإننا بنشوف Oppo Reno 3 و Reno 3 Pro اللي أغلى من A92 بخامات من البلاستيك .. فأكيد الـA92 من البلاستيك .. وده مش معناه ان الخامات مقبولة بالسعر ده.
بس اللي مختلف هنا .. شكل التصميم .. إتحسن كتير وشكل رصة الكاميرات في المُستطيل مخليه شكل الموبايل الطف شوية من الـReno 3.
بالنسبة للألوان فا منصحش حد باللون الإسود .. في الأبيض والموف الوان أحسن بكتير وهتوضحلك فعلًا شكل التصميم وشكل الأشعة اللي طالعة من الكاميرات.
الموبايل وزنه 192 جرام وتخانه 8.9 ملم .. حاجة متوسطة .. ولا هو خفيف ولا هو تقيل اوي .. وبروز الكاميرات كبير شوية ومتحاوط بفريم الومنيوم لامع والجراب المُرفق في العلبة بيغطي البروز ده.
الشاشة :-
شاشة الموبايل بتيجي بحجم 6.5 بوصة من نوع IPS LCD بدقة FHD+ .. واخده التريند الجديد بتاعت ثقب الشاشة على الشمال بس للأسف حواف الشاشة كبيرة شوية خصوصًا الحافة السفلية.
الشاشة Quality حلو، سطوع حلو، الوان كويسة مظبوطة .. الأبيض بيبقى ابيض فعلًا مش مصفر خالص .. وألوان وسطوع الشاشة عمومًا أحسن وأنظف من شاشة الـRealme 6.
بس الشاشة مفيش فيها ميزة حقيقية .. ولا فيها 90 هيرتز ولا نوعها AMOLED .. فالشاشة هنا مش ميزة خالص .. زي ما بقولك هي شاشة عادية جدًا .. وكتصميم فا هو جديد مواكب 2020 مش اكتر.
الشاشة عليها طبقة حماية Corning Gorilla Glass الجيل الثالث .. والموبايل جاي في العلبة متركب عليه سكرينة.
الأداء :-
الموبايل جاي بمعالج سناب دراجون 665 بمعمارية 11 نانو .. معالج متواضع جدًا وموجود في موبايلات بنص سعر الموبايل ده حرفيًا .. فأكيد الموبايل ده مش مُوجه للـGamers او للناس اللي إستخدامها تقيل على الموبايل.
وطبعًا واضح جدًا من أرقام Antutu إن الأداء في الـA92 أقل بفرق واضح عن الـRealme 6 .. المنافس اللي يُعتبر في نفس الفئة السعرية.
إنما اللي إستخدامهم خفيف .. سوشيال، مكالمات، وتصوير مثلًا .. اللي هما فئة البنات غالبًا وعايزين موبايل مضمون .. اداءه اه مش قوي بس أداءه ثابت مستقر مع الوقت ومش هيظهر فيه Bugs او مشاكل .. وكمان بـ8 جيجا رام يعني مش هيقفل البرامج المفتوحة في الخلفية .. فأعتقد التجربة هنا ممكن تبقى مرضية ليهم.
الأداء الرسومي بقى .. لعبة ببجي بتشتغل على اعدادات جرافيك Medium والأداء معقول .. بس الجرافيك قليل على السعر ده بسبب المعالج .. ولعبة كول اوف ديوتي شغالة على اعدادات جرافيك Very High.
وانا بلعب كده كل كام دقيقة بحس بتسقيط فريم بسيط .. واللي لاحظته برده لما بلعب كول اوف ديوتي فترة على الجرافيك العالي بلاقي سخونية من ناحية الكاميرا الخلفية .. سخونية بسيطة مش شديدة يعني.
عوامل الأمان وعناصر اخرى :-
البصمة مُدمجة في زرار الباور .. بصمة سريعة وعملية .. والـFace Unlock اداءه معقول جدًا .. والموبايل جاي بأندرويد 10 مع واجهة ColorOS 7.0 اللي اهم حاجة فيها الـDark Mode.
بس للأسف الموبايل مفهوش لمبة إشعارات ولا فيه بديل ليها .. المستشعرات كلها موجودة وحقيقية في الموبايل ده .. ضوءـ تقارب، وجيروسكوب .. كله شغالة كويس جدًا.
بس للأسف اوبو بتستخدم تطبيق الإتصال بتاع جوجل .. واللي للأسف مفهوش دعم لتسجيل المكالمات.
الصوت بتاع الموبايل ده أهم ميزة فيه انه صوت Stereo .. بيخرج من السماعة السفلية وسماعة المكالمات مع بعض .. بيديلك تجربة صوتية مُحترمة وعالية .. ومش هتلاقيها في موبايلات منافسة بنفس الجودة اللي هنا.
صوت سماعات المكالمات عالي جدًا ومُمتاز .. وصوت سماعات الأذن بردة ممتاز جدًا.
وأخيرًا بالنسبة لقوة الشبكات .. الموبايل كشبكات WiFi و شبكات إتصال ممتاز .. ويمكن برده ديه من أقوى مُميزات موبايلات اوبو واللي بتخلي الناس تشتري وهي متطمنة.
البطارية :-
بطارية كبيرة بتيجي بحجم 5000 مللي أمبير هتستحمل معاك حوالي 8 ساعات شاشة مفتوحة وممكن توصل لأكتر على حسب إستخدامك .. وده معناه هتكفي اليوم مستريح جدًا.
الشاحن المُرفق 18 واط ومنفذ الشحن Type C .. والبطارية بتشحن بالكامل في ساعتين وربع .. وده وقت طويل علشان المنافسين بيقدموا شحن اسرع .. يعني عندك الـRealme 6 والـNote 9 Pro بيشحنوا في ساعة بس.
الكاميرات :-
الموبايل جاي بـ4 كاميرات في الظهر .. الأساسية بدقة 48 ميجا بيكسل بفتحة عدسة F/1.8 والتانية 8 ميجا بيكسل للتصوير الواسع بفتحة عدسة F/2.2 .. التالتة 2 ميجا بيكسل للعزل والرابعة 2 ميجا بيكسل Black & White.
والسيلفي الموجود في ثقب الشاشة بيجي بدقة 16 ميجا بيكسل مع فتحة عدسة F/2.0.
لما بشغل جوجل كاميرا على موبايل اوبو .. بحس بإنجاز .. وأنا نجحت في ده ولاقيت نسخة كويسة جدًا.
لو صورت بأي موبايل في الفئة المتوسطة لوحدة من غير ما تقارنه بموبايلات تانيه .. هتتبسط بيه جدًا .. بس علشان تعرف مين احسن من مين لازم تحط موبايل تاني مُنافس جنبه .. وتصور بالإتنين في نفس أوضاع التصوير وبكدا هتقدر تعرف مين احسن من مين.
بالنسبة لكاميرات الـA92 فا الأداء بتاعها مش بعيد عن ما توقعت .. أداء معقول متوازن والألوان الى حدٍ ما منطقية والتفاصيل مقبولة .. بس مش أحسن كاميرا اكيد وكالعادة.
تجربة جوجل كاميرا على الموبايل ده بتطلع صور في حتة تانية خالص .. أنصحك تجرب جوجل كاميرا لو هتشتريه وتجرب تصور بيه .. خصوصًا في الـNight Mode.
لما نقارن مع Realme 6 .. هنلاقي تفوق واضح في معظم أوضاع التصوير للمُستشعر الـ64 ميجا بيكسل الموجود في ريلمي 6 في البورترية والتفاصيل وحاجات كتير.
يمكن بس الوضع الوحيد اللي اوبو تفوق فيه هو الـNight Mode لإنه اصلًا مش كويس في ريلمي 6 .. سوفت وير اوبو زود الـSharpness شوية وطلع صورة فيها تفاصيل أكتر من Realme 6.
اما بالنسبة للسيلفي فا هنلاقي أداء السيلفي معقول جدًا في الشمس والظل والإضاءات العالية عمومًا .. الـHDR حلو ولون السماء مظبوط في الصور العادية .. بس لما تصور في إضاءات داخلية وضعيفة هتلاقي الألوان بهتانة والتفاصيل قليلة.
وانصحك لو هتصور بالسيلفي في إضاءه ضعيفة تصور بـGoogle Camera .. هتلاقي صور أحسن بمراحل وبفرق واضح جدًا.
ولما تجربه جنب Realme 6 هنلاقي الصور اللي في الشمس بتلسع بشكل واضح في الـA92 .. بس في الظل هتلاقي اوبو بيتعامل احسن شوية في لون البشرة .. بيخليها افضل شوية .. لكن في الإضاءه الداخية A92 اداءه بيقل كتير.
وفي الإضاءه الضعيفة الموبايلين مش قد كده .. بس اوبشن الـGoogle Camera مُتاح في A92 ومش متاح في Realme 6 وده هيوفرلك صور احسن بفرق واضح.
الموبايل بيصور 4K بجودة 2160p .. وللأسف مش بيدعم المثبت الإلكتروني على 4K .. وكمان مفيش مايكروفون اضافي لعزل الضوضاء.
شوف تجربة التصوير بالموبايل في فيديو المراجعة في اخر المقال
سعر الموبايل :-
سعر الموبايل الرسمي 5000 جنية للنسخة الوحيدة المتوفرة منه بمساحة تخزين 128 جيجا مع 8 جيجا رام.
بينفع تركب كارت ميموري بحجم 256 جيجا وشريحتين اتصال مع بعض.
الرأي النهائي :-
مميزات Oppo A92 :-
- صوت Stereo مُميز جدًا
- شبكات قوية
- عوامل امان سريعة
- بطارية إستهلاكها مقبول
- تصميم جديد مقبول
- مشاكل قليلة ولا وجود لعيوب الصناعة
عيوب Oppo A92 :-
- سرعة الشحن غير مناسبة في 2020 فيتم شحن البطارية في ساعتين وربع
- معالج ليس الأقوى وكل الموبايلات المنافسة تقدم اداء أفضل مع اداء ضعيف في الالعاب
- خامات بلاستيك غير مقبوله بهذا التسعير
- الشاشة غير مميزة فهي ليست أموليد ولا تدعم 90hz
- لا يدعم ميك اضافي لعزل الضوضاء
- لا يدعم لمبة اشعارات ولا بديل عنها
الموبايل غالي نسبيًا على مواصفاته .. خصوصًا المعالج .. بس اوبو سعرت الموبايل كدا لإن الموديل القديم منه A9 2020 اللي أقل منه في دقة وشكل الشاشة ومفهوش شحن سريع كان وصل 4500 جنية وكمان مش موجود في السوق بسبب نجاحه الكبير ومبيعاته الضخمة .
ومع التطويرات الي زادت في Oppo A92 وكمان زيادات الأسعار .. فا اوبو شايفه ان تسعير منطقي.. ولكن احنا في موبيزل شايفين الموبايل غالي ومش مميز عن المنافسين .
Comments