في سلسلة موبايلات جديدة نزلت من شركة اوبو في سلسلة الـA .. أول واحد الـOppo A53 ثم الـOppo A73 وأعلى واحد فيهم الـOppo A93 وهو اللي هنراجعه النهارده .. وهنعرف النهارده كل حاجه عنه .. نازل يعمل ايه بالظبط .. وامتى تفكر فيه وامتى تبعد عنه وايه الجديد اللي فيه .. ده لو فيه جديد اصلا !
التصميم :-
الموبايل ده خد نفس توجه اوبو الجديد .. موبايل خفيف رفيع من البلاستيك .. لو تفتكر Oppo A92 القديم كان كبير وتخين بسبب بطاريته الضخمة .. هنا اوبو في الـA93 قالت لا أنا هقلل البطارية علشان أعمل موبايل خفيف.
المهم .. الموبايل جاي بتصميم بلاستيكي .. وفي قسمه بالطول في ظهر الموبايل شكلها شيك .. مع مربع الكاميرات اللي شكله عاجبني .. هو تحسه متاخد من Nova 7i .. بس عامة التصميم ده حلو وشياكة.
مربع الكاميرات بارز شوية عن جسم الموبايل والبروز جاي على درجتين .. الحركة الصايعة اللي اوبو بقت تعملها علشان متحسسكش ان البروز كبير .. تلاقي درجة بروز صغيرة في مربع الكاميرات ودرجة بروز اعلى في عدسات الكاميرات.
عموما لما تركب الجراب الشفاف اللي جاي في العلبة هتلاقي يدوبك شفة الجراب جايه في نفس مستوى عدسات الكاميرات بالظبط .. كان نفسي شفة الجراب تبقى اعلى شوية.
الموبايل وزنه خفيف جدًا .. حوالي 164 جرام مع تخانة 7.5 ملم .. موبايل خفيف صغير مناسب جدًا للناس اللي بتدور على موبايلات خفيفة ابعادها صغيرة.
الشاشة :-
شاشة Super AMOLED بحجم 6.43 بوصة بدقة FHD+ واكيد بتردد عادي 60 هرتز مع ثقبين صغيرين أوي للسيلفي على الشمال .. وأنا مش حابب فكرة الثقب التاني اللي ملوش لازمة ده .. كان من الأفضل يبقى ثقب واحد او يحطوا عدسة تصوير سيلفي بزاوية واسعة مثلًا علشان يكون ليها إستخدام.
المهم الشاشة نفسها كويسة .. بتوصل لدرجات سطوع عالي .. ألوانها كويسة جدًا .. الحافة السفلية كبيرة شوية .. عمومًا الشاشة هنا مختلفتش كتير عن شاشة Oppo Reno 4 الـAMOLED .. حلوة زيها.
عمومًا كويس إن اوبو إستخدمت شاشة اموليد في فئة الـA بعد ما كانت بتستخدم شاشات IPS LCD .. والشاشة هنا عليها سكرينة ومفيش إعلان رسمي عن طبقة الحماية.
الأداء :-
فاكر Oppo Reno 3 Pro .. فاكر المعالج بتاعه ايوة الميدياتك Helio P95 بتكنولوجيا 12 نانو .. ده المعالج المُستخدم هنا في الـA93 .. طبعًا اوبو أكيد شايفه إنها لما تستخدم المعالج الموجود في موبايل من فئة أعلى أكيد شايفاه انجاز.
عمومًا أنا رأيي في المعالج ده واضح وصريح .. الأداء اليومي العادي بتاعه معقول مش أسرع أداء ومش أبطأ أداء .. عمومًا هو أحسن حاجة بسيطة من الـSD665 وأكيد أقل من الـSD720G .. أعتقد ديه الجملة اللي أنت محتاج تسمعها.
الـOppo A93 جاي بمساحة 128 جيجا من نوع UFS 2.1 مع 8 جيجا رام .. ده الطبيعي والعادي بتاع الفئة دي دلوقتي.
بس اللي معجبنيش الأداء الرسومي .. لعبة ببجي بتشتغل على High HD ولكن حسيت بتقطيعات أو فريمات بتسقط كل شوية .. لعبة كول اوف ديوتي على Medium ومفيش أعلى من كده .. وأكيد أدائها كويس على الإعدادات المتواضعة اللي هنا.
السخونية مقبولة في الموبايل مش بيسخن جامد لإنه أصلًا بيتطلع الأداء الـWow يعني .. وعمومًا أنا مش شايف الموبايل ده مناسب للـGamers في الفئة السعرية اللي هو نزل فيها.
عوامل الأمان وعناصر اخرى :-
البصمة في الشاشة طبعًا وأداءها حلو جدًا كعادة موبايلات اوبو .. الـFace Unlock برده سريعة ومفيهوش أي مشاكل.
الموبايل جاي بـColorOS 7.2 .. ومفيهوش حاجة جديدة ممكن اقولهالك .. Always On Display لعرض الإشعارات على الشاشة المطفية موجود .. Split Screen موجود .. Dark Mode موجود .. عمل نسختين من برامج التواصل الإجتماعي موجود .. المستشعرات كلها موجودة .. ضوء، تقارب، جيروسكوب.
وللاسف الصوت بعد ما كان Stereo في A92 بقى صوت عادي من الـSpeaker الوحيد في A93 .. هو الصوت عالي وكويس على أنه من سماعة واحدة.
صوت سماعة المكالمات كويس جدًا وعندك تسجيل مكالمات تبع برنامج إتصال جوجل وكمان فيه ميكروفون إضافي لعزل الضوضاء .. وبالنسبة لقوة الشبكات والـWiFi .. فالموبايل مُمتاز زي كل موبايلات اوبو متقلقش منه خالص.
البطارية :-
بطارية صغيرة بتيجي بحجم 4000 مللي أمبير تعمل معاك حوالي 6 ساعات شاشة مفتوحة .. يادوب يوم لو إستخدام معقول .. كان نفسي البطارية تزيد شوية ولو حتى تبقى 4500 مللي أمبير.
المهم الشاحن كمان مش سريع أوي 18 واط .. معرفش ليه مجاش بالشاحن الـ30 واط بتاع اوبو .. ده الـOppo A73 الأرخص فيه الشاحن الـ 30 واط .. عمومًا البطارية بتشحن في ساعتين إلا ربع وقت طويل شوية.
الكاميرات :-
الموبايل جاي بـ4 كاميرات في الظهر .. الأساسية 48 ميجا بيكسل فتحة عدسة F/1.7 بمستشعر سامسونج GM1 .. العدسة التانية للتصوير الواسع 8 ميجا بيكسل فتحة عدسة F/2.2 .. التالتة 2 ميجا بيكسل B&W والأخيرة 2 ميجا بيكسل عزل .. عدستين مفيش ليهم أي إستخدام.
والسيلفي المزدوج .. العدسة الرئيسية بدقة 16 ميجا بيكسل فتحة عدسة F/2.4 بمستشعر سوني IMX471 .. والعدسة التانية للعزل 2 ميجا بيكسل ملهاش لازمة.
المهم أنا كان معايا وقت تجربة الموبايل ده موبايل Realme 7 اللي جاي بكاميرات قريبة من أرقام كاميرات A93 .. لما جربت أصور بورتريه بالموبايلين حسيت ان صورة الـA93 كرتونية جدًا وتفاصيلها ممسوحة على عكس صور ريلمي 7 الأوقع والأحسن.
بشكل عام صور ريلمي 7 أوقع وفيها تفاصيل أكتر وألوانها مظبوطة أكتر .. يمكن الـA93 بيحاول يطلع صور بألوان أحسن وعينك تحب تشوفها أكتر .. والتصوير في إضاءه داخلية صور ريلمي 7 بتكون أفضل كألوان وتفاصيل .. الـA93 بيمسح الألوان والتفاصيل بشكل كبير.
لما جربت أصور بإستخدام الـNight Mode بصراحة معجبنيش ولا ريلمي 7 ولا اوبو A93 .. الإتنين أداءهم متواضع جدًا.
بالنسبة بقى للسيلفي فا هو كويس في A93 في الإضاءات العالية والصور بتطلع مشبعة اكتر بالألوان .. بس ساعات بحس أن الصور بتخسر تفاصيل لوحدها كده .. بحتاج أصورها أكتر من مرة علشان اخد تفاصيل.
في الاضاءة الداخلية وفي الـNight Mode بتاع السيلفي .. فالـ ريلمي 7 بيتفوق بشكل واضح في التفاصيل وفي كل حاجة.
بالنسبة بقى لتصوير الفيديوهات فالموبايل بيدعم تصوير فيديو 4K مع 30 فريم لكن للأسف مش بيدعم مثبت إلكتروني مع الجودة دي .. الثبات الإلكتروني موجود على جودة الـ1080p .. والموبايل فيه ميكروفون اضافي لعزل الضوضاء.
شوف تجربة الكاميرات الفعلية في فيديو المراجعة !
سعر الموبايل :-
- للنسخة الـ128 جيجا مع 8 جيجا رام بسعر 5290 جنية مصري.
والموبايل بيدعم تركيب شريحتين إتصال 4G مع كارت ميموري خارجي بحجم 256 جيجا.
وكده كده موبايلات اوبو كلها أسعارها بتتحرق جامد في المحلات والموبايل ده أتوقع يقل عن 5000 جنية خلال فترة قليلة من نزوله زي ما حصل في A92 بالظبط.
الرأي النهائي :-
مميزات Oppo A93 :-
- تصميم خفيف وشيك
- شاشة AMOLED حلوه
- بصمة أسفل الشاشة سريعة
- صوت عالي
عيوب Oppo A93 :-
- خامات خارجية بلاستيك
- السماعات مش Stereo
- معالج بأداء متواضع وسط المنافسين
- بطارية مش ضخمة
- سرعة الشحن مش مقبولة بالسعر ده
- كاميرات عادية مش منافسة
Comments