بعد ما موبايل Oppo F11 نزل الي الأسواق المصرية و كان واحد من ترشيحات موبيزل فى أفضل الهواتف فى الفئة السعرية 5000 جنية علشان مكنش فيه مشاكل , أداء مستقر كاميرات جيدة مع بصمة سريعة و لكن كان فيه شوية تحفظات زي المساحة الداخلية القليلة .
و لكن بعد ما جربنا Realme 3 Pro الترشيحات هتتغير , خلينا بقي نتكلم و نقارن بين ولاد العم اللى من نفس الشركة الأم وهما الاوبو اف 11 والريلمي 3 برو و نشوف مين فيهم أفضل في كل جزئية علشان تعرف تقرر مين أفضل بالنسبة لاستخدامك.
هاتف Oppo F11 :-
المميزات:
- يدعم الهاتف الشحن السريع VOOC Charge 3.0 مع بطارية كبيرة تدوم لأكثر من يوم من الاستخدام المتوسط.
- يقدم معالج أداء مميز و أفضل بشكل بسيط عن سابقيه من نفس السلسة.
- شاشة كبيرة 6.5 بوصة مع سطوع عالى تحت أشعة الشمس.
- تعامل الهاتف مع الشبكة جيد جدا و الشبكة قوية فى الهاتف.
- يتوفر ب6 جيجا بايت رام مما يعني تطبيقات أكثر مفتوحة فى الخلفية.
العيوب:
- يجب الاستغناء عن الشريحة الثانية لاستخدام كارت الذاكرة الخارجي.
- لا يوجد لمبة اشعارات فى الهاتف.
- لا يدعم الهاتف تصوير الفيديو بجودة 4K بالرغم من أن المعالج يدعم ذلك.
- ظهر الهاتف سريع الاتساخ ببصمات الآصابع بسبب قدومه من البلاستيك.
- لا تدعم الشاشة طبقة حماية ضد الصدمات و الخدوش و لكن تم التعويض عن ذلك بتركيب اسكرينة للحماية من الشركة.
- الهاتف لا يدعم USB Type C و لكن تم التعويض عن ذلك بالشحن السريع VOOC Charge 3.0.
هاتف Realme 3 Pro :-
المميزات:
- يمكنك استخدام شريحتين اتصال و كارت ذاكرة خارجي فى نفس الوقت.
- شحن البطارية سريع جدا VOOC 3.0 و تصمد لمدة أكثر من يوم فى الاستخدام المتوسط.
- افضل معالج في الفئة تحت المتوسطة سناب دراجون 710 .
- دعم لتشغيل لعبة فورت نايت باعدادات جرافيك متوسطة .
- وجود حماية على الشاشة من نوع جوريلا الجيل الخامس .
- تدعم كاميرا الهاتف الخلفية التصوير بجودة 4K و ايضا Slow Motion حتى 960 اطار فى الثانية.
العيوب:
- لا يوجد لمبة اشعارات بالهاتف.
- الهاتف سهل الخدش و التجريحات و الاتساخ ببصمات الآصابع بسبب أنه مصنوع من البلاستيك.
- صندوق الهاتف لا يحتوي على سماعات الرأس Headphones.
- الهاتف لا يدعم USB Type C و لكن تم التعويض عن ذلك بالشحن السريع VOOC Charge 3.0.
التصميم :-
هاتف Oppo F11 يأتى بأبعاد 162x 76.1×8.3 ملم مع وزن 188 جرام بألوان البنفسجي المتدرج و الأخضر بتصميم جديد ومبتكر من البولى كاربونيت مع اطار ذهبي حول الكاميرا الخلفية و مستشعر البصمة و كمان ألوان الهاتف بتتغير حسب الاضاءة بوميض جميل.
هاتف Realme 3 Pro يأتى بأبعاد الهاتف 156.8x 74.2×8.3 ملم مع وزن 172 جرام بألون البنفسجي المتدرج و الأزرق المتدرج بتصميم يشبه كثيرا الخاص بهاتف Realme 3 مصنوع من البولى كاربونيت البلاستيك المقوي و هو أقوي من الهواتف السابقة و ألوان الهاتف بتلمع فى الشمس مع ظهر حرف S و اللى بيرمز لسرعة الأداء و الحفاظ على الحلقة الصفراء اللون الموجودة حول الكاميرا الخلفية.
لما تخبط على ظهر الاتنين هتحس ان ال F11 متماسك أكثر أما بالنسبة الحجم الريلمى 3 برو أقل فى الحجم و سهل المسكة أكثر فى الايد أما بالنسبة لبروز الكاميرات الريلمى أقل فى البروز و كده كده الجراب الموجود في علبة الهاتفين بيعالج موضوع البروز.
الشاشة :-
شاشة هاتف Oppo F11 تأتي من نوع LTPS IPS LCD بقياس 6.53 بوصة بدقة Full HD+ بجودة 1080*2340 بيكسل مع كثافة بيكسلات 394 بيكسل لكل بوصة.
شاشة هاتف Realme 3 Pro تأتي من نوع IPS LCD بقياس 6.3 بوصة بدقة Full HD+ بجودة 1080*2340 بيكسل مع كثافة بيكسلات 409 بيكسل لكل بوصة مع حماية جوريلا الجيل الخامس على الشاشة .
لما استخدمنا الاتنين مع بعض لقينا ان السطوع أعلى بفرق بسيط فى ال F11 و لكن تشبع الألوان ألإضل بفرق بسيط فى الريلمى 3 برو.
أما بالنسبة للسطوع تحت أشعة الشمس كويس فى الاتنين و الحواف حول الشاشة قريبة أوى من بعض فى الاتنين لكن الحافة السفلية فى F11 أقل شوية و الاتنين فيهم نوتش على شكل قطرة ماء Drop water و لا يمكنك الغائه من الاعدادات في كل البرامج لكن ممكن تلغيه من برامج و تطبيقات محددة.
بالنسبة للحماية اوبو مصرحتش عن طبقة حماية على الشاشة لكن ريلمى قالت ان فيه حماية من جوريلا الجيل الخامس على شاشة الـ 3 برو و عموما الاتنين بيجوا متركب عليها اسكرينة للحماية من الشركة ممكن تستخدمها لحد ما تجيب اسركينة زجاج و لكن خلي بالك السُمك بتاعها يكون مش كبير علشان مستشعر التقارب فى المكالمات ميعلقش.
الأداء :-
هاتف Oppo F11 بمعالج Mediatek Helio P70 ثماني النواة يعمل بقوة تردد 4*2.1 جيجا هرتز cortex A73 و 4*2.0 جيجا هرتز cortex A53 بتكنولوجيا 12 نانو .
معالج الهاتف Qualcomm Snapdragon 710 ثماني النواة يعمل بقوة تردد 2*2.22 جيجا هرتز Kyro 360 gold و 6*1.7 Kyro 360 silver بمعمارية 10 نانو والمعالج هنا شغال بكامل قوته وتردده بس ريلمي عملت وضع High performance اللى بيخلي المعالج يشتغل بكامل كفائته بس على حساب البطارية بس خد بالك ان البطارية اصلا كبيرة 4045 مللي أمبير .
المفروض على الورق ان سناب 710 أفضل من P70 بحوالى 15% .. يعني من الأخر مين أفضل؟
لو جربت تفتح لعبة على الاتنين و يكون الريلمى فى الوضع العادى هتلاقى ان الأوبو أسرع لأنه مش متحجم بالسوفت وير لكن لو خليت الريلمى على وضع High performance هتلاقيه أسرع في فتح نفس اللعبة بس هيستهلك أكثر من البطارية.
من الآخر ريلمى استخدمت معالج قريب فى أدائه من P70 و تقريبا نفس السلاسة و نفس السرعة و عملت Option أنك لو عايز تشغل المعالج الاسناب 710 على أعلى أداء له وضافت بطارية كبيرة تستحمل قوة المعالج , على عكس ريلمى 2 برو اللى كانت بطاريته صغيرة علشان كده الشركة كانت مقللة تردد المعالج سناب دراجون 660.
فى اختبار Antutu سجل هاتف F11 عدد 148331 نقطة بينما سجل هاتف Realme 3 Pro عدد 159474 نقطة دا لو فى وضع البطارية العادى لكن لو فى وضع ال High performance بيسجل 172658 نقطة و دا الرقم الطبيعي اللى بيحققه السناب 710.
بالنسبة للمعالج الرسومي بهاتف F11 هو Mali-G72 MP3 و هاتف Realme 3 Pro بمعالج رسومى Adreno 616 اللى بيدعم تشغيل فورت نايت على اعدادات جرافيك متوسطة بدون تهنيج على عكس الأوبو اللى مش بيدعمها بشكل رسمي .
أما بالنسبة للعبة PUBG الاتنين بيشغلوها على High HD بأداء عالى و جيد بدون تهنيج أو سقوط فى ال Frames ممكن يحصل حاجة بسيطة جدا فى الأوبو بس مش هتحس بيها اصلا.
الصوت :-
صوت السماعة الخارجية عالى فى الاتنين بس حسينا ان ال F11 الصوت مجسم فيه أكثر أما عن صوت سماعات الأُذن الوضع معكوس الريلمى 3 برو الصوت مجسم فيه أكثر أما عن سماعة المكالمات فهو عالى و واضح فى الاتنين.
الاتنين بيدعموا ميكروفون اضافي لإزالة الضوضاء مما يُحسن من جودة الصوت في التسجيل و الفيديو.
الكاميرا الخلفية :-
نتكلم عن المواصفات و الأرقام و الميجا بيكسل و العدسة و كله و بعدين نقول الأداء الفعلى بينهم.
هاتف أوبو اف 11 الخلفية تأتي مزدوجة بجودة 48 ميجا بيكسل مع فتحة عدسة f/1.8 و الثانية بجودة 5 ميجا بيكسل مع فتحة عدسة f/2.4 من اجل العزل مع دعم الضبط التلقائي المزدوج PDAF و فلاش احادى LED و تصوير فيديو بجودة 1080 بيكسل مع 30 لقطة فى الثانية و ايضا التصوير بجودة 720 بيكسل مع 30 اطار فى الثانية كما يدعم مثبت اليكترونى gyro EIS مع دعم التصوير بوضع بانوراما و HDR و للأسف الهاتف لا يدعم التصوير بجودة 4K.
كاميرا هاتف Realme 3 Pro الخلفية تأتي مزدوجة بجودة 16 ميجا بيكسل مع فتحة عدسة f/1.7 مع مستشعر من سونى IMX 519 و هو نفس المستشعر الموجود بفلاج شيب One Plus 6 و الثانية بجودة 5 ميجا بيكسل من اجل العزل مع دعم الضبط التلقائي المزدوج PDAF و فلاش احادى LED و تصوير فيديو بجودة 1080 بيكسل مع 30 لقطة فى الثانية و ايضا التصوير بجودة 720 بيكسل مع 30 اطار فى الثانية كما يقوم بالتصوير Slow motion لحد 920 اطار فى الثانية و بيقدر يصور 4K 2160 مع 30 لقطة فى الثانية مع دعم التصوير بوضع بانوراما و HDR و تدعم مثبت اليكتروني يعمل فى جودة 1080 ولا يعمل مع جودة 4K .
مبدأيا خلينا نوضح نقطة بخصوص F11 اللى بيتم تسويقه على أساس انه بكاميرا خلفية بجودة 48 ميجا بيكسل و كلن فى الحقيقة هو 12 ميجا بيكسل مع Option فى الاعدادات انك تصور 48 ميجا بيكسل و دا بيتم فى السوفت وير لما يدمج أكثر من صورة مع بعض أما ال Realme 3 Pro بيتسوق على أنه 16 ميجا بيكسل و هو فعلا 16 ميجا بيكسل و ممكن من الاعدادات تدمج الصور و تبقي بجودة 64 ميجا بيكسل و كده كده جودة الكاميرا مش بعدد الميجا بيكسل.
فى الصور تحت أشعة الشمس الريلمى لعب شوية فى الألوان و خلى الصورة أحلى و مشبعة أكثر بالألوان اما الأوبو الألوان فيه أكثر واقعية و حلوة لوحدها لكن بجانب الريلمى اتظلمت شوية اما عن تفاصيل الوش أفضل فى الأوبو و فى البورتريه الاتنين زي بعض و القص ممتاز.
فى اضاءة الغرفة نفس الشئ ألوان أحلى و مشبعة أكثر فى الريلمى و لكن ألوان واقعية فى الأوبو.
أما باستخدام ال Chroma Boost فى الريلمى أو Dazzle Color فى الأوبو تفوق واضح للريلمى بألوان أكثر حيوية و مشبعة و لكن واقعية فى الأوبو.
فى التصوير الليلى الأوبو أفضلفى التفاصيل لكن باستخدام ال Night Mode الريلمى بيعدل فى الألوان و بيطلع صور مش محتاجة أى Filters و هو أسرع فى الريلمى عن الأوبو.
الكاميرا السيلفي :-
موبايل Oppo F11 بجودة 16 ميجا بيكسل و ريلمى 3 برو بجودة 25 ميجا بيكسل مع فتحة عدسة F/2.0 و تصوير فيديو بجودة 1080 بيكسل مع 30 لقطة فى الثانية.
بالنسبة للأداء الفعلي ال HDR أفضل فى الريلمى 3 برومع تفاصيل أكثر فى الخلفية لكن تفاصيل الوجه أفضل فى الأوبو, أما فى البورتريه فى الشمس القوية الريلمى أفضل و فى الاضاءة الضعيفة يتفوق الريلمى 3 برو.
البطارية :-
بطارية هاتف Oppo F11 بسعة 4020 مللي أمبير ثم 4045 مللي أمبير لهاتف Realme 3 Pro و الاتنين فيهم شحن سريع بشاحن VOOC 3.0 و الاتنين نفس الأداء بيكملوا يومين أو يوم و نص من الاستخدام المتوسط .
الاتنين مفيش فيهم مدخل USB Type C و تم استخدام المدخل القديم Micro USB 2.0 و الاتنين بيشحنوا فى نفس الوقت تقريبا حوالى ساعة و ربع بالشاحن السريع الفوك 3 الي موجود في علبة الموبايلين.
حماية أمان و خصوصية المستخدم :-
مستشعر بصمة الاصبع سريع جدا جدا و الاتنين زي بعض و خاصية قفل الوجه Face unlock حسينا ال F11 أسرع بفرق بسيط جدا يكاد يكون غير ملحوظ و الاتنين مش بيفتحوا و العين مغمضة.
الذاكرة الداخلية و العشوائية :-
هاتف Oppo F11 متوفر بنسخة واحدة فى مصر حيث ذاكرة داخلية 64 جيجا بايت مع 6 جيجا بايت رام ذاكرة عشوائية و يمكنك زيادة المساحة الداخلية للهاتف عن طريق إضافة كارت ذاكرة خارجي يصل الى 256 جيجا بايت و لكن مع الاستغناء عن الشريحة الثانية لاستخدامه , وفي اخبار عن توافر نسخة اخرى 128 جيجا مع اوبو اف 11 العادي قريبا في مصر .
يتوافر ريلمى 3 برو بنسختين حيث الأول بذاكرة داخلية 128 جيجا بايت مع 6 جيجا بايت رام و الثاني 64 جيجا بايت مع 4 جيجا بايت رام ذاكرة عشوائية و يمكنك زيادة المساحة الداخلية للهاتف عن طريق إضافة كارت ذاكرة خارجي يصل الى 256 جيجا بايت فى منفذ منفصل عن شريحتين الاتصال.
خواص أخري :-
الهاتفين فيهم كل المستشعرات البوصلة و التقارب و الضوء مع دعم الجيروسكوب حيث استخدام نظارات VR للواقع الافتراضي.
مع دعم خاصية OTG و تشغيل الراديو FM مع GPS سريع ودقيق.
الاتنين بنفس السوفت وير Color OS 6 و أندرويد 9 Pie و الاتنين فيهم خاصية App Twin لعمل نستخين من برامج التواصل الاجتماعى فقط و فيه Private Space تحط فيه الصور و الملفات الخاصة .
بالنسبة لـ لمبة الاشعارات الاتنين مفيش فيهم لمبة اشعارات و ايقونات الاشعارات بتظهر جنب النوتش عادى.
بالنسبة لقوة الشبكة الاتنين كويسين جدا فى التعامل مع الشبكة لكن نقدر نقول ان الشبكة أفضل بفرق بسيط في الأوبو F11 عن الريلمي وده بعد تجربة لأكثر من يوم في اماكن الشبكة فيها ضعيفة جدا .
رأى موبيزل النهائي :-
موبايل Realme 3 Pro بيقدم تركيبة مواصفات أفضل أولهم المعالج سناب دراجون 710 مع كاميرا خلفية اللى بتصور بجودة 4K و اللى بتطلع صور من وجهة نظر موبيزل أحسن بفرق بسيط من F11 و كمان ينفع تركب شريحتين اتصال و كارت ذاكرة خارجي فى نفس الوقت و فيه نسخة 64 جيجا و بسعر أقل من الأوبو و كل دا يخلينا نرشح الريلمى 3 برو في اوائل الهواتف الأفضل في الفئة المتوسطة .
نقول ان فيه نقطتين مقدرش يتفوق فيهم الريلمى على الأوبو و هى الخامات الخارجية و قوة الشبكة اللى أفضل بفرق بسيط فى ال F11.
واحنا في موبيزل هنفضل نجرب الريلمي 3 برو والاوبو اف 11 لفترة طويلة ولو ظهر اي عيوب فيهم هنبلغكم فورا .
محتويات صندوق الهاتف :-
هاتف Oppo F11 و تم تركيب اسكرينة للحماية عليه مسبقا من الشركة مع الشاحن بتقنية VOOC, كابل الشحن, جراب شفاف لحماية الهاتف, سماعات الأُذن Earphones.
هاتف Realme 3 Pro و تم تركيب اسكرينة للحماية عليه مسبقا من الشركة مع الشاحن مع VOOC 3.0 و كابل الشحن جراب سيلكون شفاف لحماية الهاتف.
ملحوظة : صندوق موبايل ريلمي لا يحتوي على سماعات الأُذن Earphones.
اسعار الموبايلات :-
هاتف Oppo F11:
فى السوق المصري 4900 جنيه مصري للنسخة الوحيدة المتوفرة فى مصر 64 جيجا بايت مع 6 جيجا بايت رام.
هاتف Realme 3 Pro:
لم يتم تحديد سعر الهاتف حتى الآن و هيعلنوا عن الأسعار الرسمية يوم 24/6 و من المتوقع انها تكون 4000 جنيه مصري للنسخة 64 جيجا بايت مع 4 جيجا رام و 5000 جنيه مصري للنسخة 128 جيجا بايت مع 6 جيجا رام.
Comments