بعد نزول Oppo F9 في الاسواق المصرية – مين الأفضل الاوبو F9 ولا النوفا 3i ؟ وليه ؟

في يوم 24-9 ابتدى موبايل Oppo F9 في الوصول للمحلات وكل منافذ البيع وطبعا هيبقا موجود في كل مصر كعادة اوبو قوية جدا في الانتشار , بالنسبة لسعر موبايل اوبو F9 فهيبقا في حدود 5500 جنية من غير هدايا و 5800 بالهدايا للنسخة 64 جيجا مع 4 جيجا رام , تجيبه بالهدايا ولا من غير ديه حرية شخصية ليك ولسه مفيش اخبار عن سعر النسخة البرو الي هتيجي ب 6 جيجا رام وبردة مساحة 64 جيجا .

وهواوي ردت على تسعير الاوبو F9 ورخصت سعر موبايل Nova 3i الي 5600 جنية كسعر رسمي وممكن تلاقيه في المحلات بسعر أقل من كدا .

بعد نزول الموبايلين بشكل رسمي عاوزين نوضح ليكم نقاط تفوق كل موبايل عن التاني علشان تعرف تشتري مين فيهم ؟ احنا في موقع موبيزل يهمنا انك تشتري الموبايل الأفضل ليك بسعر مناسب بكل حيادية وبدون اي تحيز لاي ماركة .

نقاط تفوق موبايل Oppo F9 على النوفا 3i :-
  • شحن سريع تقريبا ساعة ونص بس قصاد ساعتين وربع للنوفا , فرق كبير فعلا بس كدا كدا بطاريه الموبايلين هتكمل معاك اليوم مع استخدام معقول يعني قصة الشحن السريع مش هتفرق غير مع الشخص الي حرفيا مش بيسيب الموبايل من ايديه !
  • حواف الشاشة اقل وشكل النوتش الجديد الصغير حلو حقيقي وكمان حماية الشاشة الجوريلا 3 هتحافظ اكتر على الشاشة من الخرابيش والخدوش , بس في النوفا مش واضح نوع الحماية على الشاشة .
  • بطارية أكبر شوية في الاوبو 3500 مللي أمبير قصاد 3340 مللي أمبير في النوفا وبرغم كدا مفيش فرق فعلي في عمر البطاريتين قصاد الموبايل علشان معالج كيرين 710 الجديد في النوفا موفر جدا في الطاقة ومعوض الفرق ده !
  • الاوبو هتقدر تركب شريحتين مع كارت ميموري في نفس الوقت , الموضوع ده بردة مش بيفرق مع ناس كتير بس لازم بردة تبقا عارف كل حاجه وخصوصا ان النوفا 128 جيجا زي ما هنقول ومش هتحتاج كارت اصلا .
  • سلاسة السوفت وير في الاوبو احسن واسرع بفرق بسيط من واجهة هواوي برغم من كدا الاداء في تشغيل التطبيقات والالعاب واحد تقريبا .
  • تفوق ملحوظ لكاميرا الاوبو في التصوير الليلي خصوصا الكاميرا الخلفية نتيجة ان فتحة العدسة أوسع وبالتالي تفاصيل أكتر و تشويش في الصورة أقل .
  • المعالج الرسومي الموجود في أوبو أفضل من الموجود في نوفا بفارق بسيط .
  • السماعة الخارجية للاوبو اعلى في الصوت من النوفا بفرق بسيط .

نقاط تفوق موبايل Nova 3i على موبايل Oppo F9 :-
  • في النوفا المساحة الداخلية 128 جيجا بدل 64 في الاوبو .
  • خامات احسن برغم انه زجاج بس متين جدا ومع جراب هيبقا محمي بشكل كبير بعكس الاوبو الي ظهره بلاستيك بيتجرح حتى لو في جراب علشان التراب الي بيتحشر بين الجراب وظهر الموبايل !
  • لمبة الاشعارات موجودة في النوفا بس مش موجودة في الاوبو , الموضوع ده بيفرق بشكل كبير للي واخد ع لمبة اشعارات في موبايله القديم حرفيا مش بيمسك الموبايل الا لما اللمبة تنور , وبردة لازم تبقا عارف ان لمبة الاشعارات في النوفا اضائتها ضعيفة شويتين وممكن متشوفش اللمبة بتنور في مواقف كتير .
  • في الاضاءة النهارية الصور الي بتطلع من الكاميرا الخلفية للنوفا بتميل للون الأزرق ( باردة ) وبتقدر تتحكم في الذكاء الاصطناعي و الخارجة من الاوبو بتميل للون الأحمر ( دافئة )  وهنا يختلف الزوق العام بس احنا شايفين ان الصور الي مايله للون الأزرق أحسن شوية زي ما هنشوف في الصور الجاية .

وبكدا يبقا عرفت نقاط تفوق كل موبايل عن التاني ولازم تعرف ان مفيش موبايل فئة متوسطة خالي من العيوب , كل موبايل لازم يبقا ليه عيوب ونقط تفوق ولازم تبقا متقبل وعارف المميزات والعيوب قبل ما تشتري !

و في نفس الفئة السعرية في موبايلات أفضل زي شاومي بوكو F1 و موبايل هونر Play ولو هنرتب الموبايلات فهيبقا المركز الأول لموبايل شاومي بوكو F1 ثم Honor Play ثم Oppo F9 ثم Nova 3i .

قد يعجبك أيضا...

Comments

جاري التحميل...