مراجعة Oppo Find X2 Pro – مستحيل تصدق أن أوبو صنعت الوحش ده !

مين مننا مجربش موبايل اوبو في الفئة المتوسطة ؟ أكيد معظمنا .. طيب إيه رأيك تجرب اوبو في الفلاج شيب .. او الموبايلات الغالية .. النهاردة معادنا مع موبايل جديد من اوبو وهو اغلى موبايل عندها في مصر دلوقتي وهو Oppo Find X2 Pro .. الموبايل ده جاي بمميزات قوية.

ولكن هل المميزات القوية ديه تقدر تخلي الموبايل ده واحد من أفضل الموبايلات الفلاج شيب اللي ممكن تشتريها ؟ هل المميزات ديه تخليه فعلًا يستاهل سعره ؟


التصميم :-

الموبايل فخم جدًا كتصميم وخامات خارجية .. الـBuild Quality محترمة جدًا وفعلًا اوبو هنا صارفه ومكلفه لإنها عارفه هي بتنافس مين .. بتنافس سامسونج وابل .. فمينفعش يكون في أي تنازل في التصميم.

بس أنا مش قادر أحب شكل الكاميرا الخلفية هنا .. مش عارف ليه .. يمكن عشان أنا بقيت ميال أكتر لشكل نافذة الكاميرات المستطيل أكتر من الرصة ديه .. يمكن فعلًا.

الموبايل وزنه تقيل نسبيا 217 جرام للنسخة السيراميك اللي معايا .. والموبايل طويل شوية ولكن العرض بتاعه مقبول وأقل بفرق واضح من الـNote 20 Ultra الي كنت بجربه .. علشان كدا Find X2 Pro ملموم شوية في الإيد.

الموبايل واخد شهادة IP68 بمعنى إن الموبايل مقاوم للماء زيه زي الموبايلات الفلاج شيب التانية .. مفيش أي تنازل.

الموبايل فيه منه لونين .. لون أسود سيراميك و لون جلد برتقالي.


الشاشة :-

قبل ما اجربه .. قلت أكيد اوبو مش هتعرف تعمل شاشة مُنافسة .. ولكن الحقيقة أنا إنبهرت بالشاشة اللي هنا .. الموبايل بيجي بشاشة 6.7 بوصة من نوع AMOLED بدقة QHD+ مع ثقب صغير للسيلفي على الشمال .. مع yنحناءات كبيرة شوية في الشاشة يمين وشمال .. مع تردد بيوصل لـ120 هيرتز.

المُميز في الشاشة هنا هي إنك تقدر تشغل الـ120 هيرتز مع الدقة العالية الـQHD+ .. والتجربة بتبقى سلسة جدًا جدًا .. ولكن البطارية بتتشفط حرفيًا .. فخليك على الـFHD+ مع الـ120 هيرتز.

شاشة الموبايل داعمة لنظام جديد اسمه O1 Ultra Vision .. واللي بيقدر يرفع فريمات الفيديو اللي بتتفرج عليه لحد 120 فريم في الثانية زي تردد الشاشة ويعدل في الألوان ودرجات السطوع علشان تاخد تجربة فرجة على الفيديوهات محترمة جدًا جدا .. وكمان الشاشة داعمة للـHDR10+.

زوايا الشاشة دائرية شوية .. والحافة السفلية والعلوية للشاشة هنا مش كبيرة ومش صغيرة .. مُقارنتا مع الـNote 20 Ultra .. فالحواف في النوت أقل.

يمين نوت 20 الترا و يسار Find X2 Pro

الـEdge اللي في شاشة الـX2 Pro .. كبير نسبيًا .. ومع ذلك مضايقنيش في الإستخدام بس هو مازال بيضايق البعض .. وفي إختصار من الجمب جوا الـEdge علشان يفتحلك قائمة البرامج اللي عايز تفتحها بسرعة .. وكمان الـEdge بينور مع الإشعارات.

الشاشة عليها حماية Corning Gorilla Glass الجيل السادس .. والموبايل بيجي في العلبة متركب عليه سكرينه.


الأداء :-

الموبايل جاي بمعالج سناب دراجون 865 .. واحد من أقوى المعالجات الموجودة حاليًا بتكنولوجيا تصنيع 7 نانو .. المعالج محقق رقم ضحك جدًا على Antutu .. تقريبًا ده من أكبر الأرقام اللي شوفتها في الموبايلات اللي جربتها لحد دلوقتي.

والرقم منعكس على الأداء بشكل كبير .. الأداء مُبهر .. ناعم، وسريع .. مفيش أي تقطيعات ممكن تقابلك .. وكمان الموبايل جاي بـ12 جيجا رام.

يعني إفتح برامج زي ما انت عايز ومتخفش مش هتقفل في الخلفية .. وتأكد إنك بتاخد من الموبايل ده أداء مستقر وقوي جدًا.

لعبة ببجي بتشتغل على اعدادات HDR وExtreme .. وكول اوف ديوتي بتشتغل على Very High وفريمات Max .. يعني بتشغل الألعاب على أعلى اعدادات جرافيك وبتاخد تجربة العاب محترمة جدًا جدًا.

والموبايل مش بيسخن أوي مقارنتا مع الـGalaxy Note 20 Ultra اللي كنت بجربه مع الـOppo Find X2 Pro.


عوامل الأمان وعناصر اخرى :-

اوبو شاطرة في عوامل الأمان .. بصمة تحت الشاشة سريعة جدا .. وFace Unlock طيارة حرفيًا .. مفيش أي مشاكل فيهم .. والموبايل جاي بـAndroid 10 وواجهة اوبو اللي بقى فيها Dark Mode وتجربته أكيد محترمة جدًا مع الشاشة اللي هنا.

مفيش لمبة إشعارات بس فيه Always On Display اللي شفناه في Reno 2 والـReno 3 .. والموبايل داعم لخاصية الـNFC أكيد لإنه فلاج شيب .. ومفيش مشكلة في المستشعرات بتاعته.

صوت الموبايل ستريو .. وإتفاجئت إن طبقات الصوت عالية جدًا .. يمكن أعلى من النوت 20 الترا .. ولكن التجسيم او الـBase أقل شوية من النوت 20 الترا.

وأكيد مفيش مدخل 3.5 ملم خلاص ديه من المحرمات في الموبايلات الفلاج شيب .. قوة الشبكات ممتازة في الـFind X2 Pro متقلقش خالص من موضوع الشبكة هنا.


البطارية :-

بطارية عادية 4260 مللي أمبير .. لولا إن المعالج الاسناب دراجون موفر في البطارية .. كان هيبقى موقف البطارية هنا ضعيف .. بس المعالج لحق الدنيا وعاوز اقولك إن الإستهلاك هنا أحسن من Note 20 Ultra اللي بطاريته اكبر .. وهتكمل معاك يوم مستريح من الإستخدام.

الفكرة مش في كده بس .. الفكرة في الشاحن المرفق الـ65 واط اللي بيشحن البطارية في نص ساعة .. نص ساعة بس .. رقم محترم جدا جدًا !

بس الحلو ميكملش للأسف .. لإن الموبايل غير داعم للشحن اللاسيلكي .. وأنا مش عارف ليه .. وده مش منطقي ومش مقبول بالسعر ده.


الكاميرات :-

الموبايل جاي بـ3 كاميرات في الظهر .. الأساسية 48 ميجا بيكسل فتحة عدسة F/1.7 بمستشعر سوني IMX689 .. مع مثبت بصري .. والعدسة التانية Periscope بدقة 13 ميجا بيكسل فتحة عدسة F/3.0 للزوم الـOptical علشان يوصل لـ5X وبيوصل لحد 60X بس Digital والعدسة داعمة للمثبت البصري .. والاخيرة 48 ميجا بيكسل فتحة عدسة F/2.2 للتصوير الواسع بمستشعر سوني IMX568 .. بالاضافة الى Laser Auto-focus.

والسيلفي الموجود في ثقب الشاشة بيجي بدقة 32 ميجا بيكسل مع فتحة عدسة F/2.4.

بص .. الكاميرات مش بالميجا بيكسل .. السينسور اللي اوبو ضيفاه في الموبايل ده محترم جدًا .. بيطلع صور فعلًا متقلش أي حاجة عن الموبايلات المنافسة.

الـDinamic Range محترم .. تفاصيل محترمة .. صور كويسة جدًا فعلًا .. ولما نيجي نجرب العدسة الزوم الـ5X هنلاقي صورة Sharp تفاصيلها كتير والجودة بتاعتها تقريبا زي الـP40 Pro .. والزوم بيوصل لـ60X وطبعًا بيفقد تفاصيل كتير ولكن تقدر تشوف أي حاجة من بعيد من خلال الزوم اللي هنا.

التصوير في إضاءة داخلية مازال محترم مفيش فيه أي مشاكل والألوان معقولة وموزونة ومش مفرقعة اوي .. وكمية التفاصيل كويسة جدًا.

الـNight Mode في الموبايل ده عجبني اوي .. هو اه بيعمل Overexposure حاجة بسيطة .. بيخلي الصور منورة زيادة عن اللزوم .. ولكن وإيه المشكلة .. في مقابل إنك تاخد تفاصيل أكتر وصورة شكلها احسن.

ولما جربت الزوم بالليل .. بيبقى كويس لحد 20X بس .. منصحكش تزود عن كده .. والـNight Mode هنا في الزوم بيوصل لحد 60X عادي بس التفاصيل بتقل جدًا.

السيلفي هنا عجبني زيه زي الكاميرا الخلفية .. الأداء معقول ومتوازن وبتاخد صور بتفاصيل كتير .. هو اه بيفتح لون البشرة حاجة بسيطة تحس إنك عامل فلتر بسيط كده .. بس ديه عادة اوبو يعني.

بس اللي معجبنيش التصوير في إضاءة داخلية .. تقريبا كان لازم أستخدم الـNight Mode علشان يسيطر على الإضاءة افضل من كده.

ولما قارنت سيلفي موبايل Oppo Find X2 Pro مع سيلفي الـGalaxy Note 20 Ultra لاقيت ان سيلفي الاوبو اتفوق بفرق واضح جدًا في معظم الصور ومُختلف أوضاع التصوير.

بالنسبة بقى لتصوير الفيديوهات بالكاميرا الخلفية فالموبايل ده اخره يصور 4K مع 60 فريم في الثانية .. ومفيش 8K مع انه موجود في موبايلات تانية كتير مُنافسة .. بس كده كده محدش بيستخدم الـ8K .. وممكن تنقل من العدسة الرئيسية للـWide Angle وانت بتصور من غير ما تقفل الفيديو .. وتقدر تزوم لحد 30X وانت بتصور الفيديو برده.

وبالنسبة لتصوير الفيديوهات بالكاميرا السيلفي فالموبايل بيصور لحد 1080p ومفيش 4K .. بس في هنا تقدر تعمل Portrait او تعزل الخلفية عن اللي بيتصور فيديو بالكاميرا السيلفي.

ممكن تشوف الصور و الفيديوهات المتصورة بالموبايل في فيديو المراجعة في أخر المقالة .


سعر الموبايل :-

سعر الموبايل الرسمي للنسخة الـ512 جيجا مع 12 جيجا رام هو 19990 جنية مصري.

وبينفع تركب شريحتين إتصال من الجيل الخامس ومينفعش تركب كارت ميموري وانت مش هتحتاج كارت ميموري مع المساحة الضخمة الـ 512 جيجا.

علبة الموبايل بيجي فيها الموبايل وعليه سكرينة على الشاشة و الشاحن الـ 65 واط و كابل الشحن السريع و سماعات أذن Type C و جراب شفاف لحماية الظهر .


الرأي النهائي :-

مميزات Oppo Find X2 Pro :

  • معالج قوي جدًا ويعد من أفضل المعالجات الموجودة في هواتف أندرويد في 2020
  • شاشة محترمة جدًا بمواصفات قوية وتدعم تشغيل QHD+ مع 120Hz
  • عوامل أمان سريعة جدًا
  • صوت ستيريو عالي محترم
  • شهادة للحماية ضد الماء
  • كاميرا خلفية قوية
  • سيلفي محترم جدًا
  • شحن سريع جدًا جدًا 65 واط
  • مساحة ضخمة 512 جيجا مع رامات ضخمة 12 جيجا رام

find x2 pro

عيوب Oppo Find X2 Pro :

  • غير داعم للشحن اللاسيلكي
  • سوفت وير فاضي مش مناسب لفلاج شيب
  • سعر الموبايل غالي جدًا مقارنتا بأسم أوبو .. مهما كانت المواصفات قوية و العيوب قليلة ولكن كان لازم التسعير يبقا أفضل من كدا

فيديو المراجعة :-

قد يعجبك أيضا...

Comments

جاري التحميل...