وضحنا ليكم الفرق بين Reno 3 و Reno 3 Pro في مقالة قبل كده .. وبلغناكم اننا بنجرب حاليًا الموبايلات دي علشان نقدر نحكم عليها الحكم النهائي .. والنهارده هنراجع Oppo Reno 3 و Oppo Reno 3 Pro مراجعة كامله .. وهنركز أكتر على رينو 3 العادي.
التصميم :-
الموبايلين بيجو بتصميم من البلاستيك البولي كاربونيت .. بعد ما كان تصميم زُجاجي Premium في سلسلة الرينو 2 القديمه .. وكمان في بروز كبير في الكاميرات بيتغطى بالجراب اللي جاي مع الموبايلات في العلبة.
بالنسبة لشكل التصميم بقى فا للأسف الموبايلات رجعت لورا .. التصميم جه تقليدي جدًا بشكل تقليدي قديم جدًا مش مُميز تمامًا، يمكن شكل الـReno 3 Pro مقبول شوية لكن بشكل عام الاتنين تقليديين جدًا.
الموبايلين بخامات من البلاستيك فا وزنهم مقبول جدًا وخفيف جدًا وسهل تستخدمهم بإيد واحده .. ومسكة الموبايل في الإيد مريحه برده.
الشاشة :-
الموبايلين بيجو بشاشة بحجم 6.4 بوصة ونوعها AMOLED في الرينو 3 العادي انما البرو سوبر أموليد بدرجة سطوع أعلى .. والفرق الحقيقي بينهم هنا هو ان الـReno 3 Pro بيجي بشاشة كامله والسيلفي في ثُقب مُزدوج مش في نوتش .. والحافة السُفليه كمان صغيره بفرق واضح عن الرينو 3 العادي.
معجبنيش في الرينو 3 شكل الشاشة اللي بنوتش القديم جدًا .. ومعجبنيش في الرينو 3 برو الثُقب المُزدوج اللي في الشاشة خصوصًا ان العدسة التانيه بتاعت السيلفي ملهاش لازمه او إستخدام.
الأداء :-
بالنسبة للأداء فا الـReno 3 جاي بمعالج ميدياتك Helio P90، اما الـReno 3 Pro جاي بمعالج ميدياتك Helio P95 .. وبإختصار لو انت هتقارن مع بروسيسور سناب دراجون 730 او ميدياتك G90T او كيرين 810 .. هتحس ان الأداء هنا مش حلو وموبايلات أوبو ادائها أقل.
وكعادة معظم موبايلات اوبو، الموبايلات دي هتخسر في نقطة الأداء من اي موبايلات تانيه معاها في الفئة السعرية.
اما لو انت بتقارن مع معالجات زي سناب دراجون 665 او Helio G80 مثلًا هتحس ان الاداء قريب .. بس فرق السعر بينهم كبير للأسف .. الموبايلات دي مش بتقدم ولا بتخاطب الناس اللي عايزه اقوى اداء.
الموبايل بيقدم اداء عادي جدًا، متواضع جدًا، كل المنافسين تقريبًا بيقدموا اداء اقوى من الموبايلين .. طب هل نقدر نتقبل ده في Reno 3 العادي ؟ الى حدٍ ما اه بس لازم تبقى عارف ان في موبايلات زي Nova 5T بيتفوق عليه في الأداء بفرق واضح جدًا.
اما الـReno 3 Pro بقى فا .. لأ مش هنقدر نتقبل المعالج ده بالسعر ده .. حرام بصراحه تسيب موبايل زي Honor 20 Pro وتروح للرينو 3 برو .. حرام بجد !
بالنسبة للأداء الرسومي فا الموبايلين زي بعض بالظبط .. ببجي بتشتغل على High HD .. بتشتغل كويس بس ممكن تحس بتقطيعه كده خفيفه بعد فتره من الإستخدام.
وكول اوف ديوتي برده بتشتغل على اعدادات جرافيك High وممكن بعد فتره تحس بتقطيعات خفيفه في اللعبة .. وطبعا مفيش دعم لتشغيل فورت نايت للأسف الشديد.
بالنسبة للسخونيه بتاعت الموبايلين دول فا هي بسيطه جدًا وده لإنهم اصلًا مش بيطلعوا اداء قوي في الألعاب.
الشبكة والصوت وعوامل الأمان :-
مبدأيًا، الموبايل شبكتهم قوية جدًا جدًا .. كعادة موبايلات اوبو اللي دايمًا بتقدم شبكات قوية جدًا .. بالنسبة برده لقوة الـWiFi فا الاتنين زي بعض بالظبط .. ممتازين مفيش فيهم اي مشاكل.
بالنسبة للموبايلين صوتهم بيجي من سماعة واحده تحت على الموبايلين .. الصوت عالي وكويس مش هتحس فيه اي مشكلة .. وصوت سماعة المكالمات برده عالي ومفيهوش اي مشكله.
بالنسبة بقى للمستشعرات اللي كانت مشكلة في الجيل اللي فات .. كان مستشعر التقارب في الجيل اللي فات موجود سوفت وير بس .. لأ هنا كل المستشعرات موجوده وحقيقية وبتشتغل بكل كفاءه.
الموبايلين جايين ببصمة في الشاشة .. سريعة جدًا وعملية في الموبايلين مفيش فرق والـFace Unlock نفس الكلام برده.
الموبايلين فيهم ميزة زي الـAlways On Display اسمها هنا Display Clock Off .. بتعرضلك الساعة وايقونات اشعارات البرامج على الشاشة المطفية.
بس الـ3 برو كمان بتقدر تتحكم في شكل الساعة والأيقونات بتبقا ملونة .. انما الـOppo Reno 3 العادي مفيهوش اوبشن تعديل الـStyle .. مش عارف ليه كده يا اوبو !
الموبايلين مش بيدعموا NFC للأسف .. مع ان الـReno 2 القديم كان فيه NFC .. مش عارف احنا بنطلع لقدام ولا بنرجع لورا.
البطارية :-
الموبايلين بيجو بنفس البطارية الـ4025 مللي امبير .. مش أكبر بطارية في الفئات السعرية دي خالص .. البطاريات ادتني حوالي 6 ~ 7 ساعات شاشة مفتوحه .. وقت متواضع جدًا جدًا الصراحه.
بالنسبة لسرعة الشحن فا الـReno 3 العادي بيجي بالشاحن الـ20 وات القديم بتاع اوبو .. الشاحن شحن البطارية في حوالي ساعه و10 دقايق .. كنت اتمنى اشوف شاحن اسرع من كده.
بالنسبة بقى للكبير الـReno 3 Pro فا هو بيجي بشاحن 30 وات .. شحن البطارية بالكامل في 50 دقيقة .. وقت الى حدٍ ما كويس في الفئة السعرية اللي الموبايل ده فيها.
الكاميرات :-
الموبايلين بيجو بـ4 كاميرات خلفيه، الأولى في Reno 3 العادي بدقة 48 ميجا بيكسل بفتحة عدسة F/1.8 .. وفي Reno 3 Pro بتيجي بدقة 64 ميجا بيكسل بفتحة عدسة F/1.8.
بالنسبة للكاميرات التانيه بقى بتيجي واحد في الموبايلين، عدسة Telephoto للزوم بتيجي بدقة 13 ميجا بيكسل بفتحة عدسة F/2.4 وبتعمل زوم لحد 2x حقيقي ولحد 20x عن طريق السوفت وير .. وعدسة Ultra Wide للتصوير بزاوية عريضة بدقة 8 ميجا بيكسل بفتحة عدسة F/2.2 .. وعدسة Black & White بدقة 2 ميجا بيكسل بفتحة عدسة F/2.4.
والكاميرا السيلفي بتيجي بدقة 44 ميجا بيكسل بفتحة عدسة F/2.4 في الموبايلين .. وفي الـReno 3 Pro معاها عدسة ثانويه للعزل بدقة 2 ميجا بيكسل بفتحة عدسة F/2.4
الـReno 3 Pro بيتسوقله بإنه بكاميرا خلفيه 108 ميجا بيكسل .. بس انت لما بتفتح بتصور بالوضع العادي خالص بدقة 16 ميجا بيكسل .. وفي وضع تاني بتجيبه من الـMenu اللي فوق بيخليك تصور بدقة 64 ميجا بيكسل .. في وضع تاني بقى مُختفي في ابكليشن الكاميرا بيخليك تصور بدقة 108 ميجا بيكسل .. شوف فيديو المراجعه اللي في اخر المقاله هتعرف توصله ازاي.
بالنسبة للتصوير بالكاميرا الخلفيه في الشمس .. هتلاقي ان الـReno 3 Pro بيقدملك صوره احسن في المجمل بس لما تعمل زوم هتلاقي ان الـReno 3 العادي بيقدم تفاصيل افضل بفرق واضح جدًا .. وفي النهاية هنلاقي ان الـReno 3 Pro بيلعب جامد في الوان الصوره اما الـReno 3 بيقدم صورة بدون تعديلات بس بتفاصيل اكتر وبشكل واقعي اكتر.
الـReno 3 Pro برده في تصوير مناظر طبيعيه بيلعب جامد في الألوان وبيضيع التفاصيل منه خالص .. الـReno 3 العادي افضل بفرق واضح في التفاصيل والألوان .. ولما تعمل زوم برده هتلاحظ نفس الكلام .. الـReno 3 بينقل التفاصيل والالوان زي ما هي اما الـReno 3 Pro بيلعب جامد في الألوان.
بالنسبة للتصوير في إضاءه داخليه فا مفيش صور كويسه بصراحه من الموبايلين .. التفاصيل والألوان ضايعه والصورة تحسها كارتونيه كده مفيش تفاصيل في الصورة .. يمكن التفاصيل اكتر بفرق بسيط في الـReno 3 Pro.
لما نحط بقى الـReno 3 Pro جنب الجيل القديم منه اللي هو Reno 2 .. هتلاقي الرينو 2 القديم بيطلعلك الصورة بألوانها الواقعيه اما الـ3 برو بيحاول يلعب في الوان الصورة وبيطلعها مصفره كده شوية .. وفي التصوير في مكان مغلق الرينو 3 برو بيضيع خالص .. الرينو 2 فعلًا بيقدر يقدم صوره احسن بفرق كبير جدًا.
ولما نحط الـReno 3 العادي جنب الـRealme XT واللي يعتبر في نفس الفئة السعرية .. هنلاقي ان معالجة الـXT للصورة اقوى بكتير .. يمكن من اللعب في الألوان هتلاحظ ان لون البشره مش أفضل حاجه بس بشكل عام الموبايل افضل من الرينو 3 بفرق كبير.
بالنسبة للتصوير السيلفي في الموبايلين بقى .. الموبايلين واحد تقريبًا مفيش فرق .. يمكن في الاضاءه الداخليه هتلاقي نويز اكتر شوية في الرينو 3 العادي.
طيب لما نحط بقى الرينو 3 برو جنب الرينو 2 في السيلفي .. الرينو 3 برو الى حدٍ ما قدر ينافس لكن مازال الرينو 2 بيقدم تفاصيل افضل ونويز اقل لإن النويز في الصور اللي طالعه من رينو 3 برو كتيره جدًا وده بسبب فتحة العدسة الديقة اللي في Reno 3 Pro.
اما بقى بالنسبة للرينو 3 مع الريلمي اكس تي .. الـXT مازال سيلفي محترم جدًا مع اني توقعت العكس .. قولت سيلفي الرينو 3 بدقة 44 ميجا بيكسل وهيبقى عالمي وكده بس للأسف مطلعش افضل حاجه .. الـXT بيطلع صورة احسن بألوان احسن وتفاصيل احسن بفرق واضح جدًا.
بالنسبة لتصوير الفيديوهات بالكاميرا الخلفية .. رينو 3 و 3 برو زي بعض .. بيصوروا 4K من غير ثبات الكتروني .. وتقدر تعتمد على وضع الالترا ستيدي برو علشان تحصل على ثبات ممتاز بس على جودة 1080p .. بالنسبة للفيديو بالسيلفي فالجودة على 1080p في الموبايلين وبثبات الكتروني جيد جدا.
ممكن تشوف الصور والفيديوهات المتصورة بالموبايلات في فيديو المراجعة في أخر المقالة.
أسعار الموبايلات :-
موبايل Oppo Reno 3 العادي بيجي بنسخة واحده، النسخة دي بمساحة تخزين 128 جيجا مع 8 جيجا رام وبتيجي بسعر 5990 جنيه مصري.
اما موبايل Oppo Reno 3 Pro بيجي بنسخة واحده برده، بتيجي النسخة دي بمساحة تخزين 256 جيجا مع 8 جيجا رام والنسخة دي بتيجي بسعر 7990 جنيه مصري.
والموبايلين بينفع تركب فيهم شريحتين إتصال مع كارت ميموري في نفس الوقت.
الرأي النهائي :-
بالنسبة للرينو 3 برو :-
- سعره غالي
- خامات بلاستيك هي الأسوأ في الفئة السعرية
- كاميرات عادية متقدرش تنافس
- مفيش مثبت بصري ولا تثبيت الكتروني على جودو الـ 4K
- بطارية عادية مش كبيره اوي
- معالج ميقدرش ينافس إطلاقًا وأقل اداء في الفئة دي
- مش بيدعم خاصية الـ NFC
وفي المجمل .. هو مش Upgrade او تطوير عن الـReno 2 القديم خالص .. بالعكس، انا شايف ان الرينو 2 أقوى وأفضل بفرق كبير جدًا.
بالنسبة للرينو 3 العادي :-
- كاميرات كويسه بالنسبة للسعر ده ومعاك عدسة زوم
- شاشة اموليد كويسه بس بتصميم الـNotch القديم
- بصمة مدمجة بالشاشة ادائها كويس جدا
- عرض اشعارات البرامج على الشاشة المطفية
- بصمة سريعة محترمه
- صوت عالي ومقبول جدًا
- شبكة قوية جدًا والإتصال بالـWiFi ممتاز
رينو 3 العادي يُعتبر Upgrade عن الـReno 2F في الكاميرات .. وفي تنازل كبير في خامات التصنيع وشكل التصميم الخارجي.
وفي النهاية .. متشتريش الرينو 3 العادي ده لو بتدور على موبايل محترم بخامات Premium فخمه .. او لو بتلعب العاب تقيله كتير لإن المعالج ده مش هيقدملك اداء كويس.
Comments