الموبايلين اللي بنقارن بينهم النهارده هي متعتبرش بتقدم قيمة مقابل سعر، لإن القيمة مقابل السعر الأيام دي بقيت بتقدملك عيوب وأعطال ومشاكل بأشكال مُختلفة .. بنقارن بين Oppo Reno 3 وده من الموبايلات اللي محققة مبيعات قوية في السوق المصري .. مع الـVivo V19 وده موبايل تسعيرة ظلمة.
دي من الموبايلات المضمونة اللي ممكن تشتريها وتضمن ان الموبايل مش هيظهر فيه عيوب صناعة او مشاكل او أي عيوب مُفاجأه بعد الإستخدام .. ومع ذلك هي مش أفضل قيمة مقابل سعر.
التصميم :-
موبايل Vivo V19 بيجي بظهر من الزُجاج بطبقة حماية Corning Gorilla Glass الجيل السادس .. وطبعًا مع رصة كاميرات أشيك وتصميم خارجي بشكل عام شيك .. لكن الفريم بتاع الموبايل بيجي بخامة البلاستيك.
اما موبايل Oppo Reno 3 فا هو بيجي بتصميم من البلاستيك بالكامل من الظهر والفريم، ورصة الكاميرات بتيجي بشكل قديم جدًا.
الموبايلين مُميزين جدًا في إنهم وزنهم خفيف جدًا .. الـReno 3 وزنه 170 جرام بس وتخانته 8 مللم .. الـV19 وزنه 186 جرام مع تخانة 8.5 مللم .. فا هنلاقي الـReno 3 أخف وأرفع من الفيفو.
الموبايلين مميزين جدا في انهم خفاف اوي .. الرينو 3 وزنه 170 جرام و الفي 19 بوزن 186 جرام .. و كمان تخانه الرينو 8 ملم والفيفو 8.5 ملم .. فا الرينو 3 هيكون أخف وأرفع من الـV19.
والموبايلين بيجي معاهم في العلبة جرابات شفافة علشان تغطي بروز الكاميرات .. واللي مش كبير اوي في الموبايلين.
الشاشة :-
موبايل Vivo V19 بيجي بشاشة 6.44 بوصة نوعها Super AMOLED وبدقة FHD+ .. والشاشة بتيجي مع ثُقب مُزدوج للسيلفي على الشمال .. والشاشة بتدعم الـHDR10.
اما الـReno 3 بيجي بشاشة 6.4 بوصة من نوع AMOLED بدقة FHD+ مع نوتش Water Drop بتصميم قديم .. وطبعًا مفيش دعم للـHDR10.
والشاشات في الموبايلين بيطلعوا من العلبة متركب عليهم سكرينة.
ومن الأخر الشاشتين كويسين .. بس الـVivo V19 شاشته أحلى بفرق بسيط .. وبتقدر توصل لدرجات سطوع أعلى من الرينو وكمان تصميمها أحسن.
الأداء :-
موبايل Vivo V19 بيجي بمعالج سناب دراجون 712 بيشتغل بمعمارية 10 نانو .. اما الـReno 3 بيجي بمعالج ميدياتك Helio P90 واللي بيشتغل بمعمارية 12 نانو.
الموبايلين مُستقرين جدًا من ناحية الأداء .. ومفيش أي مشاكل ممكن تقابلك في الواجهة فيهم .. ده كده من حيث تجربة الإستخدام.
بس اللي هتحسه أكيد إن الـV19 إستجابته أسرع بفرق بسيط عن الـReno 3 وده بفضل المُعالج الأفضل .. وبرده زي ما قولتلك في أول المقال .. الموبايلين دول مش بيقدموا أفضل مُعالجات في فئتهم السعرية .. بس الواجهات المستقرة الخفيفة اللي كل موبايل بيستخدمها هتخلي الأداء مُرضي شوية.
بالنسبة للأداء الرسومي فا لعبة PUBG بتشتغل على إعدادات جرافيك High HD على الموبايلين .. اما Call Of Duty فا هي شغالة على Very High في الـV19 .. اما في Reno 3 فا هي شغالة على اعدادات جرافيك High بس .. ولعبة Fortnite شغالة على اعدادات جرافيك Medium على الـV19 .. ومش بتشتغل على Reno 3.
الموبايلين أداءهم كويس بس الـV19 هيكون أسلس أكتر .. والـV19 كمان فيه تبريد مائي مُحترم جدًا علشان يكمل معاك وقت أطول من غير ما يسخن.
عوامل الأمان وعناصر اخرى :-
كعادة موبايلات اوبو .. بصمة Oppo Reno 3 اللي موجوده أسفل الشاشة هتكون أسرع بفرق بسيط عن اللي في Vivo V19 بسبب الـAnimation اللي بيحصل في الـV19 .. ونفس الموضوع في Face Unlock برده .. والواجهات في الموبايلين بيدعموا الـDark Mode.
الموبايلين مش بيدعموا لمبة إشعارات بس بيدعموا الـAlways On Display لعرض أيقونات إشعارات البرامج على الشاشة المطفية .. بس الـV19 فيه Options أكتر لتغير شكل الساعة اللي بتظهرلك على الشاشة المطفية.
الموبايلين فيهم مُستشعر ضوء حقيقي شغال بكل كفاءة .. أما مُستشعر المقاربة بتاع المكالمات فا هو موجود حقيقي في الـReno 3 وموجود سوفت وير في الـV19 .. وأنا بفضل السينسور الحقيقي اللي في الـReno 3.
اما بالنسبة للصوت فا الـV19 صوته اعلى حاجه بسيطة عن الـReno 3 .. وصوت سماعة المكالمات عالي ومُمتاز في الموبايلين .. صوت سماعات الأذن أعلى حاجه بسيطه في الـReno 3.
اما بالنسبة للشبكات فا هي ممتازة في الموبايلين .. وشبكة الـWiFi برده محترمة في الموبايلين.
البطارية :-
موبايل Vivo V19 بيجي ببطارية بحجم 4500 مللي امبير .. اما الـReno 3 فا هو بيجي ببطارية بحجم 4000 مللي امبير .. والإستخدام الفعلي بطارية الـV19 هتقعد معاك 7 ~ 8 ساعات اما الـReno 3 هيقعد معاك 6 ~ 7 ساعات شاشة مفتوحة.
الـV19 بيجي معاه شاحن بقوة 33 وات .. بيشحن البطارية في ساعة ورُبع .. اما الـReno 3 بيجي بشاحن 20 وات بس وبيشحن البطارية في ساعة وربع برده .. وده لإن في فرق بين الموبايلين في حجم البطارية.
الكاميرات :-
الموبايلين جايين بـ4 كاميرات .. الأساسية 48 ميجا بيكسل في الموبايلين .. وعدسة Ultra Wide بدقة 8 ميجا بيكسل في الإتنين .. والـفيفو فيه 2 ميجا بيكسل ماكرو أما الرينو مفيهوش عدسة مُخصصة للماكرو إنما فيه نقطة تفوق بوجود عدسة 13 ميجا بيكسل لعمل زوم 2X حقيقي .. والأخيرة 2 ميجا بيكسل للعزل في الموبايلين.
بالنسبة للسيلفي .. الرينو جاي بـ44 ميجا بيكسل بفتحة عدسة F/2.4 .. والفيفو جاي بعدستين .. الأساسية 32 ميجا بيكسل بفتحة عدسة F/2.1 والتانية 8 ميجا بيكسل بفتحة عدسة F/2.4 للتصوير السيلفي الواسع.
كل شركة بتفكر في إتجاة مُختلف في معالجة الصور .. وفي إختلافات واضحة في النتجة في كل وضعية تصوير في الموبايلين .. بس اللي واضح ان الـV19 الـDinamic Range أفضل .. لكن الموبايلين بيقدموا نفس مستوى التفاصيل.
العدسة الـUltra Wide أفضل في الـReno 3 في التفاصيل .. اما الماكرو فا الـReno 3 فيه ماكرو عن طريق عدسة الـUltra Wide عن طريق السوفت وير .. بس مش بتطلع نتيجة زي العدسة الماكرو الحقيقية الموجوده في Vivo V19 .. والـReno 3 فيه عدسة للزوم وده Option مُحترم مش موجود في الـV19.
بالنسبة للتصوير في الإضاءه الداخلية فا مفيش فرق كبير في التفاصيل .. لكن لما تشغل الـNight Mode الوضع بيختلف .. شوية بتلاقي الـReno 3 بيكسب في معالجة الصورة والتفاصيل .. وشوية بتلاقي الـV19 بيكسب في التفاصيل ومعالجة الصور .. مفيش نتيجة ثابته.
اما بقى بالنسبة للسيلفي فا الـReno 3 واخد إتجاه إنه بيخلي الصور Warm او دافية شوية او مائلة للون الأحمر .. اما الـVivo V19 فا هو واحد إتجاه إنه يخلي الصورة Cold او مائلة للأزرق .. وفي الإضاءه الضعيفة لما تشغل الـNight Mode هتلاقي تفوق واضح لسيلفي الـV19.
بالنسبة لتصوير الفيديوهات، الموبايلين بيصوروا 4K بجودة 2160p بس مفيش مُثبت إلكتروني .. والموبايلين فيهم مايكروفون اضافي لعزل الضوضاء.
أسعار الموبايلات :-
- الـVivo V19 نسخة الـ128 جيجا مع 8 جيجا رام بسعر 6300 جنية مصري
- الـReno 3 نسخة الـ128 جيجا مع 8 جيجا رام بسعر 6000 جنية مصري
والموبايلين بيدعموا تركيب شريحتين إتصال من الجيل الرابع مع كارت ميموري بحجم 512 جيجا في منفذ مخصص له.
الرأي النهائي :-
نقاط تفوق V19 على Reno 3 :-
- تصميم أحدث بخامات أفضل
- شاشة أفضل بتصميم أحدث
- معالج أقوى مع تبريد مائي
- بطارية أكبر وشحن أسرع
- عدسة سيلفي Ultra Wide
نقاط تفوق Reno 3 على V19 :-
- عوامل أمان أسرع
- كاميرا Telephoto خلفية
اما بالنسبة بقى لموقف الموبايلات دي جنب موبايل Galaxy A71 .. فا ده بإختصار وضعه وسطهم :-
نقاط تفوق A71 على رينو 3 وV19 :-
- كاميرات أقوى سواء أماميه او خلفية
- شاشة سوبر أموليد أكبر وأشيك
- معالج أقوى
نقاط تفوق رينو 3 وV19 على A71 :-
- سرعة عوامل الأمان
- شبكات أفضل سواء مكالمات او Wi Fi
- واجهات أخف من واجهة سامسونج
Comments