الإنطباعات الأولية عن Oppo Reno 4 و Reno 4 Pro – اوبو رجعت لعقلها .. ولا لأ ؟

خلينا نتفق على حاجة .. النقلة اللي عملتها شركة Oppo من سلسلة Reno 2 الى سلسلة Reno 3 مكانتش حلوة ومعجبتش ناس كتير .. وكمان Reno 3 نزل متأخر في مصر بسبب أزمة كورونا .. ولكن دلوقتي أوبو بتلحق الدنيا .. وهتنزل سلسلة Oppo Reno 4 بسرعة في مصر بعد ما نزلت بره.

وده علشان تظبط أمورها في الفئة المتوسطة أكتر وأكتر .. لإن اوبو بتستهدف المركز الأول دايمًا في List أعلى 10 موبايلات مبيعًا في مصر بموبايلها اللي في الفئة المتوسطة .. فا هل Reno 4 هيقدر يحقق اللي اوبو عايزاه ولا لأ ؟

محتويات العلبة :-

علبة Oppo Reno 4 Pro :-

قبل ما نفتح العلبة هنلاقي Badge فوق مكتوب عليه 256 جيجا مع 8 جيجا رام، وعلى ظهر العلبة هتلاقي Badge أندرويد موجود .. بالتبعية الموبايل جاي بإشتراطات جوجل الجديدة واللي أهمها إنه الموبايل يبقى ببرنامج إتصال جوجل اللي مفيهوش تسجيل مكالمات.

وبالنسبة لشكل العلب برده فا هو هو نفس شكل علب سلسلة الـReno 3 متغيرش .. لو تفتكر.

• جراب شفاف
• دبوس إخراج بيت الشرائح
• الكتالوج والضمان
• ورقة مكتوب عليها أبرز المواصفات بتاعته واللي هي :-
  – شاشة 90 هيرتز
  – شاحن 65 وات
  – كاميرا تدعم الذكاء الإصتناعي
  – التصوير البطيء
  معالج كوالكوم سناب دراجون 720G
• الشاحن الـ65 وات زي اللي موجود في Oppo Find X2 Pro
• وصلة الشحن الـType C
• سماعات الأذن

علبة Oppo Reno 4 :-

نفس التصميم بدون إختلاف .. وعندك الـBadge مكتوب عليه 128 جيجا مع 8 جيجا رام، وفي الظهر هتلاقي برده نفس الـBadge بتاع الـAndroid.

• جراب شفاف
• دبوس إخراج بيت الشرائح
• الكتالوجات والضمان
• ورقة مكتوب عليها أبرز المواصفات واللي هي :-
  – كاميرا تدعم الذكاء الإصتناعي
  – دعم للتصوير البطيء
  – ميزة الـSmart AirControl الي بتخليك تعمل اوامر للموبايل بدون لمس عن طريق الكاميرا السيلفي الثانوية
  – ميزة الـSmart Spying Prevention
  – كوالكوم سناب دراجون 720G
• شاحن 30 وات
• وصلة الشحن الـUSB Type C
• سماعات الأذن

علبة Oppo Watch :-

دي ساعة أوبو الجديدة، العلبة بتاعتها شيك وتحسهم صارفين عليها أكتر من علب الموبايلات .. وطبعًا هي تقليد جدًا للعلبة بتاعت الـApple Watch Series.

• الساعة بمقاس 41 مم
• الشاحن الـWireless
• الكتالوجات
• Speer للعقلة اللي بتتركب في الساعة

الساعة بمقاسها ده هتناسب اللي إيده صغيرة .. الساعة بتيجي بسوفت وير Google Wear .. هنجربها لسه وهننقل لكم تجربتها الكاملة في فيديو مراجعة على يوتيوب.

الإنطباعات الأولية عن Reno 4, 4 Pro :-

التصميم :-

اول حاجة هتاخد بالك منها أما تمسك الموبايلات ديه الوزن والنحافة .. الموبايلات دي خفيفة أوي .. في حدود الـ161 جرام وتخانه 7.7 ملم .. حرفيًا اخف وأرفع موبايلات فئة متوسطة ممكن تشوفها.

وطبعًا علشان يوصلوا للوزن الخفيف جدًا ده فا إضطروا ميكبروش حجم البطارية .. البطارية زي ما هي بحجم 4000 مللي أمبير في الموبايلين .. والتنازل التاني السخيف الخامات .. بلاستيك مش زجاج.

عاجبني تصميم الظهر عمومًا في الموبايلين .. حبيتهم كدا لما شفتهم .. الـOppo Reno 4 Pro تحس عليه فنش مط كده .. والـReno 4 العادي أسود لما الضوء بيجي عليه بيدي شكل Pattern أو نقشة على الظهر كده وشكله حلو برده.

رصة الكاميرات شكلها شياكة .. أيوة هي متاخده شوية من شكل كاميرا الـNote 20 بس على أصغر شوية وCurves مدورة تليق مع الموبايل.

الشاشة :-

الإتنين من نوع Super AMOLED .. الـ رينو 4 برو بشاشة بحجم 6.5 بوصة .. والـ رينو 4 العادي بحجم 6.4 بوصة .. فرق حجم الشاشة جاي في الحواف لإن الحافة السفلية لشاشة الـ4 برو أقل بفرق واضح من شاشة الرينو 4 العادي.

دقة الشاشتين FHD+ .. شكل شاشة الرينو 4 واخد ثقبين للسيلفي على الشمال .. وشكل شاشة الرينو 4 برو ثقب واحد بس كده مع Edges بسيطة في الشاشة مخليه شكلها حلو فعلًا.

المُميز في الرينو 4 برو كمان التردد الـ90 هيرتز اخيرًا إتضاف .. وأكيد لو بتسأل فالرينو 4 العادي بالتردد العادي الـ60 هيرتز .. هنتكلم على الشاشات أكتر بالتفصيل في المراجعة الكاملة.

الأداء :-

الموبايلين جايين بمعالج كوالكوم سناب دراجون 720G .. عارف إنت أما واحد يجي يقولك أنا عندي خبرين .. خبر حلو وخبر وحش .. نبدأ بالحلو إن اخيرًا اوبو إستخدمت معالجات كوالكوم وسابتها بقى من معالجات ميدياتيك فئة الـP علشان زهقنا.

أرقام Antutu Benchmark كمان مش وحشة خالص بالنسبة للمعالجات دي .. يمكن ديه من أكبر الأرقام اللي شوفت المعالج ده محققها.

الخبر الوحش بقا بخصوص الـReno 4 Pro .. بسعره المُتوقع هيكون أكيد المعالج الـ720G مش حلو وأكيد كل الناس اللي بتفهم في المواصفات هتعترض على إستخدام المعالج ده في الموبايل ده لإنه موجود في موبايلات بنص سعره.

الكاميرات :-

الموبايلين فيهم كاميرا خلفية رباعية .. الأساسية 48 ميجا بيكسل فتحة عدسة F/1.7 بمستشعر سوني المحترم IMX586 .. والتانية 8 ميجا بيكسل للتصوير الواسع .. والتالتة 2 ميجا بيكسل ماكرو والأخيرة 2 ميجا بيكسل عزل .. السيلفي في الموبايلين 32 ميجا بيكسل فتحة عدسة F/2.4.

أيوة مفيش عدسة الـTelephoto اللي كانت موجودة في سلسلة Reno 3 وإتعمل عليها مهرجان .. إتشالت من هنا .. مفيش مثبت بصري .. مفيش أي ميزة حقيقية .. ولكن تبقى التجربة الفعلية هي الفيصل في قوة الكاميرات اللي هنا.

ولو بتسأل على الثقبين بتوع شاشة Reno 4 موجودين ليه هقولك العدسة التانية دي للذكاء الإصطناعي .. وهي المسؤولة عن ميزة الـSmart Air Control اللي بتخليك تعمل بيها حركات في الهوا زي إنك تعمل Scroll في فيس بوك مثلًا من غير ما تلمس الموبايل .. هنشرحها أكتر في المراجعة الكاملة.

البطارية :-

البطاريات زي ما قولتلك بتيجي بسعة 4000 مللي أمبير في الموبايلين .. والشواحن برده قولتهالك .. شاحن الرينو 4 برو بقوة 65 واط .. اسرع شاحن تقريبًا في سعرة .. اما رينو 4 العادي بيشحن بقوة 30 واط .. شاحن معقول جدًا وهو نفس شاحن Realme 6 Pro.

الأسعار المُتوقعة :-

• موبايل Reno 4 Pro النسخة الـ256 جيجا مع 8 جيجا رام بحوالي 8500 جنية
• موبايل Oppo Reno 4 النسخة الـ128 جيجا مع 8 جيجا رام بحوالي 6200 جنية
• ساعة Oppo Watch الـ41 مم بسعر حوالي 5000 جنية مصري

والموبايلات بتدعم تركيب شريحتين إتصال من الجيل الرابع مع كارت ميموري بحجم 256 جيجا في نفس الوقت.

المراجعة الكاملة للموبايلات والساعة قريب على موقع موبيزل وقناة موبيزل على يوتيوب.