مراجعة Oppo Reno 4 – أسرار لا تعرفها .. خلي بالك !

بنجرب الـOppo Reno 4 بقالنا فترة .. والنهارده هقولك رأيي في الموبايل بكل صراحة .. هل الموبايل ده يقدر ينافس ؟ وايه عيوبه ؟ هل تشتريه ولا تستنى Realme 7 Pro مثلا ؟ وكمان هنعرف الفرق بينه وبين Oppo Reno 4 Pro.


التصميم :-

الـReno 4 تصميمه ميزة وعيب .. نبدأ بالعيب .. خامات بلاستيكية بالكامل .. تستحمل وقعات .. بس هتتخربش بسهولة .. مينفعش تمشي بالموبايل من غير جراب، وهو بيجي معاه في العلبة .. وطبعًا مش محتاج اقولك كل الموبايلات المُنافسة بتصميم زجاج ماعدا موبايلات سامسونج.

الميزة بقى .. إن الخامة البلاستيك والبطارية الصغيرة .. خلت الوزن 165 جرام .. وتخانه 7.7 ملم .. وبإختصار ده أرفع وأخف موبايل فئة متوسطة حاليًا في مصر .. في ناس كتير بتحب موضوع الوزن الخفيف ده، شخصيًا انا منهم .. بس يعني ممكن أستحمل 20 جرام زيادة وأخد مواصفات أعلى خصوصًا البطارية.

بالنسبة لشكل التصميم .. الموضوع زي ما بقول دايمًا هو أزواق .. بس أنا عاجبني شكل الجيل الجديد من سلسلة Reno 4.

شكل الكاميرا عاجبني بصراحة .. 3 عدسات كُبار والعدسة الرابعة فوق على اليمين .. وحتى اللون الأسود من الموبايل فيه نقشة شكلها حلوة .. والموبايل بيجي بالألوان الإسود والأزرق.

تصميم Reno 4 Pro :-

وفي الأخر اقولك الفرق بينه وبين الـReno 4 Pro .. الـ4 برو وزنه أخف أكتر 161 جرام .. هو فرق 4 جرام مش كبير بس برده .. وشكل الكاميرات بتاعته مُختلف .. الأربع كاميرات ورا بعض كبار مفيش عدسة صغيرة زي رينو 4.

وبرده الـ رينو 4 برو من البلاستيك .. وعليه نفس ملاحظاتي اللي قولتها على Reno 4 وزود عليهم إن البرو أغلى 2000 جنية ولسه برده بلاستيك .. ما علينا.


الشاشة :-

شاشة بحجم 6.4 بوصة من نوع Super AMOLED بدقة FHD+ مع تردد عادي 60 هيرتز وفيها ثُقبين للسيلفي صغيرين على الشمال .. حواف الشاشة تقليدية جدًا .. الحافة السُفلية مش أصغر عن الأجيال اللي فاتت .. كان نفسي تقل شوية.

بشكل عام شكل الشاشة أرحم كتير من شكل الشاشة القديمة اللي بنوتش اللي كانت في Oppo Reno 3.

الشاشة من ناحية السطوع تحت الشمس مُمتازة مفيهاش أي مشاكل .. من ناحية الألوان مُمتازة برده .. وعمومًا دي نفس Quality شاشة الـRealme 7 Pro اللي لسه منزلش .. بعيدًا عن الشكل .. فممكن نقول الشاشة هنا كويسة.

شاشة Reno 4 Pro :-

حواف الشاشة أقل وبالتالي حجم الشاشة أكبر في البرو .. الشاشة بتيجي بحجم 6.5 بوصة .. تردد الشاشة أعلى 90 هيرتز .. شكل الثقب واحد صغير وعلى الشمال.

ده الفرق بين شاشة العادي والبرو .. وده يعتبر أول فرق جوهري محسوس ما بينهم .. والشاشات جاية متركب عليها سكرينات زي عادة موبايلات اوبو.


الأداء :-

أوبو قررت تستغنى عن خدمات معالجات ميدياتك الـP وقالت تروح لـ Qualcomm .. إستخدمت معالج سناب دراجون 720G في الـOppo Reno 4 العادي.

أنا شايف ده إنجاز .. ايوة أنا عارف إن في موبايلات بسعر أقل فيها نفس المعالج .. بس خطوة حلوة من اوبو إنها تروح لمعالجات SD .. ويكفي إني اقولك إن ريلمي إستخدمت نفس المعالج ده في Realme 7 Pro اللي جاي مصر قريب.

الفكرة إن الأداء مبقاش عيب من عيوب الموبايل تقريبًا لأول مرة في الفئة المتوسطة من اوبو .. تقدر تتقبله عادي .. محدش هيقولك على أداء المعالج اللي هنا عيب قاتل .. أنا بس أقدر أقولك اة في موبايلات تانية بتقدم أداء أفضل زي الـNova 5T مثلا بمعالج رائد .. تمام ؟

بالنسبة لأداء Reno 4 العادي .. أداء معقول جدًا .. مفيش أي مشاكل واجهتني مع الموبايل .. كلنا عارفين واجهة اوبو مُستقره، هي فاضية مفيهاش Options كتير بس مستقره .. والأداء بتاعها كويس جدًا مع الـSD720G.

الأداء الرسومي بقى .. ببجي بتشتغل على اعدادات جرافيك High HD واللعبة بتشتغل كويس جدا .. كول اوف ديوتي بتشتغل على Very High .. وبتشتغل برده كويس جدًا .. وبشكل عام الأداء الرسومي في Reno 4 كويس والموبايل بيسخن شوية بسيطة في الألعاب.

أداء Reno 4 Pro :-

نفس المعالج في موبايل في فئة سعرية أعلى كتير .. حقيقي معرفش اوبو عملت كده ليه ؟ أنا عارف إن مفيش معالجات تانية كتير في الفئة المتوسطة من سناب دراجون داعمة للجيل الرابع غير الـSD730G.

فا يعني كانوا على الأقل يستخدموه علشان ها يبقى في فرق حتى لو بسيط اوي .. مش هقولك كانوا إستخدموا معالجات سناب دراجون الرائدة القديمة .. علشان ده مش ستايل اوبو.

ملخص الكلام .. أداء Reno 4 Pro زيه زي Reno 4 بالظبط .. اللي ممكن تحس بالفرق بتاعه الـ90 هيرتز وسلاسه التنقل والـScroll .. إنما الأداء الفعلي واحد.


عوامل الأمان وعناصر اخرى :-

الرينو 4 البصمة مُدمجة بالشاشة وسريعة جدًا .. من أسرع البصمات اللي ممكن تجربها .. والـFace Unlock نفس القصة سريع جدًا .. اوبو شاطرة في عوامل الأمان زي ما انتو عارفين.

الموبايل جاي بنظام تشغيل Android 10 المبني على واجهة ColorOS 7.2 .. والـDark Mode موجود .. تقدر تعمل نسختين من برامج التواصل الإجتماعي.

مفيش لمبة إشعارات بس فيه Always On Display لعرض الإشعارات على الشاشة المقفولة .. كل ده مفيهوش جديد .. امال فين الجديد.

الجديد في العدسة التانية اللي في ثُقبين الشاشة في Reno 4 العادي .. دي ملهاش علاقة بالتصوير خالص .. ديه عدسة ذكاء اصطناعي بتقدر تساعدك في حاجات كتير.

مميزات العدسة الـAi :-

  • الشاشة مش بتقفل طول ما إنت باصص عليها
  • تقدر تعمل Scroll بإيدك في الهوا من غير ما تلمس الشاشة .. والكلام ده في بعض البرامج زي Youtube و Facebook .. وإنك ترد او تقفل على حد بيتصل بإيدك برده من غير ما تلمس الشاشة
  • الموبايل بيقدر يعرف وضعية وشك وإنت باصص له وبُناءًا عليها يعمل Rotate او لأ
  • لو انت بتستخدم الموبايل وفاتح الشاشة .. لما يجيلك Notification من فوق زي Instagram او Whatsapp .. اول ما حد تاني غيرك يبص على الشاشة .. الـNotification هيقفل الكلام اللي فيه زي Lock كده

مميزات لطيفة وإضافات مُحترمة من اوبو في الفئة المتوسطة .. طيب بالنسبة لـReno 4 Pro ؟ ..هو بعدسة سيلفي وحيدة .. وبالتالي مفيهوش الـOptions اللذيذة دي.

المُستشعرات كلها موجودة في الموبايل حقيقية وشغالة بدون أي مشاكل .. ضوء وتقارب وجيروسكوب.

صوت الموبايل جاي من سماعة واحدة .. الصوت عالي مش واطي .. زي صوت Reno 2 تقريبًا .. واللي هو كان عاجبني على إنه من سماعة واحدة .. بس طبعًا كان نفسي يكون Stereo زي Realme 7 Pro.

صوت سماعة المكالمات عالي ومُمتاز وفيه ميكروفون إضافي لعزل الضوضاء .. وكمان في تسجيل مُكالمات عادي بالرغم من وجود برنامج إتصال جوجل.

وكمان لما بتدوس على Record إنت بس اللي بتسمع جملة جاري تسجيل المكالمة .. الطرف التاني مش بيسمع .. شوف بقى بالنسبالك ديه ميزه ولا عيب.

بالنسبة لقوة الشبكات والـWiFi .. فا هي ممتازة .. وديه من أهم مميزات موبايلات اوبو عمومًا .. ومفيش أي إختلافات شوفتها في جودة الصوت او الشبكات بين Reno 4 العادي أو البرو.


البطارية :-

بطارية صغيرة بتيجي بحجم 4000 مللي أمبير في Reno 4 العادي والبرو .. أيوة هي فعلًا صغيرة .. أقل بطارية مقبولة دلوقتي 4500 مللي أمبير وانا قولتلك في جزئية التصميم، ميفرقش معايا الموبايل يزيد 20 جرام والبطارية تكبر شوية.

عمومًا البطارية بتخلص بسرعه .. هتعمل معاك حوالي 5 ساعات Screen On وده وقت أقل من كل المنافسين .. ولو شغلت التردد الـ90 هيرتز في الـ4 برو هتخلص أسرع من كده كمان.

وعمومًا أنا شايف حجم البطاريات اللي هنا من عيوب الموبايلات دي .. لإن إنت لو بتتحرك كتير بره البيت هتحتاج الشاحن معاك .. والشواحن السريعة غالية، لو الوصلة بس ضاعت يعتبر الشحن السريع كله راح، فـ ما بالك لو رأس الشاحن ضاعت.

الـOppo Reno 4 العادي جاي بشاحن 30 واط بيشحن البطارية في حوالي 50 دقيقة .. الـOppo Reno 4 Pro جاي بشاحن 65 واط سريع جدًا مفيش موبايل تاني بسعره فيه سرعه الشحن دي .. وبيشحن البطارية في نص ساعة.

وبالمناسبة الـRealme 7 Pro هيبقى جاي بنفس الشاحن الـ65 واط وساعتها هيكون أرخص موبايل بالشاحن ده.


الكاميرات :-

الـReno 4 العادي جاي بـ4 كاميرات في الظهر .. الأساسية 48 ميجا بيكسل بفتحة عدسة F/1.7 بمستشعر سوني IMX586 .. العدسة التانية 8 ميجا بيكسل بفتحة عدسة F/2.2 للتصوير الواسع .. والتالتة 2 ميجا بيكسل ماكرو والرابعة 2 ميجا بيكسل للعزل.

والسيلفي زي ما فهمتك هو عدسة واحدة 32 ميجا بيكسل فتحة عدسة F/2.4 .. العدسة التانية هي ملهاش علاقة بالتصوير .. ودي إتكلمنا عنها خلاص في جزئية السوفت وير.

المُفاجئة بقى .. أرقام الكاميرات دي نفس ارقام Reno 4 Pro .. مفيش عدسة Telephoto بقى .. مفيش مُثبت بصري حقيقي .. ممكن أتقبل أرقام الكاميرات في رينو 4 العادي .. بس مش ممكن خالص في البرو.

بعد ما جربت الموبايلين مع بعض كتير .. لاقيت إن الصور تفاصيلها واحدة .. الفرق بس في Look أو شكل مُعالجة الصورة في الإضاءات العالية .. الـ4 برو بيبقى أحسن شوية .. إنما غير كده الباقي واحد.

وده معناه برده إن الكاميرات بالنسبالي كويسة جدًا في Reno 4 العادي على سعره على كمية التفاصيل .. بس الصور مش بتبقى Sharp اوي .. حاسسها مايلة أكتر لإنها تبقى سايحة .. إنما البرو فالكاميرا بالنسبة لسعره عاديه ما أبهرتنيش.

وحتى لما بنظلم الدنيا شوية ونصور بإستخدام الـNight Mode .. الصور بتطلع كويسة جدًا وتقدر فعلًا تعتمد على الـNight Mode اللي في الموبايلات دي.

أما بالنسبة للسيلفي .. فا كعادة اوبو .. بتعرف تعمل سيلفي كويس جدًا .. يكاد يكون دايمًا من أفضل الكاميرات السيلفي اللي ممكن تجربها .. وبرده في فرق بسيط في معالجة الصور بين العادي والبرو.

إنما كمية التفاصيل قريبه جدًا من بعض .. والزاوية بتاعت الـReno 4 العادي أوسع شوية في التصوير من البرو .. مُجملًا السيلفي كويس جدًا.

اما بالنسبة لتصوير الفيديوهات بقى فا في الموبايلين بينفع تصور 4K مع ثبات إلكتروني، ودي حاجه كويسة في رينو 4 العادي إن يكون في ثبات إلكتروني مع الـ4K بالسعر ده.

ومعاك طبعًا الـOptions اللذيذة زي الـUltra Stady اللي هتخليك تنزل الجودة على [email protected] ودي كويسة لو هتصور مشهد رياضي مثلًا وكمان موجود الـPortrait لو عايز تصور واحد فيديو وتعزل الخلفية عنه.

شوف تجربة التصوير بالموبايل صور وفيديوهات في فيديو المراجعة في أخر المقال


سعر الموبايل :-

  • موبايل Oppo Reno 4 العادي نسخة الـ128 جيجا مع 8 جيجا رام سعرها 6290 جنية
  • موبايل Oppo Reno 4 Pro نسخة الـ256 جيجا مع 8 جيجا رام سعرها 8990 جنية

والموبايلين بينفع تركب فيهم شريحتين إتصال من الجيل الرابع مع كارت ميموري بحجم 256 جيجا في نفس الوقت.


الرأي النهائي :-

مميزات Oppo Reno 4 :-

  • شاشة AMOLED محترمة جدًا
  • أداء معقول جدًا
  • كاميرا أمامية وخلفية مُمتازة
  • شبكة قوية جدًا
  • عوامل أمان سريعة
  • تصميم خفيف وشيك
  • عدسة الذكاء الإصطناعي بمجموعة مُميزات

عيوب Oppo Reno 4 :-

  • خامات بلاستيكية
  • بطارية ضعيفة

وأكيد كنت أتمنى أشوف معالج أقوى وكمان تردد أعلى للشاشة علشان تبقى ميزة حقيقية قوية .. بس مش مشكلة .. وبشكل عام موبايل Reno 4 أرحم بفرق ضخم عن Reno 3 القديم في وجهة نظري.

رينو 4 برو أفضل من رينو 4 في :-

  • مساحة 256 جيجا
  • شاشة Curved بتردد 90 هيرتز
  • شاحن سريع 65 وات
  • مفيش عدسة ذكاء اصطناعي

الـOppo Reno 4 Pro كان محتاج فعلًا يبقى مُميز أكتر في المعالج والكاميرا والخامات، والصوت كمان كان المفروض يكون Stereo .. أي حاجه من دول فعلًا كانت هتفرق.

وبسعر الـReno 4 Pro هتلاقي عندك بدائل أقوى من شركات منافسة زي سامسونج واللي بتوفلك تجربة فلاج شيب بس Lite شوية .. زي الـS10 Lite او الـNote 10 Lite.


فيديو المراجعة :-

قد يعجبك أيضا...

Comments

جاري التحميل...