مراجعة Poco M3 – ملك الفئة الإقتصادية ولا مقلب ؟

النهارده هنقدملكم مراجعة Poco M3 الجديد .. أكتر موبايل عامل قلق حاليًا في الفئة الإقتصادية وكلو بيسأل عنه .. شاومي المرة دي لعبت على نقط تميز للموبايل ده غير الأداء، لعبت على كاميرا وبطارية وصوت .. وكمان التصميم .. فا خلينا ننقل لكم تجربتنا الكاملة للموبايل ورأينا فيه بكل صراحة.

التصميم :-

تصميم Poco M3 معقول جدًا على الفئة الاقتصادية .. كله بلاستيك بالتأكيد بس معمول بشياكة .. الظهر مغطي بطبقة بلاستيك أقرب في الملمس من الجلد .. بيقدملك إحساس انك ماشي بموبايل مش رخيص .. وكده كده موضوع النقشة اللي على الظهر هتخلي الموبايل قابليته للخربشه قليلة جدًا.

في مستطيل بلاستيك كبير فوق في الظهر لامع مكتوب فيه كلمة POCO من ناحية والكلمة كبيرة لإن بوكو بتعمل Branding لنفسها .. بتشهر نفسها بالموبايلات اللي بتبيعها في الأول بسعر حلو .. نوع من أنواع الدعاية .. والناحية التانية رصة الكاميرا الثلاثية .. شكل التصميم لطيف جدًا.

المُميز في الموبايل هنا ان الكاميرا بسينسور 48 ميجا بيكسل ولكن الكاميرا مش بارزه اوي .. في بروز خفيف .. علشان الناس اللي بتخاف من البروز الكبير اللي بيدخل تراب .. ده غير الجراب المرفق في العلبة .. بعيدًا عن إنه خانق اوي على الموبايل بتركبه وتشيله بصعوبه اوي .. مستحيل يخرج من الموبايل لوحده .. وهو برده بيغطي البروز الخفيف للكاميرات.

الموبايل وزنه مش خفيف 198 جرام ولكن مع ذلك لما تمسكه في ايدك مش هتحس انك ماسك موبايل تقيل اوي .. بس تخانته 9.6 ملم .. دي اللي مش هنعرف نقول فيها حاجة علشان البطارية الضخمة اللي هنا.

الشاشة :-

شاشة بحجم 6.53 بوصة IPS LCD بدقة FHD+ مع نوتش صغير للسيلفي .. الشاشة ديه نفس شاشة Redmi 9 بالظبط بنفس مميزاتها بعيوبها .. المُميز هو الدقة المُمتازة بتاعت الشاشة وبتديك كثافة بيكسلات محترمة جدًا.

العيوب بقى .. السطوع كالعادة .. ده مش احسن سطوع .. الشاشة دي بالكتير 400 شمعة .. أقل شوية من Poco X3 في السطوع وبالتالي تحت الشمس المُباشرة هتضايقك شوية في الإستخدام .. ولو ركبت سكرينه تقيله هتضايقك أكتر وأكتر .. زي ريدمي 9 بالظبط لو تفتكر.

حواف الشاشة مش أحسن حاجة .. بس عادي زي باقي الفئة الإقتصادية .. وكتجربة شاشة ألوان وزوايا رؤيا فهي تأدي الغرض في الفئة الإقتصادية .. مقدرش أقول عليها مميزة ولا فيها عيب.

فا زي ما فهمتك .. أنت هتاخد دقة شاشة محترمة جدًا مقابل سطوع مش الأعلى .. وعمومًا معظم الموبايلات الإقتصادية سطوعها مش قوي .. وبقول معظم مش الكل لأن في كام موبايل بالسعر ده سطوعهم اعلى بس دقة الشاشة أقل .. والشاشة عليها حماية Corning Gorilla Glass الجيل التالت وهتلاقي عليها سكرينه.

الأداء :-

معالج كوالكوم سناب دراجون 662 تكنولوجيا 11 نانو .. المعالج ده مش نشيط ..معالج كسول شوية .. كل همه وتركيزه توفير الطاقة .. كمقارنة في الأداء بينه وبين G80 الموجود في Redmi 9 .. فا ريدمي 9 أنشط واسرع.

ضيف على كده تقل واجهة شاومي .. فا حقيقي لو إنت جاي من موبايل سلس وسريع شوية مش هتتبسط من أداء الموبايل ده .. لازم تكون جاي من موبايل قديم شوية علشان التجربة هنا متضايقكش .. في تحديث وصل للموبايل بيحاول يحسن شوية من تجربة الأداء.

وبصراحة الوضع اتحسن .. بس مازال الموبايل مش بالسرعة الكافية اللي تخليني ممكن أفكر اقول عليه سلس .. وانا عارف اني ممكن ابقى متحامل شوية على شاومي لاني متعود منها باخد أفضل اداء في الفئة السعرية مهما كان سعر الموبايل .. هي شاومي عملت اللي عليها ومستخدمه معالج في شركات موبايلات غيرها مستخدماه في موبايلات اغلى بكتير.

بس الحقيقة إن النتيجة اللي أنا شايفها مش قد كده وكنت متوقع أفضل من كده .. يعني الأداء مش نقطة تفوق على المنافسين .. أداء اقتصادي على قد سعر الموبايل .. يدوبك يمشي الدنيا .. ولو بصينا للموضوع من زاوية تانية وحطيت نفسك مكان شاومي هتقول كلمة بسيطة .. هو مين بيقدم أداء كويس في الفئة الاقتصادية ؟ ده غير إن شاومي مقدمة أكتر من ميزة في الموبايل ده بعيدًا خالص عن نقطة المعالج.

مقدرش أنسى نوع ذاكرة التخزين UFS2.1 في حالة النسخة الـ64 جيجا او UFS2.2 في حالة النسخة الأعلى الـ128 جيجا .. هيقدمولك سرعة نقل بيانات مش موجودة في الفئة السعرية ديه غير في شاومي.

بالنسبة للأداء الرسومي فهو متواضع برده .. الألعاب التقيلة زي ببجي وكول اوف ديوتي بيشغلوا على اعدادات جرافيك متوسطة وممكن تحتاج تقللها كمان لأقل اعدادات جرافيك علشان تاخد تجربة ناعمة جدًا .. وبالنسبة للسخونية فا متقلقش المعالج هنا بيسخن أقل من معالجات ميدياتيك فئة الـG والموبايل هنا بيسخن اقل من ريدمي 9 بفرق ملحوظ.

عوامل الأمان وعناصر اخرى :-

بصمة مدمجة بزرار الباور .. مينفعش اقول عليها سريعة .. هي متوسطة السرعة .. والـFace Unlock برده متوسط السرعة .. والموبايل مفهوش لمبة اشعارات .. بس فيه IR Blaster .. فيه كل المستشعرات شغالة تمام ومفهوش NFC.

الميزة اللي أول مرة نشوفها في الموبايل ده في فئته السعريه هو الصوت الـStereo .. الصوت بيطلع من سماعتين مع هزه بسيطة خالص في الظهر تكاد تكون معدومة .. تقيمي للصوت الـ ستيريو هنا .. هو ستريو إقتصادي مينفعش يتقارن بستريو موبايلات اغلى منه زي Poco X3 أكيد .. ولكن مازال مميز لإن مفيش حد تحت الـ3000 جنية بيقدم صوت ستريو.

للأسف في فتحه او سماعة صوت في الفريم العلوي للموبايل هتتسب في إنك لو بتعمل مكالمة ممكن لو حد جمبك هيسمع الصوت .. هتحتاج توطي الصوت لاقل درجة ممكنة علشان اللي جمبك ميسمعش الصوت اوي .. في تسجيل مكالمات .. هيقولك أنت إنك بتسجل بس الطرف التاني مش هيسمع انه بيتسجله مكالمات.

شبكات الـWiFi متوسطة .. شبكات الإتصال برده متوسطة .. لو عندك أزمة في اشارة الـWiFi عندك او ازمة في شبكة الاتصال في بيتك او مكان شغلك او انت فودافون .. فالموبايل ده هيضايقك شوية للأسف.

البطارية :-

بطارية عملاقة بحجم 6000 مللي أمبير .. مكنتش عارف أخلصها حرفيًا .. معلي السطوع على الأخر علشان هو أصلًا مش عالي وعمال استخدم الموبايل جامد بـإختبارات أداء وبالعاب والبطارية عدت الـ10 ساعات شاشة مفتوحة .. وقت حلو جدًا جدًا وممكن توصل 12 و 14 ساعة كمان.

معاك منفذ شحن USB Type C كويس جدًا .. ومعاك شاحن في العلبة 22.5 واط بس بيشحن 18 واط اللي هو الموبايل بيدعمه.

الموبايل بيشحن بالكامل في حوالي ساعتين وربع .. وقت مش وحش خالص على حجم البطارية الضخمة اللي هنا .. ولو مش هتشحن الموبايل للاخر يعني لحد 90% بس هتلاقيه بيشحن في حوالي ساعة ونص لإن أخر 10% بياخدوا وقت طويل شوية .. فـ البطارية هتعجبك في الموبايل ده متقلقش منها.

الكاميرات :-

كاميرا خلفية ثلاثية .. الأساسية 48 ميجا بيكسل فتحة عدسة F/1.8 والتانية 2 ميجا بيكسل ماكرو والتالتة 2 ميجا بيكسل عزل .. والسيلفي 8 ميجا بيكسل فتحة عدسة F/2.1.

بما إن الموبايل جاي بمعالج سناب دراجون فا ده معناه إنك هتقدر تشغل جوجل كاميرا علشان تاخد تجربة تصوير افضل .. واصلًا انت معاك هاردوير كويس بس السوفت وير مش قد كده.

أول مرة نشوف سينسور 48 ميجا بيكسل من شاومي في الفئة الإقتصادية بتاعتها .. ده تقريبا نفس سينسور ريدمي نوت 8 .. اللي كان عظيم بـ جوجل كاميرا .. وفعلا تجربة جوجل كاميرا بالموبايل ده قدمت أداء مميز جدًا .. لإن الإعتماد على تطبيق الكاميرا بتاع شاومي في الموبايل ده غير مقبول تمامًا.

بس طبعا مفيش عدسة Ultra Wide .. دي بقت مهمة للبعض .. بس هنا شاومي شايفه إنها ادتك سينسور خلفي كويس فا شالت العدسة الـUltra Wide علشان تقلل التكلفة .. حركة سخيفة شوية.

الـNight Mode بتاع الموبايل مش حلو تمامًا وفيه Noise .. إنما الـNight Sight بتاع جوجل كاميرا حاجة تانية .. مخلي الموبايل في حته تانيه خالص .. بس طبعًا لازم تكون حابب معالجة جوجل كاميرا والـSkin Toons اللي بيطلعها.

السيلفي مش حلو تمامًا بتطبيق الكاميرا بتاع شاومي .. إنما جوجل كاميرا بيحسن الدنيا شوية .. بس مازال الـHardware نفسه او العدسة السيلفي مش قد كده.

جوجل كاميرا بيرسم الصور .. بيعدل فيها كتير اوي علشان يقدر يطلعلك صور معقولة .. ومازال برده أرحم واحسن بكتير من تطبيق شاومي العادي .. جوجل كاميرا انتشلت الموبايل ده من الضياع.

بالنسبة لتصوير الفيديوهات فا الموبايل أخره 1080p مع 30 فريم في الثانية .. وطبعًا مفيش أي ثبات إلكتروني في الموبايل، والموبايل فيه ميكروفون اضافي لعزل الضوضاء.

شوف تجربة التصوير بالموبايل صور وفيديوهات في فيديو المراجعة في بداية المقال !

سعر Poco M3 :-

• نسخة 64 جيجا مع 4 جيجا رام بسعر 2600 جنية
• نسخة 128 جيجا مع 4 جيجا رام بسعر 2800 جنية

وبينفع تركب شريحتين إتصال من الجيل الرابع مع كارت ميموري بحجم 512 جيجا في نفس الوقت.

الرأي النهائي :-

مميزات Poco M3 :-

• بطارية قوية جدًا مع شحن سريع
• دقة شاشة ممتازة في السعر ده
• صوت Stereo مُميز
• كاميرا خلفية كويسة في حالة إستخدام جوجل كاميرا – حمل جوجل كاميرا للموبايل ده من هنا

عيوب Poco M3 :-

• شبكات متوسطة مش قوية
• سطوع شاشة متواضع
• مفيش عدسة Ultra Wide للتصوير الواسع
• معالج معقول لكن الأداء الفعلي مش قوي

هذا وسيتم نزول هاتف Redmi 9T قريبا بنفس الموافات مع كاميرا خلفية الترا وايد وبسعر متقارب خلال أيام .