مراجعة Realme 7 Pro – هل يقدر ينافس في الفئة المتوسطة ؟

شركة ريلمي أطلقت Realme 7 Pro الجديد في السوق المصري رسميًا .. والنهارده هنشوف مراجعة كاملة لـ ريلمي 7 برو الجديد مع التطوير الحقيقي بين Realme 7 Pro وبين الجيل السابق Realme 6 Pro.

معظمنا إعترض على تسعير Realme 6 Pro في بداية نزوله .. بس مع الزيادات اللي حصلت في أسعار الموبايلات .. فالموبايل حقق نجاح كبير جدًا في فئته السعريه وناس كتير إشترته وإرتاحت معاه جدًا بدون ظهور أي مشاكل .. وعلشان ريلمي تقدر تطور عليه من غير ما ترفع أوي من سعره .. فهي إضطرت تعمل تطويرات وفي نفس الوقت تعمل تنازلات علشان الـPackage أو تركيبة المواصفات متدخلش في فئه سعريه أعلى.

الكاميرات :-

ريلمي 7 برو بيجي بـ4 كاميرات في الظهر .. العدسة الأساسية بدقة 64 ميجا بيكسل بفتحة عدسة F/1.8 بمستشعر سوني IMX682 .. العدسة التانية للتصوير الواسع بدقة 8 ميجا بيكسل بفتحة عدسة F/2.3 .. والعدسة الثالثة هي 2 ميجا بيكسل بفتحة عدسة F/2.4 وهي مُخصصة للعزل، اما العدسة الأخيرة فا هي 2 ميجا بيكسل بفتحة عدسة F/2.4 وهي ماكرو.

وبالنسبة للكاميرا السيلفي فا هي بقت عدسة واحدة بس وبتيجي بدقة 32 ميجا بيكسل بفتحة عدسة F/2.5.

لحد دلوقتي أنت كده خسرت في Realme 7 Pro العدسة الـTelephoto في الكاميرات الخلفية اللي ممكن بالنسبالي ملهاش لازمة أوي .. وخسرت العدسة الـUltra Wide للسيلفي ودي بالنسبالي ليها لازمة.

سوفت وير الكاميرات بقى .. الـRealme 7 Pro زاد فيه الـStarry Mode في الـNight Mode علشان تصور النجوم .. وزاد فيه كمان وضع الـUltra Night في تصوير الفيديوهات وبصراحة لما جربته متبسطتش أوي بتجربته.

التجربة الفعلية بقى لما جربت الـ7 برو الجديد مع الـ6 برو .. انا كنت في حيرة شديدة ومكنتش قادر احدد اني موبايل أفضل .. بس اللي أقدر أقوله .. واللي متأكد منه .. إن أصلًا الـ6 برو الكاميرات بتاعته كانت قوية وكانت عجباني .. ومعالجة الألوان بتاعتها كانت حلوة ومُشبعة وعينك تحب تشوفها.

فالـ7 برو المُستشعر الجديد المُختلف من سوني بتاع الكاميرا الخلفية المفروض إنه Sharp أكتر .. يعني حدة أكتر للصور وتفاصيل أكتر شوية .. بالنسبالي فأنا مش شايف إن في تطوير كبير في الكاميرا الخلفية .. ممكن يكون الـNight Mode بيطلع صور أفتح حاجة بسيطة اوي .. ده اللي لاحظته.

بالنسبة للسيلفي بقى فا أنا إتفاجئت إن سيلفي الـ6 برو في الشمس أحلى .. صور مشبعة مليانة ألوان عينك تحب تشوفها .. بس الكلام ده مش علطول .. يعني في عشوائية شوية في نتايج الصور .. مره تلاقي الـ7 برو بقى مُشبع زي الـ6 برو .. ومرة تلاقي العكس.

وطبعًا منقدرش ننسى إنك خسرت العدسة الـWide Angle في الـ7 برو للسيلفي .. وده كان Option جامد في السيلفي في الـ6 برو .. بس طبعًا هتاخد شكل شاشة أحسن في الـ7 برو.

ولو عاوز رأيي النهائي في السيلفي .. في الشمس عجبني أكتر الـ6 برو .. وفي الإضاءة الداخلية والـNight Mode عجبني أكتر الـ7 برو .. حيرة ما بعدها حيرة.

بالنسبة بقى لتصوير الفيديوهات فالريلمي 7 برو هو نفسه الـ ريلمي 6 برو في تصوير الفيديوهات بدون إختلاف .. الموبايل بيدعم تصوير فيديوهات بجودة 4K مع 30 فريم في الثانية وبيدعم مثبت إلكتروني .. وفي مايكروفون اضافي لعزل الضوضاء.

شوف صور وفيديوهات متصورة بالموبايلين في فيديو المراجعة في أخر المقالة !

التصميم :-

الـ6 برو كان الظهر من الزجاج والموبايل كان وزنه 202 جرام .. الـ7 برو الشركة خلت الظهر من البلاستيك والموبايل بقى وزنه 182 جرام .. بس بصراحة بلاستيك مُحترم وتقفيل كويس مش اي كلام .. ولكنه يزال بلاستيك.

ولكن الجديد بقى .. لغة التصميم إتغيرت خالص في الـ7 برو .. شكل الكاميرات وشكل التصميم المقسوم بطول ظهر الموبايل، جزء لامع وجزء مطفي والإتنين بيعكسوا مع بعض لو في ضوء على الظهر .. التصميم الجديد شيك .. ولكن هل أنت شايف من ناحية شياكة التصميم .. الـ6 برو ولا الـ7 برو اشيك ؟

بالنسبة لبروز الكاميرات فالـ7 برو فيه بروز أقل شوية من الـ6 برو .. لو هنتكلم عن الأبعاد والمسكة في الإيد فشاشة الـ7 برو صغرت وبالتالي أنت بتاخد موبايل بأبعاد أقل حاجة بسيطة ووزن أقل وبالتالي مسكة في الإيد أحسن من الـ6 برو.

ملخص جزئية التصميم .. الريلمي 7 برو أخد شكل مُختلف تمامًا عن الريلمي 6 برو مع بروز كاميرات أقل مع وزن وحجم أقل ولكن بخامات بلاستيك مش زجاج.

الشاشة :-

حيرة كل مرة .. تختار شاشة AMOLED بمعدل تحديث 60 هيرتز ولا شاشة IPS LCD بمعدل تحديث 90 هيرتز ؟ الموضوع بيختلف من واحد للتاني .. أنا ممكن أفضل الـAMOLED الـ60 هيرتز علشان بحب أتفرج على فيديوهات كتير .. واحد تاني Gamer ومُستخدم تقيل للموبايل ميفرقش معاه الـAMOLED وهيفضل الـIPS LCD بمعدل تحديث 90 هيرتز.

ريلمي 7 برو بيجي بشاشة من نوع Super AMOLED بحجم 6.4 بوصة بدقة FHD+ مع ثقب صغير للسيلفي على الشمال .. الـ6 برو بشاشة IPS LCD بحجم 6.6 بوصة بدقة FHD+ مع ثقبين للسيلفي على الشمال.

لما نيجي نتكلم عن جودة ألوان الشاشة .. أحب أفكرك أن الـ6 برو كانت شاشته IPS LCD مُحترمة مش أي كلام .. وأحب أقولك أن شاشة الـ7 برو هنا AMOLED عادية مش Wow.

فأحنا واخدين أعلى شاشة IPS LCD بنقارنها بشاشة عادية AMOLED .. وبالتالي .. أه أكيد في فرق في درجة تشبع الألوان والألوان في الـ7 برو أحسن شوية .. ولكن ممكن من وجه نظري الفرق حوالي 20% بس مش أكتر بينه وبين الـ6 برو .. وفرق السطوع بين الموبايلين برده الـ7 برو أعلى بحوالي 20%.

ولكن الحافة السفلية لشاشة الـRealme 7 Pro لاحظت إنها كبيرة شوية .. كانت محتاجة تقل عن كده شوية .. أحنا في أخر 2020 يا ريلمي.

أنا شايف شاشة الـ7 برو أفضل بنسبة لا تتعدى 20% عن الـ6 برو من ناحية السطوع تحت الشمس ودرجة تشبع الألوان .. والشاشة كمان مفيهاش درجة الإصفرار الموجودة في الـ6 برو .. ده غير إن شكل الشاشة نفسه أحسن بفضل الثقب الواحد مش الثقبين .. بس طبعًا أنت بتخسر التردد العالي الـ90 هيرتز اللي مش هتحس بيه إلا لو كنت إستخدمته قبل كده.

الأداء :-

الـ ريلمي 7 برو جاي بنفس معالج الـ ريلمي 6 برو .. كوالكوم سناب دراجون 720G بمعمارية 8 نانو .. الأداء واحد تقريبًا .. مفيش أي فرق جوهري بينهم.

لو أنت حابب تدخل في جزئية أن الـ90 هيرتز بتوع الـ6 برو هيفرقوا في الأداء عن الـ60 هيرتز بتوع الـ7 برو .. فرق تردد الشاشة بيتسبب في نعومة وسلاسة في الـScroll مش في الأداء الفعلي .. والنعومة بتبان كمان مش في كل التطبيقات.

وعمومًا لو أنت راجل Gamer فـ ريلمي برده مش نسياك ومنزله لك Realme 7 العادي بمعالج جيمنج قوي Helio G95 مع شاشة IPS LCD بمعدل تحديث 90 هيرتز .. أعتقد ريلمي 7 هيكون مناسب أكتر للناس اللي إستخدامها تقيل.

انما الـRealme 7 Pro ده للناس العادية .. وأكيد أدائه في الألعاب أنت عارفه من غير ما اقوله .. لعبة PUBG بتشتغل على High HD .. لعبة COD بتشتغل على Very High .. لعبة Fortnite بتشتغل على اعدادات جرافيك Medium .. أداء الموبايل كويس جدًا في الألعاب .. الأداء الطبيعي بتاع الـSD720G من غير أي جديد يذكر.

عوامل الأمان وعناصر اخرى :-

البصمة دلوقتي بقت تحت الشاشة في الـRealme 7 Pro علشان الشاشة الـAMOLED وبرده سريعه جدًا .. الـFace Unlock سريع جدًا برده في في ريلمي 7 برو.

بسبب الشاشة الـAMOLED في الـ7 برو فـ بقى فيه Always On Display بيظهرلك الإشعارات على الشاشة المطفية .. الميزة اللي مش موجودة في الـ6 برو.

أهم Feature جديدة إتضافت في الريلمي 7 برو هي الصوت الـStereo .. يعني الصوت بيطلع من السماعة السفلية وسماعة المكالمات.

أنا قولت الفرق هيبقى رهيب بينه وبين الـ6 برو .. ولكني إتفاجئت أن الفرق مش كبير .. الـ7 برو بس الصوت مُجسم أكتر وجايلك من ناحيتين .. إنما من ناحية العلو فممكن يكون أعلى 10% مثلا من الـ6 برو مش أكتر .. والسبب في ده إن Speaker الـ6 برو أصلًا كان جامد جدًا وكان عالي ومُجسم.

بالنسبة للـNFC فالـ ريلمي 6 برو القديم مكانش بيدعم الـNFC .. والجيل الجديد منه Realme 7 Pro برده مش بيدعم الـNFC.

أي حاجة أنا مقولتهاش فهي واحد في الموبايلين وشغالة تمام زي المُستشعرات مثلاً .. وقوة الـWiFi وشبكات الإتصال فهي مُمتازة وقوية جدًا في الموبايلين .. متقلقش يعني.

البطارية :-

بطارية Realme 6 Pro كانت 4300 مللي أمبير .. ولكن الشاشة أما بتشغلها علطول على 90 هيرتز كانت بتسحب كتير شوية .. ممكن توصلك لـ6 ساعات مثلًا شاشة مفتوحة.

الـ7 برو البطارية أكبر حاجة بسيطة .. بحجم 4500 مللي أمبير والشاشة 60 هيرتز مش 90 هيرتز .. الإستهلاك أحسن حاجة بسيطة ممكن يوصلك لـ7 ساعات وشوية شاشة مفتوحة.

أصلًا سيبك من البطارية بتقعد قد ايه .. الشاحن كان في الــ6 برو بقوة 30 واط وبيشحن البطارية بالكامل في ساعة او 55 دقيقة .. الـ7 برو الشاحن طلقة 65 واط يا معلم بيشحن البطارية في نص ساعة .. نقله كبيرة في الفئة المتوسطة .. بس طبعًا لازم تشحن بالشاحن الأصلي ووصلة الشحن الأصلية اللي جاية في العلبة.

أسعار الموبايلات :-

• ريلمي 6 برو نسخة الـ128 جيجا مع 8 جيجا رام بسعرها حوالي 5400 جنية
• ريلمي 7 برو نسخة الـ128 جيجا مع 8 جيجا رام بسعر رسمي 5990 جنية وهيكون عليه هدية realme Bud Q يوم 21 أكتوبر على موقع سوق . كوم

والموبايلين بينفع تركب فيهم شريحتين إتصال 4G مع بعض في نفس الوقت بدون مشاكل ومعاهم كارت ميموري خارجي بمساحة 256 جيجا لزيادة مساحة التخزين.

الرأي النهائي :-

التطورات في Realme 7 Pro عن الـ6 برو :-

• شاحن فائق السرعة 65 وات
• شاشة AMOLED مع مميزاتها :-
  – الـAlways On Display
  – البصمة اللي تحت الشاشة
• لعبة التصميم الجديدة الأحدث
• وزن وأبعاد الموبايل أصغر وأرفع
• صوت Stereo لنتيجة تجسيم وتوزيع أفضل

المميزات في Realme 6 Pro عن الـ7 برو :-

• خامات خارجية أفضل من الزجاج
• عدسة Telephoto
• عدسة السيلفي الـWide Angle
• بصمة الإصبع على زِر الباور

وفي النهاية لو انت معاك Realme 6 Pro او Realme XT وبتفكر تغير لـRealme 7 Pro .. فأنا منصحكش .. مفيش تطوير قوي يستاهل .. اما لو انت لسه هتشتري ومحتار ما بين الـRealme 6 Pro والـRealme 7 Pro فالإختيار محسوم .. هات ريلمي 7 برو الأجدد .. ولو موضوع تردد الشاشة فارق معاك وانت Gamer فا روح هات الـRealme 7 العادي الأرخص واللي هنراجعه قريب.

ريلمي مع أوبو :-

شركة ريلمي كانت معودانا على تقديم مواصفات أفضل من مواصفات موبايلات اوبو وفي نفس الفئة السعرية، وكانت بتقدم قيمة محترمة مقابل السعر بإختصار، دلوقتي لو شوفت ريلمي 7 برو مع اوبو رينو 4 هتلاقي نفس الخامات البلاستيك مع نفس الشاشة الـAMOLED ونفس المعالج .. والكاميرات قريبة جدًا من بعض.. الفرق بس في بطارية أكبر شوية في الـRealme 7 Pro مع شحن سريع وصوت Stereo .. بشكل عام الفرق مش كبير، واتمنى شركة ريلمي تيجي على نفسها وتنزل الموبايل بسعر أقل من المتوقع علشان تنافس في مكانها اللي هي جاية علشان تنافس فيه !

فيديو المراجعة :-