مراجعة Realme 7 – وحش الألعاب وصل .. مع أسرع شاحن فئة متوسطة !

لو عايز تشتري أفضل موبايل تحت الـ5000 جنية من ناحية المعالج والأداء .. فالموبايل اللي هنراجعة النهارده هو طلبك .. هنراجع موبايل ريلمي الجديد Realme 7 “النسخة المصرية” .. وبأكد على كلمة مصرية لإن مواصفاتها مختلفة شوية عن النسخة الهندية اللي عملنا عنها خبر من فترة.

المهم .. ريلمي 7 لحد النهارده هو بيقدم أقوى معالج في فئته .. ولكن .. فين التطوير عن Realme 6 ؟ .. هل ريلمي قدرت تضيف مميزات جديدة في ريلمي 7 عن الريلمي 6 ؟ ولا التطويرات محدودة ؟


التصميم :-

موبايل ريلمي 7 جاي بنفس خامات Realme 6 اللي فات .. خامات بلاستيكية بالكامل .. الإختلاف بس ان Realme 7 جاي بتصميم أحدث مع حرف V متكرر بيظهر في ظهر الموبايل مع إنعكاس الضوء عليه.

شكل الكاميرا الخلفية إتغيرت ولكن لسه فيه بروز متوسط الحجم للكاميرات .. مُجملًا شكل التصميم بقى أحسن وأحدث حاجة بسيطة في ريلمي 7 عن ريلمي 6 .. وأكيد في جراب مع الموبايل في العلبة بيغطي البروز بتاع الكاميرا.

ريلمي 7 وزنه 191 جرام وتخانته 8.9 ملم .. موبايل متوسط الحجم بالنسبة للموبايلات في سنة 2020 .. معنديش مشاكل مع مسكته في الإيد.


الشاشة :-

وهنا ريلمي إستخدمت الشاشة الـ6.5 بوصة من نوع IPS LCD بدقة FHD+ بتردد بيوصل لـ90 هيرتز مع ثقب للكاميرا السيلفي على الشمال .. الشاشة كويسة، ألوانها معقولة، سطوعها متوسط تحت الشمس.

وعاجبني إن ريلمي متخلتش عن مبدأ الـ90 هيرتز الموجودين في الموبايل ده علشان الموبايل ده موجه أكتر للـGamers وأكيد دول يفضلوا وجود الـ90 هيرتز في الموبايل بتاعهم.

الشاشة عليها حماية Corning Gorilla Glass الجيل الثالث .. وهتلاقي سكرينة متركبة على شاشة الموبايل أول ما تطلعه من العلبة.

ومن الأخر دي نفس شاشة موبايل Realme 6 اللي فات بالظبط بدون أي إختلاف يُذكر بينهم.


الأداء :-

معالج جديد من ميدياتيك Helio G95 بمعمارية 12 نانو .. وده حاليًا أقوى معالج من ناحية الأداء في الفئة السعرية تحت الـ5000 جنية .. متفقين ؟ ومع الـ90 هيرتز فأنت بتاخد تركيبة أداء مُحترمة جدًا بالسعر ده.

Antutu لـ ريلمي 7

ولكن في نقطة مُهمة .. الأداء الفعلي مختلفش كتير عن الـG90T الموجود في Realme 6 .. الإتنين إدوني نفس الأداء .. واصلًا أداء G90T كان كويس جدًا .. فا جايز علشان كده أنا مش حاسس بالتطور البسيط الموجود في الـG95.

فـ نصيحة ليك لو معاك Realme 6 متفكرش تغيره وتجيب Realme 7 الجديد لإنك مش هتحس بأي فرق من ناحية الأداء.

لو تفتكر معايا Realme 6 كان جاي بنسختين واحدة 4 رام والتانية 8 رام .. وكنت دايمًا بقولك هات الـ8 رام علشان تحس بإستقرار أكتر في الـSoftware .. وعلشان كده ريلمي قررت المرة دي تجيب نسخة واحدة بس من Realme 7 وهي بـ128 جيجا مع 8 جيجا رام مفيش نسخ أقل.

الأداء الرسومي بقى .. ببجي بتشتغل على High HD ومفيش إعدادات أعلى .. بالرغم من أنها كانت بتشتغل على Ultra HDR في Realme 6 .. مش عارف ليه قافلين الإعدادات الأعلى .. كول اوف ديوتي بتشتغل على Very High.

أكيد هتاخد تجربة أداء رسومي مُمتازة على الموبايل ده مع تحسن في أداء المعالج الرسومي في الـG95 الجديد عن G90T.

ولكن اللي متحسنش هو السخونية .. الجهاز بيسخن نفس سخونية ريلمي 6 بالظبط .. ولكن هل في حد مثلًا ريلمي 6 حصله حاجه من السخونية ؟ .. لا مفيش.

هل السخونية أثرت على الأجزاء الداخلية للجهاز .. لا برده .. وأعتقد ريلمي 7 هيبقى زيه .. سخونية مؤقتة لما بتلعب على الموبايل لفترة وبتختفي بدون أي ضرر داخلي على الجهاز بعد ما تسيب الموبايل من ايدك دقيقتين تلاته.


عوامل الأمان وعناصر اخرى :-

البصمة مدمجة على زرار الباور .. والبصمة سريعة جدًا كالعادة .. الـFace Unlock سريع جدًا برده مفيش مشكلة.

مفيش لمبة إشعارات برده كالعادة.

والحاجة اللي ضايقتني لسه برده ريلمي مش ضايفة ميكروفون إضافي لعزل الضوضاء في موبايل بالسعر ده زي ريلمي 6 بالظبط .. معرفش ليه كده !

ولكن التحسن الكبير اللي حسيته هو في الصوت .. صوت Realme 7 نقدر نقول عليه أعلى من المتوسط من الـSpeaker السفلي الوحيد .. وأحسن بفرق ملحوظ من ريلمي 6 اللي كنت بشتكي من صوته.

المُستشعرات كلها موجودة .. ضوء، تقارب، جيروسكوب، وكلهم شغالين زي الفل .. وبالنسبة لقوة إستقبال الشبكات والـWiFi .. فمتقلقش الموبايل ده مُمتاز وزيه زي Realme 6 اللي محدش اشتكى منه.


البطارية :-

البطارية هنا زيها زي Realme 7 Pro الاغلى ودي ميزه تحسبله .. بطارية 4500 مللي أمبير بتستحمل حوالي 6 ~ 7 ساعات شاشة مفتوحة .. وقت معقول جدًا .. الميزة الحقيقية هي الشاحن اللي زي ريلمي 7 برو.

شاحن بيجي بقوة 65 واط .. بيشحن بسرعة مهولة .. نص ساعة بس هتبقى شحنت 100% من البطارية.

لو تفتكر معايا ريلمي 6 كان معاه شاحن 30 واط بيشحنه في حوالي 55 دقيقة اللي هو اصلًا كان وقت ممتاز .. بس ريلمي قالت تعلي أكتر على المنافسين.

وبصراحة وجود الشاحن السريع جدًا ده تحت الـ5000 جنية ميزة قوية جدًا تحسب للموبايل ده .. ولكن علشان يضيفوا الشاحن ده قللوا الكاميرات.


الكاميرات :-

الموبايل جاي بـ4 كاميرات في الظهر .. الأساسية 48 ميجا بيكسل فتحة عدسة F/1.8 بمستشعر غير معروف نوعه .. والتانية 8 ميجا بيكسل للتصوير الواسع فتحة عدسة F/2.2 والتالتة 2 ميجا بيكسل ماكرو والأخيرة 2 ميجا بيكسل للعزل.

والسيلفي بيجي بدقة 16 ميجا بيكسل مع فتحة عدسة F/2.1 بمستشعر سوني المُحترم IMX471.

وبكدا بعد ما كان ريلمي 6 بمستشعر سامسونج GW1 الـ64 ميجا بيكسل .. خسرت المستشعر ده ونزلت لـ48 ميجا بيكسل .. ولكن أنت عارف دايمًا الأرقام مش بتهمنا .. فا خليني ألخصلكم التجربة الفعلية.

بإختصار .. مستشعر Realme 6 القديم أقوى من ريلمي 7 .. وده واضح من فرق التفاصيل اللي طلعت من الموبايلين لما جربت أصور بيهم .. حسيت إن صور ريلمي 6 فيها تفاصيل أكتر ولكن بصراحة مش بفرق عملاق يعني .. الفرق قريب جدًا .. نقول 10% مثلا تفاصيل أكتر لصالح Realme 6.

بس بصراحة ريلمي عالجت عيوب معالجة الصور القديمة في ريلمي 6 .. البورترية مثلا كان بيمسح التفاصيل .. دلوقتي ريلمي 7 مش بيمسح التفاصيل .. في سيناريو صورة تانية لو في ظلة شديدة ريلمي 6 كان بيمسح التفاصيل شوية .. دلوقتي ريلمي 7 واضح إنه مبقاش بيمسح التفاصيل دي من معالجة الصورة.

الإضاءة الداخلية برده لو حد معاه ريلمي 6 كان بيعاني فيها .. دلوقتي ريلمي 7 إتحسن وبقى يعالج الصورة بشكل أحسن .. الـNight Mode مفرقش أوي في التصوير .. وهو مازال مقبول في فئته السعريه .. ولكنه مش احسن Night Mode .. الـM31 والـNote 9 Pro.

السيلفي بقى .. سيلفي Realme 7 مفرقش كتير عن سيلفي Realme 6 اللي كان كويس جدًا في إضاءة عالية .. لسه هنا نفس السيناريو مُستمر.

اللي اتحسن حاجة بسيطة الـNight Mode في السيلفي كان ضايع في ريلمي 6 .. لاقيت فيه تحسن بسيط في ريلمي 7.

بالنسبة بقى لتصوير الفيديوهات فالموبايل بيصور فيديوهات بجودة 4K بـ 30 فريم في الثانية بدون ثبات الكتروني .. الثبات بيشتغل على جودة 1080 فيما أقل.

شوف تجربة التصوير صور وفيديوهات بالكاميرا مع مقارنتها بـRealme 6 في فيديو المراجعة !


سعر الموبايل :-

  • نسخة واحدة 128 جيجا مع 8 جيجا رام بسعر 4790 جنية مصري

وطبعًا بينفع تركب شريحتين إتصال من الجيل الرابع مع كارت ميموري بحجم 256 جيجا في منفذ مخصص له.


الرأي النهائي :-

Realme 7 بالنسبة لـRealme 6 :-

  • تحسن في شكل التصميم الخارجي
  • معالج أقوى بفرق بسيط جدًا مش هتحس بيه
  • صوت Speaker أعلى بفرق ملحوظ
  • شاحن أسرع بقوة 65 وات
  • معالجة أفضل لألوان الصور لكن مع مستشعر كاميرا أقل

هل الإختلافات دي تخليك تبيع Realme 6 لو هو معاك وتروح تجيب Realme 7 ؟ لأ طبعًا .. طيب لو لسه هتشتري .. أكيد تروح لـRealme 7 الأجدد علطول.

Realme 7 بالنسبة للمنافسين :-

  • أقوى معالج في فئته السعرية
  • أسرع شاحن في الفئة السعرية دي
  • شاشة كبيرة بألوان مقبولة وتردد 90 هيرتز ممتاز

الـPackage دي مقبولة جدًا لو انت Gamer او إستخدامك للموبايل تقيل وتبقى متقبل فكرة السخونية بتاعت المعالج .. لكن لو انت مش Gamer ويهمك سوشيال أكتر وفرجة على الفيديوهات فا خليك في موبايل بشاشة AMOLED زي TCL 10 Plus او Galaxy M31 .. بس هتتنازل عن المعالج القوي0

ولو يهمك التصوير أكتر فا الأفضل ليك تزود وتجيب Realme 7 Pro او تفكر في M31 والـRedmi Note 9 Pro .. هيقدموا ليك كاميرات اقوى بفرق كبير.


فيديو المراجعة :-

قد يعجبك أيضا...

Comments

جاري التحميل...