مراجعة Realme 8 – هاتف ريلمي الجديد المُخصص للألعاب .. ولكن !

موبايل Realme 8 اللي ريلمي أعلنت عنه في مصر هو موبايل موجه اكتر للـGamers .. بيجي بمعالج من ميدياتك مُخصص للألعاب او بيظهرلك نقاط تميزة بشكل أكبر في الأداء في الألعاب .. في مراجعة Realme 8 النهارده على موبيزل هنعرف هل الموبايل فعلا ممتاز في الألعاب ولا لا ؟ وهل بيسخن جامد مع المعالج ده ولا لا ؟


التصميم :-

لغة تصميم غريبة شوية .. اول حاجه هتلفت نظرك هي Dare To Leap اللي معناها “يجروء على القفز”، معنديش مشكلة مع المصطلح لكن ليه مكتوبة كبيرة أوي كده ؟

الخامات بلاستيك بالكامل للظهر والفريم .. الظهر لامع بيلم بصمات بس انا عارف ان القصص دي كلها متفرقش لإنك كده كده هتركب الجراب المطفي اللي جاي في العلبة مع الموبايل.

الجزء اللي مكتوب عليه Dare To Leap بيعكس ألوان الطيف، في هيصة جامده في تصميم الظهر بصراحة مش تصميم بسيط جدًا .. الموضوع أذواق لكن معتقدش هتعجب الكل.

شكل تصميم الكاميرا الخلفية غريب وكل عدسة كبيرة شوية وقريبين من بعض أوي .. مش مشكلة هنقول علشان التصميم يبقى مُميز والموبايل يتعرف في إيدك بسهولة.

المهم هو بروز الكاميرات والحمد لله قليل جدًا فا مفيش قلق في النقطة دي .. والموبايل هتلاقيه في إيدك لطيف لإن وزنه 177 جرام والتخانه 8 مللي، فا مفيش أي مشاكل.


الشاشة :-

شاشة Super AMOLED بحجم 6.4 بوصة FHD+ بثقب للسيلفي والشاشة للأسف بتردد 60 هيرتز فقط , داعمة للـ HDR10.

خليني افكرك ان ريلمي السنة اللي فاتت كانت مخليه الشاشة بتاعت Realme 7 من نوع IPS LCD بتردد 90 هيرتز .. وعلشان تخلي نوع الشاشة Super AMOLED مرفعتش معاها معدل التحديث وخلته 60 هيرتز فقط , هنتكلم اكتر عن معدل التحديث في الاداء !

المهم الشاشة نفسها ألوانها مُمتازة Saturated بزيادة وعينك تحب تشوفها اوي زي شاشات سامسونج كده .. السطوع بتاعها مُمتاز تحت الشمس متقلقش منها خالص.

ولكن برده الحافة السفلية كبيرة شوية وكانت المفروض تقل شوية عن كده.


الأداء :-

اهم حاجة في الموبايل المعالج .. هنا ريلمي مغيرتش حاجة الموبايل جاي بنفس المعالج القديم ميدياتيك Helio G95 تكنولوجيا 12 نانو .. وده يعتبر حاليًا أغلى موبايل بالمعالج ده في مصر.

بص المعالج ده كويس سريع .. بس مبقاش أحسن ولا أقوى معالج في فئة السعر دي .. لو ارخص من كده شوية ممكن اقول اه قوي وممتاز وقيمة مقابل سعر.

وفي نقطة تانية .. Animations الواجهة سلسة ومفهاش أي تقطيع والواجهة مستقره ولكن موضوع ان معدل التحديث 60 هيرتز بس محسسني شوية ان الموبايل معجز او قديم.

لان كل الموبايلات اللي بنجربها دلوقتي بمعدل تحديث اعلى .. يمكن بس علشان بنجرب موبايلات كتير فاحتجت اخد وقت شوية على ما ارجع اتعود تاني على الـ60 هيرتز.

كالعادة الموبايل بيسخن شوية في الألعاب ولكن الحق يتقال .. أقل سخونة هتلاقيها من المعالج ده هتلاقيها في ريلمي 8 .. الموبايل بيقدر يشتت الحرارة بشكل مُمتاز بصراحة واكيد ده راجع لخامات داخلية محترمة.

ببجي بتشتغل رسمي على High HD مفيش أعلى من كده .. كول اوف ديوتي على اعدادات جرافيك Very High .. مفيش مشاكل قابلتني في الالعاب .. بس كان نفسي حساسية اللمس على الأقل تبقى اعلى من كده علشان الجيمنج.


عوامل الأمان وعناصر اخرى :-

البصمة تحت الشاشة سريعة مفهاش أي مشاكل .. الـFace Unlock كويس مفهوش مشاكل.

الموبايل جاي بواجهة ريلمي الجديدة المبنية على اندرويد 11 .. احسن حاجة فيها التعديل الكامل في الواجهة .. تقدر تعدل شكل وحجم الايقونات بسهولة .. ألوان القوائم بتاعت الواجهة .. الفونت وحجمه .. حتى شكل الايقونات بتاعت ستارة الاشعارات .. تقريبًا دي أحسن حاجة موجودة في الواجهة دي.

الـ ريلمي 8 مفيهوش NFC .. وفيه ميكروفون اضافي لعزل الضوضاء .. وفيه Always On Display ولكن للأسف مفيهاش أي أشكال أقدر أختار منها، هو شكل واحد بس.

الصوت للأسف الشديد بيكون Mono .. الـSpeaker على انه وحيد لكن صوته معقول .. متوسط .. ولكن الموبايلات كلها Stereo دلوقتي وصوتها في حته تانيه .. وعمومًا أي موبايل ألعاب دلوقتي لازم يكون ستريو علشان بتفرق جامد في اللعب.

مستشعر التقارب المسؤل عن قفل الشاشة والموبايل على أذنك وانت بتعمل مكالمة شغال بكفاءة في ريلمي 8 العادي , والموبايل بيدعم تسجيل مكالمات ولكن بيقول في المكالمة انك بتسجل.

الشبكات وشبكة الـWi Fi والإتصال ممتازة .. مفيش ولا غلطة .. متقلقش.


البطارية :-

بطارية الموبايل ده احسن ما فيه .. بحجم 5000 مللي أمبير .. حرفيًا مش عارف اخلصها، بتتكلم في 9 ساعات شاشة مفتوحة إستخدام تقيل مش خفيف .. وممكن تقعد اكتر.

الموبايل معاه شاحن 30 واط .. مش 65 وات زي ما كان بيجي مع ريلمي 7 النسخة المصرية .. بيشحن البطارية في ساعة .. بقى زيه زي الباقيين والموبايل فقد الميزة التنافسية دي.


الكاميرات :-

ريلمي 8 جاي بـ4 كاميرات في الظهر .. الأساسية 64 ميجا بيكسل فتحة عدسة F/1.8 .. والتانية Ultra Wide بدقة 8 ميجا بيكسل فتحة عدسة F/2.3 والتالتة 2 ميجا بيكسل ماكرو والرابعة 2 ميجا بيكسل عزل .. والسيلفي 16 ميجا بيكسل فتحة عدسة F/2.5.

بص كاميرات ريلمي 8 العادي .. عادية جدًا .. وعلشان أعرف في تطوير حصل ولا لا قارنت الكاميرا مع ريلمي 7 القديم لقيت تحسن في معالجة ألوان الصور تحت الشمس.

انما في الإضاءات الداخلية والـNight Mode .. لاقيت الكاميرا الـ64 ميجا بيكسل هنا بتعاني شوية في التفاصيل .. بتقل كتير .. ممكن يجي تحديث يظبط شوية الكاميرا لإن على وضعها الحالي فلا الكاميرا الخلفية معجبتنيش.

السيلفي في ريلمي 8 معقول .. ماسك العصاية من النص .. قارنته بريلمي 7 لاقيت تحسن كبير في معالجة الألوان سواء في التصوير OutDoor والـInDoor .. ولكن الـNight Mode زي ما هو لإن اصلا الـNight Mode كان حلو في ريلمي 7 ولسه كويس في ريلمي 8.

بالنسبة لتصوير الفيديوهات فالموبايل بيدعم تصوير فيديوهات بجودة بتوصل لـ4K مع معدل تحديث 30 فريم في الثانية .. ومفيش ثبات إلكتروني للأسف، لكن في ميكروفون اضافي لعزل الضوضاء.


سعر Realme 8 :-

  • سعر الموبايل للنسخة الـ128 جيجا مع 8 جيجا رام 4690 جنية مصري

بينفع تركب شريحتين إتصال من الجيل الرابع مع كارت ميموري بحجم 512 في نفس الوقت


الرأي النهائي :-

مميزات Realme 8 :-

  • شاشة Super AMOLED ألوانها ممتازة
  • سوفت وير مُستقر محترم
  • سيلفي كويس نسبيًا
  • بطارية أداءها ممتاز
  • شبكات الموبايل قوية جدًا
  • مستشعر تقارب المسؤل عن قفل الشاشة اثناء المكالمات ممتاز

عيوب Realme 8 :-

  • كاميرا خلفية ضعيفة
  • صوت Mono عادي مش ستريو
  • سعر غير منافس
  • معدل تحديث 60 هيرتز فقط للشاشة
  • مفيش مستشعر الـNFC
  • لا يعتبر تغيير جذري عن ريلمي 7 بخلاف الشاشة

المعالج اللي موجود في ريلمي 8 ممتاز بس هو يعتبر أغلى موبايل حاليًا بالمعالج ده .. لو عايز موبايل Gaming من ريلمي ممكن توفر وتجيب Realme 7 لإن الفرق بسيط .. ومازال Redmi Note 10S الجديد اللي هنراجعه قريب بيقدم مواصفات أقوى وسعره أقل بفرق واضح.

قد يعجبك أيضا...

Comments

جاري التحميل...