شركة ريلمي مُهتمة جدًا بسلسلة الـC الإقتصادية في الفتره الأخيره، وبعد ما نزلت 4 موبايلات في السلسلة دي في الفترة الأخيرة .. الشركة أعلنت عن Realme C25Y الجديد واللي يعتبر هو أقوى موبايل إقتصادي في السلسلة دي .. وده اللي احنا هنقدملكم مراجعته النهارده .. وهنعرف كل حاجه عنه بالتفصيل.
التصميم :-
تصميم C25Y بلاستيكي بالكامل كالعادة لإنه موبايل إقتصادي .. وعمومًا البلاستيك ممتاز وبيستحمل الوقعات والتقفيل ممتاز، واحنا اختبرنا قبل كده خامات سلسلة الـC وهي خامات محترمة.
علشان ريلمي تضيف أي جديد في التصميم عملت خطوط رأسيه بطول ظهر الموبايل .. والظهر نفسه مصنفر علشان ميظهرش فيه بصمات او خرابيش بسهولة، والحركة دي متعودين عليها من ريلمي.
الشكل العام للموبايل هو موبايل هاديء راقي مش مطرقع ومفيهوش هيصة وألوان وإنعكاسات وكده .. والكاميرا الخلفية موجودة في مربع مكتوب عليه Matrix Ai Camera.
البصمة موجودة في الظهر .. مش عارف ليه ريلمي متحطش البصمة على زِر الـPower .. وأرخم حاجه في الظهر بقى هي الـSpeakers وده مكان قديم وبيتكتم بسهولة جدًا.
الـC25Y بيجي بوزن 200 جرام وتخانه 9.1 مللي، موبايل إقتصادي متوسط الحجم، مسكته في اليد معقولة .. والموبايل مش معاه جراب في العلبة، وحاصل على شهادة TÜV Rheinland.
الشاشة :-
شاشة 6.5 بوصة من نوع IPS LCD بدقة HD+ بتردد 60 هيرتز .. الشاشة الإقتصادية المشهورة بتاعت ريلمي، نفسي تتغير بصراحة، مينفعش نستخدم نفس الشاشة كل مره بدون أي تطوير.
هي حاجه ايجابية ان الشاشة تكون موجودة في موبايلات كتير لإنها لو اتكسرت هتقدر تلاقيها بسهولة، بس برده مش بالشكل ده .. الشاشة فعلًا مش منافسة خالص في الفئة دي.
أقدر اقول على الشاشة انها تمشي الغرض مش أكثر، سطوع أقل من المتوسط تحت الشمس .. أحسن ما فيها الألوان، ألوانها مُشبعة وحلوه .. والشاشة بتيجي في العلبة متركب عليها سكرينه.
عيب الشاشة دقتها القليلة، احنا خلاص بقينا نشوف شاشات FHD+ في الفئة الإقتصادية .. ده غير كمان الشاشات الـ90 هيرتز .. فا مفيش أي إبهار في الشاشة دي .. ولا حتى تصميم جديد.
الأداء :-
معالج UNISOC Tiger T618 .. معالج إقتصادي نشيط، أوي مره نجربه .. أداه مش أقل من معالجات ميدياتك G80 والـG88 وده باين من سكور Antutu Benchmark.
ذاكرة التخزين من النوع البطيء الـeMMC 5.1 كالعادة في الفئة الإقتصادية والموبايل بيجي بـ64 جيجا او 128 جيجا .. وفي منه نسختين، والاتنين بـ4 جيجا رام بدون إختلاف.
وعمومًا تجربة الأداء هنا تعتبر تجربة إيجابية بالنسبة للفئة الإقتصادية .. علمًا بإني حاطط في الإعتبار وجود Redmi 10 و Infinix Hot 11S في الفئة دي.
الموبايل مميز في انه جاي بسوفت وير خفيف شوية .. اندرويد 11 على واجهة Realme R Edition واللي هي تعتبر نسخة خام من الاندرويد بس عليها شكل أيقونات ريلمي.
بشكل عام الأداء كويس، كل حاجه ناعمة والموبايل لطيف في الإستخدام والتجربة مُستقره جدًا .. كان ناقص التجربة دي شاشة 90 هيرتز .. كان الأداء هيكون أحسن كتير.
الأداء الرسومي معقول جدًا في الفئة دي .. ببجي بتشتغل على High HD وهتقدملك نفس تجربة الأداء على الموبايلات المنافسه زي ريدمي 10 وانفينكس هوت 11S.
والمعالج لما ضغطت عليه في الإستخدام لاقيت انه معندوش أي مشاكل ومش بيحصله إختناق تمامًا .. بس بيسخن شوية مع الضغط الجامد عليه، سخونيه أكثر حاجه بسيطه عن G80 و G88 .. بس جسم الموبايل بلاستيك وبيشتت الحرارة بسرعة.
عوامل الأمان وعناصر اخرى :-
البصمة موجودة في الظهر .. أداءها كويس، بيحصل بس Animation خفيف أوي في الواجهة .. والـFace Unlock أداءه كويس لو الإضاءه عاليه، لو الإضاءه قلت هيبقى ضعيف لإن السيلفي ضعيف.
الموابيل مفيهوش لمبة إشعارات ولا NFC ولا ميكروفون اضافي لعزل الضوضاء .. موبايل إقتصادي ومش موجود فيه حاجات كتير .. واه بيدعم الـRadio علشان الناس اللي هتسأل.
الـSoftware زي ما قولتلك هو يعتبر اندرويد خام .. فا ملقتش ميزة عمل نسختين من برامج التواصل الإجتماعي .. ملقتش ميزة إني اعرض سرعة الشبكة كامل في الشريط العلوي جنب الـWi Fi.
الموبايل جاي بمستشعر تقارب حقيقي وأداءه زي الفل وبيقفل الشاشة علىى الأذن بكل سهولة في المكالمات .. وكمان جاي بمستشعر Gyroscope حقيقي مش سوفت وير.
صوت الموبايل غريب شوية .. المكان مش حلو تمامًا وبيتكتم بسهولة لإنه في الظهر .. الصوت عالي بس مفيهوش أي Bass وجودة الصوت مش حلوه خالص .. هو عالي بس جودته سيئة.
اما بالنسبة لشبكات الـWi Fi والإتصال فالموبايل ممتاز جدًا ومفيهوش ولا غلطه بصراحة.
البطارية :-
بطارية الموبايل بحجم 5000 مللي امبير .. أداءها كويس جدًا ومفيهوش جديد، حوالي 7 ~ 8 ساعات شاشة مفتوحة إستخدام متوسط .. بس الرخم هنا ان منفذ الشحن MicroUSB 2.0 القديم .. مشكلة كبيرة دي.
الشاحن المُرفق 18 واط، سرعة كويسه وبيشحن البطارية في حوالي ساعتين إلا ربع وده وقت كويس .. عمومًا البطارية والشحن كويسين جدًا بس منفذ الشحن القديم ده هو المشكلة.
الكاميرات :-
كاميرا خلفية ثُلاثية، الأساسية 50 ميجا بيكسل بفتحة عدسة F/1.8 والثانية 2 ميجا بيكسل ماكرو والأخيرة 2 ميجا بيكسل B&W .. الكاميرا السيلفي 8 ميجا بيكسل بفتحة عدسة F/2.0.
تطبيق التصوير هنا شبه جوجل كاميرا .. خفيف ولطيف وبيعالج الصور كويس في الإضاءات العالية بالكاميرا الخلفية، بس مفيش بورتريه للأسف في السيلفي ومفيش Night Mode في السيلفي.
اما شوفت الصور اللي الموبايل بيقدر يصورها في الإضاءات العاليه بالكاميرا الخلفية اعجبت بيها بصراحة .. معالجة صور حلوه جدًا على الفئة الإقتصادية، وأنا متعود دائمًا من ريلمي على معالجة حلوه للصور.
ولما قارنته مع كاميرا Infinix Hot 11S لاقيت معظم الصور اللي طالعه من C25Y أفضل في الألوان وفي معالجة الصور كلها عمومًا، فا دي حاجه كويسة .. كويس ان في موبايل إقتصادي نقدر نطلع بيه صور كاميرا خلفية معقولة، لكن هو في حدود الفئة الإقتصادية كالعادة.
بس اللي معجبنيش تمامًا في Realme C25Y هو الـNight Mode بتاع الكاميرا الخلفية .. مش حلو وخسر لما قارنته بـ Hot 11S.
اما السيلفي فا هو مش حلو خالص في C25Y .. المستشعر نفسه مش حلو مش مجرد معالجة الصور .. والموضوع ده كان باين معايا في الـFace Unlock انه مش بيرضى يفتح في الإضاءات الضعيفة أوي .. وعمومًا انا عارف ان مفيش موبايل إقتصادي فيه سيلفي ممتاز، لكنه أقلهم في السيلفي.
الموبايل بيدعم تصوير فيديوهات بجودة 1080p وللأسف مفيش دعم للميكروفون الاضافي لعزل الضوضاء .. ومفيش مثبت إلكتروني كالمعتاد في الفئة دي.
سعر Realme C25Y :-
- النسخة الـ64 جيجا مع 4 جيجا رام بسعر 2700 جنية
- النسخة الـ128 جيجا مع 4 جيجا رام بسعر 3000 جنية
بينفع تركب كارت ميموري بحجم 256 جيجا وشريحتين إتصال مع بعض في نفس الوقت.
الرأي النهائي :-
مميزات Realme C25Y :-
- أداء كويس جدًا
- سوفت وير خام راقي وسريع
- كاميرا خلفية ممتازة في الإضاءات القوية
- بطارية كويسة وشحن سريع
- مستشعرات مظبوطة
- شبكات قوية جدًا
- تصميم هاديء
عيوب Realme C25Y :-
- شاشة مش الأفضل كدقة ومعدل تحديث
- مكان السماعات في الظهر مش الأفضل
- منفذ الشحن الـMicroUSB 2.0 القديم
- كاميرا سيلفي مش حلوه تمامًا
- بصمة في الظهر .. مكان قديم
الموبايل كان لازم يكون سعره أرخص من كده شوية علشان يبقى منافس أكثر .. خاصًة ان ريلمي نفسها عندها Realme C25s بنفس السعر وبمواصفات أفضل !
Comments