من فترة كدا نزلنا خبر عن موبايل اقتصادي بمعالج جامد اوي وقولنا حرفيًا لازم تستناه، والموبايل ده هو الـRealme C3 .. احب اقولك ان احنا بقالنا فترة بنجرب الموبايل ده .. النسخة اللي هتنزل مصر والوطن العربي هي اللي بتيجي بـ3 كاميرات في الظهر مع بصمة وبمساحة تخزين 64 جيجا مع 3 جيجا رام.
التصميم :-
كالعادة في الفئة الاقتصادية .. التصميم بيكون من البلاستيك بالكامل .. وهنا ريلمي C3 زي كل اخواته في الفئة الاقتصادية، جاي من البلاستيك بالكامل .. بس اللي مختلف فيها هو النقشة او تصميم الظهر .. الموبايل جاي بتصميم بيقولوا عليه Sunrise .. واللي بيعمل شكل اشعة كدا بتطلع من حوالين الكاميرا الخلفية اللي بارزة شوية عن جسم الموبايل.
وطبعًا النقشة ديه تحسها بارزة كدا شوية عن جسم الموبايل تحس انك تقدر تحسها بايديك .. وده كويس علشان الموبايل ميظهرش فيه خرابيش بسهولة .. خصوصًا ان الموبايل للأسف مش جاي معاه جراب شفاف في العلبة.
ريلمي بتقول ان الموبايل متقفل كويس وده معناه انه هيكون مقاوم بس لطرطشة الماء .. مش مقاوم بشكل كامل للماء طبعا فياريت محدش يفهم المعلومة غلط وينزل الموبايل ده في المياه.
بالنسبة للوزن فالموبايل وزنه 195 جرام وتخانته 9 مللي وده راجع للبطارية العملاقة اللي فيه واللي هنتكلم عنها بعدين .. بس عمومًا مسكة الموبايل مقبولة مش سيئة ومش هتحس بتقل الموبايل في ايديك.
الشاشة :-
شاشة تقليدية IPS LCD بتيجي بنوتش Water Drop والشاشة بحجم 6.5 بوصة بدقة HD+ .. طبعا كويس ان احنا بنشوف شاشة بالحجم ده من ريلمي في الفئة الاقتصادية .. بس طبعًا متبقاش طماع وتستنى دقه FHD+ علشان انت بتتكلم في موبايل اقتصادي واكيد ريلمي مش حابه ترفع تكلفة الموبايل.
عمومًا الشاشة الـQuality بتاعتها متوسطة جدا .. مش هقعد امجدلك في الشاشة .. هي يدوبك تقضي الغرض .. والسطوع بتاعها برده متوسط مش عالي اوي .. بس مش هيدايقك خالص في الاستخدام تحت الشمس.
والشاشة بتيجي عليها طبقة حماية Corning Gorilla Glass الجيل الثالث وبتيجي في العلبة متركب عليها سكرينة.
الشاشة ديه فكرتني بشاشة الـRealme 5 .. حطيت الشاشتين جنب بعض والنتيجة اللي وصلتلها شايفهم قريبين من بعض جدًا والفرق بس ان ريلمي 5 سطوعه اعلى بفرق بسيط.
الاداء :-
بص يا سيدي .. الفئة الاقتصادية دايمًا كُنا بنلاقي فيها موبايل يدوبك يقضيك في الاستخدام اليومي العادي .. بس في الالعاب مكنش يقدر يسد .. الدنيا دلوقتي اتغيرت تمامًا.
لان ريلمي استخدمت معالج ميدياتك Helio G70 الجديد بتكنولوجيا 12 نانو وده معالج اقتصادي بس موجه للالعاب يعني بيدعم معالج رسومي كويس جدا.
المعالج بصراحة إداني اداء اول مرة اشوفه في الفئة الاقتصادية .. الاداء كويس جدًا مفيهوش اي مشاكل او تهنجيات .. حسيت اني ماسك Realme 5 من كتر ما الاداء قريب جدا من بعضه.
التهنيج الوحيد اللي كنت بحس بيه وانا بخرج من لعبة تقيله زي ببجي مثلا بحس ان الموبايل بيتفاجئ كدا وياخد ثانية او اتنين علشان يخرج من اللعبة .. وساعات لو عملت اي حاجة وحابب ارجع للعبة تاني الاقيها عادت تحميل، يمكن ده علشان الموبايل بـ3 جيجا رام بس.
يعني من الاخر كدا .. الإستخدام اليومي البسيط من برامج ومكالمات مش هتحس باي مشاكل مع المعالج ده.
الأداء الرسومي بقى .. لعبة PUBG بتشتغل على High HD .. وديه اول مرة نشوف موبايل اقتصادي يشغل ببجي بإعدادات الجرافيك ديه .. وكمان اللعبة بتشتغل كويس جدا بدون اي تهنيجات او تقطيعات .. وبكدا يبقا Realme C3 بيشغل ببجي على اعدادات جرافيك اعلى من Realme 5 اللي كان بيشغلها على اعدادات جرافيك Medium واكيد اعلى من Realme C2 اللي كان يادوبك بيشغلها على اقل اعدادات جرافيك علشان تشتغل كويس.
انما بالنسبة للعبة كول اوف ديوتي شغالة للاسف على ريلمي C3 على اعدادات جرافيك Low .. مفيش اعلى من كدا .. تقريبا اللعبة لسه مش مظبطة امورها مع المعالج .. وعموما اللعبة برده بتشتغل كويس.
وعلشان انا بخاف من معالجات الميدياتيك في الحرارة .. قرصت جامد على الموبايل ده ولاقيت سخونية مقبولة جدا في الجسم البلاستيكي بتاعه خصوصًا من عند الكاميرا من فوق .. بس مش لدرجة انها تلسعك خالص والسخونية كمان مش بتسمع في الشاشة .. فمتقلقش من موضوع الحرارة في الموبايل ده.
عوامل الامان وعناصر اخرى :-
فئة الـC من ريلمي مكنش فيها بصمة .. المرة ديه في بصمة خلفية سرعتها مقبولة جدا .. وكمان في Face Unlock سرعته مقبولة جدا.
الموبايل جاي بواجهة ريلمي المنفصلة عن اوبو وهي Realme UI 1.0 المبنية على Android 10 .. وحاجة حلوة برده ان انت بتاخد موبايل اقتصادي باندرويد 10 من العلبة علطول من غير ما تستنى تحديثات ووجع دماغ .. افضل حاجة في الواجهة هنا هي انها بقت منظمة اكتر شكلها بصراحة احلى وارقى .. وكمان الـDark Mode اللي بحبه جدا موجود هنا .. بس طبعا تجربته مش Wow لان الشاشة IPS LCD والـQuality بتاعتها مش قد كدا.
الموبايل فيه كل المستشعرات حقيقية وشغالة بدون مشاكل وكمان بيدعم وصلة الـOTG .. الموبايل مفيهوش لمبة اشعارات ولا فيه بديل ليها.
صوت الموبايل جاي من سماعة واحدة تحت على اليمين وللاسف صوتها مش عالي خالص وهديله تقييم ضعيف .. يعني الصوت اضعف من Realme 5 اللي هو اصلا مكنش عالي كان يدوبك متوسط.
صوت سماعة المكالمات عالي وممتاز وصوت سماعات الاذن كويس جدا وعالي ومفيهوش مشاكل.
واخيرًا بالنسبة لقوة الشبكة .. فالموبايل هديله تقييم فوق المتوسط .. الشبكة مش ممتازة ومش سيئة .. راضي عن ادائها وده ميمنعكش انك تشتريه .. وكدا كدا بعد ما في مستخدمين بيتشروه بنقدر نعرف من عدد كبير منهم قوة الشبكة معاهم كلهم وهل حد واجهه مشاكل في استقبال الشبكة ولا لا !
البطارية :-
بطارية ضخمة كالعاده 5000 مللي أمبير .. بصراحة مكنتش عارف اخلصها واللي مساعد البطارية ديه مش هقولك ان المعالج موفر .. لا السوفت وير موفر .. والشاشة HD+ بس .. فكرتني ببطارية الـRealme 5.
عمومًا البطارية استحملت معايا حوالي 10 ساعات واكتر شاشة مفتوحة في يوم ونص من الاستخدام القاصي .. فاحب اقولك ان البطارية ديه هتقعد معاك يومين مستريح.
بس اللي زعلني من ريلمي منفذ شحن، لإنه قديم Micro USB 2.0 وشاحن بطيء 10 واط والبطارية بتشحن في حوالي 3 ساعات إلا ربع .. يمكن هي برده حابه توفر علشان متزودش سعر الموبايل او علشان متحطش فيه ميزه هتبقى موجودة في الموبايل الاعلى منه وهو الـRealme 6i اللي نازل في نفس اليوم مصر مع ريلمي C3 إن شاء الله.
الكاميرات :-
الكاميرا الخلفية ثُلاثية، الأساسية بدقة 12 ميجا بيكسل مع فتحة عدسة F/1.8 والتانية 2 ميجا بيكسل للتصوير الـMacro بفتحة عدسة F/2.4 والاخيرة 2 ميجا بيكسل بفتحة عدسة F/2.4 للعزل .. والسيلفي الموجود في النوتش بدقة 5 ميجا بيكسل بفتحة عدسة F/2.4.
الموبايل فيه تصوير عادي وبورتريه وبيدعم الـChroma Boost اللي بيعزز الألوان وكمان فيه عدسة Macro للتصوير عن قرب هي بصراحة معجبتنيش بس اهو حلاوة روح.
ومخبيش عليك، من كتر الموبايلات اللي بنجربها في كل الفئات السعرية .. حُكمِنا على الكاميرا عمره ما يبقى صح إلا لما نحطه جنب موبايل تاني في فئة سعرية قريبه منه .. وبالصدفة كان معانا Realme 5 .. اللي المفروض بنفس العدسة الخلفية الرئيسية 12 ميجا بيكسل فتحة عدسة F/1.8.
والنتيجة لاقينا ان السوفت وير الجديد من ريلمي خلى معالجة الوان الصورة احسن في الـC3 خصوصًا في لون البشرة .. في حاجة معجبتنيش في الـC3 هو ان البورتريه بيعمل زوم شوية ولازم ترجع لورا وانت بتصور .. وساعات كان بيغلط .. بس في المجمل اداء الكاميرا الخلفية عجبني في الـC3 لما حطيته جمب الريلمي 5 الأغلى منه.
وبالتالي معنديش اي مشاكل مع كاميرا الـC3 .. بس طبعا ريلمي شايله الـNight Mode من السي 3 علشان برده تفرقه عن الموبايلات الأغلى منه وبالتالي التصوير بالليل بالـC3 مش هيبقى قد كدا وبرده ده طبيعي في الفئة الاقتصادية.
ندخل بقى على الكاميرا السيلفي، من رقم السيلفي الـ5 ميجا بيكسل وفتحة العدسة الضيقة .. توقعت اداء سيء جدا .. وحقيقي بعد التجربة مش هضحك عليك واقولك التجربة كانت ممتازة يعني .. لا هو فعلًا السيلفي مش قد كدا خالص .. بس يعني يقضي الغرض لو الاضاءة مساعداك.
بس البورتريه في الكاميرا السيلفي بيغلط بشكل كبير والصوره بحسها بهتانة وبردة حطيت الـC3 جمب الـRealme 5 علشان اقدر اشوف الفرق وفعلًا الصور بهتانه في الـC3 .. هي مش مقارنة على قد ما هي توضيح لكفاءة كاميرا السي 3 لحد اما ينزله منافسين بنفس سعره ونقارن معاهم.
ممكن تشوف الصور والفيديوهات المتصورة بـ Realme C3 ومقارنة مع ريلمي 5 في فيديو المراجعة في أخر المقالة.
سعر الموبايل :-
السعر الرسمي 2290 جنية للنسخة 64 جيجا مع 3 جيجا رام .. والموبايل عليه خصم لفترة محدودة على موقع سوق . كوم وهيكون بسعر 2190 جنية … وينفع تركب كارت ميموري وشريحتين اتصال مع بعض في نفس الوقت .
الرأي النهائي :-
رأيي النهائي في Realme C3 .. بيقدملك تجربة العاب محترمة جدا في الفئة الاقتصادية مع شاشة كبيرة وبطارية ضخمة تكمل معاك تجربة الالعاب ديه .. الكاميرا الخلفية مقبولة .. ومعاك بصمة علشان لو مكانتش موجودة كان هيبقى تنازل كبير .. العيب الوحيد بالنسبالي هو أنخفاض صوت الموبايل.
موبايل C3 بالنسبة لـC2 القديم .. نقله نوعية وتطوير كبير جدا .. الريلمي سي 3 افضل في حجم شاشة أكبر .. في معالج افضل بفرق كبير .. في بطارية اكبر .. في كاميرا خلفية احسن .. في ووجود مستشعر بصمة.
والفكره كلها في تسعير الـC3 .. انه أقل من ريلمي 5 اللي سعره دلوقتي حوالي 2500 جنية … لان ريلمي 5 زي ما وضحت لك بيقدم تجربة كاميرات احسن وبيقدم تصميم البعض هيشوفه افضل ومعاه جراب في العلبة وعمومًا هو فئة اعلى … واللي هيبقى التطوير لريلمي 5 هو الـRealme 6i اللي نازل مع الـC3 ان شاء الله وهنراجعه قريب جدا.
انما بالنسبة لـRealme 6 و Realme 6 Pro فـ لسه شوية على ما ينزلوا عندنا .. ممكن على اخر ابريل ولو الظروف متحسنتش ممكن ينزلوا في مايو.
Comments