شركة ريلمي في مصر اتاخرت اوي على ما نزلت موبايل في الفئة المتوسطة العُليا .. وهي عندها بره أكثر من إصدار من موبايل الـGT الـFlagship Killer بتاعها، والشركة قررت انها تنزل Realme GT Master Edition في أخر شهر في سنة 2021 .. الموبايل اللي نازل بره بقاله 5 شهور .. والتأخير ده للأسف مش في صالح الموبايل.
المهم خلينا النهاردة نعرف كل حاجة عن الـ Realme GT Master Edition الجديد و ايه مميزاته وعيوبه !
التصميم :-
تصميم الموبايل مختلف .. الظهر عليه Finish قريب لخامة الجلد، معمول حلو جدًا واحساسه في الإيد مختلف فعلًا عن الزجاج والبلاستيك .. والخامة دي بتخلي الموبايل مسكته كويسة في الإيد وصعب يقع منك، وطبعًا مفيش أي بصمات هتظهر عليه وصعب جدًا يتخدش او تظهر عليه الخدوش.
الجراب اللي بيجي في العلبة من السيليكون ومعموله بنفس تصميم الظهر ودي حاجه كويسة، والموبايل مسكته في اليد كويسة لإن حجمه صغير وشاشته صغيرة، وتخانته 8.7 مم ووزنه 180 جرام.
التصميم مختلف، كشكل فا هو تصميم حلو، كحجم فا هو صغير، فخامة الخامات لأ مش الأفضل، وللأسف مش مقاوم للماء والغبار بشهادة معتمدة زي أبرز منافس ليه وهو Galaxy A52s 5G.
الشاشة :-
شاشة Super AMOLED بحجم 6.43 بوصة بدقة FHD+ بثقب للسيلفي على الشمال وبتردد بيوصل لـ120 هيرتز وبسطوع بيوصل لـ1000 شمعة وبمعدل إستجابة للمس بيوصل لـ360 هيرتز، والشاشة من سامسونج.
الشاشة حوافها مقبولة، مش أصغر حاجه ولا أكبر حاجه، وأداء الشاشة كويس جدًا، من ناحية تشبع الألوان ومن ناحية السطوع وزوايا الرؤية .. الشاشة كويسة جدًا، مقدمة اللي عليها ومش مطلوب منها انها تكون افضل من كده.
لما قارنتها بشاشة Galaxy A52s 5G لاحظت ان الـA52s 5G نسبة تشبع الألوان فيه أفضل حاجه بسيطة اوي، مش الفرق الرهيب، وبشكل عام شاشة الـGT كويسة مفيهاش أي مشاكل ممكن تواجهك.
تقدر تعمل معدل التحديث على الـAuto Select اللي بيحدد لنفسه معدل التحديث المناسب للحاجه اللي انت بتعملها، وده بيقدم أداء سريع وفي نفس الوقت بيوفر في البطارية شوية لإن البطارية مش كبيرة اوي.
مفيش اعلان رسمي عن طبقة الحماية بس الموبايل بيجي في العلبة متركب عليه سكرينه.
الأداء :-
الموبايل بيجي بمعالج كوالكوم سناب دراجون 778G .. المعالج اللي موجود في Galaxy A52s 5G و HONOR 50 و Xiaomi 11 Lite NE، معالج مش جديد .. هيضمن ليك أداء محترم وسريع، مفيش فيه أي مشاكل.
أكيد أداء المعالج أقل من المعالجات الرائدة، لإنه هو في الأخر معالج فئة متوسطة عُليا، ولكنه مستقر ومفيهوش مشاكل وبيقدم أداء كويس .. وسوفت وير ريلمي كويس ومستقر وسريع، يجي في المركز التاني من ناحية الإستقرار وسرعة السوفت وير بعد هونر 50 .. والمركز الثالث A52s 5G وفي المركز الأخير Xiaomi 11 Lite.
انا مخرج من حساباتي أسعار الموبايلات، وبقارن بُناءًا على ان الـ4 موبايلات بينافسوا بعض وبيقدموا نفس المعالج.
المعالج مش بيحصله أي إختناق لما تضغط عليه في الإستخدام ودي حاجه كويسة، بيسخن سخونيه معقولة جدًا زي Galaxy A52s 5G .. وأداء الألعاب كويس مفيهوش أي جديد زيه زي A52s 5G والـHonor 50 .. أداء محترم في ببجي على Ultra HDR و Ultra Frame Rate.
عوامل الأمان وعناصر اخرى :-
البصمة تحت الشاشة وأداءها ممتاز جدًا زي HONOR 50 .. والـFace Unlock سرعته ممتازه.
الموبايل فيه NFC وفيه Always On Display .. وتقدر تزود 5 جيجا رام زيادة من الاعدادات بتاعت الموبايل علشان تاخد سماحية أكبر لفتح برامج في الخلفية.
أهم حاجه في الموبايل ده انه بيدعم مدخل السماعات الـ3.5 مللي زي A52s 5G .. لكن صوت الموبايل للأسف Mono مش Stereo .. لكن ميتقارنش بسامسونج وشاومي لإنه هيخسر قدامهم.
مستشعر التقارب موجود حقيقي وأداءه ممتاز جدًا وبيقفل الشاشة في الوقت الصح ويفتحها في الوقت الصح .. وأداء الشبكات ممتاز جدًا، مش هتواجه أي مشاكل في الشبكات سواء اتصال او Wi Fi.
البطارية :-
بطارية الموبايل بسعة 4300 مللي امبير .. بتوصل لوقت شاشة مفتوحة من 6 لـ7 ساعات في حالة لو مختار الـAuto Select لمعدل تحديث الشاشة.
اما بالنسبة للشحن فا هو ممتاز بقدرة 65 وات Super Dart شحن البطارية بالكامل في 25 دقيقة.
الكاميرات :-
الموبايل بيجي بـ3 كاميرا خلفية .. الأساسية 64 ميجا بيكسل بفتحة عدسة F/1.8 مفيهاش مثبت بصري، الثانية 8 ميجا بيكسل بفتحة عدسة F/2.2 وهي Ultra Wide .. الأخيرة 2 ميجا بيكسل ماكرو، والكاميرا الأمامية بدقة 32 ميجا بيكسل بفتحة عدسة F/2.5.
معالجة ريلمي كويسة جدًا في الكاميرات .. هتلاقي الألوان مُشبعة في معظم الصور، حتى هتلاقي الموبايل بيخلي لون السماء أزرق بزيادة .. وده بيخلي الصورة شكلها حلو في النهاية .. ولكن عجز الكاميرا بيبدأ يظهر في الإضاءه الداخلية، التفاصيل بتقل كتير .. والصور بتبقى مش حقيقية، والـNight Mode بيلحق الدنيا شوية.
لما قارنت مع Galaxy A52s 5G لاقيت ان معالجة الـA52s حقيقية أكثر .. نقلت الصورة زي الحقيقه بالظبط، اما GT Master لعب جامد في ألوان الصور، الـHDR ممتاز في الموبايلين لكن في الـA52s 5G مظبوط أكثر.
في الإضاءة الداخلية، سامسونج يبدأ يتفوق أكثر وأكثر من ناحية التفاصيل ونقل الألوان الحقيقية، ريلمي بيلعب جامد في ألوان الصور في الأضاءه الداخلية لدرجة بتخلي الصورة تروح في حته تانيه خالص.
اما بالنسبة للسيلفي فا هو بيفتح البشرة شوية عن الطبيعي، وبيعزز الألوان بزيادة برده وبيظبط لون السماء أكثر، والـSharpness في الصور بيبقى قليل شوية .. ولما قارنت مع A52s 5G احتارت بين الموبايل اللي بيقدم صورة واقعية والموبايل اللي بيقدم صورة حلوه ملعوب في ألوانها.
بالنسبة لتصوير الفيديوهات فالموبايل بيدعم تصوير بجودة 4K مع 30 فريم في الثانية .. ومفيش للأسف مثبت بصري، في مثبت إلكتروني بس.
سعر Realme GT Master Edition :-
الاسعار الرسمية في مصر .
للنسخة 128 جيجا مع 6 جيجا رام بحوالي 6800 جنية .
للنسخة 256 جيجا مع 8 جيجا رام بحوالي 7600 جنية .
الرأي النهائي :-
مميزات Realme GT Master Edition :-
- تصميم مختلف عن اي موبايل منافس
- شاشة سوبر أموليد 120 هرتز كويسة جدا
- عوامل أمان سريعة جدًا
- شبكات ممتازة
- سرعة شحن قوية جدًا
- سوفت وير سريع ومستقر
عيوب Realme GT Master Edition :-
- كاميرا خلفية متواضعة في الاضاءات الضعيفة
- مفيش مقاومة للماء والغبار
- الصوت Mono
Comments