مراجعة Realme X3 SuperZoom – أقوى موبايل من ريلمي في مصر !!

موبايل جديد من ريلمي في السوق المصري وده أغلى موبايل من ريلمي حاليا .. وهو Realme X3 SuperZoom .. وفي البداية أحب أعرفك ان X3 SuperZoom بيجي مبني على موبايل Realme 6 Pro .. ونازل بضعف السعر تقريبًا .. فا هل فعلًا ريلمي ضافت تطورات قوية أوي كده في الـX3 SuperZoom تخليه يستاهل السعر ده ؟

التصميم :-

الـX3 SuperZoom جاي بتصميم ظهر من الزجاج مع فريم بلاستيكي .. التصميم شكله شيك من ناحية اللون والتدرج اللي عليه .. بس معجبنيش شكل الكاميرات اللي محطوط في كل موبايلات ريلمي.

وعلشان ابقى صريح معاك .. ده نفس شاسية الـRealme 6 Pro .. مع نفس الظهر الزجاج والفريم البلاستيكي ونفس التخانة الـ8.9 ملم ونفس الوزن الـ202 جرام بالظبط.

فمُجملًا .. شكل التصميم كويس بس فريم بلاستيك بالسعر ده مش مقبول .. وبرده مجملًا كان نفسي خطوط التصميم تتغير خالص عن موبايل بنص سعره واللي هو الـRealme 6 Pro .. خصوصًا ان ده اول موبايل غالي من ريلمي في مصر.

وبروز الكاميرات في الـRealme X3 SuperZoom كبير نسبيًا .. وفي جراب مُرفق في العلبة بيغطي البروز ده.

الشاشة :-

شاشة بتيجي بحجم 6.6 بوصة من نوع IPS LCD بدقة FHD+ .. بتردد بيوصل لـ120 هيرتز .. مع ثقبين للسيلفي على الشمال.

مُجملًا وقبل ما نتكلم كده .. ديه نفس شاشة الـ6 برو من ناحية النوع والـQuality ودرجات السطوع والحواف اللي حوالين الشاشة .. فإستخدام نفس كل الحاجات ديه في الـX3 SuperZoom اللي سعره أغلى بحبه حلوين .. انا شايفه مش حلو .. يعني الشاشة الـIPS LCD والحافة السفلية مينفعوش في موبايل بالسعر ده.

النقطة الوحيدة اللي ممكن تشفع للشاشة هنا هي الـ120 هيرتز اللي بتخلي فعلًا تجربة الأداء مُمتعه ومُمتازه وهتبقى مُتناغمه أكتر مع الـProcessor .. النقطة ديه هنتكلم عنها بالتفصيل.

الشاشة بتيجي عليها طبقة حماية Corning Gorilla Glass الجيل الخامس .. والموبايل بيجي في العلبة متركب عليه سكرينة.

الأداء :-

ريلمي قالت بدل ما تستخدم معالج داعم لشبكات الجيل الخامس اللي مش موجودة في مصر .. فا إستخدمت أقوى معالج داعم لشبكات الـ4G علشان ميرفعش سعر الموبايل على الفاضي .. وهو الـSnapdragon 855+.

ومع ذاكرة داخلية من نوع UFS 3.0 مع شاشة بتردد عالي 120 هيرتز .. مع سوفت وير مستقر بسبب الـ12 جيجا رام اللي في الموبايل ده .. كل التركيبة ديه هتديك أداء خيالي .. الموبايل بيطير حرفيًا ومش هتحس منه بأي تقصير في المهام اليومية وميقلش أي حاجة عن أي Flagship حقيقي.

الأداء الرسومي .. كل حاجة بتشتغل على اعلى إعدادات .. ببجي بتشتغل على HDR وفريمات Extreme .. واللعبة بتكون ناعمة وسلسة جدًا جدًا .. موبايل Gaming فعلًا.

لعبة كول اوف ديوتي بتشتغل على اعدادات جرافيك Very High وفريمات Max .. وبرده اللعبة بتشتغل كويس جدًا جدًا .. اما فورت نايت بتشتغل على Epic اللي هي أعلى إعدادات جرافيك ممكن تشوفها في اللعبه ديه .. والتجربه بتبقى مُمتازة جدًا.

بس للأسف الموبايل بيسخن شوية مع الإستخدام .. خصوصًا وأنا معلي الإضاءة ومشغل الـ120 هيرتز .. البطارية بتتشفط والموبايل بيسخن .. التبريد كان محتاج يبقى أحسن من كده.

عوامل الأمان وعناصر اخرى :-

البصمة موجودة على زرار الباور وسريعة جدًا  .. والـFace Unlock سريع جدًا برده .. مفيش أي مشاكل في عوامل الأمان .. طبعًا مفيش لمبة إشعارات ولا في بديل ليها.

الموبايل داعم لخاصية الـNFC .. وفي موتور خاص للـHaptic Feedback اللي بيعمل Vibrate بسيط مع الكتابة على شاشة الموبايل.

والمُستشعرات كلها موجودة وشغالة في الموبايل ده بس للأسف مفيش تسجيل مكالمات .. أما بالنسبة للصوت فهو جاي من Speaker وحيد سفلي وصوته عالي .. بس تجربة الـGaming اللي هنا كانت هتبقى أفضل لو الصوت Stereo .. حقيقي زعلان من عدم وجود Stereo هنا.

صوت سماعات المكالمات كويس جدًا .. ومفيش مدخل سماعات 3.5 ملم .. واخيرًا قوة شبكات الـWifi والإتصال هنا مُمتازة مفيهاش اي مشاكل.

البطارية :-

بطارية صغيرة بحجم 4200 مللي أمبير .. أيوة صغيرة على الـ120 هيرتز والمعالج اللي بيطير هنا حرفيًا .. هتقعد معاك حوالي 6 ساعات شاشة مفتوحة.

والشاشة المُرفق نفس شاحن الـ6 برو الـ30 واط .. هيشحن البطارية في ساعة .. وأنا كنت محتاج شاحن أسرع او بطارية أكبر أو دعم لشحن لاسلكي علشان أحس بفرق عن الموبايل الأرخص !

الكاميرات :-

الموبايل جاي بـ4 كاميرات في الظهر .. الأساسية 64 ميجا بيكسل بفتحة عدسة F/1.8 مستشعر سامسونج GW1 وديه نفس عدسة الـ6 برو الأساسية .. والتانية 8 ميجا بيكسل فتحة عدسة F/3.4 بيرسكوب فيها مثبت بصري وبتعمل زوم 5X اوبتيكال وبتوصل لحد 60X ديجتال .. والتالتة 8 ميجا بيكسل للتصوير الواسع فتحة عدسة F/2.3 والأخيرة 2 ميجا بيكسل ماكرو فتحة عدسة F/2.4.

والسيلفي مُزدوج .. الرئيسية بدقة 32 ميجا بيكسل بفتحة عدسة F/2.5 والتانية للتصوير الواسع 8 ميجا بيكسل مع فتحة عدسة F/2.2.

الصور اللي بتطلع من الموبايل ده عينك تحب تشوفها .. يعني ايه ؟

يعني نهج ريلمي المعروف بتاع الصور المُشبعة اوي بالألوان موجود في الـX3 SuperZoom وبقوة .. خصوصًا مع لون السماء اللي بيخلي الصور تحفة فعلًا .. بس كتفاصيل في موبايلات كتير أقوى من ناحية التفاصيل زي الـNova 7.

اما بقى لما جربت الزوم .. زوم بسيط كده 2X لاقيت الألوان بقت مشبعة أكتر .. زوم 5X ومازالت الصورة فيها تفاصيل وألوان والعدسة تعرف تعتمد عليها فعلًا .. اما بقى زوم الـ60X ضعيف جدًا والتفاصيل مش بتكون واضحة ومش بيُعتمد عليها .. الزوم بيكون كويس لحد 20X بالكتير.

وبالنسبة للعدسة الماكرو الموجودة هنا فا هي ضعيفة جدًا ولا تُقارن بأي موبايل منافس .. والتصوير في إضاءه داخلية بيظهر قلة التفاصيل واللعب الكبير في الألوان .. بس بيخلي الصورة حلوة وعينك تحب تشوفها.

لما قارنت مع Realme 6 Pro لاقيت ان الـX3 SuperZoom أهدا كتير عن الـRealme 6 Pro من ناحية اللعب والتعديل وفرقعة الألوان .. بس الصور واخدة Look قريب بنفس التفاصيل تقريبًا .. لإنه نفس السينسور والفرق في المعالجة بس.

ولما جربت أصور في الضوء المحمر بتاع المغرب ده .. لاقيت ان تأثير إحمرار لون البشرة قل كتير في الـX3 SuperZoom عن الـRealme 6 Pro.

لكن في الإضاءات الداخلية محستش بفرق في قوة التفاصيل ولا حتى في الـNight Mode .. ودي حاجه مش لطيفة، إني أقارن الـX3 SuperZoom بموبايل تاني بنص سعرة والنتايج تبقى مُتشابهه اوي كده مع فروقات بسيطة في الألوان.

اما السيلفي في الـX3 SuperZoom فا هو واخد Look كده مُختلف شوية .. لوك الصور فاتحه زيادة عن الطبيعي والألوان بتاعتها مُشبعه اوي .. معنديش مشاكل مع السيلفي اللي هنا .. والعدسة الـUltra Wide بتاعت السيلفي كويسة بس بتقل في التفاصيل وساعات الألوان.

اما بالنسبة للمقارنة مع الـ6 برو .. فلأ هنا في إختلاف في الشكل العام للصور السيلفي والـLook بتاعها .. وممكن أفضل شوية الـLook بتاع صور سيلفي الـX3 SuperZoom في مُجمل الصور عمومًا .. بس في الإضاءات الضعيفة الإتنين قدمولي نفس الأداء.

بالنسبة بقى لتصوير الفيديوهات بالـRealme X3 SuperZoom .. فالموبايل هنا بيقدر يصور 4K مع 30 فريم او 60 فريم .. والموبايل فيه مُثبت إلكتروني .. وأكيد كنت اتمنى اشوف مثبت بصري بس للأسف هو موجود في العدسة الـTelephoto بس .. وعندك وضع الـHDR تقدر تشغله بس علشان تلاحظ النتيجة لازم تكون ثابت والإضاءه تكون ثابته.

وتقدر تعمل زوم بيوصل لحد الـ10X وانت بتصور فيديو بس للأسف الجودة مش بتكون كويسة .. هي اه 4K بس ضايعه خالص .. والعدسة الـUltra Wide بتصور على 1080p بس ومش بتصور على 4K .. وتقدر تصور شخص فيديو برده وتعزله عن الخلفية في الفيديو ودي ميزة كويسة لكن لازم الشخص يكون ثابت.

بالنسبة بقى لتصوير الفيديوهات بالكاميرا السيلفي .. فا العدستين اللي في الموبايل بيصوروا اخرهم على 1080p ومفيش 4K ودي حاجه مش لطيفة اوي .. ووضع الـUltra Steady موجود في الكاميرا السيلفي.

شوف صور وفيديوهات متصورة بالموبايل في فيديو المراجعة في أخر المقالة !

سعر الموبايل :-

سعر Realme X3 SuperZoom للنسخة المتوفرة منه بمساحة تخزين 256 جيجا مع 12 جيجا رام هو 9590 جنية مصري.

وينفع تركب شريحتين إتصال من الجيل الرابع ومينفعش اصلًا تركب كارت ميموري.

الرأي النهائي :-

ايه اللي بيقدمه X3 SuperZoom زيادة عن الـRealme 6 Pro ؟

الموبايل نازل اغلى من ريلمي 6 برو بحوالي 4000 جنية مصري، والمفروض انه بيقدملك بيهم :-

• معالج أقوى بفرق كبير
• نفس الشاشة بس بتردد أعلى
• عدسة كاميرا زوم أقوى
• دعم خاصية الـNFC
• دعم الـHaptic Feedback
• مساحة تخزين و رام أكبر

عرفني في الكومنتات هنا على الموقع .. هل الفروقات دي تستاهل فرق السعر الـ4000 جنية ده ولا لأ ؟

مميزات Realme X3 SuperZoom :-

• معالج قوي جدًا
• شاشة بتردد 120 هيرتز
• عوامل أمان سريعة جدًا
• كاميرا سيلفي مقبولة جدًا
• عدسة زوم مقبولة لحد 30X

عيوب Realme X3 SuperZoom :-

• خامات أقل بسبب الفريم البلاستيك
• سطوع الشاشة الأقل وسط المنافسين
• شاشة IPS LCD أقل من المنافسين
• أقل من المنافسين في الكاميرا الخلفية من ناحية التفاصيل

وكنت اتمنى بصراحة ان شركة ريلمي تميز الموبايل ده بحاجه زي صوت Stereo او مدخل الـ3.5 مللي او الشحن اللاسيلكي .. او حتى شهادة مُعتمدة ضد المياة او طبقة حماية على الظهر .. بس للأسف ريلمي مضافتش أي ميزة في الموبايل !

فيديو المراجعة :-