مقارنة Redmi Note 11 Pro 4G مع Galaxy A52s 5G – صراع الفئة المتوسطة !

بعد ما Redmi Note 11 Pro 4G الجديد نزل السوق المصري وراجعناه لكم .. النهارده هنقارن بينه وبين أقوى موبايل في الفئة المتوسطة العُليا خلال الفترة اللي فاتت دي كلها .. وهو Galaxy A52s 5G .. وهنعرف هل مازال A52s 5G متصدر الفئة دي ولا نوت 11 برو 4G الجديد من شاومي يقدر “يسد” قدامه!


التصميم :-

انا مايل أكثر لتصميم نوت 11 برو 4G .. تصميم فخم شيك .. والخامة الزُجاجية بالرغم من إنها مش اعتمادية ولو وقع هيتكسر إلا أنه بيقدملك تجربة فاخرة وملمس ممتاز وتجربة عامة لطيفة جدًا.

اما جالاكسي A52s 5G تصميم بلاستيك تقليدي وكلنا عارفين شكله الموجود في باقي موبايلات سلسلة Galaxy A من سامسونج .. وبيتميز بميزة حصرية وهي مقاومة الماء والغبار بشهادة IP67 .. وكمان بروز الكاميرات في الموبايل أقل بكتير عن نوت 11 برو 4G .. والكاميرا نفسها محمية بشكل أفضل.

نوت 11 برو 4G كـ حجم فا هو أكبر شوية من سامسونج وأثقل شوية .. خامات زُجاجية وشاشته أكبر وبطاريته أكبر.

في النهاية Redmi Note 11 Pro 4G يكسب كفخامة وخامات وشياكة .. اما كإعتمادية وحجم أصغر وأخف وشهادة مقاومة للماء والغبار فا Galaxy A52s 5G يكسب.


الشاشة :-

الشاشتين من نوع Super AMOLED بدقة FHD+ بتردد بيوصل لـ120 هيرتز .. شاشة A52s 5G بقياس 6.5 بوصة، اما شاشة Note 11 Pro 4G بقياس 6.67 بوصة.

الشاشتين ممتازين، شاشة A52s 5G ممتازة ومتكاملة جدًا .. لكن شاشة نوت 11 برو 4G أحلى ومنورة أكثر وسطوعها أعلى، لكن الإتنين زي بعض في الألوان.

الحافة العلوية في نوت 11 برو 4G أقل حاجه بسيطة عن شاشة A52s 5G .. الشاشتين عليهم طبقة حماية Corning Gorilla Glass الجيل الخامس ومتركب عليهم سكرينه.


الأداء :-

معالج جالاكسي A52s 5G هو سناب دراجون 778G بتكنولوجيا 6 نانو ميتر .. داعم لشبكات الجيل الخامس .. اما نوت 11 برو 4G بمعالج ميدياتك Helio G96 بتكنولوجيا 12 نانو ميتر .. شبكات الجيل الرابع فقط.

كـ قوة معالج وأداء فعلي، الـA52s 5G متفوق .. أسرع في فتح البرامج، سرعة ذاكرة التخزين الفعلية أسرع .. وكمان على المدى البعيد معالج A52s 5G أقوى .. وموفر أكثر في الإستهلاك.

ببجي بتشتغل على Ultra HDR في A52s 5G .. وبتشتغل على High HD بس في Note 11 Pro 4G، وبالنسبة للسخونة فا A52s 5G بيتفوق بفرق واضح جدًا بسبب الخامات البلاستيك وتكنولوجيا التصنيع الموفرة.


عوامل الأمان وعناصر اخرى :-

بصمة الإصبع موجودة على زِر الباور في نوت 11 برو 4G .. وموجودة تحت الشاشة في A52s 5G .. وبصراحة بصمة نوت 11 برو 4G عملية أكثر وسريعة أكثر .. والـFace Unlock برده أسرع في شاومي عن سامسونج.

الموبايلين فيهم ميكروفون اضافي لعزل الضوضاء .. فيهم خاصية NFC .. فيهم Always On Display .. فيهم إمكانية عمل نسختين من برامج التواصل الإجتماعي .. نوت 11 برو 4G بيتفوق في الـIR Blaster.

الموبايلين هنا صوتهم Stereo ممتاز جدًا .. نوت 11 برو 4G صوته أعلى من جالاكسي A52s 5G .. والـA52s 5G الـBass بتاعه أفضل، مُجملًا الإتنين ممتازين بس لو بتدور على درجة علو صوت فا نوت 11 برو 4G يكسب.

الموبايلين فيهم مدخل سماعات 3.5 مللي .. اما بالنسبة لمستشعر التقارب فا الإثنين مش أفضل حاجه .. بس نقدر نقول ان A52s 5G أفضل شوية عن نوت 11 برو 4G.

بالنسبة لشبكات الإتصال فا هنلاقي Note 11 Pro 4G أفضل حاجه بسيطة من A52s 5G .. والإثنين مش الأقوى.


البطارية :-

نوت 11 برو 4G بطاريته 5000 مللي امبير .. جالاكسي A52s 5G بطاريته 4500 مللي امبير .. أداء بطارية شاومي أفضل بالرغم من أن المعالج بيستهلك طاقة بشكل أكبر.

وكمان شاحن شاومي أسرع بفرق كبير .. الشاحن بقدرة 67 وات وبيجي في علبة الموبايل .. بيشحن البطارية بالكامل في ساعة إلا رُبع، انما A52s 5G أخره في سرعة الشحن 25 وات ومش بيجي معاه في العلبة.


الكاميرات :-

الكاميرا الخلفية الرئيسية في A52s 5G بدقة 64 ميجا بيكسل بمثبت بصري حقيقي، اما نوت 11 برو 4G بدقة 108 ميجا بيكسل ومفيهاش مثبت بصري .. السيلفي في A52s 5G بدقة 32 ميجا بيكسل .. وفي نوت 11 برو 4G بدقة 16 ميجا بيكسل.

لو بتدور على موبايل واقعي في التصوير بشكل كبير فا A52s 5G بتحديث Android 12 هيقدملك تجربة تصوير حقيقية بشكل كبير .. الموبايل بيتفوق في أغلب أوضاع التصوير، مشهد واقعي جدًا بمعالجة لألوان البشرة وألوان الصورة كلها لصالح A52s 5G .. وده سواء في الإضاءه الخارجية او الداخلية.

وفي الإضاءات الداخلية الفرق بين الموبايلين بيكبر .. وكمان لو مشغل Night Mode هتلاقي سامسونج أفضل بفرق كبير .. تفاصيل أفضل بفرق واضح، معالجة أفضل للصور .. ألوان واقعية أكثر.

بالنسبة للكاميرا السيلفي فا الحق يتقال ان الإتنين مش أفضل في السيلفي .. بس أنا ميال أكثر لـ سيلفي A52s 5G اللي بيحاول يجيبلك تفاصيل ولون بشرة أفضل ودي حاجه أهم في السيلفي .. ولما الإضاءه بتقل هتلاقيه سامسونج تفاصيله أكثر وأكثر بفضل الـNight Mode اللي مش موجود في سيلفي نوت 11 برو 4G.

بالنسبة لتصوير الفيديوهات فا جالاكسي A52s 5G بيقدر يصور فيديوهات بجودة 4K مع مثبت بصري .. اما نوت 11 برو 4G بيصور بجودة 1080p فقط مع مثبت إلكتروني .. الموبايلين فيهم ميكروفون اضافي لعزل الضوضاء.


اسعار الموبايلات

أسعار الموبايلات :-

سعر Galaxy A52s 5G :-

  • نسخة 128 جيجا مع 8 جيجا رام بسعر 8000 جنية
  • نسخة 256 جيجا مع 8 جيجا رام بسعر 9300 جنية

والموبايل بيدعم تشغيل شريحتين إتصال من الجيل الخامس او شريحة مع كارت ميموري بحجم 1 تيرا.

سعر Redmi Note 11 Pro 4G :-

  • نسخة 64 جيجا مع 6 جيجا رام بسعر 6550 جنية
  • نسخة 128 جيجا مع 6 جيجا رام بسعر 6950 جنية
  • نسخة 128 جيجا مع 8 جيجا رام بسعر 7450 جنية

والموبايل بيدعم تركيب شريحتين إتصال 4G او شريحة مع كارت ميموري بحجم 1 تيرا.


الرأي النهائي :-

نقاط تفوق Galaxy A52s 5G :-

  • كاميرات أمامية وخلفية أفضل
  • معالج أقوى وسخونيه أقل
  • إعتمادية التصميم ومقاومة الماء

نقاط تفوق Redmi Note 11 Pro 4G :-

  • شاشة أكبر وسطوع أعلى
  • صوت أعلى
  • بطارية أقوى وشحن أسرع
  • عوامل أمان أسرع بكتير
  • سعره الرسمي أرخص

جالاكسي A52s 5G أقوى في نقطتين مُهمين جدًا وهما المعالج والكاميرات .. لو تقدر تتقبل عيوبه التانيه زي سرعة الشحن والبصمة البطيئة والشبكات الضعيفة فا أنصحك تشتريه بدون تردد .. اما لو الحاجات دي هتفرق معاك فا ساعتها ممكن تفكر تشتري Redmi Note 11 Pro 4G هيكون أفضل لك.

وممكن تفكر في Realme GT Master Edition .. متوازن، هيقدملك المعالج الأقوى سناب دراجون 778G مع سرعة الشحن الـ65 وات وبصمة تحت الشاشة سريعة جدًا .. معاهم شبكة قوية جدًا .. لكن الصوت عادي مش Stereo والكاميرات أقل شوية من نوت 11 برو 4G و A52s 5G .. وسعره في حدود 8000 جنية.

قد يعجبك أيضا...

Comments

جاري التحميل...