مقارنة Realme 6i مع Redmi Note 8 – مين أفضل موبايل بسعر 3000 جنية ؟

اشهر فئة سعريه في مصر دلوقتي هي من 2500 جنيه لـ3000 جنيه .. ودائمًا بيجي استفسارات كتير عنها .. ايه اكتر موبايل متكامل تحت الـ3000 جنية ؟ ويكون بيقدم اداء كويس وكاميرا كويسة ؟ .. وعلشان كده احنا دايمًا في موبيزل بنهتم بالفئة السعرية ديه .. وبعد ما الـRealme 6i نزل من كام يوم .. كان لازم نعملكم مقارنة شامله بينه وبين الـRedmi Note 8 .. لان دول من وجه نظرنا اللي بيقدموا أفضل قيمة مقابل سعر تحت الـ3000 جنيه.


التصميم :-

موبايل نوت 8 طفره في فئته السعريه .. لإن ظهره زجاجي فخم جدا وشيك ولامع .. انما موبايل Realme 6i تصميم الظهر من البلاستيك.

فهنا نقطه تفوق واضحه وصريحه لتصميم الـNote 8 الزُجاجي .. بس طبعًا زي ما متعودين من الزجاج خصوصًا اللامع .. النوت 8 ظهره بيبصم من الهوا .. انما الـ6i الظهر عليه نقشه عجيبه كده بتخلي الموبايل صعب يظهر فيه بصمات.

وكـ شكل بقى .. انا بصراحة مكنتش مبسوط بالوان الموبايلات اللي بعمل عليها المقارنة، لإن معايا الإسود من النوت 8 واللي بيبصم جدا جدا .. الازرق اللي عملناله Review قبل كده احسن مليون مره .. اوعى تجيب الإسود ده .. هو فخم اه بس بيتبهدل من الهوا.

الـRealme 6i اللون الاخضر اللي معانا دلوقتي برده مش عاجبني خالص .. الابيض اللي عملناله Review قبل كده لونه افضل مية مره ولو هتجيب الـ6i انصحك خليك في الابيض.

كحجم ومسكه في الإيد .. النوت 8 بيتفوق لإن شاشته اصغر وبالتالي الموبايل اقصر ومسكته في الايد احسن .. بس طبعا على حساب حجم الشاشة الأقل.

والنوت 8 مفيهوش كيرفات في الظهر .. الموبايل ظهره حته واحده كده والفريم عريض شويه .. انما الـ6i فيه كيرفات في الظهر علشان يحسن المسكه في الايد شويه لإن حجمه اكبر زي ما قولت لك.

انما كوزن الاتنين قريبين اوي من بعض .. الـNote 8 وزنه 180 جرام والـRealme 6i وزنه 195 جرام، فا يعني مفيش فرق محسوس في الوزن في الايد.

اخر حاجه في جزئية التصميم هي بروز الكاميرات .. الاتنين فيهم بروز كبير في الكاميرا الخلفية .. بس البروز اكبر في النوت 8 .. وعمومًا لازم تركب الجراب اللي بيجي في علبة كل موبايل فيهم علشان تغطي البروز ده.


الشاشة :-

شاشة النوت 8 بتيجي بحجم 6.3 بوصه من نوع IPS LCD وبدقة FHD+ وفيها نوتش للكاميرا السيلفي مُمكِن تلغيه من الاعدادات.

انما الريلمي 6i شاشتة أكبر .. بتيجي بحجم 6.5 بوصة من نوع IPS LCD برده بس للأسف بدقة أقل وهي HD+ .. وفيها نوتش للكاميرا السيلفي مينفعش تلغيه من الاعدادات.

وطبعا هنا في تفوق واضح في كثافة بيكسلات شاشة الـRedmi Note 8 .. الشاشة هتبقى Sharp اكتر وصعب تشوف فيها بيكسلات بعينك على عكس شاشة الـRealme 6i .. والكلام بتاع كثافة البيكسلات ده لو انت بتدقق اوي.

انما كـ الوان وسطوع وزوايا رؤية بصراحة الاتنين ممتازين وبيقدموا اداء مماثل .. مشوفتش فرق جوهري بينهم في النقطة ديه.

بالنسبة للحماية .. النوت 8 بيجي بحماية Corning Gorilla Glass الجيل الخامس ومش متركب عليه سكرينه .. انما الـ6i بيجي بحماية Gorilla Glass الجيل الثالث وبيجي في العلبة متركب عليه سكرينه.

بالنسبة للإعتمادية ومشاكل التطبيع .. النوت 8 ظهر فيه بعض المشاكل البسيطة في نقطة تطبيع الشاشة او رعشة بسيطة مع بعض المستخدمين .. على عكس الـRealme 6i بيجي بنفس شاشة الـRealme 5 القديمة اللي مجاش عليها مشاكل كتير.


الأداء :-

النوت 8 جاي بمعالج كوالكوم سناب دراجون 665 بمعمارية 11 نانو ميتر .. انما الـRealme 6i جاي بمعالج ميدياتيك Helio G80 بمعمارية 12 نانو ميتر.

في الأداء اليومي العادي .. مش هتحس بأي فرق جوهري بين الموبايلين .. الاتنين بيقدموا أداء ممتاز وسريع وتقدر تعتمد عليهم جدا.

يمكن اللي حسيته في الـMultitasking وفتح البرامج المفتوحة في الخلفية .. الريلمي 6i كان افضل ومش بيعيد تحميل كتير زي النوت 8 .. مع ان النسخة اللي كنت بجربها من الـ6i هي الصغيره اللي بـ3 جيجا رام اما النوت 8 كانت النسخة الـ4 جيجا رام.

بس سيبك من الكلام ده .. بشكل عام الموبايلات محترمه ويُعتمد عليها .. اللي هيحدد بجد مين المعالج الأقوى هو الأداء الرسومي.

اشهر لعبه الكل بيسأل عليها هي ببجي .. واللي بيتفوق فيها الـ6i وبيشغل اللعبة بكفاءة على High HD .. انما البروسيسور اللي موجود في النوت 8 اخره بيشغل اللعبة على Medium Graphic.

اعدادات لعبة كول اوف ديوتي على شاومي نوت 8

انما لما ندخل اللعبة التانية المشهورة برده كول اوف ديوتي هنلاقي الوضع اتعكس .. وهنلاقي النوت 8 بيتفوق بتشغيل اللعبة على اعدادات Very High انما الـ6i بيشغلها على Low Graphic لإن مفيش Optimization بين معالج ميدياتك مع لعبة كول اوف ديوتي.


عوامل الأمان وعناصر اخرى :-

الموبايلين فيهم بصمة في الظهر .. والبصمة سريعة جدا في الموبايلين مفيش اي مشاكل .. بس الـ6i اسرع بفرق بسيط اوي عن الشاومي .. وبالنسبة للـFace Unlock فهو موجود في الموبايلين وبرده اسرع شويه في الـRealme 6i عن الـNote 8.

الـRealme 6i بيجي من العلبة عليه Android 10 انما الـRedmi Note 8 بيجي بـAndroid 9.0 لانه اقدم واكيد يعني هيوصله اندرويد 10.

الاتنين بيقدموا Dark Mode اللي بيقلب القوائم للإسود والتجربة بتبقى احلى كتير .. انصحك لو معاك موبايل من الموبايلين دول تجرب الـDark Mode.

النوت 8 بيتفوق في وجود لمبة اشعارات بتعرفك ان جالك اشعار على الموبايل .. واللمبه ديه مش موجوده في الـRealme 6i .. والنوت 8 بيتفوق برده في وجود مستشعر IR للتحكم بالاجهزة الكهربائية والمستشعر ده مش موجود في الـ6i.

الموبايلين فيهم كل المستشعرات .. ضوء، تقارب، بوصلة وجيروسكوب وشغالين بكفاءة بدون اي مشاكل.

بالنسبة لدرجة إرتفاع الصوت .. الإتنين فيهم Speaker سفلي وحيد .. بس صوت النوت 8 اعلى بفرق واضح ومجسم اكتر .. صوت النوت 8 جامد اوي بصراحة.

انما صوت سماعات المكالمات اعلى في الـ6i عن الـNote 8 .. وصوت سماعات الاذن ممتاز في الموبايلين بس مجسم اكتر في النوت 8 عن ريلمي 6i.

وأخيرا بالنسبة لقوة الشبكة .. الريلمي 6i بيستقبل شبكة احسن شوية من النوت 8 في الأماكن اللي فيها شبكة ضعيفة .. ده لو انت بتتواجد في اماكن فيها الشبكة وحشة كتير.


البطارية :-

بطارية النوت 8 بتيجي 4000 مللي امبير انما الريلمي 6i بحجم 5000 مللي أمبير .. تفوق واضح للـ6i في حجم البطارية .. وكمان سوفت وير ريلمي موفر اكتر في إستهلاك البطارية عن سوفت وير شاومي.

وبالتالي الـRealme 6i هيقعد معاك حوالي 10 ساعات شاشة مفتوحة .. انما الـRedmi Note 8 هيقعد معاك متوسط 7 ساعات شاشة مفتوحة .. وبكده Realme 6i بطاريته هتكون افضل من Note 8.

بالنسبه للشحن فالموبايلين بيجوا بمنفذ الشحن الـUSB Type C .. النوت 8 بيدعم شحن 18 وات بس اللي بيجي في العلبة شاحن 10 واط بيشحن البطارية في ساعتين وربع.

انما الـRealme 6i بيجي معاه شاحن على طول 18 واط في العلبه .. جربناه وشحن البطارية في ساعتين وربع برده .. نفس وقت الشحن بتاع النوت بس علشان هنا بطارية الـ ريلمي أكبر.


الكاميرات :-

الموبايلين فيهم 4 كاميرات في الظهر .. الأساسية بدقة 48 ميجا بيكسل بفتحة عدسة F/1.8 في الموبايلين .. وفيهم بردة عدسة 8 ميجا بيكسل للتصوير الواسع وعدسة 2 ميجا بيكسل ماكرو وعدسة 2 ميجا بيكسل للعزل.

السيلفي في النوت 8 بدقة 13 ميجا بيكسل فتحة مع عدسة F/2.0 انما الريلمي 6i السيلفي بدقة  16 ميجا بيكسل بفتحة عدسة F/2.0.

نسيبنا بقى من الارقام وندخل على نتيجة مقارنة فعليه في التصوير بالكاميرات الاماميه والخلفيه بين الموبايلين.

بالنسبة للتصوير في الشمس فا شاومي عندها مشكلة في النوت 8 ان الصور في الشمس بتلسع جامد على عكس الريلمي اللي بيطلع الوان البشره هاديه والوان الصوره عمومًا مظبوطه .. ولما تصور في الشمس برده بس بالـPortrait الشاومي هيديك نتيجة احسن .. الوان افضل وتفاصيل اكتر ولون بشره واقعي اكتر والعزل كمان افضل.

والتصوير كمان في الضل بنشوف نفس القصه تاني .. ريلمي 6i بيتفوق بالألوان في التصوير العادي .. وفي تصوير بني او شجر وورد مثلًا الشاومي نوت 8 بيديني صوره احسن ومفرقعه اكتر بس الريلمي 6i واقعي اكتر.

بالنسبة للتصوير الواسع والعدسة الـUltra Wide في الموبايلين فا هي ممتازه في الاتنين بتطلع نفس النتيجة تقريبًا مع تحسن بسيط في الالوان في الـ6i بفضل الـChroma Boost .. وبالنسبة للعدسة الماكرو هي مقبوله وبتطلع تفاصيل احسن شويه في النوت 8.

اما في التصوير في اضاءه داخليه او مكان مغلق، فالـNote 8 بيفرقع الصوره وبيفتح لون الشخص وبيخليه واضح وظاهر كده .. اما الـ6i بيطلع الألوان الواقعيه بس الصوره بتبقى سايحه كلها على بعضها لكن التفاصيل احسن فيها.

بالنسبة للتصوير بإستخدام الـNight Mode في الموبايلين، النوت 8 بيطلع تفاصيل وصوره كويسه بس الصوره غامقه ومحتاجه تتفتح جامد وتتعدل، اما الـ6i بيطلع صوره فاتحه جدًا بس بتفاصيل والوان بشره اوحش .. وبرده محتاجه تتعدل وتغمق، وبشكل عام النوت 8 بيتفوق في الـNight Mode بشكل كبير.

بالنسبة للكاميرات السيلفي فا الاتنين قريبين جدًا من بعض .. مفيش فعلًا فرق واضح بينهم في التصوير في الشمس وفي اضاءه قوية .. والـPortrait برده كويس جدًا في الاتنين مفيش فرق .. يمكن النوت 8 بيتفوق شويه في انه بيجيب الوان احسن لكن بشكل عام الاتنين ممتازين.

وفي التصوير الـPortrait في إضاءه داخليه بالسيلفي، الـ6i طلع اقوى بفرق ملحوظ وعرف يجيب الوان افضل وتفاصيل اكتر وعزل احسن بفرق ملحوظ .. والتصوير العادي مش البورتريه في إضاءه داخليه وفي إضاءه ضعيفه الريلمي 6i اتفوق بفرق ملحوظ، وكده نقدر نقول ان السيلفي في الـ6i بشكل عام افضل.

اما بالنسبة لتصوير الفيديوهات، الشاومي ريدمي نوت 8 عنده نقطة تفوق واضحه وصريحه قدام الـ6i، الموبايل بيقدر يصور فيديوهات 4K .. اما الـRealme 6i بيصور 1080p بس وده بسبب المعالج المستخدم فيه واللي مش بيدعم التصوير الـ4k.

وعمومًا لما جربت اصور بالموبايلين .. النوت 8 اداني ثبات قوي في تصوير الفيديوهات مع صوت اوضح وعزل افضل بفرق كبير وملحوظ للصوت عن الـRealme 6i .. وبشكل عام النوت 8 اقوى بفرق كبير في تصوير الفيديوهات عن الريلمي 6i.

ممكن تشوف الصور والفيديوهات المتصورة بالموبايلات في فيديو المقارنة في أخر المقالة.


الأسعار :-

موبايل شاومي نوت 8 بيجي بـ3 نسخ في مصر :-

  • الأولى بمساحة تخزين 32 جيجا مع 3 جيجا رام وبسعر 2500 جنيه، ودي صعب تلاقيها
  • الثانيه بمساحة تخزين 64 جيجا مع 4 جيجا رام وبسعر 2850 جنيه، ودي اللي هتلاقيها كتير دلوقتي في المحلات
  • الثالثه بمساحة تخزين 128 جيجا مع 4 جيجا رام وبسعر 3150 جنيه، ودي مش موجوده كتير برده

اما الـRealme 6i موجود بنسختين بس في مصر :- 

  • الصغيره بمساحة تخزين 64 جيجا مع 3 جيجا رام بسعر 2890 جنيه
  • الكبيره بمساحة تخزين 128 جيجا مع 4 جيجا رام بسعر 3390 جنيه

الموبايلين بيدعموا تركيب شريحتين إتصال جيل رابع مع كارت ميموري بحجم 256 جيجا في نفس الوقت.


الرأي النهائي :-

لو توهت مني تعالى هنا هلخصلك المقارنة كلها بشكل بسيط.

نقاط تفوق الـNote 8 على Realme 6i :-

  • الضهر الزُجاجي الفخم
  • شاشة بدقة أعلى FHD+
  • لمبة الإشعارات
  • مستشعر الـIR Blaster
  • صوت أعلى
  • جودة تصوير فيديوهات بالكاميرا الخلفيه احسن
  • أسعار ارخص وخصوصًا في النسخة الكبيره

نقاط تفوق الـRealme 6i على Note 8 :-

  • معالج رسومي أفضل خصوصًا في تشغيل ببجي
  • سماعة مكالمات جودتها اعلى
  • إستقبال الشبكات أفضل
  • بيجي بأندرويد 10 من العلبه مباشرا
  • كاميرا سيلفي أفضل خصوصا في التصوير الليلي
  • بطارية اكبر وبتستحمل وقت اطول

وفي النهايه .. شاومي هتنزل قريب الـNote 9S بسعر هيبدأ من 3300 جنية للنسخة الـ64 جيجا مع 4 جيجا رام .. واللي هنعمله مراجعة قريب جدا.

انما الـNote 9 العادي اللي التسريبات بتقول انه جاي بمعالج Helio G80، واللي هو نفس معالج الـRealme 6i .. معتقدش انه هينزل مصر دلوقتي وعشان كده انا قارنت النوت 8 بالـ6i .. عشان النوت 8 هو المتواجد من شاومي دلوقتي تحت سعر الـ3000 جنيه.


فيديو المقارنة :-

قد يعجبك أيضا...

Comments

جاري التحميل...