شركة Oppo عملت قلبان جامد في السوق المصري بموبايل OPPO Reno 2F واللى بيتباع بشكل كبير، وعلشان كده قررت شركة Honor تقلل سعر هاتف Honor 20 علشان يبقي سعره قريب من الفئة المتوسطة ويقدر ينافس وبما ان الاتنين بقي سعرهم قريب من بعض قررنا نعمل لكم مقارنة بينهم.
Honor 20 بيجي بمعالج كيرين 980 مع كاميرا خلفيه قوية بمستشعر من Sony، اما Reno 2F بيجي ببطارية 4000 مللي أمبير مع Pop Up Slider للسيلفي، هنتكلم عن الاتنين بالتفصيل فى مقارنة النهاردة وانت اختار المناسب لإستخدامك.
التصميم :-
الاتنين بظهر من الزجاج واللى بيعمل انعاكسات جميلة وشيك جدا مع تغير الاضاءة وكمان اللون الأبيض فى الرينو 2F جميل جدا وفي الهونر 20 جميل برده .. بالنسبة للـFrame في الـReno 2F من البلاستيك للأسف بس مش هتحس بيه انه بلاستيك اوي، الـHonor 20 من المعدن بس الاتنين Premium فى الايد.
بالنسبة لبروز الكاميرا فى Reno 2F واخد من أخوه الكبير Reno 2 ان مفيش بروز للكاميرا اصلا .. الكاميرا جوا الموبايل وفيه زي كورة لونها أخضر من السيراميك فى ظهر الهاتف علشان لما تحط الموبايل على ظهره، أما الـHonor 20 فيه بروز كبير ولازم تركب جراب لأن كل ما هتحطه على ظهره هيتسند على الكاميرات وهتتجرح منك بسرعه.
أما بالنسبة للحجم فى الايد يتفوق ال Honor 20 فى كونه مثالى و سهل الاستخدام بيد واحدة و كمان الوزن الأخف أبعاد 154.3×74×7.9 ملم و وزن 174 جرام بألوان الأسود و الأزرق و الأبيض و لكن هاتف Reno 2F شاشة كبيرة و حجم كبير بأبعاد 162.4×75.4×8.7 ملم و وزن 195 جرام بألوان الأزرق و الأبيض.
نتكلم بقي عن Slider السيلفي وهو نفسه الموجود فى هاتف F11 Pro وتقدر تختار ما بين 12 لون علشان ينور لما يطلع وكمان تقدر تختار ما بين 3 أصوات و حركات، لكن فى Honor 20 مفيش سلايدر لكن فيه Hole للسيلفي في الشاشة فوق وفي ناس كتيره بتفضله عن السلايدر.
الشاشة :-
نقطة الجدل المحسومه بين الموبايلين هتلاقيها هنا، هنلاقي شاشة هاتف Honor 20 تأتي من نوع IPS LCD بقياس 6.26 بوصة بدقة FHD+ بجودة 1080×2340 بيكسل مع كثافة بيكسلات 412 بيكسل لكل بوصة وابعاد 19.5:9 .. وبالنسبة للـHole اللى فيها السيلفي تقدر تلغيه من الاعدادات ويظهر بدلا منه شريط أسود وتظهر الاشعارات بجانب الـHole.
أما شاشة الرينو 2F كبيرة حجمها 6.5 بوصة من نوع AMOLED بدقة Full HD+ وكثافة بيكسلات 394 بيسكل لكل بوصة بأبعاد 19.5:19 وبتتفوق في تشبع الألوان الأحسن ودرجة السطوع الأعلى وتجربة الشاشة الكاملة.
بالنسبة للحواف حول الشاشة يتفقو هنا الـHonor 20 فى الحواف القليلة حول الشاشة خصوصا الحافة السفلية اللى أقل من الـ2F، وبالنسبة للحماية مفيش اعلان رسمي عنها بس الـHonor 20 بيجي فى العلبة مع اسكرينة للحماية .. الرينو 2F بيجي بطبقة حماية من جوريلا جلاس الجيل الثالث و جاي باسكرينة فى العلبة كمان.
وهنا تتفوق شاشة الـOppo Reno 2F عن الـHonor 20 بسبب الشاشة الاموليد !
الصوت :-
صوت الـReno 2F أعلى ومجسم أكثر من الـHonor 20 وصوت سماعات المكالمات أعلى فى الرينو برده أما عن صوت سماعات الأذن خلينا أقولك ان اصلا مفيش مدخل 3.5 ملم للسماعات فى هاتف Honor 20.
علشان كده لازم تستخدم Converter لتشغيل منفذ الـType C كـ3.5 مللي او تستخدم سماعة Type C على طول .. ولو استخدمت سماعة كويسة الاتنين هيطلعوا صوت ممتاز مفيش كلام على جوده الصوت اوي يعني.
الأداء :-
معالج هاتف Honor 20 هو Hisilicon Kirin 980 ثماني النواة بمعمارية 7 نانو واللى سجل فى Antutu اللي بيقيم المعالجات حوالي 360714 نقطة وهو معالج رائد وجبار جدًا بالسعر دا .. هو أحسن معالجات الفئة السعرية دى مع معالج رسومى للألعاب Mali-G76 MP10 مع وضع تعزيز الألعاب GPU Turbo اللى بيوفر تجربة ألعاب مميزة وسريعة.
أما هاتف Oppo Reno 2F بيجي بمعالج Mediatek P70 تكنولوجيا 12 نانو معالج ثمانى النواة واللى سجل فى برنامج انتوتو حوالي 189965 نقطة بس مع معالج رسومي Mali-G72 MP3.
الـHonor 20 يعتبر طيارة فى فتح التطبيقات والألعاب والتنقل ما بينهم وسريع جدا علشان كده هو الاختيار الأول فى الفئة دى لو انت مهتم بالأداء بشكل كبير، فرق الاداء بين الموبايلين فعلًا كبير.
بالنسبة للأداء الرسومي الـHonor 20 هو هاتف رائد بيشغل أى لعبة على أعلى اعدادات جرافيك يعني مثلا لعبة Fortnite بتشتغل على أعلى اعدادات جرافيك Epic وللكن الرينو مش بيدعم تشغيلها اصلا .. اما لعبة PUBG بتشتغل على Ultra HDR وفى الرينو على اعدادات High HD.
هل دا معناه ان أداء الرينو 2F وحش ؟ الاجابة لأ لكن هو غير مُوجه للـGamers او لحد عايز موبايل للتصفح وتطبيقات السوشيال بس مش اكتر.
الكاميرات :-
الاتنين بيجو بأربع كاميرات فى الظهر و الاتنين العدسة الرئيسية بجودة 48 ميجا بيكسل مع فتحة عدسة F/1.8 فى الـHonor 20 وفتحة عدسة F/1.7 بالنسبة لـ Reno 2F والفرق دا مش هيبقي عامل أساسى فى مين بيطلع صورة أحسن لأن المستشعر الموجود فى الـHonor 20 أفضل بكثير من الرينو وهو Sony IMX586.
والاتنين فيهم عدسة Wide Angle في الهونر 20 بتيجي بدقة 16 ميجا بيكسل والرينو بدقة 8 ميجا بيكسل والاتنين بعدسة للعزل 2 ميجا بيكسل وأخر عدسة في الموبايلين فى الرينو اسمها Black And White و فى الأونر عدسة Macro.
معرفتش استخدم جوجل كاميرا فى المقانرة لأن معالجات الميديا تك والكيرين مش بيشغل علهم جوجل كاميرا كويس علشان كده هنقارن بالأداء الفعلى بتاع تطبيق الكاميرا الموجود على الموبايلين.
بالنسبة لصور البورتريه فى الشمس الـHonor 20 طلع صورة أحسن من الـReno 2F بكتير تفاصيل الوجه ممتازة ولون البشرة وكل الألوان، مشكلة الـReno 2F انه بيمسح تفاصيل الوجه و بيغير فى الألوان.
فى الصور الطبيعية الاتنين تقريبا زي بعض بس اضاءة الشمس بتكون واضحة أكثر فى Honor 20 أما فى الاضاءة المتوسطة مع وضع الـDazzle Color كان الرينو 2F أحلى لكن الأونر واقعى أكثر، ودي عادة موبايلات اوبو وريلمي بتطلع صور احلى لكن مش بتكون واقعيه على عكس مُعظم شركات الموبايلات التانيه.
بالنسبة لاستخدام الـNight Mode الأونر 20 كان واقعى اكتر وتفاصيل أحسن مع توزيع أفضل فى الاضاءة أفضل من الرينو بفرق كبير.
هونر 20 بيدعم تصوير فيديوهات 4K بجودة 2160p مع دعم لـ30 فريم في الثانيه، وبيدعم تصوير بجودة 1080p مع 30 او 60 فريم في الثانيه، وبيقدر يصور Slow Motion لحد 960 فريم في الثانيه، وفي الفيديو هتلاقي 1x و 2x و Wide Angle وممكن تتنقل بينهم وانت بتصور.
اما الرينو 2F مبيدعمش تصوير فيديوهات بجودة 4K بيدعم تصوير بجودة 1080p بس مع 30 او 60 فريم في الثانيه وده بسبب المعالج الموجود فيه واللي للأسف مخليه اقل من معظم المنافسين زي Realme XT و Mi 9T في حاجات كتير.
وبعد تجربة تصوير فيديوهات بالموبايلين لاقينا ان عزل الصوت فى Honor 20 كان احسن وطبعًا فرق الجودة بين الاتنين وقدرة كل موبايل على التصوير بوضح مُعين وجودة مُعينه.
اما بالنسبة للكاميرا السيلفي فى هونر 20 بتيجي بجودة 32 ميجا بيكسل مع فتحة عدسة F/2.0 و تصوير فيديو بجودة 1080 بيكسل مع 30 لقطة فى الثانية مع HDR ودعم للمثبت الالكتروني، وفى الرينو 2F بتيجي بدقة 16 ميجا بيكسل مع فتحة عدسة F/2.0 فى الـSlider.
فى التصوير فى الشمس ممكن تحس ان الرينو أفضل لكن واقعية أكثر فى الـHonor 20، فى الاضاءة الداخليه الرينو 2F أفضل فى الألوان و التفاصيل، فى التصوير بالليل هتلاقي تقريبا الاتنين ممتازين ولو عملت زووم هتحس ان الرينو متفوق شوية.
البطارية :-
بطارية ال Reno 2F بتيجي بحجم 4000 مللي أمبير انما بطارية هاتف Honor 20 بسعة 3750 مللي أمبير مش عارفين ليه مش موجود الـ 4000 مللي أمبير بتاعة الـ Honor 20 Pro هنا، عمومًا وبالنسبة للاستخدام الفعلى الرينو هيصمد حوالى 6 ساعات أما ال Honor 20 هيصمد حوالى 5 ساعات ونص وكده كده الاتنين قريبين جدًا من بعض.
الرينو معاه الشاحن السريع VOOC اللى بيشحن البطارية بالكامل الى 100% فى حوالى ساعة و نص أما Honor 20 معاه شاحن Super Charge من هواواى بقوة 22.5 وات وبيشحن البطارية فى أقل من ساعة ونص بس خلى بالك ان الشحن السريع بيفصل فى أخر 10%، كده الاتنين ممتازين فى سرعة الشحن عن طريق المداخل USB Type C.
المستشعرات والشبكة :-
بالنسبة لمستشعر التقارب موجود أعلى الهاتف لكن فى الرينو موجود سوفت وير و بيعتمد على حركة الهاتف، باقى المستشعرات كلها موجود بوصلة وسرعة وضوء وشغالة كويس جدا وطبعا موجود دعم الجيروسكوب وخاصية ال OTG.
أما بالنسبة لتعامل الهواتف مع الشبكات فى الأماكن ذو الشبكة الضعيفة فهو تعامل جيد جدا والشبكة ممتازة حتى فى الأماكن اللى الشبكة فيها ضعيفة و مفيش واحد أحسن من التانى الاتنين ممتازين.
عناصر الأمان وحماية الخصوصية :-
يدعم هاتف Honor 20 مستشعر بصمة الاصبع المدمج بزر التشغيل Power button والذي يعمل بسرعة ممتازة ومكانها سهل الوصول له كما يدعم الهاتف خاصية قفل الوجه Face Unlock والتى تعمل بسرعة ممتازة و لا تفتح والعين مغلقة .. ونظرًا لعدم وجود السلايدر للكاميرا السيلفي فا إستخدام الـFaceUnlock هيبقى اسرع واسهل.
اما هاتف Reno 2F استغلال الشاشة الأموليد كان حاجة حلوة جدا وعملوا بصمة مدمجة بالشاشة وخاصية الـFace Unlock بتشتغل بسرعة والسلايدر كويس مفيهوش مشاكل وسرعة الفتح قريبه للهونر 20.
بالنسبة لموبيزل بيفضل البصمة المدمجة بزر الباور.
لمبة الاشعارات :-
الـHonor 20 فيه لمبة اشعارات بتنور بأكثر من لون ولكن الاضاءة ضعيفة جدا أما الـ2F مفيش فيه لمبة اشعارات اصلا لكن باستغلال الشاشة الأموليد فيه خاصية اسمها Screen Of Clock بيظهر عليها الساعة ونسبة البطارية والمكالمات الفائتة Missed Calls لكن مش بتظهر اشعارات التطبيقات ونتمني يكون فيه تحديث قريب لاظهارها.
الرأي النهائي :-
موبايل Honor 20 بيقدم أفضل أداء مع الكيرين 980 وكاميرا خلفية هي الأفضل مع مستشعر محترم جدا وبيطلع صور أحسن والمستشعرات الموجودة حقيقية وأهمها مستشعر التقارب ولو بتخاف من فكرة الـSlider للكاميرا السيلفي هنا مفيش سلايدر وموجود الـHole او الثقب اللي جواه الكاميرا السيلفي.
أما الـReno 2F بيتفوق بشاشة أفضل وتجربة الشاشة الكاملة الأموليد مع سلايدر السيلفي بألوان روشه وكاميرا سيلفي أفضل من الـ هونر 20 مع صوت أعلى ومدخل 3.5 مللي للسماعات ومفيش بروز للكاميرات مع دعم تركيب كارت ذاكرة خارجي مع شريحيتن اتصال في نفس الوقت.
سعر الهواتف :-
هاتف Honor 20 بيجي بسعر 6200 جنيه مصري و دا السعر الرسمي للنسخة الوحيدة 128 جيجا بايت مع 6 جيجا بايت رام وفى المحلات بيتباع بحوالى 5700 جنيه ومينفعش تركب كارت ذاكرة خارجي و شريحتين اتصال .. اما هاتف Reno 2F بيجي بسعر رسمي 5500 جنيه مصري للنسخة الوحيدة الموجودة 128 جيجا بايت مع 8 جيجا رام و ممكن تركب كارت ذاكرة خارجي وشريحتين اتصال مع بعض وسعره فى المحلات وصل الى 5200 جنيه.
Comments