مقارنة Galaxy A52 مع Reno5 4G – سامسونج ولا اوبو ؟

دلوقتي لو عايز تشتري موبايل جديد في الفئة المتوسطة في سعر من 5 الى 6 الاف جنية .. حاليًا هتلاقي أبرز موبايلين في السوق وهما Reno5 4G و Galaxy A52 .. وبما ان الموبايلات مؤخرًا بقت شبه بعضها فا النهارده هنقارن بين الموبايلين دول علشان نعرف مين فيهم مناسب أكتر لإستخدامك.


التصميم :-

الموبايلين تصميم الظهر بتاعهم من البلاستيك .. فهنا مفيش حد خاماته احسن .. وانا مش هقدر اقولك ان في واحد اشيك واحلى من التاني لإن الموضوع ده أذواق .. ممكن تقولنا في كومنت على المقال أني موبايل أشيك من وجهة نظرك.

بس لما تمسك الموبايلين مع بعض هتلاقي Reno5 اخف و ارفع من A52 .. الـReno5 بإختصار هو اخف وارفع موبايل فئة متوسطة ممكن تشوفه .. ده غير كمان ان الرينو فيه Curves في الظهر مخلياه رفيع أكتر وأكتر وأنت ماسكه في ايدك على عكس A52 اللي Curves الظهر بتاعته خفيفه اوي اوي وتحس مفيهوش كرفات.

بروز الكاميرات متوسط في الموبايلين .. ممكن يبقى A52 بروز الكاميرات فيه أكبر حاجة بسيطة .. والإتنين معاهم جرابات شفافة في العلبة علشان تحمي الموبايل وتغطي البروز بالكامل.

ولكن في نقطة تفوق للـA52 إنه اول موبايل فئة متوسطة بشهادة IP67 مقاومة للماء لمدة نص ساعة عمق متر .. حتى لو مش هتنزل بيه حمام سباحة ولكنك مش هتبقى قلقان لو الموبايل كان معاك على البحر او على حمام السباحة ومش هتخاف شوية مايه يقعوا عليه او لو ايدك فيها مايه والكلام ده هتبقى متطمن جدا.

الـReno5 4G أخف وأرفع .. الـGalaxy A52 مقاوم للماء والأتربة بشهادة معتمدة.

الشاشة :-

شاشة Reno5 بحجم 6.4 بوصة من نوع AMOLED بدقة FHD+ مع ثقب للسيلفي على الشمال .. شاشة A52 بحجم 6.5 بوصة من نوع Super AMOLED بدقة FHD+ مع ثقب اصغر للسيلفي في نص الشاشة .. والشاشتين بتردد 90 هيرتز.

ألوان شاشة السامسونج مشبعه أكتر .. مشبعه بزيادة .. لو مجرب شاشات AMOLED من سامسونج قبل كده هتعرف قصدي أيه .. هي اقوى من ناحية الألوان من Reno5.

لكن حواف شاشة رينو 5 أفضل شوية من شاشة الـA52 اللي الحواف بتاعتها كبيرة نسبيًا .. إنما ثقب السيلفي بتاع سامسونج A52 أصغر من ثقب سيلفي Reno5.

وأخيرًا رينو 5 عليه حماية Corning Gorilla Glass الجيل التالت .. انما سامسونج عليه حماية Corning Gorilla Glass الجيل الخامس.

الشاشتين حلوين .. شاشة A52 مُشبعة أكتر بالألوان .. شاشة Reno5 بتيجي بحواف أصغر.

الأداء :-

هنا الموبايلين جايين بمعالج كوالكوم سناب دراجون 720G .. مش أحسن ولا أقوى معالج بالسعر ده .. ولكن زي ما بقول دايمًا ده أقل معالج متوسط يشغلك الموبايل بشكل معقول بدون تهنيجات او أي مشاكل.

سوفت وير اوبو منظم اكتر، خفيف اكتر .. سوفت وير سامسونج فيه مميزات اكتر وشكله احلى ولكنه اتقل والـAnimations بتاعته اتقل .. تجربة الأداء على الموبايلين قريبين من بعض .. ولكن زي ما قولتلك سوفت وير Oppo أفضل.

والفرق اعتقد هيبقا محسوس وظاهر أكتر بعد فترة من تشغيل الموبايلات 5 ~ 6 شهور مثلًا .. ونوع ذاكرة التخزين واحد على الموبايلين UFS 2.1 .. مش أسرع ذاكرة تخزين موجودة ولكنهم زي بعض.

الأداء الرسومي في الألعاب زي بعض في الموبايلين .. ببجي على High HD .. كول اوف ديوتي على Very High .. ومش هتحس بفرق في الأداء الرسومي في الموبايلين .. السخونية برده الموبايلين زي بعض مش بيسخنوا جامد.

الموبايلين نفس المعالج .. واجهة Oppo أسلس وأسرع.

عوامل الأمان وعناصر اخرى :-

البصمة مدمجة بالشاشة في الموبايلين .. باختصار رينو 5 أسرع .. وعمومًا اوبو سريعة جدا في البصمات .. الـFace Unlock برده رينو 5 أسرع من Galaxy A52.

موبايل Galaxy A52 فيه NFC .. لكن Reno 5 مفيهوش للأسف .. والموبايلين فيهم Always On Display لعرض الإشعارات اللي جاتلك .. وكل المستشعرات موجودة وشغالة في الموبايلين بدون مشاكل.

بالنسبة لمستشعر التقارب اللي بيقفل الشاشة لما تيجي تعمل مكالمة فا هو أسرع وأدق في Reno5 .. المستشعر فعلًا مبيغلطش ولا مره على عكس A52 لما بترفع الموبايل من على ودنك بيتأخر شوية في الفتح.

أما بالنسبة للصوت .. فالـA52 صوته Stereo .. انما رينو 5 صوته Mono .. صوت A52 أعلى ومجسم اكتر من رينو 5 .. يكسب بصراحة.

اما بالنسبة لشبكات الإتصال .. الـ OPPO Reno5 4G أقوى موبايل ممكن تجيبه من ناحية الشبكة والـWiFi .. أقوى من سامسونج A52 وأقوى من موبايلات شاومي بالمناسبة.

شبكة أفضل وعوامل أمان أسرع في Reno5 .. صوت أقوى و NFC في A52.

البطارية :-

بطارية رينو 5 حجمها 4300 مللي امبير وبطارية الـA52 حجمها 4500 مللي امبير .. طبعا انت دلوقتي هتفتكر ان بطارية السامسونج اقوى .. ولكن رينو 5 إستهلاكه للبطارية أفضل بسبب السوفت وير الاذكى.

هو الفرق مش رهيب .. ولكن انا كنت بشحن الموبايلين سوا لـ100% وأستخدمهم نفس الإستخدام .. سامسونج لما بطاريته وصلت 19% .. اوبو كان 21% على نفسك الاستهلاك ونفس سطوع الشاشة.

الفرق بسيط اوي بس رينو 5 مش أقل من A52 هو ده الهدف من التجربة الفعلية .. ومتقلقش الموبايلين هيكملوا يوم مستريح 8 ~ 9 ساعات شاشة مفتوحة من غير أزمة.

شاحن رينو 5 بقدرة 65 واط بيشحن فعلي بقدرة 50 واط وبيشحن البطارية في ساعة إلا ربع .. انما الشاحن اللي جاي مع السامسونج 15 واط هيشحن البطارية في ساعه ونص .. وهو بيدعم شحن 25 واط لو حابب تشتري الشاحن الأسرع.

نفس وقت الإستخدام الفعلي .. سرعة شحن أقوى في Reno5.

الكاميرات :-

الموبايلين جايين بـ4 كاميرات في الظهر .. بالنسبة للـA52 فا الأساسية 64 ميجا بيكسل فتحة عدسة F/1.8 فيها مثبت بصري والـUltra Wide بدقة 12 ميجا بيكسل .. الأساسية في Reno5 بدقة 64 ميجا بيكسل فتحة عدسة F/1.7 ومن غير مثبت بصري والـUltra Wide بدقة 8 ميجا بيكسل.

بالنسبة للسيلفي فا اوبو رينو 5 4G بدقة 44 ميجا بيكسل بفتحة عدسة F/2.4 اما في Samsung Galaxy A52 بدقة 32 ميجا بيكسل بفتحة عدسة F/2.2.

كل شركة ليها سياسة في معالجة ألوان الصور .. الـGalaxy A52 الصور واقعية بشكل كبير .. انما Reno5 بتدخل بشكل مباشر او غير مباشر في معالجة ألوان الصور وده بيعجب بعض الناس وبعض الناس لا.

أنا من تجربتي بعد ما صورت أكتر من 150 صورة بالموبايلين .. فا أنا كنت ميال أكتر دايما لصور الـA52 لإني مش من الأشخاص اللي بيحبوا الصور اللي فيها أفورة في المعالجة بتاعتها ولا تفتيح بشرة بقى ولا الكلام ده واللي بالمناسبة ممكن يعجب البنات أكتر.

ولكن خليني واقعي .. أداء الكاميرات متقارب من ناحية الإضاءات والتفاصيل .. هو الفرق بيبقى دائمًا في الـHDR اللي اوبو بتعدل في الصور جامد من خلاله .. والفرق التاني في درجة الألوان، مش أكتر .. واللي تقدر تعدلها من خلال أي برنامج تعديل صور في ثواني.

بالنسبة للسيلفي فا بإختصار سيلفي الموبايلين دول أساسًا مش الأفضل .. مش بقول وحش ولكن مش الافضل .. تحس الشركات بقت تبخل اوي على مستشعرات الكاميرا السيلفي.

طبعا البنات كالعادة هيفضلوا سيلفي Reno5 علشان تنعيم الوش وتفتيح البشرة وعمليات التجميل اللي بيعملها بمعالجة الصور بتاعته .. سامسونج واقعي شوية .. وأنا برده مش شايف فرق جوهري كبير ما بينهم .. اختار معالجة الصور اللي تريحك.

بالنسبة بقى لتصوير الفيديوهات فا الموبايلين بيصوروا على 4K مع 30 فريم في الثانية .. لكن الثبات بيكون أفضل على جودة الـ1080p .. الـReno5 فيه وضع الـLive HDR لكن مش موجود وضع مماثل ليه في الـA52 .. الـA52 فيه وضع الـPro Video وكمان فيه الـ4K Snap .. اما Reno5 فيه وضع تصوير بالكاميرا الأمامية والخلفية في نفس الوقت.

شوف مقارنة تصوير فيديوهات وصور بالموبايلات في فيديو المراجعة على قناة موبيزل على يوتيوب !


أسعار الموبايلات :-

سعر Galaxy A52 :-

  • نسخة 128 جيجا مع 8 جيجا رام بسعر 5500 جنية في المحلات
  • نسخة 256 جيجا مع 8 جيجا رام بسعر 6300 جنية في المحلات

والموبايل بيدعم تركيب شريحتين إتصال من الجيل الرابع او شريحة واحدة مع كارت ميموري بحجم 1 تيرا.

سعر Oppo Reno5 4G :-

  • نسخة واحده 128 جيجا مع 8 جيجا رام بسعر 5500 جنية في المحلات

والموبايل بيدعم تركيب شريحتين إتصال 4G مع كارت ميموري بحجم 256 جيجا في نفس الوقت.


الرأي النهائي :-

نقاط تفوق Reno5 4G على A52 :-

  • أخف وأرفع
  • سوفت وير أخف
  • عوامل أمان أسرع
  • مستشعر تقارب أسرع
  • شبكات الإتصال والـWiFi أقوى
  • سرعة شحن البطارية أفضل
  • في سماعات في العلبة
  • بينفع تركب كارت ميموري وشريحتين إتصال في نفس الوقت

نقاط تفوق A52 على Reno5 4G :-

  • شهادة مقاومة معتمدة IP67
  • صوت Stereo أعلى وأقوى
  • جودة الميك أفضل في تسجيل الفيديوهات
  • دعم لخاصية الـNFC
  • تشبع ألوان الشاشة أفضل
  • مثبت بصري في الكاميرا الخلفية
  • كاميرا خلفية بتنتج صور واقعية أكتر وفيديوهات أفضل
  • عدسة Ultra Wide أفضل

بالنسبة للمنافسين من شاومي وهما Redmi Note 10 Pro واللي لسه مجالناش .. لما يجيلنا هنراجعه وهنعمل مقارنة بينه وبينهم .. وبالنسبة للـMi 10T العادي فا هو موجود في السوق بحوالي 6700 جنية حاليًا، تشتريه لو انت يهمك الأداء في المقام الأول بعيدًا عن أي حاجه تانية.

قد يعجبك أيضا...

Comments

جاري التحميل...