لو بتدور على موبايل في الفئة المتوسطة العُليا بسعر من 7 الاف جنية لـ8 الاف جنية في السوق المصري فا الفئة دي حاليًا فيها مجموعة موبايلات مختلفة والنهاردة هنقارن بينهم و الموبايلات الي اختارناها هما Oppo Reno 6 5G مع Samsung Galaxy A52s 5G وأخيرًا Poco F3 .. يا ترى مين أفضل موبايل فيهم؟
التصميم :-
أخف وأصغر موبايل في الـ3 موبايلات هو Reno6 5G ثم Galaxy A52s ثم Poco F3 .. الـ3 موبايلات تصميماتهم شيك وخفيفه ومُميزة.
رينو 6 5G ظهره زجاج وفريم مسطح معدن .. تصميم شيك جدًا، تحسه ايفون في نفسه ومسكته حلوة في الإيد ومختلفة تمامًا عن أي موبايل في الفئة المتوسطة .. وألوان الظهر بتاعته مطرقعه , وفي منه لون أسود وقور.
جالاكسي A52s كله من البلاستيك .. ولكن فيه ميزة مش موجودة في باقي الموبايلات وهي مقاومة الماء العذب .. مش مياه البحر ولا البسين .. مقاومة بشهادة IP67.
اما بالنسبة لـPoco F3 فا هو بيجي بظهر من الزجاج مع فريم بلاستيك .. تصميمه ممكن يكون جريء ومختلف شوية وتحسه موبايل Gaming أكثر .. وهو حقيقي موبايل قوي.
الشاشة :-
اكبر شاشة هي شاشة Poco F3 من نوع AMOLED بحجم 6.67 بوصة .. ثم Galaxy A52s من نوع Super AMOLED بحجم 6.5 بوصة .. وأخيرًا Oppo Reno6 5G من نوع AMOLED بحجم 6.43 بوصة .. والـ3 شاشات FHD+.
أصغر ثُقب للسيلفي في الشاشات موجود في Poco F3 .. والـ3 شاشات عليهم طبقة حماية Corning Gorilla Glass الجيل الخامس ومتركب عليهم سكرينه.
الـ3 شاشات ألوانهم ممتازة وجودتهم كويسة، لكن الـGalaxy A52s شاشته ألوانها مُشبعه اكثر حاجه بسيطة .. ولكن Poco F3 و Reno6 5G تقدر تتحكم في إعدادات الشاشة وتحسن من الجودة المعروضة.
أقوى موبايل في الـ3 موبايلات بيقدر يوصل لدرجات سطوع أعلى في محتوى الـHDR هو Poco F3 .. وبعديه Reno6 5G والـA52s يجي في المركز الأخير بعدهم.
بالنسبة للسطوع تحت الشمس فا أقوى موبايل هو Poco F3 ثم Reno6 5G ثم A52s ولكن الفروقات مش كبيرة .. وبالنسبة لمعدل التحديث الـA52s والـF3 بيكونوا 120 هيرتز لكن Reno6 5G بيكون 90 هيرتز.
الأداء :-
بوكو F3 بيتقدم بأقوى معالج وهو كوالكوم سناب دراجون 870 بتكنولوجيا 7 نانو .. اما A52s بمعالج متوسط قوي وهو سناب دراجون 778G بتكنولوجيا 6 نانو .. أخيرًا الـReno6 5G بمعالج Dimensity 900 بتكنولوجيا 6 نانو .. وسرعة الذاكرة الداخلية في F3 بتكون UFS 3.1 وفي A52s و Reno6 5G بتكون UFS 2.1.
بالرغم من ان سوفت وير شاومي هو الأقل إستقرارًا بس مازال المعالج القوي وسرعة الذاكرة الأقوى بتفضله في الأداء عن باقي الموبايلات .. وهو فعلًا أسرعهم.
في المركز التاني هيكون Galaxy A52s .. وفي المركز الأخير هيجي Reno6 5G بالرغم من سوفت وير اوبو السلس إلا ان في فرق واضح في المعالجات .. لكن الفروقات بينهم مش كبيرة في الإستخدام اليومي.
أقوى موبايل في تشغيل الألعاب هو Poco F3 ثم A52s وأخيرًا Reno6 5G .. وبالنسبة للسخونية فا A52s هو أقل موبايل بيسخن فيهم لأن الجسم بتاعه من البلاستيك الي بيشتت الحرارة بسهولة .. والباقي زي بعض.
عوامل الأمان وعناصر اخرى :-
اسرع بصمة موجودة في Poco F3 .. موجودة على زِر الباور عملية وسريعة جدًا .. المركز الثاني Reno6 5G بصمة تحت الشاشة .. وأخيرًا A52s اللي مازال متأخر في سرعة البصمة .. ونفس الكلام في الـFace Unlock بالنسبة للـ3 موبايلات.
الـ3 موبايلات فيهم مستشعر الـNFC .. وكمان فيهم Always On Display .. الـA52s فيه منفذ 3.5 مللي وبيدعم تركيب كارت ميموري مكان الشريحة الثانية .. لكن باقي الموبايلات مفيش فيهم الكلام ده.
موضوع الـRam Exception او انك تزود الرام بتاعتك من مساحة التخزين متاح في الـ3 موبايلات .. الـReno6 5G لحد 5 جيجا .. الـA52s لحد 4 جيجا .. الـPoco F3 لحد 3 جيجا.
بالنسبة للصوت فا أعلى واحد هو Poco F3 لإنه بيكون Stereo قوي .. الـBass مش الأفضل وفي هزات بتحصل في الظهر .. ثم Galaxy A52s صوت Stereo برده لكن أوطى في المستوى والـBass قوي .. أخيرًا Oppo Reno 6 5G علشان صوته Mono مش Stereo.
بالنسبة لمستشعر التقارب .. الوحيد اللي فيه مستشعر حقيقي هو الـReno6 5G اللي مستحيل يغلط .. سامسونج وبوكو سوفت وير والـPoco F3 هو أكتر واحد فيهم بيغلط.
أقوى شبكة إتصال وواي فاي هي Reno6 5G .. اما سامسونج وبوكو مع بعض في نفس المستوى.
البطارية :-
بوكو F3 بيتقدم ببطارية 4500 مللي امبير بتدعم الشحن بقوة 33 وات وبيشحن في ساعة إلا حاجه بسيطة.
جالاكسي A52s ببطارية 4500 مللي امبير بتدعم الشحن بقوة 25 وات لكن الشاحن اللي في العلبة 15 وات وبيشحن في حوالي ساعة ونص.
رينو 6 5G بقوة 4300 مللي امبير تدعم الشحن 65 وات وبيشحن في نص ساعه وهو أحسن موبايل فيهم في سرعة الشحن.
الكاميرات :-
جالاكسي A52s بكاميرا 64 ميجا بيكسل فيها مثبت بصري لتثبيت الفيديوهات وتحسين التصوير الليلي .. الـReno6 5G بكاميرا 64 ميجا بيكسل مفيهاش مثبت بصري .. وأخيرًا Poco F3 بكاميرا 48 ميجا بيكسل مفيهاش مثبت بصري.
والسيلفي بدقة 32 ميجا بيكسل في A52s وReno6 لكن 20 ميجا بيكسل في Poco F3.
أفضل أداء في الكاميرا الخلفية بيقدمه Galaxy A52s 5G وبيجي في المركز الثاني Oppo Reno 6 5G وفي المركز الأخير Poco F3 .. اما بالنسبة للسيلفي فا Poco F3 بيجي في المركز الأول وبيجي بعده Oppo Reno6 5G و Galaxy A52s .. وتقدر تشوف مقارنة بالصور والفيديوهات بين الكاميرات في فيديو المراجعة.
الـ3 موبايلات بتدعم تصوير فيديوهات بجودة 2160p عند 60 فريم في الثانية .. الـReno6 5G بيدعم الـAI Highlight Video اللي بيحسن من جودة التصوير بالليل .. الـGalaxy A52s 5G فيه مثبت بصري في العدسة الأساسية بيثبت تصوير الفيديوهات .. اما Poco F3 فا هو مش بيدعم حاجه تقريبًا.
أسعار الموبايلات :-
سعر Poco F3 :-
- نسخة 128 جيجا مع 6 جيجا رام بسعر 6200 جنية
- نسخة 256 جيجا مع 8 جيجا رام بسعر 6800 جنية
سعر Galaxy A52s :-
- نسخة 128 جيجا مع 8 جيجا رام بسعر 7200 جنية
- نسخة 256 جيجا مع 8 جيجا رام بسعر 7900 جنية
سعر Oppo Reno 6 5G :-
- نسخة واحده 128 جيجا مع 8 جيجا رام بسعر 8500 جنية
الرأي النهائي :-
نقاط تفوق Poco F3 :-
أقوى أداء في الفئة دي بتفوق كبير .. تصميم Gaming مُختلف .. كاميرا سيلفي كويسة .. صوت عالي جدا .. شاشة ممتازة جدًا وسطوعها قوي .. لكن عيبه الكاميرا الخلفية ومستشعر التقارب رخم شوية وأداءه مش أفضل حاجه.
نقاط تفوق Galaxy A52s :-
كاميرا خلفية ممتازة .. أداء كويس ومش بيسخن .. مقاومة للماء .. صوت متوازن .. دعم منفذ الـ3.5 مللي وتركيب كارت ميموري .. لكن سعره غالي شوية لازم يتحرق أكثر من كده في المحلات .. وكمان بصمته اللي تحت الشاشة مش الأسرع .. وسرعة الشحن بطيئة الى حد كبير.
نقاط تفوق Reno6 5G :-
سوفت وير خفيف مع شبكات قوية وأسرع شحن في الفئة دي مع مستشعر تقارب حقيقي مش بيغلط .. بالإضافة الى تصميم مُختلف مطرقع .. لكن مش بيقدم أحسن كاميرا ولا أحسن أداء ولا أعلى معدل تحديث ولا أعلى صوت .. وحقيقي هو أقل موبايل فيهم قيمة مقابل سعر وكمان نسخه 128 جيجا بالسعر ده الي يعتبر أغلاهم !
Comments