لما تيجي تنزل محلات الموبايلات في مصر تشوف عارضين ايه .. هتلاقي سامسونج و هواوي ليهم اكتر من موبايل وتحسهم كدا واخدين نص المحل .. واحب افكركم بتقارير المبيعات في مصر الي بتأكد ان المركز الأول لسامسونج والمركز التاني لشركة هواوي .. و طبعا ده بسبب الثقة الكبيرة للمستخدم في اسم سامسونج و هواوي .
يمكن فعلا سامسونج و هواوي مش بيعتمدوا انهم يقدموا أفضل قيمة مقابل سعر .. يعني مش هتلاقيهم بيدولك افضل مواصفات بالسعر ده .. وتلاقي ماركات تانية لسه جديدة بيقدمولك خلطة مواصفات افضل .. يمكن لأن سامسونج و هواوي مش محتاجين لده .. هما بيعتمدوا على اسمهم وتاريخهم وانتشارهم وخدمات ما بعد البيع المحترمة جدا بتاعتهم في انهم يحققوا مبيعات عالية .
وعلشان كدا احنا اخترنا احسن موبايلين من سامسونج وهواوي في الفئة السعرية تحت 4000 جنية وهما Samsung A30s و موبايل هواوي Y9 Prime 2019 وهنعمل ليكم مقارنة شاملة في كل حاجة علشان تعرف تشتري انهي موبايل فيهم .
التصميم :-
الموبايلين بلاستيك بالكامل .. ظهر و فريم .. مفيش حد فيهم يتفوق على التاني .. بس لما تمسك الاتنين بايديك هتحس ان خامات الهواوي Y9 Prime 2019 احسن حاجة بسيطة .. هتحسه امتن كدا في ايديك .
طبعا الموبايلين بيبصموا جدا .. والاتنين مفيهمش بروز كبير للكاميرا والاتنين معاهم جراب .. عجبني اكتر تصميم الظهر بتاع السامسونج A30s لأنه مختلف وجديد عن ظهر موبايل الهواوي .
بس بالنسبة للمسكة في الايد .. الواي 9 برايم حجمه اكبر و وزنه اتقل وسمكه اكبر .. يعني لو انت من الاشخاص الي بتحب الموبايلات الكبيرة فهنا ارشحلك الواي 9 البرايم .. انما لو بتفضل الموبايلات الصغيرة الرفيعة الي سهل تستخدمها بايد واحدة حتى لو ايديك صغيرة .. ارشحلك طبعا الـ A30s .
وعموما وزن الـ Y9 Prime حوالي 196 جرام و وزن الـ A30s حوالي 166 جرام فالفرق واضح جدا .
الشاشة :-
الهواوي Y9 Prime بيجي بشاشة كاملة 6.6 بوصة من غير نوتش والحواف قليلة جدا .. ودقتها ممتازة FHD+ .. بس للأسف الجودة بتاعتها IPS .. على عكس السامسونج الي بيجي بشاشة 6.4 بوصة فيها نوتش و بدقة قليلة HD+ بس بجودة ممتازة سوبر أموليد .
من الأخر الواي 9 برايم .. دقة الشاشة احسن .. وكمان الشاشة حجمها أكبر وكمان شاشة كاملة بدون نوتش وكمان الحواف فوق وتحت اقل ما يمكن .
انما السامسونج A30s .. الالوان في الشاشة احسن .. والسطوع تحت الشمس واضح جدا انه احسن واعلى .. بس على حساب كثافة بيكسلات أقل .
الأداء :-
الهواوي Y9 برايم 2019 بمعالج هواوي التقليدي كيرن 710 بمعمارية 12 نانو الي للأسف هنشوفه في موبايلات تاني وتالت من هواوي وهونر لان الكيرن 810 مخدش كامل تصاريحة انه يشتغل عليه خدمات جوجل .. ما علينا من القصة ديه .. الواي 9 برايم شغال عليه كل خدمات جوجل وهيوصله تحديثات الأندرويد عادي .
انما Samsung A30s بمعالج اكسينوس 7904 ثماني النواة تكنولوجيا 14 نانو .
من الأخر .. الكيرن 710 هيديلك اداء افضل من الاكسينوس 7904 .. في الاستخدام اليومي من برامج سوشيال والكلام ده مش هتحس بفرق كبير غير بس في فرق واجهات التشغيل والانيميشن الي كل واجهة بتعمله والكلام ده .
انما في الاداء الرسومي .. فهنا الهواوي Y9 Prime تفوق معايا بشكل واضح انه قدر يشغل ببجي على هاي اتش دي بدون اي تهنيج او تقطيع .. على عكس A30s الي احتجت اني اقلل الجرافيك لميديام علشان اقدر العب عليه بشكل مستقر .
يعني من الأخر نقطة الأداء الأفضل اديها للواي 9 برايم بسبب بس الاداء الأفضل في الألعاب .
عوامل الأمان :-
سامسونج بصمة في الشاشة .. مش سريعة اوي بس مبتغلطش .. شياكة وترند جديد الشباب بتحبه .
هواوي مختارة الطريق السهل .. بصمة خلفية تقليدية وادائها سريع جدا .
واضح جدا أن البصمة الأسرع هتكون للـ Huawei Y9 Prime 2019 .. رغم اني متأكد ان في منكم كتير حابب فكرة البصمة في الشاشة.
بالنسبة للفيس ان لوك فهو موجود في A30s وسرعته مقبولة بس مش موجود في الواي 9 برايم علشان يحافظ على عمر الموتور بتاع السيلفي .
نقاط أخرى :-
تعالوا ندخل في كام نقطة تانية مهمة أولهم الشبكة .. الشبكات ممتازة على الموبايلين .. بس يظل الواي 9 برايم افضل بفرق بسيط في الاماكن الي شبكتها ضعيفة .
بالنسبة لصوت الاسبيكر الخارجي .. فبردة الواي 9 برايم أفضل بفرق بسيط … وبالنسبة لصوت سماعات المكالمات فهو أفضل بردة في الواي 9 برايم وبردة بفرق بسيط .
انما بقا صوت سماعات الأذن فهنا أفضل في Samsung A30s .
السوفت وير بتاع الموبايلين فيه شوية حاجات كدا .. السامسونج فيه نايت مود بيقلب القوايم لاسود .. وكمان فيه سمارت بوب اب بيخلي ابلكيشن عايم فوق ابلكيشن تاني زي كورة الماسنجر كدا .. الحاجات ديه مش موجودة في الواي 9 برايم .. والموبايلين للأسف مفيهمش لمبة اشعارات .
البطارية :-
الاتنين بطاريتهم 4000 مللي أمبير والاتنين بمدخل USB Type C .
مع الأستخدام الفعلي .. الواي 9 هيديلك 7 ساعات Screen On والسامسونج A30s حوالي ست ساعات ونصف ع نفس الأستخدام تقريبا .
بالنسبة لسرعة الشحن .. الواي 9 معاه شاحن عادي 10 واط والسامسونج معاه شاحن شبه سريع 15 واط .. بس عموما زمن الشحن حوالي ساعتين في السامسونج وساعتين وحاجة بسيطة في الهواوي .
الكاميرات :-
هواوي Y9 Prime بـ 3 كاميرات في الظهر .. الاساسية 16 ميجا بيكسل فتحة عدسة F/1.8 والتانية 8 ميجا بيكسل للتصوير الواسع والأخيرة 2 ميجا بيكسل للعزل .. والسيلفي 16 ميجا بيكسل موجود في موتور خاص بالسيلفي .
السامسونج A30s بـ 3 كاميرات في الظهر .. الاساسية 25 ميجا بيكسل فتحة عدسة F/1.7 والتانية 8 ميجا بيكسل للتصوير الواسع والأخيرة 5 ميجا بيكسل للعزل .. والسيلفي 16 ميجا بيكسل موجود في النوتش الي بالشاشة .
ممكن تشوف مقارنة الصور المتصورة بالموبايلين في فيديو المقارنة في أخر المقارنة .. بس من الأخر كاميرات A30s تتفوق سواء الخلفية أو الامامية على الهواوي في كل اوضاع التصوير .
سعر الموبايل :-
الهواوي واي 9 برايم 2019 موجود في المحلات بمساحة 128 جيجا مع 4 جيجا رام بسعر 3850 جنية وينفع تركب شريحتين اتصال او شريحة وكارت ميموري .
والسامسونج A30s موجود بسعر 3650 جنية في المحلات للنسخة 64 جيجا مع 4 جيجا رام وينفع بردة تركب كارت ميموري وشريحتين اتصال مع بعض .
الموبايلين بيجي معاهم جراب شفاف وسماعات أذن .
الرأي النهائي :-
من الأخر كدا .. تشتري الواي 9 برايم 2019 لو بتدور على شاشة أكبر دقتها أعلى وحابب تجرب الشاشة الكاملة الي بدون نوتش والسيلفي الي بيطلع من موتور .. وعاوز معالج أفضل في الألعاب ومساحة أكبر وبتدور على بصمة خلفية عملية وسريعة .
تشتري بقا A30s لو بتدور على شاشة الوانها حلوة بعيدا عن نقطة الدقة .. خايف من فكرة الموتور بتاع السيلفي الي موجود في الواي 9 وشايفه مش عملي .. بتدور على كاميرات خلفية وامامية ممتازة في الفئة السعرية بتاعته .. وبتدور على موبايل حجمه صغير في الأيد وسهل الاستخدام بايد واحدة .. وحابب تجربة البصمة الي في الشاشة .
ومن ناحية تانية لازم تعرف ان في نفس الفئة السعرية نازل خلال أيام Xiaomi Note 8 Pro و Realme 5 Pro الي بيقدموا خلطة مواصفات أفضل بمراحل من هواتف سامسونج وهواوي في تلك الفئة السعرية .
Comments