شركة ريلمي فاجئتنا بتسعير Realme GT Master Edition في مصر وقدمته بتسعير قوي جدًا، وده بالرغم من أن أسعار الموبايلات في مصر في الفترة الأخيرة زادت بسبب الـ10% جمارك .. وده يخلينا نحطه في مقارنة مع أهم موبايل في الفئة المتوسطة العُليا في السوق المصري وهو Galaxy A52s 5G.
التصميم :-
موبايل Realme GT Master Edition مسكته مختلفة تمامًا عن أي موبايل تاني في الفئة دي، اللون الرمادي بيجي بظهر بيقدملك ملمس الجلد بس هو مش جلد، لكن بشكل عام هو مختلف عن اي موبايل تاني.
موبايل Galaxy A52s 5G تصميمه هادي وتقليدي شوية لكنه عاجب معظم الناس، والخامات بالكامل من البلاستيك .. وميزته انه مقاوم للماء والغبار بشهادة IP67.
الاختيار بالنسبالك هيكون بين اختلاف تصميم GT Master وخامته المميزة وبين دعم A52s 5G لشهادة مقاومة الماء والغبار، ومن ناحية المسكة في الإيد فا الاتنين زي بعض يمكن الـA52s 5G اعرض حاجه بسيطة.
الشاشات :-
شاشة A52s 5G بحجم 6.5 بوصة، شاشة GT Master Edition بحجم 6.43 بوصة، الاتنين من نوع Super AMOLED بدقة FHD+ مع معدل تحديث 120 هيرتز، والاتنين من تصنيع سامسونج.
الشاشتين حلوين جدًا من ناحية الألوان والسطوع وزوايا الرؤيو، شاشات راقية فعلًا وصعب تستخدمهم لفترة وتقدر ترجع لشاشة موبايل إقتصادي مثلًا.
لما قارنت بين الشاشتين حسيت ان ألوان A52s 5G مُشبعة أكثر، لكن الفرق مش ملحوظ خالص، والشاشتين عليهم سكرينه وفي طبقة حماية Gorilla Glass 5 على الـA52s 5G.
الأداء :-
الموبايل بيقدموا نفس المعالج، كوالكوم سناب دراجون 778G بتكنولوجيا 6 نانو ميتر .. الموبايلين بيقدموا نفس نوع الذاكرة UFS 2.2 ونفس نوع الرامات الـLPDDR4X.
الأداء ممتاز جدًا في الموبايلين لأي مستخدم متوسط او فوق المتوسط، مناسب لحد عايز يشتري موبايل يقعد معاه فترة كبيرة بدون مشاكل وهيكون ممتاز جدًا في الأداء اليومي.
سرعة فتح البرامج كويسة جدًا في الموبايلين والفروقات مش ملحوظة، لكن كتجربة سوفت وير فا الـA52s 5G بيتقل شوية مع برامج كتير شغالة في الخلفية، اما GT Master صعب يتقل مع الوقت، السوفت وير بتاع شركة ريلمي أخف من واجهة سامسونج .. لكن ده مش معناه ان GT Master أحسن من A52s 5G.
الأداء الرسومي واحد في الموبايلين، هتاخد تجربة أداء في الألعاب محترمة مفيش قلق منها، وبالنسبة للسخونية برده فا الموبايلين زي بعض مش بيسخنوا بسهولة.
عوامل الأمان وعناصر اخرى :-
بصمة GT Master اللي موجودة تحت الشاشة أسرع بفرق واضح عن Galaxy A52s 5G، وكمان الـFace Unlock بتاع GT أسرع بفرق كبير عن A52s 5G.
الصوت في Galaxy A52s 5G بيكون Stereo، اما في Realme GT Master Edition بيكون Mono والنتيجة صوت الـA52s 5G اعلى والـBass أقوى .. والتجربة الصوتيه كلها بشكل عام أفضل في A52s.
مفيش مشاكل هتواجهك في مستشعر التقارب في الموبايلين، الاتنين كويسين جدًا.
شبكة GT Master Edition أقوى بفرق بسيط عن Galaxy A52s 5G .. سواء في الإتصال او الـWi Fi .. وده مش معناه ان A52s 5G سيء لكن التفوق بسيط لصالح GT.
البطارية :-
بطارية A52s 5G بسعة 4500 مللي امبير، بطارية GT Master Edition بسعة 4300 مللي امبير .. النتيجة تقريبًا واحدة، نفس الأداء طالع من الاتنين، وده بيرجع للسوفت وير والتعامل مع معدل التحديث العالي وحاجات تانيه كتير.
بس ريلمي GT يتفوق في الشاحن .. شاحن بقدرة 65 وات في العلبة بيشحن الموبايل في نص ساعه بالكتير، اما A52s 5G شاحن 15 وات في العلبة بيشحن في أكثر من ساعه ونصف.
الكاميرات :-
الموبايلين بيقدموا كاميرا خلفية أساسية بدقة 64 ميجا بيكسل بفتحة عدسة F/1.8، مع عدسات ثانوية للتصوير الواسع والماكرو والعزل، وكاميرا سيلفي بدقة 32 ميجا بيكسل في الموبايلين بفتحة عدسة F/2.2 في A52s 5G وبفتحة عدسة F/2.5 في GT Master Edition.
بإختصار انت لو بتحب اللعب في الألوان بتاعت الصور وان الموبايل يقدملك صور مُشبعة أكثر بالألوان فا الـGT Master Edition هيكون انسب لك، اما الـGalaxy A52s 5G فا هو بيحاول يقدم الصور الحقيقية بالألوان الحقيقية زي ما عينك بتشوفها بالظبط بدون أي تعديلات.
اما بالنسبة للعزل فا A52s 5G متميز جدًا على جانب العزل كالعادة، وبالنسبة للتصوير inDoor بيتفوق الـA52s 5G برده بفرق واضح جدًا في الألوان ومعالجة الصور والتفاصيل.
صور السيلفي متشابهة في الموبايلين لو بتصور في إضاءه عالية، لكن في الإضاءه الداخلية هتلاقي الألوان بتاعت البشرة في A52s 5G أفضل وتفاصيل الصورة أفضل وحدة الصورة أفضل بفرق واضح.
بالنسبة لتصوير الفيديوهات فالموبايلين بيدعموا تصوير بجودة 4K عند 30 فريم في الثانية، الـA52s 5G فيه مثبت بصري حقيقي والـGT Master Edition فيه مثبت إلكتروني .. وبالنسبة للكاميرا السيلفي فا هي بتصور على جودة 4K مع 30 فريم في الثانية في A52s 5G وبجودة 1080p فقط في GT Master Edition.
أسعار الموبايلات :-
سعر Galaxy A52s 5G :-
- نسخة 128 جيجا مع 8 جيجا رام بسعر 7200 جنية
- نسخة 256 جيجا مع 8 جيجا رام بسعر 8000 جنية
سعر Realme GT Master Edition :-
- نسخة 128 جيجا مع 6 جيجا رام بسعر 6800 جنية
- نسخة 256 جيجا مع 8 جيجا رام بسعر 7600 جنية
الرأي النهائي :-
نقاط تفوق A52s 5G على GT Master Edition :-
- كاميرات أمامية وخلفية ممتازة
- مقاوم للماء والغبار بشهادة IP67
- صوت Stereo ممتاز
نقاط تفوق GT Master Edition على A52s 5G :-
- سعره أرخص
- واجهة أسرع وأخف
- شبكات قوية جدًا
- بصمة سريعه جدًا
- شاحن أسرع بفرق كبير
Comments