سامسونج تعلن عن Samsung A9 2019 كأول هاتف يحمل كاميرا خلفية رباعية !

جوجل اعلنت عن هاتفها الرائد Google Pixel 3 XL بكاميرا خلفية فردية بجودة 12.2 ميجا بيكسل وكالعادة هيتم تصنيفها من افضل الكاميرات الخلفية الموجودة في موبايل , وكل ده بكاميرا واحدة فقط بمعالج قوي وسوفت وير محترم وعدسة ومستشعر بأفضل ما يكون.

ايوة وده ايه علاقته بخبر سامسونج الي هنتكلم عنه ؟ – حابين نوضح ان قوة الكاميرا مش بعدد الميجا بيكسل ولا بعدد الكاميرات وادينا مثال حقيقي على كدا .

ندخل بقا في الخبر , سامسونج النهاردة عملت مؤتمر كبير في ماليزيا اعلنت فيه عن موبايلين جداد وهما Samsung A7 2018 الي اتأكد وصوله لمصر خلال الشهر ده بكاميرا خلفية ثلاثية وتقدر تدوس على اسم الموبايل الي باللون الأزرق هتروح لصفحة مواصفاته , وكمان اعلنت عن المفاجئه الكبيرة Samsung A9 2018 كأول موبايل يحمل كاميرا خلفية رباعية , ايوة أربع كاميرات بالطول محطوطين في ظهر الموبايل .

في المقالة ديه هنعرفك مواصفات موبايل سامسونج A9 2018 , ولسه مش عارفين ميعاد توافره في مصر .

مواصفات Samsung A9 2018 :-
  • تصميم زجاجي شيك جدا بألوان متدرجة , مع اطار معدني و وزن 183 جرام .
  • شاشة كبيرة 6.3 بوصة بدون نوتش ( الحمد لله ) مع دقة FHD+ وكعادة سامسونج الشاشة سوبر امولد .
  • مساحة تخزين عملاقة 128 جيجا وكمان كارت الميموري لحد 512 جيجا !
  • هيجي منه نسختين نسخة 6 جيجا والتانيه 8 جيجا رام .
  • الكاميرا الخلفية رباعية , ركز معايا بقا , الأولى الاساسية 24 ميجا بيكسل فتحة عدسة f/1.7 عدسة واسعة هتطلع تفاصيل حلوة حتى بليل , الكاميرا الثانية 8 ميجا بيكسل فتحة عدسة f/2.4 وديه لزاوية تصوير اوسع شوية , والثالثة 10 ميجا بيكسل فتحة عدسة f/2.4 علشان الزوم 2x بدون ما التفاصيل تروح , والأخيرة بتاعت العزل والبورتريه او اللايف فوكس زي ما سامسونج بتسيمها وهي 5 ميجا بيكسل فتحة عدسة f/2.2 , سامسونج عملت زحمه كبيرة اوي في الكاميرا الخلفية , ولما هنجرب تجربة فعلية للكاميرا هنشوف فعلا الزحمة ديه تستاهل ولا كانت كاميرا واحدة هتفي بالغرض وخلاص !
  • الكاميرا الامامية فردية 24 ميجا بيكسل بفتحة عدسة f/2.0 .
  • مستشعر البصمة في ظهر الموبايل .
  • اكيد بيدعم Face Unlock .
  • يوجد منفذ سماعات 3.5 مم .
  • أندرويد أوريو مع واجهة سامسونج .
  • بطارية 3800 مللي أمبير مع منفذ USB Type C و شحن سريع .
  • معالج الموبايل سناب دراجون 660 الموجود في Xiaomi Mi A2 .
  • ألوان الموبايل تحفة فنية : أسود – وردي – أزرق .
  • السعر هيبدأ من 600 يورو وهينزل الاسواق العالمية في شهر نوفمبر واحتمال ينزل مصر في حدود سعر 10 الاف جنية .

و من ناحية تانية شركة شاومي في مصر أعلنت عن الاسعار الرسمية لـ شاومي نوت 6 برو فهيبقا 3777 جنية للنسخة 32 جيجا مع 3 جيجا رام و 4299 للنسخة 64 جيجا مع 4 جيجا رام .

قد يعجبك أيضا...

Comments

Loading...