موبايل سامسونج القديم Galaxy A20 واحد من أكثر الموبايلات مبيعا في مصر على مدار الشهور الأولى في عام 2019 .. بالتزامن مع نزول موديلات احدث من كل موبايلات فئة A .
قامت سامسونج باصدار هاتف Samsung A20s ليقوم بحل بعض المشاكل بالهاتف ولكن مع بعض التنازلات .. دعونا نتعرف عليها في هذه المقالة .
التصميم :-
تقريبا ده التطوير الحقيقي الي هتشوفه في الموبايل ده .. تصميم الظهر الخاص بـ Samsung A20s زي ما هو من البلاستيك متغيرش بس بقا لامع كدا وبيعمل حركات مع تغير الاضاءة عليه .. وكمان رصة التلت كاميرات ورا والبصمة واسم سامسونج .. حاجة بتعجب المستخدم المصري اوي .. بعيدا عن ادائهم بس هوا هيحب شكل الـكاميرات ديه .
بس خلي بالك .. لو مشيت بالموبايل ده من غير جراب .. الموبايل هيتملي خدوش وخرابيش .. وللاسف مفيش جراب في العلبة وديه كانت نفسك مشكلة الـ Galaxy A20 القديم .
الشاشة :-
وهنا حصل تقليل لمواصفات الشاشة .. شاشة موبايل A20s من نوع TFT بعد ما كانت سوبر اموليد في Galaxy A20 القديم .. حقيقي زعلت جدا من النقطة ديه .
عموما الشاشة حجمها 6.5 بوصة بدقة HD+ فيها نوتش دروب وتر تقدر تلغيه من الاعدادات لو حابب .. هتشوف البيكسلات بعينك في حاجات دقتها عالية او في الالعاب لما تركز اوي .. غير كدا في الاستخدام العادي .. مفيش بكسلة هتظهر معاك .
والحق يتقال .. الشاشة TFT بس سطوعها تحت الشمس كويس جدا ومفيهوش اي مشاكل .. سامسونج بردة بتعرف تعمل شاشات مهما كان نوعها ايه .
وأخيرا مفيش حماية على الشاشة ولا في سكرينة حماية على الشاشة .
الاداء :-
وهنا بردة حصل دون جريد او تقليل في المواصفات .. بس تعالى افهمك الدون جريد ده في ايه .. المعالج هنا بقا سناب دراجون 450 تكنولوجيا 14 نانو .. معالج قديم نسبيا .. يعني بصراحة عيب لما نستخدمة في 2019 في موبايل سعره قريب من الـ 3 الاف جنية .. هو اه هواوي مستخدامه في Y7 Prime 2019 .. بس ع الاقل ده نازل من اول السنة .. مش في أخرها .. ما علينا .
نتكلم ع الاداء الفعلي .. مفرقش كتير عن اداء النسخة القديمة A20 .. لسه بردة هتحس بتقل الواجهة في التنقل بين التطبيقات .. هتحس بتهنجيات خفيفة كدا في ابلكيشن الكاميرا وانت بتتنقل بين السيلفي والخلفية ع سبيل المثال لا الحصر يعني .
بس اقدر اقول ان الاداء مقبول مش هيجبلك شلل يعني .. بس المشكلة ان بالسعر ده تقدر تجيب موبايل فيه سناب دراجون 660 او 665 من ريلمي 5 او شاومي نوت 8 او شاومي نوت 7 حتى .. وبالمناسبة هنعمل مراجعة للريلمي 5 والنوت 8 العادي قريب اوي .. متنساش تدخل موقعنا كل يوم وتتابعنا .
مشكلتي مع المعالج ده بقا هو ان المعالج الرسومي الي فيه ادرينو 506 اضعف حقيقي من المعالج الرسومي الي كان في A20 القديم .. وبالتالي لعبة تقيله زي ببجي هتلاقيها بتهنج ع خفيف على ميديام جرافيك بالرغم انها مكنتش بتهنج في A20 القديم .. فالحتة ديه زعلتني اكتر من الموبايل .
عوامل الأمان :-
بصمة في الظهر لسه زي ما هيا مش اسرع حاجة .. هتدوس ع البصمة وتشيل صباعك وبعد كدا الموبايل هيفتح .. كعادة سامسونج مش بتقدم اسرع بصمة .
وبردة الفيس ان لوك نفس الحكاية مش سريع اوي زيه زيه البصمة .
السوفت وير وعناصر أخرى :-
نفس الواجهة السامسونج One UI .. الي فيها نايت مود بيقلب القوايم لاسود وفيها عمل نسختين من برامج التواصل الاجتماعي .. وفي Smart Pop Up View الي بيقدر يخلي برنامج يفتح عايم فوق برنامج تاني زي كورة الماسنجر .. ومتنساش بقا لو هتشتري الموبايل ده تقفل الانيميشن خالص علشان تحسن من ادائه شوية .
بالنسبة للمستشعرات .. فسامسونج ضافت مستشعر ضوء حقيقي في الموبايل ده .. لانك لو شوفت مراجعة Samsung A20 القديم هتلاقينا اشتكينا من ان مفيش مستشعر ضوء يظبط اضاءة الشاشة .. وباقي المستشعرات موجودة في A20s زي التقارب الي بيقفل الشاشة في المكالمات والجيروسكوب وبيشغل الراديو وكل حاجة زي الفل في حته المستشعرات .
ندخل على الشبكة .. بعد التجربة فهيا بردة مش احسن حاجة في الفئة السعرية ديه .. لو هدي تقييم للشبكة فهديها اقل من المتوسط لسه في اماكن الموبايلات المنافسة بتجيب فيها شبكة الموبايل ده مش بيقدر يلقط فيها شبكة .
بالنسبة لصوت الموبايل فهو عالي وكويس .. بس مش مجسم هتحسه فيه دوشة شوية بس مقبول .. وصوت سماعة المكالمات عالي وممتاز وصوت سماعات الاذن كويس جدا بفضل خاصية الدولبي أتموس .
البطارية :-
4000 مللي أمبير مفيهاش تغيير عن النسخة القديمة . استحملت معايا حوالي 6 ساعات واكتر شاشة مفتوحة في حوالي يوم كامل .. وديه نتيجة مرضية جدا بالنسبالي في الفئة السعرية ديه .. وتقريبا ده الموبايل الوحيد في فئته الي بيجي معاه شاحن سريع .. الموبايل هنا ب يو اس بي تايب سي وشاحن سريع 15 واط بيشحن البطارية في حوالي ساعتين .. وديه اكبر ميزة في الموبايل ده .
الكاميرات :-
3 كاميرات في الظهر .. الاساسية 13 ميجا بيكسل فتحة عدسة 1.8 والتانية 8 ميجا بيكسل للتصوير الواسع فتحة عدسة 2.2 والاخيرة 5 ميجا بيكسل بتساعد في العزل فتحة عدسة 2.2 والسيلفي 8 ميجا بيكسل فتحة عدسة 2.0 .
اداء الكاميرات مقبول جدا سواء الامامية او الخلفية طالما الاضاءة كويسة .. بس لما الاضاءة بتقل .. الصور بتبقا غير مقبولة .. وممكن تشوف صور متصورة بالموبايل في فيديو المراجعة في أخر المقالة .
الأسعار :-
الموبايل نسخة واحدة 32 جيجا مع 3 جيجا رام بسعر رسمي 2950 جنية وفي المحلات 2800 جنية وتقدر تركب كارت ميموري وشريحتين اتصال مع بعض .
الرأي النهائي :-
موبايل جيد في الاستخدام المتوسط مع 3 كاميرات خلفية ومستشعر بصمة لتحصل على تجربة مقبولة من سامسونج في هذه الفئة السعرية ولكنه لا يقدم أفضل اداء ولا أفضل كاميرات فيوجد منافسين من شركات تانية بيقدموا مواصفات أفضل .
مميزات
- بطارية قوية 4000 مللي أمبير مع شاحن سريع و Type C .
- يمكنك تركيب كارت ميموري وشريحتين اتصال مع بعض .
- ارخص موبايل بـ 3 كاميرات خلفية من سامسونج منهم واحدة للتصوير الواسع .
- تصميم جيد وشيك من سامسونج .
عيوب
- تقليل جودة الشاشة من سوبر أموليد لـ TFT جعل الهاتف مثل المنافسين في جودة الشاشة المقبولة ولكن مبقتش مميزة زي ما كانت أموليد في A20 .
- ضعف المعالج الكوالكم 450 بالنسبة للمنافسين في نقطة الأداء .. ولكنه يقدم اداء مقبول في الـ GPS والمهام اليومية العادية مثل المكالمات وبرامج السوشيال .
- لا يدعم لمبة اشعارات .
- ضعف استقبال الشبكة بالنسبة للمنافسين ولكنها أفضل بشكل ملحوظ من النسخة القديمة A20 .
Comments