مراجعة Samsung Galaxy A21s – أقوى كاميرا و بطارية بـ 3000 جنية !

موبايل جديد من سامسونج نازل بقاله فتره .. وبصراحة من مواصفاته كده .. مكنتش متحمس خالص اني أجربه .. ولكن لما لاقيت طلب كبير عليه إشتريت Galaxy A21s وجربته .. وبصراحة الموبايل فاجئني في حاجات كتير .. والنهارده هقدملك مراجعته الكاملة مع مقارنته بالـRedmi Note 9 من شاومي.

 


التصميم :-

موبايل Galaxy A21s. مش بيقدم أي تجديد من ناحية التصميم .. نفس تصميم مُعظم فئة Galaxy-A من سامسونج .. الخامات بالكامل من البولي كربونيت .. الظهر لامع شوية وبيعمل إنعكاسات بألوان مُختلفة مع تغير درجة الإضاءة.

ونافذة الكاميرات مُستطيلة وفيها العدسات مترتبة على حرف L .. وعمومًا شكل التصميم كويس مش وحش .. ومش قديم وأعتقد شكله هيفضل مواكب معانا في 2020 .. وممكن على السنة الجاية سامسونج تفكر تغير التصميم ده.

الموبايل وزنه مقبول .. حوالي 189 جرام وتخانه 8.9 ملم .. مسكته في الإيد مفيهاش أي مشاكل .. وبروز الكاميرا الخلفية مش كبير.

بس سامسونج بتوفر في حاجات غريبة بقى .. مفيش جراب مُرفق في العلبة .. حاجة عجيبة وغريبة .. كل المنافسين بيقدموا جراب .. انا عارف إنه مش غالي وممكن تشتريه .. بس ليه الحركات ديه ؟


الشاشة :-

وبصراحة شاشة الموبايل كنت مقفول منها من المواصفات ولكن بعد ما جربتها رأيي إختلف .. الشاشة هنا بحجم 6.5 بوصة من نوع TFT بدقة HD+ فقط .. والشاشة واخده تريند الثقب بتاع السيلفي على الشمال.

الشاشة هنا مش وحشة خالص على إنها بجودة TFT .. يعني الألوان اللي هتشوفها من الشاشة ديه ودرجات السطوع بتاعتها كويسة ومناسبة للفئة السعرية اللي الموبايل ده محطوط فيها.

ولكن كثافة البيكسلات قليلة بسبب الدقة المنخفضة .. ده هيخليك لو بتركز أوي هتشوف البيكسلات بعينك .. والمنافسين اللي بنفس السعر مش كلهم بيقدموا شاشات بدقة عالية .. في شوية FHD+ زي الـNote 9 والـHonor 9X Lite والـY8s .. وفي البعض بشاشات HD+ بس زي الـRealme 6i والـNokia 5.3.

سامسونج اختارت انها تقدم الشاشة HD+ .. وعلشان تعوض الدقة المُنخفضة حطت ثقب صغير جدًا للسيلفي .. علشان يبقى شكل الشاشة حلو.

ولكن أكتر حاجة ضايقتني من الشاشة هي الحواف .. الحواف كبيرة سواء الحافة السفلية .. او حتى الحافة العلوية .. أعتقد الحواف كانت محتاجه تقل عن كدا شوية.

لو بنتكلم على ألوان وسطوع وشكل ثقب في الشاشة .. فهي كويسة جدًا .. لو هتكلم عن كثافة بيكسلات ودقة فهي مش اعلى دقة ولكن مقبولة .. ولو هنتكلم على الحواف .. فهي مش حلوة ومش الأفضل.

وللأسف الشاشة مش بيجي عليها سكرينة .. وانت بتشتري جراب هتشتري سكرينة !


الأداء :-

معالج جديد من سامسونج .. كنت متحمس اني اجربه .. وهو الـExynos 850 .. بتكنولوجيا تصنيع 8 نانو لأول مرة في فئة الـ3 الاف جنية.

المعالج ده بقى غريب .. رقمه في إختيار Antutu سيء .. لو هناخد بالرقم فهو يعتبر كدا من أضعف المعالجات حاليًا في فئته السعريه .. أضعف من الـG85, G80, G70 وأضعف من Kirin 710 وSnapdragon 665.

بس في التجربة الفعلية بقى الأداء مش سيء ومش سريع .. بمعنى إن الأداء ثابت على درجة معينة من السرعة .. درجة مش وحشة خالص .. ومش الحلوة اللي تخليه أفضل اداء .. سامسونج ماسكه العصاية من النص بصراحة.

وخلي بالك الموبايل بيجي بـ4 جيجا رام وده مساعد إن الواجهة تبقى خفيفة اكتر ومش بتحتاج تقفل برامج في الخلفية .. ونوع الذاكرة الداخلية هو eMMC 5.1 وده النوع المُتعارف عليه في الفئة السعرية ديه.

ولما جربت الـNote 9 جنب الـA21s ملاحظتش فرق كبير في السرعة .. اكيد تفوق الـNote 9 بس مش بفرق ضخم برده.

بالنسبة للأداء الرسومي .. فالمعالج الرسومي هنا هو الـMali-G52 وهو نفس المعالج الموجود في الفئة السعرية دي .. بيشغل لعبة ببجي على High HD وبتشتغل بشكل مقبول جدًا.

لعبة كول اوف ديوتي بتشتغل على جرافيك Medium والفريمات High وبتشتغل كويس جدًا برده مفيش اي مشاكل .. وطبعًا كعادة الفئة دي مفيش دعم لـ لعبة فورت نايت.

وبما ان المعالج موفر بشكل كبير في إستهلاك البطارية .. فا السخونية هنا مش موجودة اصلًا .. والأداء الرسومي مفيهوش أي تنازل في الموبايل ده.


عوامل الأمان وعناصر اخرى :-

البصمة موجودة في الظهر .. سرعتها متوسطة .. مش أسرع بصمة .. كذلك الحال في الـFace Unlock سرعته متوسطة برده.

الموبايل جاي بـAndroid 10 .. الـDark Mode هتلاقيه موجود وبيشتغل كويس جدًا على الموبايل برغم الشاشة الـTFT .. والموبايل مفيهوش لمبة اشعارات ولا فيه Always On Display علشان الشاشة مش أموليد.

مُستشعر التقارب والجيروسكوب شغالين كويس .. وجربت كويس مُستشعر التقارب اللي بيقفل شاشة الموبايل وانت بتعمل مكالمة وشغال كويس .. والموبايل كمان بيدعم تسجيل المكالمات.

أما بالنسبة لحساس الإضاءة فهو مش موجود Hardware .. الموبايل بيعتمد على الـSoftware في تحديد درجة سطوع الشاشة.

صوت الموبايل متوسط .. مش عالي .. يعني أقل شوية من الـNote 9 .. اما صوت سماعة المكالمات عالي ومُمتاز .. وعلى فكرة في مايكروفون إضافي لعزل الضوضاء.

وبالنسبة لصوت سماعات الأذن فا هو مع الـDolby Atmos اللي في السوفت وير هنا مخلي الصوت مُمتاز جدًا ومُجسم.

بالنسبة لقوة الشبكات .. الـWiFi كالعاده متوسط والسوفت وير بيعمل فلتر للشبكات الضعيفة .. أما شبكات الإتصال .. فالموبايل ده زي الـM31 بالظبط .. الشبكة بتاعته كويسة جدًا مفيهاش اي مشاكل.


البطارية :-

بطارية ضخمة 5000 مللي أمبير .. موجودة في موبايلات ريلمي وشاومي .. بس البطارية هنا أداءها أفضل بفرق ملحوظ عن ريلمي وشاومي بسبب المعالج المُوفر جدًا .. حرفيًا انا مكنتش عارفه أخلصها .. أعتقد هتكمل يومين واكتر مستريح.

الشاحن المرفق 15 واط .. بيشحن البطارية الضخمة ديه في ساعتين .. وانا راضي جدًا عن سرعة الشحن ديه ومبسوط جدًا بالبطارية القوية اللي هنا.


الكاميرات :-

الموبايل جاي بـ4 كاميرات في الظهر .. الأساسية 48 ميجا بيكسل بفتحة عدسة F/2.0 والتانية 8 ميجا بيكسل للتصوير الواسع بفتحة عدسة F/2.2 والتالتة 2 ميجا بيكسل للماكرو بفتحة عدسة F/2.4 والاخيرة 2 ميجا بيكسل للعزل.

والسيلفي الموجود في ثقب الشاشة بيجي بدقة 13 ميجا بيكسل مع فتحة عدسة F/2.2.

للأسف سوفت وير الكاميرات مفيش فيه Night Mode .. تعالوا بقى نشوف موقف الكاميرات اللي في الـA21s مُقارنتًا مع الـNote 9 برنس الكاميرات في فئته السعريه .. ونشوف مين الأفضل !

كلنا نتفق على إن سامسونج بقت شاطرة جدًا في الكاميرات .. معالجة الصور بتبقى كويسة جدًا .. بيبقى بس ناقصها مستشتعر كاميرا كويس .. والمستشعر ده موجود بالفعل في A21s .. مستشعر مش أقل أي حاجة عن المنافسين.

وبالتالي أنا شايف تفوق واضح وصريح للكاميرا الخلفية بتاعت Galaxy A21s على الـNote 9 .. النوت 9 اللي هو اصلًا اقوى كاميرا بـ 3 الاف جنية .. سامسونج جت أخدت اللقب منه بالـA21s .. الموضوع ده مش سهل.

بس طبعًا لازم سامسونج تحط التاتش بتاعها .. شايله الـNight Mode .. تخيلت إن الوضع هيبقى كارثي في الصور .. بس بصراحة لا .. لسه قادره تنافس مع صور الـNight Mode اللي خارجه من Note 9.

ومقدرش انسى العدسة الـUltra Wide Angle الجميلة جدًا والموجودة في الـA21s .. ديه من أحسن العدسات اللي بالسعر ده.

أما بالنسبة للسيلفي .. فالتجربة في Galaxy A21s كانت عادية .. مش أحسن سيلفي .. معالجة الألوان حلوة ايوه. بس العدسة نفسها ضيقة ومش بتطلع تفاصيل كتير.

مُقارنتا مع الـNote 9 فالأداء مقبول .. بس اصلًا سيلفي الـNote 9 مش قد كده .. أعتقد لسه لحد دلوقتي برنس السيلفي في فئة الـ3000 جنية هو الـRealme 6i.

بالنسبة لتصوير الفيديوهات فـ موبايل Samsung A21s بيصور بجودة 1080p ولكن للاسف بدون ثبات الكتروني.

ممكن تشوف الصور والفيديوهات المتصورة بالموبايل في فيديو المراجعة في أخر المقالة.


سعر الموبايل :-

سعر الموبايل حوالي 3100 جنية للنسخة 64 جيجا مع 4 جيجا رام وبينفع تركب كارت ميموري بحجم 512 جيجا وشريحتين إتصال مع بعض في نفس الوقت.

ومتنساش طبعًا عرض فلوسك هترجعلك لو إنت فودافون وإشتريت موبايل من سامسونج .. إتصل بـ نجمه 201 شباك.


الرأي النهائي :-

مميزات Galaxy A21s :-

  • بطارية قوية جدًا
  • كاميرات خلفية هي الأفضل في الفئة السعرية
  • سرعة شحن مقبولة جدًا
  • تصميم شيك وبسيط وحديث
  • مايكروفون اضافي لعزل الضوضاء مع تسجيل المكالمات

عيوب Galaxy A21s :-

  • مفيش جراب او سكرينة في العلبة
  • سيلفي مش الأفضل خصوصًا بالليل
  • الأداء مش الأفضل في الفئة دي
  • عوامل أمان مش الأسرع
  • شاشة بحواف ضخمة وكثافة بيكسلات قليلة

وفي النهاية أحب اقولك ان Galaxy A21s يُعتبر من الإختيارات الكويسة المضمونة في فئة الـ3 الاف جنية مصري .. خصوصًا بعد المشاكل الكتيرة اللي شوفناها من Realme 6i وRedmi Note 9 في الفئة دي.


فيديو المراجعة :-

قد يعجبك أيضا...

Comments

جاري التحميل...