سامسونج نزلت Galaxy A22 في مصر بشكل مُفاجئ .. وكده بقى عندها A72 ثم A52 ثم A32 واخيرًا A22 .. والـA22 نازل يسد الفجوه اللي في فئة من 3 لـ 4 الاف جنية واللي سامسونج تعتبر غايبة عنها شوية، الموبايل بيقدم مجموعة مواصفات غريبة شوية، هنعرف عنها كل حاجه النهارده في المراجعة.
التصميم :-
الموبايل خاماته بالكامل من البلاستيك .. تصميم تقليدي مفيهوش اي حاجه جديدة، والظهر لامع جدًا .. الأسود هيظهر فيه البصمات والخرابيش وللأسف مفيش جراب في العلبة.
الموبايل بيجي بألوان الأخضر والأبيض والبنفسجي والأسود .. الكاميرا الخلفية بارزة شوية عن ظهر الموبايل لكن بروز مش كبير يعني مفيش قلق منه.
وزن الموبايل معقول 186 جرام وتخانه 8.4 ملم .. الموبايل مش عريض خالص في الايد .. مسكته مريحه ومفيهاش اي مشاكل .. في النهاية التصميم تقليدي واللون الأسود مش لطيف.
الشاشة :-
شاشة Super AMOLED بحجم 6.4 بوصة بنوتش مش ثقب .. دقتها HD+ .. مع تردد بيوصل لـ90 هيرتز .. لو الشاشة كانت FHD+ كانت هتبقى رهيبة في الفئة دي بصراحة .. بس مستحيل طبعًا!
الحافة السفلية للشاشة هنا كبيرة شوية .. كانت محتاجه تقل شوية .. وشكل النوتش قديم طبعًا مش محتاجه كلام .. ألوان الشاشة كويسة جدًا وسطوعها عالي تحت الشمس.
لكن طبعا كون الشاشة HD+ مش FHD+ يخليها تخسر لما تتحط في مقارنة مع شاشة AMOLED بدقة FHD+ بنفس السعر زي Redmi Note 10 .. نوت 10 هيكسب في التفاصيل الأكتر.
ولكن برده حابب أوضحلك ان الشاشة بتاعت سامسونج مش مبكسلة اوي في عرض المحتوى .. الشكوى الي بقلها كتير لما براجع موبايل شاشته HD+ .. عرض المحتوى هنا مقبول .. طبعا اقل من FHD+ .. ولكنه مقبول.
الشاشة هنا معلهاش سكرينة في العلبة .. هتحتاج تشتريله جراب وسكرينة .. والحسنة الوحيدة للشاشة هنا هي الـ90 هيرتز .. واللي هتلعب دور مهم في الأداء.
الأداء :-
ولما نتكلم عن الأداء .. المعالج هنا ميدياتيك Helio G80 .. هو اه موجود في موبايلات أرخص .. بس أنا عاوز افهمك ان ده نفس معالج Galaxy A32 الاغلى .. فا سامسونج كده شايفه انها منزلاه بسعر ممتاز.
نوع ذاكرة التخزين هنا للاسف eMMC 5.1 .. معرفش ليه سامسونج بتبخل علينا في الحاجات دي مع انها مش مكلفه اوي.
أداء الموبايل ده مش متوافق تمامًا مع إمكانياته .. أنا توقعت الأداء يكون ضعيف لما سمعت المواصفات .. ولكن الأداء فعلًا كويس وناعم وسريع .. مواجهتش اي مشاكل في إستخدام الموبايل ده .. أداء مستقر وسريع والـ90 هيرتز هيحسسوك ان الدنيا ناعمة اوي في التنقل والتصفح.
الأداء الرسومي .. ببجي بتشتغل على High HD .. كول اوف ديوتي بتشتغل على Medium .. مش هقولك ان ده احسن اداء هتاخده من ببجي بالسعر ده ولكنه معقول مفيهوش مشاكل .. بس مش بالنعومة الكافية اللي هتاخدها من أي موبايل بمعالج Helio G95 زي Redmi Note 10S و Realme 7 و Infinix Note 10 Pro.
الموبايل بيسخن شوية مع الألعاب بس مش بيولع نار وسخونيته اقل شوية من Note 10S مع الضغط عليه .. وعمومًا اي موبايل في الحر ده هيسخن طبعًا مع الضغط الشديد عليه .. ولكن الموبايل مش بيحصله اختناق بعد الضغط عليه لفتره ولا استهلاكه بيزيد للبطارية.
عوامل الأمان وعناصر اخرى :-
البصمة هنا على زرار الباور وأداءها سريع ومش بتغلط زي بصمة الشاشة .. وممكن تسحب على زرار الباور وتنزل ستارة الاشعارات .. الـFace Unlock كالعادة مش اسرع حاجه.
الموبايل هنا جاي بـAndroid 11 بواجهة سامسونج One UI Core 3.1 .. الـCore يعني مش موجود فيها المجلد الأمن بتاع سامسونج .. بس في Dual Messenger عادي علشان تعمل نسختين من برامج التواصل.
هنا في Always On Display بس مفيهوش أشكال كتير .. بس موجود علشان يعرضلك الاشعارات على الشاشة المقفولة .. في NFC .. سامسونج مش بتتنازل في خاصية الـNFC في الموبايلات حتى ولو سعرها قل ودي حاجة كويسة .. وفيه ميكروفون اضافي لعزل الضوضاء .. حاجه كويسة جدًا.
الصوت Mono مش Stereo .. صوت متوسط او أقل من المتوسط طبعًا .. لو قارنته باي موبايل Stereo هيرخص .. ومفيش هنا مستشعر اضاءة حقيقي .. الموبايل بيستخدم الكاميرا علشان يقدر يحدد الضوء المحيط بيه وبناءًا عليه يحددلك سطوع الشاشة .. محستوش بيتأخر اوي .. شغال يعني.
مستشعر التقارب بتاع قفل الشاشة وانت بتعمل مكالمات سوفت وير .. هو بيقفل الشاشة وانت بتعمل مكالمة عادي .. بس بيتأخر شوية لما تشيله من على أذنك .. وانا الأهم عندي انه يقفل الشاشة عشان ميحصلش اي اوامر غلط وده هو بيعمله كويس .. والموبايل فيه تسجيل مكالمات.
شبكات الـWi Fi متوسطة كالعادة السوفت وير بيفلتر الشبكات البعيده عنك .. ولكن شبكات الاتصال كويسة جدًا جدًا .. في تحسن رهيب في أداء الشبكات في سامسونج في 2021 في موبايلاتها الجديدة.
البطارية :-
بطارية الموبايل 5000 مللي أمبير .. بطارية ـداءها قوي تستحمل معاك 8 ~ 9 ساعات واكتر شاشة مفتوحة وانت مشغل الـ90 هيرتز .. طبعًا علشان الشاشة HD+ فا بتوفر معاك شوية في الاستهلاك .. والاستهلاك هنا من نقاط قوة الموبايل.
ولكن كالعادة الشاحن المرفق مش بالسرعة الكافية .. شاحن بقوة 15 واط .. بيشحن البطارية في ساعتين وشوية .. كالعادة سامسونج مش عاوزه تكرمنا في موضوع الشواحن ده لحد دلوقتي.
الكاميرات :-
الكاميرا الخلفية الأساسية 48 ميجا بيكسل بفتحة عدسة F/1.8 بمثبت بصري حقيقي .. والتانية 8 ميجا بيكسل فتحة عدسة F/2.2 للتصوير الواسع والتالتة 2 ميجا بيكسل ماكرو والرابعة 2 ميجا بيكسل عزل .. والسيلفي 13 ميجا بيكسل فتحة عدسة F/2.2.
قارنت بين Galaxy A22 و Redmi Note 10S .. شاومي عندها معالجة صور أحسن في الشمس و Dinamic Range أحسن .. لكن في الظل الاتنين بيعالجوا الصور كويس بس تفاصيل Note 10S أكتر وألوان A22 بتطلع أحسن .. البورتريه احسن في A22 وبيقص الصور مظبوط أكتر.
التصوير في الإضاءخ الداخلية فا شاومي بتتفوق في التفاصيل لكن A22 أفضل من بعيد وألوانه أحسن وواقعيه أكتر .. التصوير بالـNight Mode هتلاقي هتلاقي شاومي مقلل الـHighlights وده بيأثر على شكل الصورة النهائي .. الـA22 مش مقللها، الاتنين كويسين وبتعديل بسيط هتخليهم زي بعض.
السيلفي في الإضاءه العالية A22 مش لطيف اوي .. الـNote 10S الصورة مظبوطة اكتر والتباين مظبوط أكتر والصورة Sharp أكتر .. اما InDoor او في إضاءه داخلية هتلاقي سيلفي Note 10S بيقل كتير وسيلفي الـA22 بقى أحسن وبيقدر يتفوق .. والـNight Mode أفضل في الـA22.
بالنسبة بقى لتصوير الفيديوهات فالموبايل بيدعم تصوير بجودة 1080p ومفيش 4K للأسف .. وفي مثبت بصري ودي ميزة قوية .. والموبايل فيه ميكروفون اضافي لعزل الضوضاء.
سعر Galaxy A22 :-
- النسخة الـ64 جيجا مع 4 جيجا رام بسعر 3400 جنية
- النسخة الـ128 جيجا مع 4 جيجا رام بسعر 3700 جنية
- النسخة الـ128 جيجا مع 6 جيجا رام بسعر 4000 جنية
وينفع تركب كارت ميموري بحجم 1 تيرا وشريحتين اتصال مع بعض في نفس الوقت.
الموبايل لسه نازل وانا منصحكش تمامًا تشتري بالأسعار دي لإن الموبايل كده سعره قريب من Galaxy A32 ويمكن أغلى حاجه بسيطة كمان .. الـA32 أحسن منه على الأقل في دقة الشاشة، استنى شوية والموبايل سعره هيتحرق في المحلات وهينزل حوالي 400 جنية على الأقل.
علبة الموبايل فيها سماعة لكن للأسف مفيهاش جراب .. المفروض العكس، انا مقدرش استغنى عن الجراب لكن ممكن اتصرف في سماعة عادي.
الرأي النهائي :-
الموبايل هيكون اختيار كويس لمحبي سامسونج اللي عايزين شركة مضمونة وموبايل مفيهوش مشاكل وبديل معقول جدًا عن Galaxy A21s .. لكن هو بسعره الحالي لما يتحط في مقارنة مع Redmi Note 10S خسر في معظم النقط أهمها شكل التصميم، دقة الشاشة، المعالج، نوع ذاكرة التخزين، الصوت، سرعة شحن البطارية.
Comments