شركة سامسونج عاملة تعاون مع Vodafone في مصر .. اي موبايل من سامسونج هتشتريه، فلوسك كلها هترجعلك وحداث او ميجابايتس على مدار سنه .. يعني مثلًا لو إشتريت موبايل Galaxy A31 بسعر رسمي 4150 جنيه هتقسمهم على 12 شهر، هيطلعلك 346 جنيه ودي قيمة الهدية اللي هترجعلك كل شهر لمدة 12 شهر من فودافون.
لو مثلًا الفيلكس بـ20 قرش فا هتلاقي ان انت هتاخد 1729 فيلكس كل شهر لمدة سنة، وطبعًا علشان تاخدهم لازم تكون مشترك في باقة فيلكسات 30 او 35 وتجددها كل شهر علشان يجيلك الفيلكسات .. طيب علشان يجيلك الفيلكسات دي هتشتري الموبايل من اي مكان وهتركب شريحة فودافون بتاعتك في مكان الـSIM 1 وبعدين بتتصل بـ #201* وهيجيلك الفيلكسات الهدية بتاعتك.
الفيلكسات الهدية دي بتستخدمها خلال 30 يوم ومش بتترحل .. بمعنى انك لو خلصت الشهر من غير ما تخلص الفيلكسات مش هتترحل للشهر اللي بعده .. وفودافون شروطها علشان يجيلك الهدية دي هي انك تكون مشترك في باقة فيلكس من تاني شهر .. يعني لما تشتري الموبايل اول شهر هيجيلك الفيلكسات بس تاني شهر لازم تعمل باقة فيلكس 30 او 35 علشان تقدر تكمل.
اما بالنسبة للموبايلات الـFlagships اللي زي S20 Ultra او S20 Plus او Galaxy Z Flip فا انت فلوسك هترجعلك كـ ميجا بايتس، يعني مثلًا الـZ Flip موبايل بـ24 الف جنيه .. هيرجعلك بـ2000 جنيه ميجا بايتس كل شهر بحوالي 10 الاف جنيه ميجا بايت في الشهر لمدة سنه .. وعلشان تاخد الهدية لازم تكون مشترك في باقة اكستريم 30 او تكون عميل Vodafone RED او SuperPass 30, 35.
العرض ده ساري لمدة سنة .. من مايو 2020 لـ مايو 2021 او حتى نفاذ الكمية .. وطبعًا لازم تجدد باقتك كل شهر وتتصل بالـ #201* كل شهر .. يعني مش هينفع باقتك متبقاش اتجددت وتاخد الهدية .. لازم الاول الباقة تتجد علشان تقدر تاخد الهدية.
دلوقتي هنبدأ مراجعة موبايل Samsung A31 .. الي هنتكلم عنه بالتفصيل في المقالة ديه !
التصميم :-
الموبايل كالعادة زي معظم موبايلات سامسونج اللي في فئه الـA .. بيجي بظهر وفريم من البلاستيك .. والفئة السعرية اللي الموبايل ده موجود فيها مش كل الموبايلات زجاج ومش كلها بلاستيك.
فالموضوع راجع ليك انت اللي تحدده .. سواء شايفه ميزة انه مش بيتكسر بسهولة .. او شايفة عيب لإنك عاوز موبايل خاماته محترمه وPremium.
اللون الأبيض حلو في الموبايل ده وشيك كده .. اللون لوحده ممكن يخليك تغير رأيك بخصوص تصميم الموبايل على فكرة.
وطبعا رصة الكاميرا الرُباعية المعهودة في الظهر .. خلاص ده اللي بقينا نشوفه من سامسونج دايمًا، الكاميرات موجوده على حرف L في المستطيل بتاع الكاميرات اللي البروز بتاعه قليل جدًا وبيتغطى بالجراب الشفاف اللي جاي مع الموبايل في العلبة.
الموبايل وزنه متوسط حوالي 185 جرام وتخانته حوالي 8.5 ملم .. مقبول في الإيد .. مش تقيل اوي ومش خفيف اوي .. حاجة في النص كده.
الشاشة :-
والشاشة بقى اهم ميزة في الموبايل ده .. شاشة Super AMOLED بحجم 6.4 بوصة بدقة FHD+ .. فيها نوتش صغير كده فوق.
الشاشة حلوة جدًا.. سواء الوان او سطوع او زوايا الرؤية .. وزي ما بقولك ديه احسن حاجة عجبتني في الموبايل ده.
بس للأسف الحافة السفلية للشاشة كبيرة شوية .. كنت اتمنى تبقى اقل من كده .. وللأسف مفيش إعلان رسمي عن طبقة الحماية على الشاشة ولا هي كمان بيجي عليها سكرينة.
الأداء :-
موبايل Galaxy A31 جاي بمعالج ميدياتيك Helio P65 .. معالج مش قوي خالص في فئته السعرية .. محقق سكور مش كبير على Antutu Benchmark .. وده منعكس جًدا جدًا على الأداء.. وكمان نوع الذاكرة الداخلية eMMC 5.1 النوع القديم البطيء وكمان الموبايل بـ 4 جيجا رام فقط !
معروف ان واجهة سامسونج مليانة مميزات فبالتالي هي تقيله نسبيًا وبتحتاج معالج قوي شوية .. فالأداء هنا كله تقطيع وهتحس بالفريمات في كل حته.
حقيقي متبسطتش بالأداء هنا خالص .. وحقيقي عرفت نعمة الـExynos 9611 اللي معجبنيش اوي في الـGalaxy A51 والـGalaxy M31 .. لأ الـExynos 9611 احسن بفرق ملحوظ.
بالنسبة للأداء الرسومي بقى .. لعبة PUBG بتشتغل على High HD، بس مش هتعرف تلعب بسبب التقطيعات .. وهتحتاج تقلل الـQuality .. اما لعبة كول اوف ديوتي نفس القصة .. بتشتغل على أقل إعدادات جرافيك واكيد بتشتغل كويس على الإعدادات القليلة ديه.
ومن الأخر الموبايل ده مش مناسب للألعاب التقيلة على الإطلاق .. والبروسيسور اللي فيه موجود أقوى منه في الموبايلات اللي تحت الـ3000 جنية زي الـG70 والـG80 من ميدياتيك برده.
عوامل الأمان وعناصر اخرى :-
البصمة مٌدمجة في الشاشة .. مش سريعة ومش عملية .. ساعات بتغلط .. والـAnimation بتاع الواجهة مبطئها اكتر واكتر .. والـFace Unlock سرعته مقبولة بس مش اسرع حاجة.
الموبايل كالعادة مفيهوش لمبة اشعارات .. بس فيه خاصية الـAlways On Display .. بتعرضلك ايقونات إشعارات البرامج اللي جاتلك.
الموبايل فيه خاصية الـNFC وديه ميزة كويسة إن سامسونج مش بتشيلها من النسخ اللي جايه مصر .. عشان تقدر تشحن كارت عداد الكهربا من الموبايل علطول.
مستشعر الضوء موجود وشغال كويس .. ومستشعر التقارب كالعادة هيعلق معاك في المكالمات .. لازم تزلق الموبايل في ودنك اوي.
صوت الموبايل جاي من سماعة واحدة تحت على اليمين صوتها متوسط مش عالي ومش مجسم .. وصوت سماعات المكالمات عالي وواضح .. وصوت سماعات الأذن كويس مفيهوش مشاكل.
كالعادة بالنسبة للشبكة .. الـWiFi مش اقوى حاجه .. وشبكة الإتصال متوسطة مش هقدر اديها تقييم ممتاز للأسف.
البطارية :-
بطارية كبيرة بتيجي بحجم 5000 مللي أمبير .. بس للأسف استحملت معايا حوالي 6 ساعات شاشة مفتوحة .. إستخدام تقيل .. بس كنت متوقع تعمل 7 ساعات ~ 7 ساعات ونص مثلًا … مش عارف ليه !
المهم الشاحن 15 واط بيشحن البطارية بالكامل في 3 ساعات وده وقت كبير اوي اوي اوي .. ممكن نقول اوي من هنا لبكرة عادي !
الكاميرات :-
الموبايل بيجي بـ4 كاميرات في الضهر .. الأساسية 48 ميجا بيكسل بفتحة عدسة F/2.0 .. والتانيه 8 ميجا بيكسل فتحة عدسة F/2.2 للتصوير الواسع، التالته 5 ميجا بيكسل فتحة عدسة F/2.4 ماكرو، والأخيره 5 ميجا بيكسل للعزل.
والسيلفي الموجود في نوتش الشاشة بيجي بدقة 20 ميجا بيكسل مع فتحة عدسة F/2.2 .. وللأسف الشديد مفيش Night Mode في سوفت وير الكاميرا الخلفية ولا امامية.
موبايل Galaxy A31 الكاميرا بتاعته متواضعه .. هتطلعلك اداء كويس لو الإضاءه مساعداك، لو بتصور في شمس مثلًا .. وده اللي اي موبايل هيعمله، طبيعي يعني .. عمومًا انت هتاخد تفاصيل مقبوله في الإضاءه الكويسه.
انما لما تجرب تصور بقى في اضاءه ضعيفه، لأ هتلاحظ فعلًا ان التفاصيل ضايعه خالص والصوره مفيهاش اي تفاصيل واضحه .. واللي كان ممكن يحل الموضوع ده بشكل بسيط الـNight Mode واللي مش موجود هنا.
ولما تحطه برده جنب الـNote 9S واللي يُعتبر مُنافس مُباشر .. هتلاحظ تفوق ضخم جدًا في نوت 9 اس في التفاصيل بتاعت الصورة وفي التصوير بالليل كمان هتلاحظ الفرق الضخم بينهم.
بالنسبة بقى للكاميرا السيلفي فا هي مقبوله .. مش وحشه .. في الشمس وفي الظل هتاخد منها اداء الى حدٍ ما مقبول .. اما بقى في الإضاءه الضعيفه والداخليه هتحس ان مفيش تفاصيل والوان الصورة كلها بتدخل في بعضها.
بس عمومًا مُمكن اتقبل الكاميرا السيلفي شوية عن الكاميرا الخلفيه خصوصًا في الإضاءه الضعيفه .. وعمومًا بصراحه ولا الكاميرا الأماميه ولا الكاميرا الخلفيه في الموبايل ده هيدولك اداء كويس يقدر ينافس ويسد قصاد المُنافسين.
بالنسبة بقى لتصوير الفيديوهات بالـA31 فا للأسف الموبايل ده مش بيصور 4K .. بالرغم من ان مُعظم المُنافسين في الفئة دي بيصوروا 4K .. وكمان الموبايل مفيهوش مثبت إلكتروني .. وهتلاقي مايكروفون لعزل الضوضاء واداءه كويسه.
لو عايز تشوف صور متصوره بالموبايل وتجربة تصوير الفيديوهات، شوف فيديو المراجعة في اخر المقاله !
سعر الموبايل :-
الموبايل موجود منه نسخة واحدة في مصر .. بتيجي بمساحة تخزين 128 جيجا مع 4 جيجا رام وسعرها الرسمي 4300 جنية.
بس سيبك من السعر الرسمي، الموبايل موجود في المحلات بحوالي 3800 جنيه .. وينفع تركب كارت ميموري بحجم 512 جيجا وشريحتين اتصال مع بعض.
الرأي النهائي :-
لو معاك الـ4000 جنية ورايح تشتري الـGalaxy A31 .. بعد أذنك هات الـGalaxy M31 .. احسن في الكاميرات والمعالج والبطارية والصوت ورام أكبر ( 6 جيجا رام ) وتجربتة احسن مية مرة من الـA31.
واهو برده سامسونج ومروحناش بعيد .. علشان انا عارف ان في ناس كتير بتحب موبايلات سامسونج عشان الشاشة.
انما لو على الـA31 .. فهو ميقدرش يكسب اي موبايل منافس في اي حاجة في فئته السعرية اللي محطوط فيها غير بس الشاشة الـAMOLED الـFHD+ وميزة الـNFC .. واللي برده موجوده في اخوه الـM31 اللي رشحته ليكم !
Comments