مراجعة Galaxy A33 5G الجديد من سامسونج – اللعب مع الكبار !

موبايل Galaxy A33 5G واحد من أحدث موبايلات سامسونج اللي نزلت السوق المصري .. نزل بعد Galaxy A53 بفترة، وطبعًا نزل بالأسعار الجديدة .. وبالتالي سعره الرسمي قريب من سعر A53 في المحلات .. وكالعادة بعد توفره بفتره سعره هيتنزل في المحلات .. والنهارده بنقدملكم مراجعة Galaxy A33 5G الجديد!


التصميم :-

تصميم Galaxy A33 5G مفيهوش أي جديد .. نفس تصميم Galaxy A53 من الظهر، مش هتعرف تميز بينهم .. وعمومًا ده نفس تصميم سلسلة Galaxy A الجديدة كلها.

وزن A33 5G حوالي 186 جرام مع تخانه بتوصل لـ8.1 مللي .. مع بروز قليل للكاميرات ومفيش قلق منه .. والموبايل مسكته في الإيد مفيهاش أي مشاكل .. وطبعًا الخامات بلاستيك بالكامل كالمعتاد.

الموبايل مقاوم للماء والغبار بشهادة معتمدة IP67 .. ميزة حصرية عند سامسونج في موبايلاتها المتوسطة، لكن هي طبعًا سبب من أسباب إرتفاع سعر الموبايل وإنه دخل في فئة سعرية غالية.


الشاشة :-

شاشة Super AMOLED بحجم 6.4 بوصة بدقة FHD+ مع تردد بيوصل لـ90 هيرتز، وأول تنازل في نقطة الشاشة هي ان في نوتش للكاميرا السيلفي .. مش مقبول تمامًا بالسعر ده، وكمان الحافة السُفلية للشاشة كبيرة جدًا.

جودة شاشة Galaxy A33 5G ممتازة جدًا .. مش أقل من Galaxy A53 او Galaxy A52s 5G تمامًا .. ألوان محترمة جدًا وتباين رهيب وكثافة بيكسلات محترمة، يمكن الفرق الوحيد بس في التردد الـ90 هيرتز.

الشاشة محمية بطبقة حماية Corning Gorilla Glass Victus .. لكن للأسف مفيش سكرينة بتيجي مع الموبايل في العلبة، ومفيش شاحن ومفيش جراب!


الأداء :-

معالج اكسينوس 1280 بتكنولوجيا 5 نانو ميتر .. معالج أداءه اليومي كويس معقول جدًا، موفر جدًا في البطارية .. مش بيسخن بسهولة، وهو نفسه الموجود في Galaxy A53 وبيقدم نفس الأداء.

المعالج ده مُقارنًة بالمعالجات اللي بتنزل في الموبايلات الجديدة الفتره دي فا هو يعتبر ممتاز .. لكن لو هنقارنه بـSD778G اللي كان بينزل في موبايلات السنة اللي فاتت، فا سناب دراجون يكسب طبعًا.

الأداء في الألعاب كويس، ببجي أخرها تشتغل على High HD والأداء معقول جدًا .. بس مفيش اعدادات جرافيك أعلى من كده .. والسخونيه كويسة الموبايل مش بيسخن بسهولة.


عوامل الأمان وعناصر اخرى :-

بصمة الإصبع موجودة أسفل الشاشة .. أداءها معقول جدًا مش كارثي، بس كسرعة بصمة تحت الشاشة بالنسبة للمنافسين فا سامسونج تعتبر الأبطأ، والـFace Unlock برده مش أسرع حاجه.

الموبايل بيجي بـAndroid 12 مع واجهة سامسونج الجديدة .. والموبايل فيه مستشعر الـNFC وفيه ميكروفون اضافي لعزل الضوضاء .. بس مفيهوش للأسف منفذ 3.5 مللي.

صوت الموبايل Stereo عالي وممتاز جدًا زي A53 و A52s 5G ودي ميزة قوية جدًا .. مستشعر التقارب بطيء شوية، مش بيغلط بس بطيء وبيتأخر على ما يفتح الشاشة .. زيه زي A52s 5G و A53 بالظبط.

وبالنسبة للشبكات فا شبكة الـWi Fi متوسطة لأن الموبايل بيعمل تصفية للشبكات الضعيفة، وشبكات الإتصال كويسة مفيهاش مشاكل.


البطارية :-

بطارية الموبايل 5000 مللي امبير .. بتقدم أداء محترم جدًا خاصًة مع المعالج اللي مش بيستهلك بطارية خالص .. الموبايل يقدر يعدي 8 ساعات شاشة مفتوحة.

الموبايل بيدعم شحن 25 وات .. مش أسرع حاجه، بس مفيش شاحن للأسف في علبة الموبايل.


الكاميرات :-

العدسة الأساسية 48 ميجا بيكسل بفتحة عدسة F/1.8 فيها مثبت بصري، عدسة Ultra Wide للتصوير الواسع بدقة 8 ميجا بيكسل بفتحة عدسة F/2.2 .. عدسة تصوير ماكرو 5 ميجا بيكسل وعدسة مخصصة للعزل 5 ميجا بيكسل .. وكاميرا سيلفي بدقة 13 ميجا بيكسل بفتحة عدسة F/2.2.

الكاميرا الخلفية ممتازة جدًا، المعالج مساعد الكاميرا في إنها تطلع صور ممتازة بالنسبة لدقتها، أحيانًا هتلاحظ ان تشبع الألوان محتاج يزيد شوية .. لكن بشكل عام كمعالجة ألوان في مختلف ظروف الإضاءه هتلاقي A33 5G ممتاز .. الـShutter Speed بتاع الكاميرا مش أسرع حاجه بس مش كارثي.

لما جربت A33 5G مع A53 اللي هو أفضل كاميرا موجودة في الفئة المتوسطة، لاقيت ان الاداء متقارب جدًا بينهم .. بصراحة سامسونج مستواها ممتاز جدًا وبيعلى كل يوم عن اللي قبله في الكاميرات.

بالنسبة للسيلفي فا مقدرش أقول انه ميزة، ومقدرش أقول انه عيب برده .. الأداء متوازن، توقعت ان الأداء هيكون سيء، لكن المعالجة بتاعت الصور ممتازة جدًا .. ولما قارنتها مع A53 لاقيت ان في فرق بسيط في الإضاءات العالية .. لكن لما الإضاءه بتقل بيظهر التفوق واضح لصالح A53 قصاد A33 5G.

بالنسبة لتصوير الفيديوهات فالموبايل بيدعم تصوير بجودة 4K مع 30 فريم في الثانية .. والموبايل فيه مثبت بصري حقيقي بيقدم أداء ممتاز جدًا .. وفيه ميكروفون اضافي لعزل الضوضاء.


galaxy a33 5g price

سعر Galaxy A33 5G :-

  • نسخة 128 جيجا مع 8 جيجا رام بسعر 8450 جنية

وتقدر تركب شريحتين إتصال من الجيل الرابع او شريحة مع كارت ميموري 1 تيرا.


الرأي النهائي :-

لو هتشتري A33 5G بسعر 8000 جنية فا بلاش، دور على Galaxy A52s 5G او Galaxy A53 واشتريهم بالسعر ده .. اما A33 5G المنطقي ان سعره هيتحرق في المحلات على الأقل بـ ألف جنية عن سعره دلوقتي.

مميزات Galaxy A33 5G :-

  • مقاوم للماء والغبار بشهادة معتمدة
  • صوت Stereo ممتاز جدًا
  • أداء جيد
  • بطارية قوية جدًا
  • كاميرات على مستوى المنافسة

عيوب Galaxy A33 5G :-

  • علبة الموبايل فاضيه من غير شاحن ولا جراب ولا سكرينه
  • مستشعر التقارب مش الأفضل
  • مفيش مدخل 3.5 مللي
  • تصميم نوتش قديم وحواف كبيرة

قد يعجبك أيضا...

Comments

جاري التحميل...