مراجعة Galaxy A52 و Galaxy A72 – عودة العصر الذهبي لـ سامسونج !

النهارده هنقدملكم مراجعة Galaxy A52 و Galaxy A72 .. موبايلات مهمة من سامسونج في الفئة المتوسطة , الموبايلين 4G مش بيدعموا للجيل الخامس .. والنهارده في المراجعة دي هتعرف كل حاجه عنهم بالتفصيل بعد ما جربناهم.


التصميم :-

الموبايلين الـ Galaxy A52 و الـ Galaxy A72 بينزلوا بأربع ألوان .. أبيض وأسود وأزرق وبنفسجي.

سامسونج مش بتحب تتنازل .. ظهر الموبايلين بالكامل من البلاستيك .. لكن المرة دي ألوان الظهر مطفية ومش بتعمل إنعكاسات علشان ميظهرش فيها الخرابيش.

وحقيقي الخامة البلاستيك اللي هنا معقولة واتحسنت عن الأجيال القديمة بشكل ملحوظ والموبايل متين وماسك نفسه كده .. هتلاحظ ده لما تمسك الموبايلات بنفسك وتجربها .. لكن علشان نبقى متفقين، تظل الخامات الزجاجية أفخم ولكنها بتغيب عن كل موبايلات سامسونج المتوسطة للأسف.

في بروز في الكاميرا الخلفية في ظهر الموبايلين .. بروز مش كبير أوي ومش صغير .. حاجة كده في النص .. وعلشان سامسونج توفر فا خلت فريم الكاميرات من البلاستيك بنفس لون الظهر وكله حته واحده مفيش اي قطعات علشان يحافظوا على جزئية المقاومة البسيطة للماء.

الـGalaxy A72 و الـ Galaxy A52 مقاومين للماء والغبار IP67 , المقاومة دي علشان لو في طرطشة ماية جت على الموبايل تبقى متطمئن إنه مش هيحصله حاجة .. لكن الشهادة دي مش معمولة لإنك تنزل بيه حمام السباحة والكلام ده .. لإن الشهادة دي معناها مقاومة الماء لعمق متر في مايه عذبة مفيهاش ولا ملح ولا كلور .. ولكن برده كويس اننا بنشوف شهادة معتمدة لمقاومة الماء في موبايلات فئة متوسطة.

الموبايلات وزنها متوسط ، الـA52 حوالي 190 جرام انما الـA72 أتقل شوية حوالي 200 جرام والتخانة معقولة حوالي 8.4 ملم.

الـA72 اطول شوية من الـA52 علشان شاشته أكبر شوية.

ولكن الملحوظ ان مفيش Curves او انحناءات كبيرة في الظهر .. في Curve صغير اوي يحسسك ان الموبايل مستطيل شوية في ايدك علشان ميتزحلقش.


الشاشة :-

شاشة A52 بحجم 6.5 بوصة انما شاشة A72 بحجم 6.7 بوصة .. والشاشتين Super AMOLED بجودة FHD+ بتردد بيوصل لـ90 هيرتز مع ثقب صغير للسيلفي .. الفرق الفعلي بين الشاشتين مجرد حجم لكن مفيش فرق جوهري ما بينهم.

الشاشات هنا تحفة حرفيًا .. أفضل شاشات في الفئة المتوسطة حرفيًا .. ألوان مُشبعة وزوايا رؤية ممتازة وسطوع عالي بيوصل لـ800 شمعة .. مفيش ولا كلمة تتقال عليها.

وجربت اقارن شاشة A52 مع شاشة Reno5 4G لانهم نفس الفئة السعرية ولقيت تفوق واضح وتام لشاشة A52.

ولكن الملحوظ اوي هو إستغلال حواف الشاشة .. الحافة العلوية في شاشات سامسونج كبيرة شوية وهما عاملين كده علشان يبقى في سمترية او تماثل بين الحافة العلوية والسفلية .. سامسونج عملت الحركة ديه برده لو تفتكر في Samsung S20 FE.

شاشات سامسونج A52 و A72

وطبعا المُميز اننا بقينا نشوف تردد أعلى شوية في شاشات سامسونج الممتازة 90 هيرتز .. وبالتالي بدل ما كانت بتاخد شاشة Super AMOLED حلوة بس دلوقتي كمان بقت بتردد أعلى .. كومبو قوي جدًا في الفئة المتوسطة .. لو هنتكلم على شاشة Redmi Note 10 Pro انها AMOLED و120 هيرتز فا الأفضل نستنى لما نجرب ونقارنهم ببعض.

وفي النهاية شاشات Galaxy A52 و Galaxy A72 بتيجي محمية بطبقة حماية Corning Gorilla Glass الجيل الخامس.


الأداء :-

الموبايلين موجودين في مصر نسخة 4G فقط .. والموبايلين بمعالج سناب دراجون 720G تكنولوجيا 8 نانو.

أكيد أنا كان نفسي في معالجات أقوى .. معالجات داعمة للجيل الخامس واللي اصلًا لسه مشتغلش في مصر بس ما هو في موبايلات منافسة أرخص بقت بتقدم الميزة دي .. ولكن سامسونج معملتش كده علشان ده كان هيتسبب في رفع سعر الموبايل أكتر وأكتر .. وأصلًا في نسخة 5G من A52 بس مش هتنزل مصر علشان سعرها اغلى.

على مستوى الأداء فا معروف عن سناب دراجون 720G اللي لسه مجربينه في Reno5 4G إنه هيقدملك تجربة أداء مستقرة في الأداء اليومي العادي بدون أي مشاكل ممكن تحصل معاك .. وده الوضع اللي حاصل في A52 وA72 .. مع مراعاة تقل واجهة سامسونج نسبيًا واللي ممكن تخلي الأداء بعد فترة اقل 15% من موبايل منافس بيستخدم نفس المعالج .. ولكن انت بتاخد مميزات قوية في واجهة سامسونج في المقابل.

بالنسبة لمعدل التحديث الـ90 هيرتز فا انت هتحس بيه ساعات وساعات .. مش مستقر علطول بسبب تقل الواجهة نسبيًا.

انا ممكن اتقبل فكرة استخدام المعالج الـ SD720G في A52 علشان باقي المميزات اللي فيه .. انما A72 لا مش متقبله .. لأن أغلى وفي معالجات أقوى موجودة في أكتر من موبايل منافس لـ A72 .. وسامسونج نفسها عندها S20 FE بمعالج أقوى كتير بسعر قريب جدا من الـ A72.

نقطة كمان .. نوع ذاكرة التخزين متطورش، زي ما هوا UFS 2.1 في الموبايلين .. مع مراعاة ان في موبايلات أرخص بتقدم ذاكرة تخزين اسرع .. والموبايلين في منهم نسختين 128 أو 256 جيجا مع 8 جيجا رام.

الاداء الرسومي الموبايلين زي بعض .. ببجي High HD وبتشتغل كويس .. وكول اوف ديوتي بتشتغل كويس .. مفيش سخونية كبيرة السخونية معقولة.


عوامل الأمان وعناصر اخرى :-

البصمة مدمجة في الشاشة في الموبايلين .. أدائها معقول مش سريعة زي موبايلات اوبو ولكن كويسة .. ولكن تحس ان في تسقيط فريمات في Animation البصمة اتمنى يتحل قريب.

الـFace Unlock لسه سرعته متوسطة مش اسرع حاجه، كالعادة سامسونج مش بقدم اسرع عوامل امان في الفئة المتوسطة.

الموبايلين جايين باندرويد 11 مع واجهة OneUI 3.1 اللي شريط الإشعارات فيها بقت منظمة اكتر .. وكمان بقا في ميزة الـNotifications History .. لو شغلتها ومسحت إشعار جالك بالغلط هتلاقيه في الـHistory.

وكالعادة في Always On Display لعرض الاشعارات اللي جاتلك على الشاشة المطفية.

المُميز السنة دي في موبايلات Galaxy A52 و A72 هو الصوت الـStereo .. صوت Stereo زي الموبايلات الرائدة من سامسونج .. صوت عالي وتجسيم قوي جدًا .. يغلب اي موبايل منافس في جزئية الصوت.

والمستشعرات كلها موجودة .. ضوء، تقارب، جيروسكوب، ومفيهمش مشاكل .. والموبايلين بيدعموا NFC .

بالنسبة للشبكات فا شبكة الإتصال كويسة في الموبايلات هنا .. ولكن الأزمة بتاعت الـWiFi وفلترة الشبكات الضعيفة لسه موجودة .. وبالتالي هتلاقي عدد شبكات ظاهرلك في سامسونج اقل من الشبكات اللي ظهرالك في موبايل من اوبو مثلًا.


البطارية :-

بطارية A52 بحجم 4500 مللي امبير اما A72 بحجم 5000 مللي أمبير .. الإتنين استهلاكم الفعلي زي بعض علشان فرق حجم الشاشة بيعوض فرق حجم البطارية .. حوالي 8 ساعات شاشة مفتوحة إستخدام متوسط في الموبايلين وده وقت معقول جدًا .. وهيكفي معاك يوم مستريح.

ولكن اللي لسه متطورش اوي هو سرعة الشحن .. الاتنين بيدعموا 25 وات .. الشاحن المرفق مع الـA52 هو 15 وات والـA72 هو 25 وات.. وأنا دوري أقارن واقلك ان الموبايلات المنافسة بتقدم سرعات شحن اعلى 30 وات و50 وات و65 وات !


الكاميرات :-

الموبايلين فيهم كاميرا خلفية رباعية .. الأساسية واحدة في الموبايلين 64 ميجا بيكسل بفتحة عدسة F/1.8 مع مثبت بصري حقيقي .. العدسة التانية 12 ميجا بيكسل Ultra Wide فتحة عدسة F/2.2 في الموبايلين .. ممتاز إننا نشوف 12 ميجا بيكسل مش 8 ميجا بيكسل.

العدسة التالتة مختلفة .. في A52 للعزل 5 ميجا بيكسل .. في A72 عدسة للزوم الحقيقي 3X مع مثبت بصري حقيقي .. والعدسة الرابعة واحد في الموبايلين 5 ميجا بيكسل ماكرو.

السيلفي واحد في الموبايلين برده بيجي بدقة 32 ميجا بيكسل فتحة عدسة F/2.2.

في ميزة جديدة في سوفت الكاميرات وهو إنك تقدر تاخد صورة بجودة 8 ميجا بيكسل من أي لقطة من فيديو 4K مصورة باي موبايل من الموبايلين دول.

المهم اداء الكاميرات كالعادة ممتاز من سامسونج .. ألوان مشبعة ومعالجة مظبوطة .. حدة او Sharpness مظبوط جدا.

الـA72 فيه عدسة زوم 3X حقيقي وباين فرق الأداء عن الزوم اللي بيتعمل بالعدسة الرئيسية في الـA52 .. ولما تزوم أكتر يبان الفرق أكتر وده الفرق الجوهري بينهم في التصوير .. والعدسة الزوم للاسف مش شغالة دلوقتي مع الـNight Mode في A72.

العدسة الـUltra Wide محترمة جدًا جدًا في الموبايلين .. زاوية واسعة وتفاصيل كتير ومعالجة حلوة جدا .. والتصوير في اضاءة داخلية محترم جدًا جدًا .. برده بتاخد معالجة ألوان ممتازة .. والنتايج متقاربة جدًا جدًا في الموبايلين.

السيلفي كالمعتاد من سامسونج في الفئة المتوسطة .. معقول جدًا .. مش بيحاول يلعب في الألوان والتفاصيل جامد زي موبايلات اوبو .. لا سيلفي هادي ومنطقي وانا معنديش اي مشاكل معاه.

بالنسبة بقى لتصوير الفيديوهات فالموبايلين زي بعض بالظبط .. بيصوروا على [email protected] .. وطبعًا في مثبت بصري في العدسة الرئيسية فا انا توقعت انه يكون شغال على 4K لكن اللي لاحظته انه مش ثابت أوي .. لأن المعالج نفسه مش بيقدر يثبت الفيديو على جودة عالية زي الـ 4K بسهولة .. لكن تقدر تنزل الجودة لـ1080p وتاخد وضع الـUltra Stady Mode.

تقدر تتنقل بين العدسات وانت بتصور .. تقدر تبدأ بالعدسة الأساسية وتحول للـUltra Wide عادي .. لكن الثبات في التصوير العريض مش الأفضل .. في كمان وضع الـPro Video اللي اتضاف في الموبايلين واللي بيخليك تقدر تتحكم في الـShutter Speed والـISO علشان تطلع فيديو أكثر إحترافية.

شوف تجربة التصوير بالموبايل صور وفيديوهات في فيديو المراجعة !


سعر Galaxy A52 و A72 :-

سعر Galaxy A52 :-

  • نسخة 128 جيجا مع 8 جيجا رام بسعر 5900 جنية مصري
  • نسخة 256 جيجا مع 8 جيجا رام بسعر 6600 جنية مصري

بيدعم تركيب شريحتين إتصال من الجيل الرابع او شريحة واحدة وكارت ميموري بحجم 1 تيرا.

سعر Galaxy A72 :-

  • نسخة 128 جيجا مع 8 جيجا رام بسعر 7600 جنية مصري
  • نسخة 256 جيجا مع 8 جيجا رام بسعر 8222 جنية مصري

وبينفع تركب شريحتين إتصال 4G او شريحة واحدة مع كارت ميموري بحجم 1 تيرا.


الرأي النهائي :-

مميزات Galaxy A52 :-

  • تصميم خفيف وشيك ومقاومة للماء
  • شاشة Super AMOLED ممتازة جدًا 90 هيرتز
  • صوت Stereo عالي
  • كاميرا خلفية ممتازة فيها مثبت بصري
  • دعم للـNFC

عيوب Galaxy A52 :-

  • خامات بلاستيك
  • مش بيدعم تركيب شريحتين وكارت في نفس الوقت
  • معالج SD720G مش أحسن معالج في الفئة دي ولكن ما زال مقبول
  • سرعة شحن أقل من كل المنافسين
  • مفيش سماعات في علبة الموبايل ( ولكن مرفق في العلبة جراب شفاف و الشاحن و الوصلة )
  • بيفلتر شبكات الـWi-Fi الضعيفة

بالنسبة للـ Samsung Galaxy A72 فا هو أغلى حوالي 1500 جنية عن الـA52 ويزيد عليه عدسة Telephoto للزوم .. هو اه شاشة أكبر وبطارية أكبر حاجه بسيطة بس مش فارقة أوي .. رأيي وفر فلوسك وخليك في A52 .. واصلًا في فئة الـA72 في موبايلات تانية من شركات تانية أقوى في المعالجات والكاميرات، وكمان سامسونج نفسها عندها S20 FE في نفس الفئة !

قد يعجبك أيضا...

Comments

جاري التحميل...