سامسونج في مصر اتأخرت جدا في نزول موبايلها الاقتصادي Samsung Galaxy M21 .. الموبايل ده بيقدم أرخص شاشة AMOLED بدقة FHD+ من سامسونج .. ويمكن يكون ده السبب اللي هيخليني اراجع الموبايل ده .. لأني عارف ان في ناس كتير بيحبوا موبايلات سامسونج بسبب شاشتها .. ولكن هل باقي مواصفات الموبايل ترقى للمنافسة في 2021 ؟
التصميم :-
الموبايل كعادة سامسونج من البلاستيك بالكامل .. مفيش فريم .. الفريم والظهر حته واحدة كده علشان تدي متانه اكتر .. ولكن عمومًا البلاستيك المستخدم ضعيف نسبيا.
دايما خامات فئة الـM من سامسونج بتبقى مش قد كده .. الموبايل هيتخربش معاك بسهولة .. وللأسف مش جاي معاه جراب في العلبة .. ولازم تشتريله جراب في أسرع وقت.
الموبايل وزنه مش تقيل أوي رغم أن بطاريته كبيرة حوالي 188 جرام وزن معقول أوي .. ولكن تخين نسبيا 8.9 ملم .. سامسونج إستغلت التخانة دي في انها تخلي الكاميرا الخلفية مش بارزة خالص عن جسم الموبايل وديه حاجة كويسة متعودين عليها من سامسونج.
في كرفات بسيطة في ظهر الموبايل علشان تخلي المسكة في الأيد أحسن .. والمسكة في الأيد فعلا كويسة ومعقولة.
مجملا تصميم الموبايل مش مميز خالص .. خامات بتتخربش بسهولة ومفيش جراب في العلبة .. الحاجه الحلوة ان مفيش بروز في الكاميرات .. ومن الأخر ده نفس تصميم Galaxy M31 والاختلاف بس في عدد الكاميرات الخلفية.
الشاشة :-
حرفيًا دي أحسن حاجة في الموبايل ده .. شاشة بحجم 6.4 بوصة من نوع Super AMOLED بدقة FHD+ وبنوتش للسيلفي .. شاشة ميتقالش عليها ولا كلمة.
شاشة ممتازة .. ألوان مُشبعة عينك تحب تشوفها .. زوايا رؤية محترمة جدًا .. سطوع كويس جدًا تحت الشمس .. وكلكم عارفين جودة الشاشات الـSuper AMOLED بتاعت سامسونج .. هي بس مشكلتها الوحيدة تكلفة إصلاحها عالية شوية.
الحافة السفلية وسط ولا هي كبيرة اوي ولا هي صغيرة أوي .. نقدر نقول معقولة .. وللأسف مفيش سكرينة بتيجي على الموبايل .. كده هتشتري جراب وسكرينة .. وأحب اقولك باختصار ديه نفس شاشة Galaxy M31 الاغلى منه بالظبط.
الأداء :-
أيوة برده نفس معالج الـGalaxy M31 .. اكسنوس 9611 تكنولوجيا 10 نانو .. المعالج ده انا اتكلمت عنه كتير جدا قبل كده .. رأيي فيه واضح وصريح.
في الأداء اليومي العادي .. يناسب الأستخدام الخفيف أكتر .. الناس اللي استخدامهم تقيل .. لا بلاش الأداء هنا مش هيعجبك .. يعني مثلا Redmi Note 9S بنفس السعر وأفضل منه بفرق ملحوظ في الاداء اليومي.
نوع الذاكرة الداخلية في موبايل M21 هو UFS 2.1 ومفيش تنازل في النقطة دي.
بالنسبة للأداء الرسومي فا ببجي تقدر تشغلها على Ultra HDR .. ولكن طبعا هتلاقي تسقيط فريمات كتير .. نزلها High HD والعب وهتلاقي تسقيط الفريمات قل جدا .. لو مش عاوز اي تسقيط فريمات قللها على اقل جودة.
كول اوف ديوتي بتشتغل على جرافيك High وفريمات High برده واللعبة بتشتغل بشكل معقول .. والموبايل بيسخن سخونية معقولة مش بيولع نار يعني.
عوامل الأمان وعناصر اخرى :-
بصمة على ظهر الموبايل .. طبعًا المكان ده قدم نسبيًا ولكنه مازال مقبول ولكن مكان البصمة مش غاطس شوية فا مش هتتعرف على المكان بسهولة .. طبعًا لما تركب جراب المشكلة دي بتتحل لان بيبقى في تجويف في الجراب للبصمة .. وعموما أداء البصمة متفاوت مرة يبقى سريع و مرة يتاخر ثانية كده .. مش احسن اداء للبصمة.
الـFace Unlock سرعته متوسطة مش أسرع Faceunlock في الفئة دي .. الموبايل بيجي بـAndroid 10 بواجهة سامسونج One UI 2.5 وبيجي من غير Secure Folder بتاع سامسونج زي الـGalaxy M51 و M31.
الموبايل فيه الـNFC وفيه Always On Display لعرض الأشعارات على الشاشة الـAMOLED وهي مقفولة.
وبالنسبة للمستشعرات .. مفيش مستشعر ضوء .. الاعتماد على السيلفي في تحديد اضاءة المكان .. وده بيخلي الكاميرا السيلفي شغالة علطول وبيستهلك طاقة اكتر وساعات الموبايل بيتأخر في تحديد درجة سطوع الشاشة.
وكمان مستشعر التقارب سوفت وير وبالتالي برده هتلاقي شاشة الموبايل ساعات بتعلق وانت بتعمل مكالمة ممكن تفضل مفتوحة او تقفل ومتفتحتش .. وده عيب متكرر سخيف في سامسونج.
صوت الموبايل جاي من سماعة واحدة تحت على اليمين صوتها متوسط ولا عالي ولا واطي .. ولكن مستوى التجسيم او الـBass قليل شوية.
بيدعم مدخل 3.5 ملم لتركيب سماعات اذن وبيجي معاه سماعة في العلبة.
بالنسبة لقوة شبكات الاتصال والـWiFi فهي متوسطة .. ده مش احسن موبايل تشتريه لو الشبكة عندك وحشة .. وكمان السوفت وير بيفلتر شبكات الـWiFi البعيدة عندك ومش هتلاقيها وده ممكن برده يعملك ازمة لو الراوتر بعيد عنك.
البطارية :-
بطارية 6000 مللي أمبير .. سيبك من رقمها هي زيها زي بطارية 5000 مش اكتر .. بتستحمل 7 ~ 8 ساعات شاشة مفتوحة باستخدام متوسط .. ماشي نقدر نقول عليها كويسة ومقبولة.
الشاحن المرفق 15 واط بيشحن البطارية في ساعتين و نص وده رقم كبير شوية على 2021 .. وعلى فكرة دي نفس بطارية وسرعة شحن الـGalaxy M31.
الكاميرات :-
الكاميرا الخلفية ثلاثية .. الاساسية 48 ميجا بيكسل فتحة عدسة F/2.0 .. والتانية 8 ميجا بيكسل للتصوير الواسع فتحة عدسة F/2.2 .. والاخيرة 5 ميجا بيكسل للعزل .. وديه نفس كاميرات الـM30s لو تفتكره .. والسيلفي في 20 ميجا بيكسل فتحة عدسة F/2.2 .. وفي Night Mode في الكاميرا الخلفية لكن مفيش في السيلفي.
بالنسبة للكاميرا الخلفية فهي زي ما قولتلك نفس كاميرات M30s ولكن مع سوفت وير احدث من سامسونج وبالتالي هتلاقي معالجة الألوان أفضل شوية .. الألوان بقت مشبعة اكتر بحبه حلوين .. اداء الكاميرا الخلفية الصبح معقول جدا جدا .. هو الـPortrait مش احسن حاجة ولكنه مقبول.
تفاصيل الصور مش كتير لو زومت فيها بايدك هتلاقي التفاصيل فقيرة شوية .. ولكن ما زالت مقبولة .. بس اللي هتحسه ان تفاصيل الصورة سايحة في بعضها يعني مفيش اي Sharpness في الصور.
الكاميرا الـWide Angle ممتازة وواسعة ولكن لازم تصور في اضاءة عالية فقط .. لو اضاءة قليلة النتايج هتبقى سخيفة .. التصوير في اضاءة داخلية معقول ولكن الـHDR ساعات بيعلق وتلاقي خلفية الصورة لاسعة.
ولكن للأسف فتحة العدسة ضيقة وبالتالي لما الاضاءات بتقل هتلاقي تفاصيل الصورة بتقل كتير وحتى مع تشغيل الـNight Mode الوضع مش بيتحسن اوي .. لما جربته جنب الـNote 9S لاقيت تفاصيل نوت 9 اس أحسن في الإضاءه الليلية بفرق واضح وصريح.
اما السيلفي .. فهو معقول جدا في M21 في الاضاءات العالية .. البورترية بس ساعات بيغلط شوية .. الطبيعي بتاع الفئة السعريه دي .. وفي الاضاءة الداخلية هتلاقي التفاصيل قلت كتير اوي .. يعني نقدر نقول مقبولة ولكن مش احسن حاجة.
انما في الاضاءات الضعيفة اداء السيلفي وحش جدا .. الـNote 9S اللي هو مش قد كده في السيلفي بيقدر يتفوق على الـM21 بسهولة.
بالنسبة لتصوير الفيديوهات فالموبايل بيقدر يصور فيديوهات بجودة 4K مع 30 فريم في الثانية لكن للأسف مش بيكون في مثبت إلكتروني .. وبيدعم تصوير فيديوهات بجودة الـ1080p وبيكون في مثبت إلكتروني مقبول جدًا .. والموبايل فيه ميكروفون اضافي لعزل الضوضاء.
سعر الموبايل :-
- نسخة 64 جيجا مع 4 جيجا رام بسعر 3500 جنية على موقع سامسونج
الموبايل كان عليه خصم في الـSamsung Store بقيمة 500 جنية لكن خلاص الخصم خلص .. والموبايل بنسبة كبيرة هيكون موجود في المحلات ولكن مش بكميات كبيرة وسعره هيكون في حدود الـ3300 جنية.
والموبايل بيدعم تركيب شريحتين إتصال من الجيل الرابع معاهم كارت ميموري في نفس الوقت بحجم 512 جيجا.
الرأي النهائي :-
مميزات Galaxy M21 :-
- شاشة هي الأفضل .. تتفوق حتى على Huawei Y8p
- كاميرات بأداء جيد في الاضاءات العالية
- بطارية مقبولة جدا
عيوب Galaxy M21 :-
- أداء مقبول ولكنه ليس الأفضل
- لا يدعم مستشعر ضوء
- لا يدعم مستشعر مقاربة
- شبكات الـWiFi الضعيفة
أما بقى الـM21 بالنسبة للـA21s من سامسونج فالـM21 هيقدملك شاشة أفضل بفرق ضخم وأداء أحسن بفرق بسيط وبطارية أكبر وأحسن بفرق بسيط.
بالنسبة للـM21 مقارنتا مع Redmi Note 9S فالنوت 9 اس هيقدملك خامات أفضل بفرق كبير مع شحن أسرع وصوت أعلى وكاميرات أفضل ومعالج أقوى .. الـM21 هيتفوق بس في الشاشة الـAMOLED وان في NFC بس مش أكتر.
Comments