كل سنة وانتوا طيبين .. رمضان كريم عليكم .. والنهاردة مراجعة Samsung Galaxy M31 .. الموبايل ده فعلًا بيقدم قيمة محترمه من سامسونج مقابل الفلوس اللي بتدفعها .. بس علشان احنا اخر ناس في الكوكب تعمل مراجعة للموبايل ده .. في المراجعه دي هتلاقي كمان مقارنة مع الـRealme 6 .. بحيث كده نعرف مين فيهم الأفضل خصوصًا في الكاميرات .. لحد اما الـRedmi Note 9S يبقى معانا ونبقى نقارن تاني.
التصميم :-
موبايل Galaxy M31 واخد نفس تصميم اخوه الأقدم Galaxy M30s بالظبط .. تصميم بلاستيكي بالكامل مع لون واحد مفيش نقشه جديده ولا مختلفه .. ويمكن يكون سامسونج مش بتحب تهتم بتصميم موبايلات فئة الـM على قد ما بتهتم بالمواصفات الداخلية اللي هنتكلم عليها كمان شوية.
الموبايل وزنه 191 جرام وتخانته 9 ملم .. مسكته في الإيد كويسه لإن الموبايل مش طويل اوي .. ومعنديش اي مشاكل معاه .. ومفيش بروز في الكاميرا الخلفية .. حاجة حلوه جدا.
بس للأسف مفيش جراب بيجي في علبة الموبايل ده ولا سكرينه ولا سماعه ولا اي حاجه .. تحس سامسونج موفره اوي في الحاجات ديه.
لما نحط الـRealme 6 جمب الـM31 .. هتلاقيهم الاتنين مشتركين في الخامات البلاستيك .. وتقريبًا الاتنين نفس الوزن والتخانه .. بس ريلمي 6 اطول شوية من M31 علشان فرق حجم الشاشة.
اما الـRealme 6 فيه بروز كبير في الكاميرات الخلفية .. البروز ده مش موجود في الـGalaxy M31 .. بس الريلمي 6 بيجي معاه جراب في العلبة بيغطي البروز ده.
واخيرًا .. بالنسبة لشياكة وحداثة التصميم .. فأكيد الـRealme 6 شكله أحدث وأشيك من الـM31 اللي تصميمه كلاسيكي شويه .. وعمومًا هي ازواق برده.
الشاشة :-
وزي ما بقول دايمًا .. افضل حاجة في موبايلات سامسونج هي شاشتها .. الـM31 بيجي بشاشه سوبر أموليد بحجم 6.4 بوصة بدقة FHD+ مع نوتش Water Drop محطوط فيه الكاميرا السيلفي.
الشاشة المعهوده اللي جربناها قبل كدا في الـM30s .. هي شاشه مش جديدة فعلًا .. بس ادائها مبهر جدًا جدًا .. الوان الشاشة ودرجات سطعوها تحت الشمس العالية تخليك مبسوط فعلا بتجربة الموبايل ده.
الشاشة عليها حماية Corning Gorilla Glass الجيل التالت ومش بتيجي متركب عليها سكرينه .. وسامسونج هتديلك ضمان 6 شهور على الشاشة في حالة كسرها .. علشان الشاشات الأموليد غالية شوية.
لما نحط الشاشة ديه جمب شاشة الـRealme 6 .. هنلاقي الريلمي 6 جاي بشاشة كاملة 6.5 بوصة IPS LCD بثقب للسيلفي .. مع معدل تحديث أعلى 90 هيرتز.
هل معنى ان شكل شاشة الـRealme 6 الأحدث ومعدل التحديث الأعلى .. يخليها تكسب شاشة M31 ؟.. في رأيي المتواضع لا .. لان تجربة الشاشة الأموليد حتى ولو بـ60 هيرتز ستظل افضل للعين بكتير عن معظم الشاشات الـIPS LCD مهما كانت الـOptions اللي فيها.
الأداء :-
موبايل سامسونج Galaxy M31 جاي بنفس معالج M30s برده .. اكسينوس 9611 اللي اتكلمت عنه كتير جدًا قبل كدا .. المعالج ده اول ما تشتري الموبايل بيكون معاك كويس جدا.
بس الفكرة بعد كده اما تحمل برامج كتير وكلهم بيفضلوا يشتغلوا في الخلفية بفضل واجهة سامسونج اللي مش بتقفل اي تطبيقات لوحدها .. فتلاقي الموبايل تقل شوية معاك.
لو انت استخدامك عادي مش راجل Gamer وبتاع العاب ولا استخدامك تقيل .. فالـ اكسينوس 9611 هيكون كافي جدا ليك متقلقش منه.
بس في نقطة بقى .. تعالى نشوف معالج الـRealme 6 .. اللي هو الـHelio G90T .. المعالج ده اقوى بفرق ملحوظ عن الـM31 .. في الاداء اليومي ممكن تحس بفرق بسيط .. بس الفرق اللي هتحسه فعلا في الاداء الرسومي.
ريلمي 6 بيشغل ببجي على Ultra HDR و الـGalaxy M31 بيشغل اللعبه برده على Ultra HDR .. بس في اختلاف في الاداء !
اللعبة هتلاقيها بتسقط فريمات كتير معاك على اعدادات الجرافيك العالي في الـM31 وهتضطر تنزل لـHigh HD علشان تقدر تلعب مع تسقيط بسيط في الفريمات وسخونية واضحة جدا في جسم الموبايل بتسمع لحد الشاشة.
شخصيًا شايف تجربة الألعاب على الـRealme 6 أفضل شويه من ناحية الاداء والسخونية اللي اقل شوية ومش بتوصل لشاشة وتاتش الموبايل نفسه.
لعبة كول اوف ديوتي شغالة على اعدادات جرافيك Very High على ريلمي 6 .. وشغالة على اعدادات جرافيك High في الـM31 واللعبه بتشتغل كويس جدا على الموبايلين.
وأخيرًا فورت نايت بتشتغل على الـRealme 6 على اعدادات جرافيك High .. انما في الـM31 مش بتشتغل بشكل رسمي.
الخلاصه علشان مطولش عليك .. لو اهتمامك العاب .. فا في منافسين اقوى زي الـRealme 6 والـNote 8 Pro هيكونوا أقوى معاك بفرق واضح وصريح .. انما لو استخدامك عادي .. فمعالج الـGalaxy M31 هيكون كافي معاك.
عوامل الأمان وعناصر اخرى :-
موبايل Galaxy M31 فيه بصمة موجوده في الضهر .. وبيدعم كمان الـFace Unlock سريع ومفيهوش اي مشاكل.
بس لما نقارن مع عوامل امان الـRealme 6 .. هنلاقي الريلمي 6 اسرع حاجة بسيطة .. ومكان البصمة اللي في زُرار الباور عملي اكتر واحدث وكده.
الـRealme 6 والـM31 فيهم Dark Mode .. بس التجربه على الـM31 احلى بكتير علشان طبعًا الشاشة الأموليد .. والموبايلين مفيهومش لمبة اشعارات .. بس في الـM31 هتلاقي Always On Display بيعوضلك غياب اللمبة ديه.
صوت الموبايلين عالي .. بس عجبني اكتر صوت الـM31 مجسم اكتر .. انما كصوت أعلى .. فالـM31 والريلمي 6 نفس الدرجة مفيش واحد اعلى من التاني .. وصوت سماعات المكالمات عالي وممتاز في الموبايلين .. وصوت سماعات الاذن كويس جدا في الموبايلين برده.
بالنسبة لنقطة الشبكة .. ركز معايا كده .. الـRealme 6 بيقدر يلقط شبكات واي فاي اكتر من الـM31 اللي مش بيقدر يلقط غير الشبكات القريبة .. فخلي بالك من الحته ديه علشان ممكن تقفلك من الـM31.
اما بالنسبة لشبكة الإتصال .. فالريلمي 6 اقوى من الـM31 في نقطة الشبكة بفرق بسيط في الاماكن اللي شبكتها ضعيفة.
البطارية :-
موبايل Galaxy M31 جاي بنفس بطارية الـM30s .. بطارية ضخمه جدًا 6000 مللي امبير.
بس طبعًا مع معالج اكسينوس وسوفت سامسونج .. البطارية استحملت معايا حوالي 8 ساعات شاشة مفتوحة .. وقت عادي مش فلته .. يكاد يكون قريب جدا من وقت استخدام بطارية ريلمي 6 الـ4300 مللي أمبير.
بس الفكره في زمن الشحن بقى .. السامسونج معاه شاحن 15 واط زي الشاحن القديم بالظبط بتاع الـM30s اللي كان بيشحن البطارية في ساعتين ونص .. انما الريلمي 6 بيجي معاه شاحن 30 واط .. بيشحن البطارية في ساعة واحدة بس .. فرق كبير !
الكاميرات :-
ولحد كده لو تاخد بالك .. مفيش اي فرق ضخم بين الـM31 والـM30s .. انا عمال اقول نفس كل حاجه لحد دلوقتي .. بس اللي اتغير فعلا بقى الكاميرات بقت حاجة تانية .. خلينا نشوف.
الـM31 جاي بـ4 كاميرات في الظهر .. الاساسية الـ64 ميجا بيكسل بمستشعر سامسونج GW1 المميز مع فتحة عدسة F/1.8 .. والعدسة التانية 8 ميجا بيكسل فتحة عدسة F/2.2 للتصوير الواسع .. والتالته 5 ميجا بيكسل ماكرو والاخيره 5 ميجا بيكسل للعزل.
والكاميرا السيلفي بدقة 32 ميجا بيكسل مع فتحة عدسة F/2.0 موجود في نوتش فوق في الشاشة.
حقيقي اداء الكاميرات في الـM31 فرق كتير عن الـM30s .. لإن هنا سامسونج مستخدمه مستشعر نظيف جدا واللي هو موجود في الـGalaxy A71 اللي كاميراته ممتازة بصراحة .. وكمان مع معالجه سامسونج للألوان اللي اتطورت كتير في الواجهة الأخيرة بتاعتهم .. فانت بتاخد صور محترمة جدا جدا.
العدسة الـWide Angle اللي هنا من افضل العدسات الواسعه اللي ممكن تجربها .. والتصوير بالموبايل حتى في الاضاءة الداخلية عادي وبورترية ممتاز والتفاصيل كتير والألوان عينك تحب تشوفها.
والـNight Mode بتاع الموبايل مش بيفرق كتير في الكاميرا الخلفية .. هو بيعمل زوم شوية كدا في الصور .. بس عمومًا انا راضي جدا عن اداء التصوير بالليل.
ولما جربت الـRealme 6 جنب الـM31 .. المفروض الريلمي 6 بنفس المستشعر الموجود في الـM31 .. الفرق هنا في معالجة السوفت وير للصور.
وبصراحة الموبايلين ممتازين .. زي ما قولتلكم قبل كدا في ريفيو الـRealme 6 ان الكاميرا فعلًا حلوة جدا .. فاحب اقول لك ان كاميرا الـM31 متفرقش عنها كتير .. نفس الاداء المحترم .. الكلام ده في الاضاءات العالية.
اما بالنسبة للتصوير في الإضاءه الداخليه، هنلاقي تفوق الـM31 في معالجة لون الشعر .. انما كباقي التفاصيل واحد تقريبا .. ولما الاضاءة تقل اكتر ونشغل بقى الـNight Mode في الموبايلين .. يبان تفوق السامسونج .. الـSkin Tone بتبقى Saturated اوي .. لدرجة ان الريلمي 6 طلع بهتان جدًا جنبه .. وشخصيًا في الوضعيه دي هختار M31 !
وبشكل عام هنلاقي ان الريلمي 6 مازال بيلعب في الصور بينما الـM31 بيحاول يطلع لك تفاصيل اكتر والوان صوره واقعيه اكتر .. والصور بتطلع واقعيه جدًا من الـM31 عن الـRealme 6 .. بس اقدر اقولك ان الكاميرتين دول هما افضل كاميرات هتاخدها في الفئة دي.
وبالنسبة لتصوير الفيديوهات .. فـ موبايل سامسونج M31 و ريلمي 6 .. بيقدروا يصوروا فيديوهات بجودة 4K .. بدون تثبيت الكتروني .. وعلشان تلاقي تثبيت الكتروني لازم تنزل لجودة 1080p.
اما بالنسبة للسيلفي .. لما بنجرب الـM31 لوحده، العدسه اتطورت كتير عن الاول .. وبحس ان هي هي نفس عدسة السيلفي الممتازه بتاعت الـGalaxy A70 لو تفتكروه مع معالج صور افضل واحدث.
وبالتالي انت هتاخد لون بشرة مظبوط جدا جدا .. لون Warm كده او دافي احيانًا .. وهتاخد تفاصيل حلوة جدا ايً كانت الاضاءة .. وحتى الصور البورتريه مظبوطة جدا ومفيهاش اي مشاكل.
واللي بهرني بقى بجد في السيلفي بتاعت الموبايل ده .. الـNight Mode رهيب فعلًا، تحس انه شغال وبيأدي اكتر من الـNight Mode بتاع الكاميرا الخلفيه .. بيخلي فعلًا الصور ممتازه .. مشوفتش معالجه زيها قبل كده.
اما بقى لما حطيط الـM31 جنب الـRealme 6 في السيلفي .. تقريبًا حسيت في كل الصور ان ريلمي 6 صوره بهتانه .. وده لإن الـM31 صوره مُعززه بالألوان وعينك تحب تشوفها .. وانا شايفها فعلًا احلى.
يمكن لما تصور في الإضاءه الداخليه .. بتلاقي الـRealme 6 صوره بهتانه جدًا كالعاده اما الـM31 الصور بتكون مُعززه بالألوان اوي .. يعني هتحتاج تعدل الاتنين وتعمل عليهم فلتر عشان تظبطهم.
بس لما في الإضاءه الداخليه تستخدم الـNight Mode .. وش تفوق واضح وتام للـM31 في السيلفي .. لإن اصلًا سيلفي الريلمي 6 بالليل مش حلو زي ما قولتلكم.
وبصراحه انا مبهور من كاميرات الـGalaxy M31 .. ممكن تشوفوا الصور المتصورة بالموبايلين مع بعض في فيديو المراجعة في أخر المقالة.
سعر الموبايل :-
موبايل Samsung Galaxy M31 نزل بنسخة واحده بمساحة تخزين 128 جيجا مع 6 جيجا رام بسعر رسمي 3999 جنية والموبايل مُتاح اونلاين على موقع جوميا .. وينفع تركب كارت ميموري وشريحتين اتصال مع بعض في نفس الوقت.
والموبايل شكله كدا هيفضل اونلاين بس او هينزل في بعض المحلات بس مش بكميات .. وده لإن سامسونج اعلنت عن نزول الـGalaxy A31 بسعر 4150 جنية للنسخة 128 جيجا و4 جيجا رام.
وده موبايل اصلًا كـ كاميرات واداء وبطارية ورام أقل من الـM31 .. بس هيبتاع في المحلات حلو علشان اسم سامسونج .. وهو ده اللي سامسونج هتركز عليه.
الرأي النهائي :-
موبايل M31 افضل من M30s في :-
- كاميرات افضل بفرق كبير سواء اماميه او خلفيه
- مساحة تخزين اكبر و رام اكبر
مميزات الـM31 :-
- الكاميرات بتاعته القوية
- الشاشة الاموليد الممتازة
- البطارية الضخمة
- مساحة ورام كافيين جدًا
- اسم سامسونج الغني عن التعريف
عيوب الـM31 :-
- تصميم قديم مفيهوش تطوير
- شاحن 15 وات مش سريع
- اداء مش الأفضل في الألعاب
موبايل Realme 6 افضل من M31 في :-
- اداء اقوى في الألعاب
- شحن أسرع
- اداء أفضل في شبكات الإتصال والواي فاي
- موبايل شكله احدث وأجدد
تشتري الـM31 امتى ( نقط التفوق على ريلمي 6 ) :-
- لو بتدور على كاميرا سيلفي قوية
- لو بتدور على أفضل كاميرا خلفية
- لو عايز شاشة اموليد ممتازة من سامسونج
- لو فارق معاك الـAlways On Display
متقلقوش .. مش ناسيين الـRealme 6 Pro والـRedmi Note 9S .. هنعملهم مراجعات قريب وهنعمل كل المقارنات اللي في دماغك إن شاء الله !
Comments