سلسلة النوت من سامسونج ليها طابع خاص .. ودائمًا هي الأكثر نجاحًا وسط كل الموبايلات الفلاج شيب التانية .. وإحنا دلوقتي هنراجع موبايل Samsung Galaxy Note 20 Ultra .. وحش جديد من وحوش سامسونج .. أو ممكن يكون هو الوحش الأقوى عندها دلوقتي.
سامسونج بتحاول دايمًا متزعلش حد في موبايلات جالاكسي نوت .. وبتمسك العصاية من النص .. فهل ده حصل في النوت 20 الترا ؟ هل الموبايل يستاهل لقب أفضل موبايل أندرويد في 2020 ؟
التصميم :-
اول لما تمسك Note 20 Ultra في إيدك هيجيلك إحساسين عكس بعض .. الأول ايه الفخامة ديه .. إنت ماسك فعلًا حاجة فخمة جدًا في ايدك .. والتانية إيه الأبعاد دي والوزن ده .. الموبايل كبير جدًا خصوصًا لو إيدك صغيرة.
سامسونج خلت الموبايل ده مستطيل جدًا مع كيرفات او إنحناءات يمين وشمال .. والتصميم فيه سمتريه رهيبة عجباني جدًا بصراحة.
التصميم من الزجاج .. والفريم من الـStainless Steel والفريم صغير جدًا يمين وشمال الموبايل وبيكبر بس عند أزرار الباور والتحكم في الصوت.
ولما يجي الفريم يدخل على الطرف العلوي للموبايل هتلاقيه مسطح جدًا لدرجة إنك هتحاول توقف الموبايل ده على طرفه العلوي أو السفلي .. بس متعملش كده علشان أنا جربت وبقولك هيوقع.
الموبايل وزنه 208 جرام .. وزن كبير، هتاخد فترة على ما تتعود عليه .. وكمان الموبايل طويل وعريض جدًا .. هتاخد برده فترة علشان تتعود على الأبعاد الضخمة ديه.
أنا معجب جدًا بشكل الكاميرات الخلفية .. بجد عجباني جدًا ويخطف العين حرفيًا خصوصًا العدسات بتاعت الكاميرات .. بس البروز بتاع نافذة الكاميرات كبير بشكل واضح جدًا ومُزعج جدًا، لدرجة إنك لو حطيت الموبايل على ظهره على المكتب هيتسند على الكاميرات بشكل كامل .. هو اة في حماية على زجاج الكاميرا .. بس برده ليه كل البروز ده ؟
وأخيرًا .. الموبايل كعادة سامسونج مقاوم للماء بشهادة IP68 المعتادة والضهر عليه حماية Corning Gorilla Glass.
الشاشة :-
الشاشة هنا بحجم عملاق 6.9 بوصة من نوع Dinamic AMOLED الجيل التاني بدقة بتوصل لـQHD+ مع حواف فيها إنحناء بسيط .. ومعدل تحديث الشاشة بيوصل لـ120 هيرتز مع معدل سطوع عالي بيوصل لـ1500 نتس .. مع ثقب للسيلفي في منتصف الشاشة.
وانا بقول انه بيوصل لإن الدقة العالية الـQHD+ والـ120 هيرتز كالعادة مش بيشتغلوا مع بعض .. وده علشان البطارية هتتشفط حرفيًا لو ده حصل .. لما بترفع التردد لـ120 هيرتز هتلاقي الدقة نزلت لـFHD+ فقط.
عمومًا الشاشة هنا جاية تكمل السمترية او التماثل الرهيب في التصميم الشيك جدًا للـNote 20 Ultra .. ثقب في النصف وحجمه صغير جدًا.
وحواف شاشة صغيرة جدًا جدًا وقد بعض فوق وتحت .. لو انت شخص مهوس بالسمترية فالتصميم بتاع Note 20 Ultra هيعجبك لأقصى درجة مُمكنة.
الـEdge اللي هنا بقى قل بشكل كبير وبقى في أخر جزء من الشاشة بس .. يعني الإنحناء او الـEdge مش واخد مساحة كبيرة من الشاشة.
عمومًا الـEdge بيخلي شكل الشاشة أفخم .. وسامسونج هنا حاطه إستخدامات فعلية للإيدج زي الـEdge Lighting اللي بينور لما يجيلك إشعار وأكيد الـEdge Panel اللي تقدر تضيف فيها قائمة ممكن تختارها من قوائم كتير جدًا علشان تختصر عليك وقتك .. وأعتقد مع الوقت الـEdge هيقل أكتر وأكتر لحد أما يختفي.
بالنسبة للشاشة بقى فا هي تحفة من ناحية الألوان وتشبعها .. كالعادة في تشبع أزيد حاجة بسيطة في درجة الألوان علشان تبقا زاهية أكتر ومنورة أكتر كعادة شاشات سامسونج .. والشاشة داعمة للـHDR10+.
زوايا الرؤية مُمتازة والسطوع تحت الشمس فوق المُمتاز .. الشاشة بتوصل لدرجات سطوع عالية جدًا فعلًا .. وأخيرًا الشاشة عليها حماية Corning Gorilla Glass الجيل السابع.
الأداء :-
معالج Exynox 990 بمعمارية 7 نانو داعم لشبكات الجيل الرابع فقط .. وده مش أفضل معالج موجود حاليًا .. ولكن هو مازال بيقدم أداء متوازن ومعقول .. ومعدل التحديث العالي الـ120 هيرتز اللي هنا بيخلي توليفة الأداء كويسة جدًا وناعمة جدًا.
نوع الذاكرة الداخلية هنا UFS 3.1 النوع السريع جدًا .. والموبايل جاي بمساحة تخزين داخلية 256 جيجا فقط مع 8 جيجا رام من نوع LPDDR5.
وحقيقي أنا مش فاهم ليه دايمًا سامسونج بتمسك إيديها في المساحات .. أنا عارف إن النسخة بتاعتنا 4G فقط وسامسونج دايمًا بتعمل Limit كده للنسخ الـ4G بتاعتنا .. بس ياريت المرة الجاية يكرمونا شوية في المساحة والرام.
الأداء الرسومي .. ببجي بتشتغل على Ultra HDR .. وكول اوف ديوتي بتشتغل على Very High .. وفورت نايت بتشتغل على High .. معنديش مشكلة مع الـGame Play في أي لعبة منهم .. كلهم بيتشغلوا بكفاءة أكيد لإن ده موبايل فلاج شيب.
ولكن الموبايل فاجئني إنه بيسخن بسرعة .. مسافة نص ساعة لعب تلاقي الموبايل سخن بشكل غريب شوية .. وحقيقي أنا مش عارف ليه مع إن المفروض إن التبريد إتطور شوية بس انا مش ملاحظ ده !
عوامل الأمان وعناصر اخرى :-
بصمة الإصبع Ultra Sonic تحت الشاشة .. السرعة إتحسنت كتير عن الأجيال اللي فاتت .. وبقيت تقدر تعتمد عليها .. الـFace Unlock لسه سرعته مش حلوة وبيتأخر شوية.
الموبايل جاي بنظام تشغيل Android 10 .. والـDark Mode اللي هنا حكاية طبعًا علشان الشاشة الممتازة اللي اتكلمنا عليها .. والمستشعرات كلها شغالة كويس .. ضوء، تقارب، جيروسكوب.
صوت الموبايل ستريو .. صوت محترم عالي ومجسم .. والصوت بيطلع من السماعة السفلية وسماعة المكالمات .. تجربة صوتية محترمة .. ومفيش مدخل 3.5 ملم كعادة الموبايلات الفلاج شيب.
في ميزة مهمة جدًا وجامدة جدًا وهي الـDex .. تقدر توصل الموبايل بشاشة Wireless بدون أسلاك .. تكونوا بس على نفس شبكة الـWiFi .. وتقدر توصل الموبايل عليها وهيفتحلك كل الـData اللي على الموبايل في شكل وواجهة مُختلفة قريبة من شكل الـWindows شوية .. وكمان تقدر تستخدم القلم على شاشة الموبايل أكنة Mouse .. ديه من أكتر الحاجات اللي عجبتني في الموبايل ده لإنها بتاخده ناحية بعيد جدًا في الإنتاجية والعملية.
ولما نجيب سيرة القلم بقى .. فا خلاص كلنا عرفنا إن التأخير بتاعه بقى 9 ملي ثانية بس .. وده معناه إنك حرفيًا هتحس إنك بتكتب على ورقة مش على شاشة موبايل.
لما بتكتب Note بأي لغة سواء عربي او انجليزي .. تقدر بلمسة تحول الكلام بتاعت لتكست تقدر تاخده كوبي .. وحرفيًا الموبايل هنا مش بيغلط في التعرف على كلامك حتى لو خطك وحش .. وكمان تقدر تعدل الكلام اللي إنت كاتبه في النوت بلمسة زرار برده علشان تعرف تقراها بسهولة بعد كده.
ده غير إن القلم بقى بيعمل حركات أزيد في التحكم عن بعد .. بتدوس على زرار القلم وبتعمل حركة قدام الموبايل وهو بيقدر يتعرف عليها زي إنك تعمل باك او تفتح الـRecent Apps .. ترجع للهوم .. تحدد جزء من الشاشة وتكتب عليه .. كلها إضافات قوية بتحسن كتير من تجربة إستخدام الموبايل.
في رأيي المتواضع .. تجربة السامسونج Dex وتجربة القلم مع النوت 20 الترا .. بيحطوه في حتة بعيد عن الموبايلات الأندرويد المنافسة.
البطارية :-
وزي ما سامسونج مطورتش المعالج فا هي مطورتش البطارية .. 4500 مللي أمبير .. يدوبك هتكمل 5 ~ 6 ساعات إستخدام شاق شاشة مفتوحة .. ولو إستخدام معقول هتكمل اليوم.
الشحن المُرفق في العلبة 25 واط .. مجربتوش لإنه مكانش معايا .. وديه سرعة شحن غير منطقية .. ده موبايل Oppo Find X2 Pro معاه شاحن 65 واط !
والنوت 20 الترا بيدعم شحن لاسيلكي بقوة 15 واط .. وشحن لاسيلكي عكسي بقوة 9 واط .. وكل سرعات الشحن ديه برده لم يتم تطويرها ولا اعلم السبب الحقيقي.
الكاميرات :-
النوت 20 الترا جاي بـ3 كاميرات .. الرئيسية 108 ميجا بيكسل فتحة عدسة F/1.8 بمثبت بصري .. العدسة التانية Telephoto بدقة 12 ميجا بيكسل فتحة عدسة F/3.0 مسؤلة عن زوم حقيقي 5 اكس Optical وبيوصل لحد 50 اكس Digital وتدعم مثبت بصري .. والعدسة الأخيرة 12 ميجا بيكسل فتحة عدسة F/2.2 للتصوير الواسع.
والسيلفي الموجود في ثقب في الشاشة بيجي بدقة 10 ميجا بيكسل فتحة عدسة F/2.2.
والإضافة الجديدة في النوت 20 الترا هو الـLaser Auto focus علشان السينسور الكبير الـ108 ميجا بيكسل كان فيه مشكلة في الفوكس وإتحلت بوجود الـLaser Auto focus اللي هنا.
طبعا مفيش كلام عن كوالتي الصور ومعالجة سامسونج للألوان اللي بتخليها مُعززة ومُميزة جدًا .. العدسة الـWide Angle واسعة جدًا .. والزوم لحد 50X ومفيش 100X زي S20 Ultra بس عمومًا انا راضي جدًا عن Quality الـZoom اللي هنا.
الصور في إضاءات داخلية مازالت مُميزة من ناحية تشبع الألوان والتفاصيل .. وانا شايف الـNight Mode هنا بيقدر يعمل معالجة ألوان مُميزة جدًا والتفاصيل مازالت كويسة برده.
ولما جربت زوم بالليل بإستخدام الـNight Mode .. لاقيت إن أخري زوم 10 اكس فقط وطبعا التفاصيل بتقل كتير في الإضاءات الضعيفة وده منطقي جدًا.
وأنا بجرب النوت 20 الترا كان معايا الـFind X2 Pro وجربت أصور بالإتنين جنب بعض .. تقدر تشوف الصور من فيديو المراجعة !
أما بالنسبة للسيلفي فهو معجبنيش .. لازم الإضاءة تكون كويس جدًا وتكون مساعداك علشان تاخد صور كويسة .. اللي عجبني التصوير في إضاءات داخلية .. التفاصيل ومعالجة الألوان كويسة جدا.
الـNight Mode .. التفاصيل بتبقى متوزعة على الصورة كلها مش على الشخص اللي بيتصور علشان الصورة كلها تبقى واضحة .. وده بيبقى على حساب إن تفاصيل الوش مش هتبقى كتير.
ولما جربت سيلفي الـFind X2 Pro لاقيت انه أفضل بفرق واضح عن الـNote 20 Ultra في مُختلف أوضاع التصوير.
بالنسبة بقى لتصوير الفيديوهات فا الموبايل ده بيصور بالكاميرا الخلفية بجودة 8K مع 24 فريم في الثانية .. Resolution ضخم جدًا وكبير جدًا .. وفي حاجه موجودة في الموبايل ده وهو تصوير الفيديوهات الـ8K بيتوفر خيار 21:9 .. وكمان تقدر تتحكم في المايكروفون اللي بيسجل الصوت.
وانت بتصور فيديوهات على العدسة الأساسية تقدر تنقل على العدسة الـWide Angle .. وكمان تقدر تروح للعدسة الزوم واللي هتوصل معاك لـ20X زوم.
اما بالنسبة لتصوير الفيديوهات بالعدسة السيلفي فا هي بتدعم تصوير فيديوهات 4K مع 30 او 60 فريم في الثانية .. والكاميرا السيلفي مفيهاش مميزات كتير زي انك تعزل الخلفية عن اللي بيتصور في الفيديو مثلًا.
شوف تجربة تصوير صور وفيديوهات بالموبايل في فيديو المراجعة في اخر المقالة !
سعر الموبايل :-
السعر الرسمي للنسخة الوحيدة المتوفرة منه في السوق المصري بمساحة تخزين 256 جيجا مع 8 جيجا رام هو 21099 جنية.
وبينفع تركب شريحتين إتصال من الجيل الرابع مع بعض في نفس الوقت أو شريحة واحدة وكارت ميموري بحجم 1 تيرا.
الرأي النهائي :-
مميزات Note 20 Ultra :-
- كاميرا خلفية مُحترمة جدًا
- تصميم Premium وسيمتريه خرافية
- شاشة عملاقة بألوان مُميزة وبمواصفات قوية
- صوت ستيريو مُميز
- خاصية السامسونج Dex
- القلم اللي بيتميز بخواص كتيرة
عيوب Note 20 Ultra :-
- معالج بيسخن وإستهلاكة للبطارية عالي
- بطارية اداءها مُتواضع
- سرعة شحن قليلة
- كاميرا سيلفي متواضعة
- Face Unlock محتاج يبقى أسرع
- الكاميرات بارزة بشكل كبير جدًا
- رامات ومساحة تخزين قليلة
Comments