مراجعة Samsung Galaxy S20 Plus – ليه تشتري موبايل رائد و هل الغالي تمنه فيه ؟

الفتره الأخيره سامسونج خلت شكل موبايلات الفئة المتوسطة قريب من الفلاج شيب بتوعها، على عكس مثلا سنة 2018 .. وده علشان المنافسة بقت صعبة جدا في الفئة المتوسطة بسبب الشركات الصينية .. وسامسونج ابتدت تزود في المواصفات وتظبط الشكل شوية .. وده اللي خلى مثلا حد يقول ليه اشتري موبايل غالي ما اجيب موبايل فئة متوسطة وخلاص.

طيب علشان اللي تايه ومش فاهم، خليني اوضحلك النقط او الحاجات الي تخليك تشتري الـGalaxy S20 Plus مثلا لو بتدور على موبايل رائد .. علشان لو الحاجات ديه مش فارقه معاك .. يبقى اي موبايل فئة متوسطة وليكن الـGalaxy A71 من سامسونج يقضي استخدامك وخلاص .. واحب اوضحلك ان ديه مش مقارنة لانها لا تجوز اصلا بسبب فرق السعر .. بس زي ما قولتلك انا بوضحلك ليه الموبايلات الرائدة غالية .. وعلشان الصورة تبقا واضحة فاحنا هنناقش في المقالة ديه مميزات S20+ مقارنتا بموبايل Samsung A71.


التصميم :-

من بعيد كدا هتحس انهم واخدين نفس الـ ستايل .. بس الحقيقي في اختلاف كبير، الـA71 زي ما احنا عارفين هو من البلاستيك بالكامل ويمكن ديه من اكبر عيوبة .. بس لازم سامسونج تفرق بين الفئة المتوسطة عندها والفئة العليا.

وهنا يجي البرنس الـS20 Plus بتصميم زجاجي فخم عليه حماية Corning Gorilla Glass 6 مع فريم الومنيوم من جيل جديد بيقدر يتحمل اكتر من الفريم اللي موجود في الجيل القديم الـS10.

طبعا غير فنش الموبايل .. تكات الزراير، شكل الفريم الصغير اوي اللي لافف حوالين الشاشة وبيكبر بس عند الزراير ويرجع يرفع تاني .. ده غير مسكة الموبايل في ايديك .. فئة الـS بالذات من سامسونج بالنسبالي هي المفضلة من ناحية الاستخدام يمكن بحبها اكتر من النوت .. الموبايل بيبقا ملموم في الايد بطريقة حلوة جدا.

طبعا غير ان S20 Plus زي كل الهواتف الرائدة بيجي مقاوم للماء والاتربة بشهادة معتمدة IP68 .. والكلام ده طبعا مش موجود في الـA71 لان مقاومة الماء عمومًا مش موجودة في موبايلات الفئة المتوسطة.


الشاشة :-

وبرده من بعيد كدا هتحس ان الـS20 Plus شبه الـA71 .. شاشة بحجم 6.7 بوصة .. بس الحقيقي في اختلافات كبيرة .. اولهم ان شاشة الـS20 Plus من نوع Dinamic AMOLED وده نوع افضل من الـSuper AMOLED اللي موجود في A71، ايوة يعني ده معناه ايه ؟

معناه ان الـS20 Plus بيقدر يعرض محتوى والوان بشكل احسن بفرق ملحوظ لما تجربهم قدام عينك عن اي شاشة تانيه .. يمكن الصور مش قادره توضح اوي .. ويمكن شاشة S20+ من افضل الشاشات اللي ممكن تجربها حاليا في اي موبايل.

واللي مساعد كمان شاشة الـS20 Plus في انها تتفوق على الشاشات التانية تلت حاجات .. اولهم الدقة العالية الـQHD+ واللي هتترجم معاك لكثافة بيكسلات عالية جدا في الشاشة ده غير معدل التحديث او الـRefresh Rate العالي 120 هيرتز .. هو لحد دلوقتي مش بيشتغل غير على جودة FHD+، لازم تنزل دقة الشاشة يعني.

علشان فعلا الـQHD+ لوحده والـ120 هيرتز لوحدها بتاكل جامد في البطارية فمبالك لو الاتنين مع بعض مش شغالين .. سامسونج بتقول ان هتسمح ان ده يحصل بتحديث بس لسه التحديث ده موصلش.

واخيرا بقا الـEdge الخفيف اوي اللي في شاشة الـS20 Plus .. مديلك انسيابية استخدام وفي نفس الوقت مش الـEdge او الإنحناء اللي يرخم عليك ويخليك تغلط .. فعلا تجربة الشاشة هنا محترمة جدا.

طبعا الثقب بتاع السيلفي صغير جدا موجود في منتصف اعلى الشاشة والحواف اقل ما يكون .. ومش هتحس بالكلام ده غير اما تحط الموبايل جمب واحد فئة متوسطة زي الـA71 وفعلا تاخد بالك من الفرق.

واخيرا الـS20 Plus عليه طبقة حماية على الشاشة Gorilla Glass 6 .. انما موبايلات سامسونج في الفئة المتوسطة زي الـA71 عليهم حماية Gorilla Glass الجيل الثالث بس.


الاداء :-

سامسونج كل سنة بتنزل في الفلاج شيب بتاعها اعلى معالج من كوالكوم وما يوازية من خط الانتاج بتاعها اللي هو الاكسينوس .. والسنة ديه اداء الاكسينوس قرب جدا من اداء الكوالكوم.

موبايل S20 Plus النسخة اللي بتنزل مصر والوطن العربي بتيجي بمعالج Exynos 990 تكنولوجيا 7 نانو .. معالج رائد حرفيًا هيديلك تجربة استخدام سلسة جدا كلها نعومة كدا هتحس انك عايم في الواجهة .. وخصوصًا لما تعلي معدل التحديث لـ120 هيرتز .. هتحس قد ايه انت مرتاح مع الموبايل ده .. وفرق الاداء مش هيبقى واضح وصريح عن الكوالكوم سناب دراجون 865 رغم اني لسه برده مجربتوش .. فمش هأكد اوي على النقطة ديه .. اللي قدامي الاكسينوس ممتاز جدا.

طبعا الـA71 غني عن التعريف جاي باحسن معالج فئة متوسطة اللي هو سناب دراجون 730 .. حاجة محترمة وبتديلك تجربة اداء كويس .. بس برده لا يرقى لانه ينافس معالج رائد ولو حتى اكسينوس .. وانا هنا مش بقارن .. انا بس بفهمك الفرق بين الاداء اللي طالع من كل معالج بالنسبة للفئة السعرية.

اما بالنسبة للأداء الرسومي .. الـS20 Plus ممتاز مشغل ببجي على Ultra HDR وكول اوف ديوتي شغالة على Very High .. والشاشة الممتازة اللي هنا مع استجابة التاتش السريعة جدا الي بتوصل لـ240 هيرتز هتخلي تجربتك للالعاب هنا استثنائية بعيدًا عن درجة تشغيل الجرافيك .. الجيم بلاي نفسه وتجربة اللعب على موبايل رائد مختلفة واحسن بفرق ملحوظ ومش هتحسها إلا اما تجرب بايدك مش كلام وخلاص.


عوامل الامان وعناصر اخرى :-

الـA71 والـGalaxy S20 Plus فيهم بصمة مدمجة بالشاشة .. بس اوعى تفتكر انهم زي بعض .. الـA71 بصمة Optical .. انما الـS20 Plus بصمة Ultra Sonic.

كدقة وسرعة الـS20 Plus ممتاز وعمومًا بقى يعتمد عليه وتقدر تتعايش مع بصمة الموبايل وتخليها الحاجة الرئيسية اللي بتفتح بيها الجهاز خصوصًا ان البصمة مش تحت اوي فوق شوية وتقدر توصلها بكل سهولة بايد واحدة .. بس بردة لسه مش ديه اسرع بصمة ممكن تجربها .. بس اتحسنت كتير عن الاجيال القديمة .. واحسن بمراحل من بصمات الفئة المتوسطة من سامسونج.

وكمان الـFace Unlock سريع وممتاز في الـS20 Plus وبيقدر يستجيب ويفتح اسرع برده من الـA71.

طبعا الموبايلين جايين بـAndroid 10 المبني على واجهة One UI 2.0 الجديده من سامسونج .. وحاجة حلوة من سامسونج انها بتحط الواجهة بتاعتها في كل الموبايلات بنفس المميزات تقريبا في كل الفئات عشان متحرمش حد من حاجة.

وده اللي بيخلي موبايلاتها في الفئة السعرية القليلة شوية تبقى تقيله شوية لان الواجهة مليانة مميزات ومفيش عتاد او مواصفات قوية تشغل كل المميزات دي .. لكن لما تجرب واجهة سامسونج على موبايلاتها الرائدة .. هتتبسط جدا جدا من الاداء بتاعها.

الـS20 Plus صوته جاي من سماعتين .. السماعة اللي تحت وسماعة المكالمات ستريو عالي ومحترم .. تجربة صوتية مش هتلاقي احسن منها .. واكيد احسن من الـA71 اللي بيجي بسماعة واحدة .. مفيش مقارنة.

للاسف S20 Plus مفيهوش مدخل سماعات اذن 3.5 ملم ولازم تستخدم سماعة Type C وهي جايه مع الموبايل في علبته .. انما موبايل A71 بيدعم مخرج سماعات 3.5 ملم.

وفي النهاية بالنسبة لنقطة قوة الشبكة فانا مواجهتش مشاكل في استقبال شبكات الاتصال على الـA71 ولا الـS20 Plus .. وعمومًا بعتمد على تجربة عدد كبير من المستخدمين بيبلغونا على الانبوكس بتاع صفحة موبيزل على فيس بوك علشان نقدر نعرف ونحكم بشكل أوضح.


البطارية :-

الـS20 Plus والـA71 نفس البطارية الـ4500 مللي امبير .. والمفروض على الورق ان S20 Plus معمارية المعالج موفره اكتر من معالج الـA71 .. ولكن الحقيقة ان الاتنين في الاخر ادوني نفس الاستهلاك .. يدوبك هيكملوا يوم من استخدام معقول مش اكتر من كدا.

لو على الـA71 فـ أنا متقبل جدًا البطارية .. انما عيب يعني موبايل رائد زي الـS20 Plus ومعرفش ارفع الشاشة لـ120 هرتز ولا حتى اعملها QHD+ لان البطارية فعلًا بتتشفط وكنت مضطر استخدم الـ60 هيرتز ودقة عادية FHD+ زي زيه شاشة الـA71 !

وبالنسبة لسرعة الشحن الاتنين معاهم شواحن بقوة 25 وات في علبة الموبايل .. والاتنين بيشحنوا في حوالي ساعة و5 ~ 10 دقايق.

مبسوط جدا من زمن شحن الـA71 ولكن مينفعش يبقى هو هواه بتاع الـS20 Plus وكان نفسي في شاحن مرفق 45 وات علشان يعني ده فلاج شيب وموبايل غالي وكدا .. ما علينا.

انما طبعا الـS20 Plus بيتفوق بقى في دعم الشحن الـWireless او اللاسيلكي 15 وات وفيه شحن عكسي لاسيلكي برده يعني تشحن موبايل تاني ظهر بظهر لو هو بيدعم شحن لاسلكي بقوة 9 واط .. وديه حاجات دايما موبايلات سامسونج الرائدة بتتميز بيها.


الكاميرات :-

الموبايلين بيجو بـ اربع كاميرات .. الـGalaxy A71 بكاميرا اساسية 64 ميجا بيكسل فتحة عدسة F/1.8 .. والباقي Wide Angle وماكرو وعزل.

انما الـS20 Plus جاي بكاميرا اساسية 12 ميجا بيكسل فتحة عدسة F/1.8 وفيها مثبت بصري .. واحد هيطلعلي من تحت الارض دلوقتي يقولي كدا اكيد كاميرا الـA71 احسن عشان 64 ميجا بيكسل .. هقوله والله ما بالارقام .. وباقي العدسات في الـS20 Plus واحدة 64 ميجا بيكسل مسؤلة عن زوم حقيقي لحد 3 اكس وزوم Digital لحد 30 اكس بفتحة عدسة F/2.0 .. والعدسة التالتة Wide Angle بجودة 12 ميجا بيكسل فتحة عدسة F/2.2 والاخيرة ToF للمساعدة في حسابات العزل والعمق والكلام ده.

سيبك من الارقام .. ملهاش لازمة ومش مقياس لحاجه .. تعالى نخش في التجربة الفعليه لإستخدام الكاميرات بتاعت كل موبايل منهم.

جربت اصور بالموبايلين في الشمس .. لاقيت ان الـA71 مطلع صورة هاديه خالص الوانها كويسه تفاصيلها كويسه صورة مقبوله جدًا يعني .. بس الـS20 Plus بقى طلع صورة اقوى بكتير من حيث التفاصيل والألوان الافضل والحقيقه فعلًا كانت في الـS20 Plus .. وده بيوضحلك ان الكاميرات في موبايل A71 المتوسط مقبوله عادي بس برده لسه الـS20 Plus متفوق بفرق كبير مش هتلاحظه غير لما تجرب الاتنين.

الـS20 Plus دايمًا بيحاول يقدملك صورة بألوان Warm او دافيه كده مع الإحتفاظ بالتفاصيل والواقعيه وبينقلك الصورة حقيقيه اما الـA71 الصورة بتميل للأبيض وبتروح في حته تانيه كده مقبوله بس متتقارنش بالـS20 Plus، ولما تعمل زوم هتلاقي ان التفاصيل في S20 Plus احسن، ولما تصور منظر طبيعي كمان هتلاقي فرق تشبع الالوان ومعالجه الصورة كبير اوي اوي لصالح الـS20 Plus وبشكل واضح.

بالنسبة بقى للزوم في S20 Plus فا انت عندك زوم ممتاز جدًا والصورة بتفضل كويسه بمعالجه كويسه معاك لحد زوم 10 اكس، لما توصل لـ10 اكس هتلاقي برده ان الصورة مقبوله جدًا .. اما لما توصل للـ30 اكس الصورة مش هتبقى كويسه خالص .. ودي تستخدمها لما تكون عاوز تقرأ حاجه بعيده مثلًا او في حاجه مش واضحه ليك بس مش اكتر.

التصوير بالـNight Mode في الموبايلين، الفرق بيكون لصالح الـS20 Plus برده بشكل كبير جدًا .. معالجه الصورة احسن وتفاصيل اكتر والالوان ممتازة جدا وشكلها عينك تحب تشوفه عن الـA71، وبرده لما تصور بالنايت مود شخص مثلًا الفرق بيكون واضح وكبير جدًا لصالح الـS20 Plus من غير اي تفكير.

وفي ميزة اسمها Single Take بتبقى موجوده في كل سلسلة الـS من سامسونج ودي بتخليك بدوسه واحده بس تقدر تصور بالكاميرا الخلفيه كذا صورة ورا بعض مع فيديوهات مع صور بصوت .. بضغطه واحده بس بيقدر يعمل كذا حاجه مع بعض على حسب المشهد اللي قدامك وعلى حسب الحركة.

ندخل بقى على الكاميرا السيلفي .. السيلفي معجبنيش خالص في الـS20 Plus .. دي مش كاميرا سيلفي لموبايل رائد .. يعني انا كنت حاسس في معظم الاوقات اللي انا بصور فيها ان كاميرا الـA71 السيلفي احسن .. مش عارف ازاي.

في معظم احوال التصوير الموبايلين قريبين من بعض .. ايوه في فرق تفاصيل كويس لصالح الـS20 Plus بس المعالجه مش قد كده والصورة في الاخر مش هي اللي تاخدها من موبايل رائد، في البورتريه الـS20 Plus احسن بفرق ملحوظ بس في التصوير العادي الفرق مش كبير.

ولما جربت اصور سيلفي بالـNight Mode لاقيت ان صور الـA71 منوره اكتر عن الـS20 Plus .. بس التفاصيل ايوه اكتر في الـS20 Plus بس الوضوح لصالح الـA71 لإنه مفتح الصورة وجايبلك الإستخدام الحقيقي اللي بتحتاجه من الـNight Mode .. في الاخر انا مش عاجبني خالص السيلفي بتاع الـS20 Plus ومش ده اللي انا كنت متوقعه.

بالنسبة بقى لتصوير الفيديوهات بالـS20 Plus .. الموبايل ده مميز جدًا في تصوير الفيديوهات ودي من اهم المميزات اللي بيجي بيها .. الموبايل ده بيصور فيديوهات بجودة 8K ب24 فريم في الثانية لأول مره في موبايل رائد .. دي ميزة موجوده في سلسلة الـS20 الجديده كلها وبقت موجوده في الموبايلات الـFlagship التانيه.

موبايل S20 Pus بيدعم تصوير 4K مع 30 او 60 فريم في الثانيه وكمان العدسة الـWide Angle بتصوير 4K وتقدر تروحلها وانت بتصور الفيديو وترجع للعدسه بتاعتك الاساسية تاني .. والعدسه الزوم بتوصل لـ3 اكس وبتصور 4K برده .. والتصوير بالليل كمان بيطلعلك فيديو كويس جدًا كتفاصيل لكن برده مش الافضل وميُعتمدش عليه.

وبردو الـ S20 Plus فيه مايك اضافي مع الكاميرا الخلفيه ميزته انه بيخليك لما تقرب من حاجه وانت بتصور يعزل الصوت ويعمل فوكس على الحاجه دي ويحاول يطلع الصوت بتاعها بس .. وتقدر تشغل وضع Steady Mode عشان تصور مشهد رياضي مثلًا وتثبت التصوير أكتر بس الجودة بتكون 1080p فقط .. وأخيرا تقدر تاخد سكرين شوت وانت بتتفرج على فيديو انت صورته بدقة الـ4K او الـ8K عادي وبتطلعلك صورة حجمها كبير شوية ومليانة تفاصيل اكنك مصورها بالكاميرا صورة مش سكرين شوت من فيديو.

وأخيرا علشان تشوف الصور والفيديوهات المتصورة بالـ S20 Plus و الـ A71 .. هتلاقيها في فيديو المراجعة في أخر المقالة.


الاسعار :-

الـA71 نسخة 128 جيجا مع 8 جيجا رام بحوالي 6500 جنية وينفع تركب كارت ميموري وشريحتين اتصال مع بعض .

انما الـS20 Plus سعره الرسمي 17 الف جنية للنسخة 128 جيجا برده مع 8 جيجا رام وينفع تركب كارت ميموري بس مكان الشريحة التانية .. وبالنسبالي عيب كبير لما ادفع 17 الف جنية في موبايل 128 جيجا.

انت متخيل الكاميرا اللي في الـS20 Plus بتصور بدقة قد ايه فيديوهات وصور .. فانت بس محتاج مساحة ضخمة لتخزين الداتا بتاعتك .. فانا مش عارف ليه سامسونج منزلتش النسخة الـ256 جيجا زي النوت .. ما علينا.

بس طبعا نوع الذاكرة في الـ S20+ هو UFS 3.0 وده أفضل من A71 الي نوع ذاكرته UFS 2.1 وبينتج عنه سرعة نقل وفتح بيانات اكتر .. وكمان نوع الرامات في S20 Plus أفضل وأحدث وأسرع عن الـ Galaxy A71.


الرأي النهائي :-

من الاخر كدا .. معجبنيش في الـS20 Plus .. الكاميرا السيلفي .. لا ترقى للمنافسة اطلاقًا .. معجبنيش استهلاك البطارية .. سامسونج لسه محتاجة تشتغل على معالجات الاكسينوس في توفير الطاقة لان لما بتعمل 120 هرتز او QHD+ البطارية بتتشفط حرفيًا ومش هتعرف تستمع بمميزات الشاشة خالص لو انت خارج بالموبايل ومش جنب شاحن .. معجبنيش سرعة الشاحن المرفق في العلبة .. معجبنيش موضوع ان الموبايل بمساحة 128 جيجا وبالسعر ده.

واخيرا بأكد عليك ان ديه مش مقالة مقارنة لان فرق السعر كبير جدا .. انما خلاصة المقالة .. انك لازم تبقى فاهم الموبايل الرائد زي الـS20 Plus بيقدم ايه زيادة عن الـA71 زي الخامات الأفخم والشاشة الأفضل والمعالج الأقوى والشحن اللاسلكي والكاميرا الزوم وتصوير الفيديوهات والصوت الـ ستريو والبصمة الأسرع ونوع الذاكرة الأسرع … الحاجات ديه لو محتاجها فعلا فانت مش بترمي فلوسك في الارض واكيد الـS20 Plus هيكون اختيار كويس.

انما لو انت مش فارق معاك كل الكلام ده .. فالـA71 برده اختيار ممتاز من سامسونج في الفئة المتوسطة واهو توفر باقي فلوسك.


فيديو المراجعة :-

قد يعجبك أيضا...

Comments

جاري التحميل...