بعد تجربة سلسلة الـ Samsung Galaxy S21 الجديدة – هل التطويرات سطحية ولا جذرية ؟

سامسونج في مصر قامت بدعوتنا لتجربة موبايلات سلسلة الـ Samsung Galaxy S21 الجديدة .. السلسلة تتضمن الـ Samsung Galaxy S21 العادي والـ Samsung Galaxy S21 Plus والأخير Samsung Galaxy S21 Ultra .. السلسلة كلها نازلة مصر 5G داعمة لشبكات الجيل الخامس بمعالج اكسنوس الجديدة من سامسونج .. في المقالة ديه هننقل لكم إنطباعاتنا الأولية عن السلسلة الجديدة من Samsung وهنقول لكم مواصفات النسخ المصرية لكل هواتف السلسلة الي هتنزل من سامسونج في مصر والألوان المتاحة و مساحات التخزين و الرام وهنقول ليكم كل المميزات الجديدة في موبايلات سلسلة الـ S21 و بعد فترة هننزل لكم مراجعات تفصيلية !


التصميم :-

طبعا كلكم شوفتوا في تسريبات Galaxy S21 شكل التصميم .. المرة دي سامسونج لعبت على شكل تصميم الكاميرا الخلفية .. المستطيل الخاص بالكاميرا الخلفية بقى في اعلى يسار ظهر الموبايل .. والمستطيل ده داخل ولافف على فريم الموبايل وبيجي بنفس اللون بتاعه.

وكمان المستطيل ده مش حاد من كل النواحي .. في ناحية منه دائرية علشان تتماشى مع الناحية الدائرية التانية اللي ماشية مع أنحناء الموبايل من فوق .. علشان الموبايل يحافظ على السمترية بتاعته .. طبعا هما عاملين كدا علشان يميزوا شكل الموبايل ويبقا مختلف عن الأجيال القديمة.

الخامة اللي معمول بيه نافذة الكاميرات من الألمنيوم الجيل السادس المتين وكمان في حماية على عدسات الكاميرات Corning Gorilla Glass الجيل الثالث علشان العدسات متتبهدلش منك بسهولة .. وبصراحة عجبني شكل الكاميرات في الـS21 العادي والـPlus لأنهم 3 كاميرات بس فا حجم المستطيل مش كبير.

انما الـUltra كالعادة كاميرات كتير وبالتالي حجم مستطيل الكاميرات كبير وواخد جزء كبير من ظهر الموبايل .. ولكن في سبيل أنك بتاخد Hardware كاميرات أقوى من العادي والـPlus بفرق ملحوظ وهتكلم عنه كمان شوية .. وطبعًا الكاميرا الخلفية بارزة عن جسم الموبايل بشكل ملحوظ في الـUltra والبروز أقل شوية في النسخ التانية.

الـ Samsung Galaxy S21 العادي جاي بتصميم جلاستيك .. اللي هو بلاستيك زيه زي Galaxy Note 20 و Galaxy S20 FE .. سامسونج شايفه ان لازم موبايل في السلسلة يبقى مش زجاج علشان اللي بيدور على موبايل خفيف وصغير وفي نفس الوقت مش لازم تركب جراب .. لأن البلاستيك هيستحمل أكتر من الزجاج لو الموبايل وقع منك.

ولكن مفيش تنازل في الفريم الألمنيوم متين من الجيل السابع زيه زي السلسلة كلها علشان الموبايل يبقا متين في ايدك .. والموبايل ده هو الأصغر والأخف في السلسلة كالعادة .. تخانته 7.9 ملم و وزنه 171 جرام بس .. وهيتوفر في مصر بـ4 ألوان وهما الأبيض والرمادي والبنفسجي والوردي.

حابب أقولك على حاجة روشة جدًا .. اللونين المطرقعين اللي هما البنفسجي والبينك هيكون الفريم بلون مختلف وهو الذهبي وطبعًا لون الفريم مكمل معاك في لون نافذة الكاميرا الخلفية وبيخلي شكل التصميم مطرقع جدا جدا.

ألوان S21 العادي

الـ Samsung Galaxy S21 Plus هيجي بظهر زجاجي عليه حماية Corning Gorilla Glass الجيل السابع (فيكتس) مع فريم من الالمنيوم .. تخانته 7.9 ملم وزنه حوالي 202 جرام .. وهيتوفر في مصر بـ3 ألوان وهم أسود ورمادي فاتح وبنفسجي .. والبنفسجي فقط هو اللي هيكون الفريم بتاعه لونة ذهبي.

ألوان S21 بلس

الـ Samsung Galaxy S21 Ultra بظهر زجاجي محمي بطبقة حماية Corning Gorilla Glass فيكتس وفريم الومنيوم مع تخانة 8.9 ملم و وزن 228 جرام هو اتقل بفرق ملحوظ عن الـPlus .. وهيتوفر في مصر بلونين فقط وهما الأسود والرمادي الفاتح.

ألوان S21 الترا

وطبعًا الـ3 موبايلات الحواف او الفريم بتاعهم دائري من الأطراف وده المتعارف عليه في سلسلة الـS عمومًا .. واللي مختلف شوية ان مفيش اي انعاكسات بتحصل على ظهر الموبايلات لأن الالوان كلها مط .. الظهر كان بيعكس وبيبصم بسهولة في الأجيال القديمة.

التبصيم قل شوية في الجيل الجديد ولكنه لسه موجود .. الألوان مطفية بزيادة خصوصًا اللون الأسود قاتم اوي .. معرفش فكرة المط ديه هتعجبكم ولا لأ .. وطبعًا الـ3 موبايلات كالعادة مقاومين للماء والغبار بشهادة IP68.


الشاشة :-

الـS21 العادي بشاشة 6.2 بوصة .. الـS21 Plus بشاشة 6.7 بوصة .. الـS20 Ultra بشاشة 6.8 بوصة .. والـ3 شاشات بثقب صغير للسيلفي زي المعتاد والـ3 شاشات من نوع Dinamic AMOLED الجيل الثاني لكن بتطوير بسيط وهو ان الشاشة بقت بتعرض ألوان زرقاء أقل 50% عن الأجيال اللي فاتت وبالتالي الأشعة الضارة هتقل جدًا.

الـS21 Ultra هو الوحيد الل فيه Edges بسيطة أوي في أطراف الشاشة .. انما العادي والـPlus شاشاتهم مسطحة تمامًا.

الـS20 Ultra هو الوحيد اللي فيهم بدقة WQHD+ وبتشتغل مع الـ120 هيرتز عادي . اما العادي والـPlus بدقة FHD+ وكنت أتمنى على الأقل الـPlus هو كمان يكون QHD+ لأن شاشته مش صغيرة.

الـ3 شاشات بتردد 120 هيرتز مُتغير .. في النسخة الـUltra بيكون من 11 هيرتز لـ120 هيرتز .. أما في العادي والـPlus بيكون من 48 هيرتز لـ120 هيرتز .. وطبعًا لما التردد يكون مُتغير بيساعدك توفر في البطارية وفي الـUltra أعتقد السوفت وير هيقدر يوفر كتير اوي بفضل ان الشاشة بتنزل لتردد 11 هيرتز!

أقصى سطوع بيوصل لـ1500 شمعة في الـUltra .. لكن أقصى سطوع في الـPlus والعادي بيوصل لـ1300 شمعة بس، واللي هو برده رقم ممتاز جدًا .. والـUltra بيجي بـContrast بيوصل لـ3m:1 اما النسخة العادية والـPlus بيكون 2m:1 بس .. والـ3 موبايلات عليهم حماية Gorilla Glass Victus ومتركب عليهم سكرينة.

وواضح جدًا تفضيل وتمييز سامسونج لشاشة الـUltra من ناحية الدقة الأعلى الـWQHD+ والـCurves البسيطة اللي في الشاشة واللي بتدي فخامة والـContrast الممتاز والسطوع الأعلى .. الـS21 العادي مقبول جدًا على حجم الشاشة لكن اللي أتظلم بينهم هو الـS21 Plus.


الأداء :-

الـ3 موبايلات جايين بمعالج سامسونج Exynos 2100 الجديد بتكنولوجيا 5 نانو ميتر الداعم لشبكات الجيل الخامس .. وهينزل مصر داعم لشبكات الجيل الخامس عادي .. أرقام الـBenchmarks للمعالج ده كويسة لكن لسه مجربناش الموبايل تجربة محترمة فهنأجل كلام عن المعالج لوقت المراجعة النهائية لحد اما نقيس السخونية واستهلاك البطارية الخاص به.

الـS21 Ultra هيجي نسخة واحدة بـ256 جيجا مع 12 جيجا رام.
. والـS21 Plus هيجي نسخة واحدة بـ256 جيجا مع 8 جيجا رام.
والصغير الـS21 العادي نسخة واحدة بـ128 جيجا بس مع 8 جيجا رام.
و مينفعش تركب كارت ميموري في الـ 3 موبايلات .. ونوع الذاكرة الداخلية بيكون UFS 3.1 ونوع الرامات LPDDR5.

البصمة الـUltra Sonic المُدمجة في الشاشة المفروض أداءها أتحسن كتير لكن لسه مجربنهاش تجربة مطولة .. في المراجعة النهائية هنعرف الأداء بالتفصيل .. والـ3 موبايلات كالعادة بيجو بصوت Stereo.


البطارية :-

الـS21 العادي بطارية 4000 مللي أمبير والـS21 Plus بطارية 4800 مللي أمبير والـS21 Ultra بطارية 5000 مللي أمبير .. بطاريات كأرقام معقولة .. ولكن تبقى تجربة الأستهلاك الفعلية هي الفيصل بعد التجربة المطولة مع المعالج الجديد.

ولكن السخيف في الأمر .. الـ3 موبايلات أخرهم في قوة الشحن 25 واط بس بدون اي تطوير.

وكمان الشاحن مش جاي في العلبة .. العلبة فاضية ولا في شاحن ولا سماعة زي ما أبل عملت بالظبط في سلسلة iPhone 12 .. وكل حاجة هتتباع لوحدها .. والـ3 موبايلات بيدعموا الشحن الـWireless بقوة 15 وات بدون أي تطوير.

الـS-Pen مدعوم في الـUltra فقط ( باقي السلسلة لا ) .. وأكيد مش بيكون معاه في العلبة .. وفي جرابات جاهزة من سامسونج هتنزل بالقلم للي حابب ياخد التجربة .. وسلسلة الـNote عادي هتفضل تنزل بدون أي مشاكل.


الكاميرا :-

الـS21 العادي والـPlus جايين بنفس الكاميرات .. الأساسية 12 ميجا بيكسل بمثبت بصري فتحة عدسة F/1.8 والتانية 12 ميجا بيكسل فتحة عدسة F/2.2 للتصوير الواسع والأخيرة 64 ميجا بيكسل فتحة عدسة F/2.0 فيها مثبت بصري للزوم الحقيقي 3X وبيوصل Digital لـ30X .. وده نفس Hardware كاميرات الـGalaxy S20 والـS20 Plus.

انما الـUltra جاي بـ4 كاميرات .. الاساسية 108 ميجا بيكسل بمثبت بصري بفتحة عدسة F/1.8 والتانية 12 ميجا بيكسل فتحة عدسة F/2.2 للتصوير الواسع .. والتالتة 10 ميجا بيكسل فتحة عدسة F/2.4 بمثبت بصري للزوم القريب 3X حقيقي .. وفي عدسة رابعة اخيرة 10 ميجا بيكسل بمثبت بصري وفتحة عدسة F/4.9 لزوم بعيد حقيقي 10X وبيوصل لـ100X ومعاك أكيد Laser Autofocus .. سامسونج عملت عدستين للزوم علشان تقدر تحط عدستين مختلفتين واحده تصور زوم قريب بكوالتي عالي وواحدة زوم بعيد بكوالتي عالي.

طبعا لسه مجربناش الكاميرا اوي .. تجربة مبدئية، بس بصراحة فرق كبير جدا في كوالتي الزوم بين الـUltra اللي في حته لوحده والعادي والـPlus اللي الزوم بتاعهم مش متطور خالص .. لو تفتكر زمان كنت لما تعمل زوم تلاقي اهتزاز كده .. دلوقتي في Lock لمنع اهتزاز التصوير بعد ما تعدي 20X زوم باي موبايل في السلسلة.

السلسلة كلها بتصور فيدوهات 8K بـ24 فريم في الثانية .. ده غير الـStady Video بقا يوصل لـ60 فريم في الثانية مش 30 زي الاجيال القديمة .. وكمان في وضع Director View .. بيفتحلك كل العدسات Live قدامك وتتنقل ما بينهم وانت بتصور وتبقا عارف اصلا شكل الفيديو قبل ما تدوس على العدسه لانه مفتوح قدامك علشان يساعدك في اخراج فيديوهات محترفة أكتر.

السيلفي 10 ميجا بيكسل فتحة عدسة F/2.2 .. وفي الالترا 40 ميجا بيكسل فتحة عدسة F/2.2 .. لما جربناها في اضاءة عالية الفرق مكنش كبير .. اعتقد الفرق هيبان اكتر في ظروف تصوير مختلفة.

ومجملا علشان نحكم أكتر على تجربة التصوير لازم نجرب الموبايلات فتره أكبر وده هيكون في المراجعة النهائية اللي هتنزل بعد فتره .. خصوصا ان الـUltra بيصور كمان فيديوهات RAW 12-Bits وده شكله هيبقى منافس جدا لموبايلات أبل الجديدة.

وعمومًا التطوير في الكاميرات معتمد اكتر على السوفت وير والذكاء الاصطناعي المتطور اكتر في المعالج اللي هنا .. لأن العدسات متغيرتش عن الاجيال القديمة بخلاف بس عدستين الزوم بتوع الـS21 Ultra اللي أدائهم خلى أداء الزوم اتحسن كتير في الاضاءات المرتفعة.


اسعار سلسلة الـ S21 :-

  • سامسونج S21 العادي معالج أكسنوس 5G نسخة 128 جيجا مع 8 جيجا رام بسعر رسمي 14899 جنية مع هدية للحجز المسبق Galaxy Fit2 وشاحن وايرلس .
  • سامسونج S21 البلس معالج أكسنوس 5G نسخة 256 جيجا مع 8 جيجا رام بسعر رسمي 18499 جنية مع هدية للحجز المسبق Galaxy Buds Live .
  • سامسونج S21 الترا معالج أكسنوس 5G نسخة 256 جيجا مع 12 جيجا رام بسعر رسمي 22699 جنية مع هدية للحجز المسبق سماعة Galaxy Buds Live و جراب سيلكون وقلم S-Pen .

لا يوجد سماعات أذن او شاحن او جراب حماية داخل علب الهواتف .. مع العلم أنه يوجد هدايا للحجز المسبق وقمنا بتوضيحها في المقالة .

قد يعجبك أيضا...

Comments

جاري التحميل...