الإنطباعات الأولية لـ هواتف Galaxy S22 الجديدة بعد التجربة الأولية !

الجيل الجديد من السلسلة الرائدة سلسلة الـGalaxy S من سامسونج نزلت بشكل رسمي، وسامسونج اتاحت لنا في موبيزل تجربة الموبايلات قبل الإطلاق العالمي لها .. والنهارده هنقدملكم التجربة الأولية لـGalaxy S22 Ultra بديل الـNote الجديد، مع باقي سلسلة S22 واللي بتنزل في أسواق مصر و الشرق الأوسط لأول مرة بمعالجات كوالكوم.


موبايل Galaxy S22 Ultra :-

سامسونج عملت تعديل في خريطة موبايلاتها، وهي انها خلت سلسلة الـS هي السلسلة الرائدة، وإستبدلت سلسلة الـNote بفكرة الموبايلات القابلة للطي، ولكن سلسلة الـNote ليها جمهور ضخم جدًا، وبالتالي سامسونج دمجت سلسلة الـNote مع الـS في نسخة الـS22 Ultra.

التصميم :-

تصميم الموبايل مائل لسلسلة الـNote جدًا، حواف حادة من فوق، الـCurves البسيطة اللي في اليمين والشمال، حماية Gorilla Glass Victus على الموبايل بالكامل، موبايل كبير ووزنه 228 جرام وده وزن مش خفيف، وتخانته 8.9 مللي، وتصميم الكاميرات مختلف عن الـS والـNote اللي فاتوا .. ليه طابع لوحده.

طبعًا مقاوم للماء والغبار بشهادة IP68، وبيتقدم بـ4 ألوان، الأسود والأبيض والأخضر واللون الجديد المُميز وهو الـ”بتنجاني”.

القلم اللي مستخدم سلسلة الـNote محتاجه موجود جوه جسم الموبايل، والقلم فيه كل المزايا اللي متعودين عليها من سامسونج، غير ان نسبة التأخير بتاعته 2.8 مللي يعني أسرع 3 مرات من Note 20 Ultra .. وكل حركات الـAir Actions اللي بتعملها في الهواء بالقلم موجودة في Galaxy S22 Ultra.


الشاشة :-

شاشة عظيمة 6.8 بوصة Dynamic AMOLED الجيل الثاني، بدقة QHD+ بتردد بيوصل لـ120 هيرتز، الشاشة أكيد عظيمة والسطوع بتاعها 1200 شمعة، وبيوصل لـ1750 شمعة، وده أعلى رقم ممكن تشوفه من سامسونج لحد دلوقتي، علشان تقدر تستخدم الموبايل تحت الشمس بشكل مُباشر بدون مشاكل.

كمان معدل التحديث بتاع الشاشة بينزل لـ1 هيرتز وبيطلع لـ120 هيرتز مش ثابت على 60 هيرتز و120 هيرتز، وبكده يقدر يوفر معاك بشكل قوي جدًا في إستهلاك البطارية.


الأداء :-

المعالج اللي نازل مصر في سلسلة S22 هو سناب دراجون 8 جين 1 بتكنولوجيا 4 نانو ميتر .. لأول مره بينزل لنا في مصر بشكل رسمي معالج كوالكوم.

أداء المعالج ده مميز جدًا وموفر جدًا في البطارية، ولكن خلينا نحكم أكثر في جزئية الأداء في المراجعة النهائية للموبايل.


عوامل الأمان وعناصر اخرى :-

مستشعر البصمة Ultra Sonic .. أداءها معقول بس مش فائقة السرعة، والسلسلة كلها نازلة بـOne UI 4.1 المبني على Android 12 .. وصوت الموبايل Stereo من AKG وممتاز طبعًا.


البطارية :-

نسخة الـS22 Ultra بتيجي ببطارية 5000 مللي امبير .. أتوقع أداء ممتاز من المعالج اللي بدقة تصنيع 4 نانو ميتر والشاشة اللي بتنزل لحد 1 هيرتز .. سرعة الشحن 45 وات، والشحن للأسف مش بيجي في العلبة، وفي دعم للشاحن اللاسلكي بقوة 15 وات.


الكاميرات :-

العدسة الخلفية الأساسية 108 ميجا بيكسل بفتحة عدسة F/1.8 بمثبت بصري حقيقي، الثانية 12 ميجا بيكسل بفتحة عدسة F/2.2 للتصوير الواسع، الثالثة 10 ميجا بيكسل بفتحة عدسة F/2.4 بمثبت بصري للزوم 3X، العدسة الأخيرة 10 ميجا بيكسل بفتحة عدسة F/4.9 بمثبت بصري للزوم الحقيقي 10X وبيوصل لـ100X عن طريق السوفت وير، والكاميرا السيلفي 40 ميجا بيكسل بفتحة عدسة F/2.2.

سامسونج طورت في الموبايل التصوير الليلي سواء الصور او الفيديوهات .. وكمان الموبايل بيقدر يظبط الـFrame Rate لوحدة من 15 فريم لـ60 فريم علشان لو بتصور في إضاءه مش مظبوطة، وطورت كمان الـCinematic لإن انت بتصور Super HDR على Ultra HD .. والمثبت البصري ممتاز والـAutoFocus أسرع.

طبعًا تصوير الفيديوهات لحد 8K زي ما احنا متعودين من سامسونج، بس معتقدش ان في حد بيستخدم الجودة الكبيرة دي، وكل التطورات اللي سامسونج عملتها على الـFHD+ والـUltra HD علشان حجم الفيديو يطلع منطقي.

ولسه التجربة الكاملة للكاميرات قريب ان شاء الله، وهنقارنها مع iPhone 13 Pro في المراجعة الكاملة للموبايل.


سعر Galaxy S22 Ultra :-
  • نسخة واحدة 256 جيجا مع 12 جيجا رام بسعر 25700 جنية مصري

والموبايل بيدعم تركيب شريحتين إتصال من الجيل الخامس ومبيدعمش تركيب كارت ميموري.


فيديو S22 Ultra :-

سلسلة Galaxy S22 :-

فصلنا S22 Ultra عن باقي السلسلة لإن الـS22 Ultra سامسونج بتقدمه كنسخة بديلة لسلسلة الـNote، حبينا نوضح ده بشكل مُفصل شوية .. وفي الجزء اللي جاي من المقال هنقدملكم الـS22 Plus والـS22 العادي.

S22 Plus Camera

التصميم :-

تصميم S22 النسخة العادية والـPlus مش بيختلفوا كتير عن الجيل اللي فات .. نفس الفكرة بالظبط، الكاميرات موجودة في أعلى يسار ظهر الموبايل .. ونافذة الكاميرات داخلة مع فريم الموبايل المعدني.

الموبايل كله زوايا دائرية ومفيش أي زوايا حادة، وده المعتاد من سلسلة الـS .. الموبايلات مقاومة للماء والغبار بشهادة معتمدة IP68 زي النسخة الـUltra.

النسخة العادية من السلسلة وزنها 167 جرام وتخانه 7.6 مللي، اما النسخة الـPlus وزن اثقل شوية، حوالي 195 جرام وتخانه 7.6 مللي برده.

في طبقة حماية Corning Gorilla Glass Victus على الموبايل بالكامل من الخارج، والموبايلات بخامه خارجية زجاجيه بالكامل ومفيش بلاستيك زي سلسلة Galaxy S21.


الشاشات :-

الشاشتين Dinamic AMOLED من الجيل الثاني بدقة FHD+ بتردد بيوصل لـ120 هيرتز .. مع ثقب صغير للكاميرا السيلفي، النسخة الـPlus بحجم 6.6 بوصة والسطوع 1000 شمعة وبيوصل لـ1300 شمعة، اما النسخة العادية بحجم 6.1 بوصة بسطوع 1000 شمعة وبيوصل لـ1300 شمعة برده، وتردد الشاشة من 48 هيرتز لـ120 هيرتز.


الأداء :-

المعالج المستخدم في سلسلة Galaxy S22 في مصر والشرق الأوسط هو كوالكوم سناب دراجون 8 جين 1 بتكنولوجيا 4 نانو ميتر، موفر جدًا في إستهلاك البطارية، ولسه هيتجرب تجربة مُطولة.

صوت الموبايلات Stereo طبعًا من AKG، والبصمة Ultra Sonic.


البطاريات :-

البطارية في نسخة S22 Plus حوالي 4500 مللي امبير وبتدعم الشحن السريع بقدرة 45 وات، وفي النسخة العادية 3700 مللي امبير وبتدعم الشحن بقدرة 25 وات فقط.

الشحن اللاسلكي ثابت بقدرة 15 وات في كل الموبايلات، ومفيش شواحن بتيجي في علب الموبايلات.


الكاميرات :-

نفس الكاميرات موجودة في النسخة العادية والـPlus .. كاميرا خلفية رئيسية 50 ميجا بيكسل بفتحة عدسة F/1.8 بمثبت بصري حقيقي، الثانية 12 ميجا بيكسل بفتحة عدسة F/2.2 للتصوير الواسع، والأخيرة 10 ميجا بيكسل بفتحة عدسة F/2.4 للزوم 3X وبيوصل لـ30X عن طريق السوفت وير.

سوفت وير الكاميرات اتطور وبقى يقدر يستخدم الذكاء الإصطناعي المتطور في المعالج الجديد علشان يحسن من تجربة التصوير سواء التصوير الليلي او صور وفيديوهات.


سعر Galaxy S22 :-
  • نسخة واحدة 128 جيجا مع 8 جيجا رام بسعر 16200 جنية مصري

سعر Galaxy S22 Plus :-
  • نسخة واحدة 256 جيجا مع 8 جيجا رام بسعر 20200 جنية مصري

فيديو S22 و S22 Plus :-

مراجعة واجهة One UI 4.0 الجديدة :-

قد يعجبك أيضا...

Comments

جاري التحميل...