سامسونج اجتهدت علشان تخلي موبايل Galaxy Z Fold 3 ناجح تُجاريًا، يعني موبايل يتباع كثير في الأسواق، وده اتحقق فعلا بالحجز المُسبق على الموبايل .. والنهارده هنقدملكم مراجعة Galaxy Z Fold 3 الجديد وهنوضحلكم أكبر السلبيات اللي واجهناها في الإستخدام وكمان ايه المميزات اللي هتاخدها من هاتف قابل للطي.
سامسونج اتصرفت بذكاء لما لغت سلسلة الـGalaxy Note السنة دي .. وده علشان تجبر المُستخدمين اللي بيشتروا في الفئة الرائدة من سامسونج انهم يخوضوا في تجربة Z Fold 3 واللي بيدعم الـsPen بالمناسبة.
البطارية :-
لما بستخدم أي جهاز رائد من سامسونج ببقى قلقان من البطارية .. البطارية هنا بحجم 4400 مللي امبير وده حجم مش كبير بالنسبة لجهاز بمعالج رائد وشاشتين واحدة منهم ضخمة .. وبالتالي كنت متوقع أداء سيء من البطارية.
ولكن الحقيقي ان اداء البطارية متوسط، يعني بتشتغل حوالي 5 ساعات شاشة مفتوحة بإستخدام قاسي جدًا .. وأكيد كل حاجه على أعلى حاجه زي السطوع ومعدل التحديث وغيره .. انا شايفه وقت إستخدام معقول جدًا، لو نزلت من البيت الصبع بالموبايل مشحون هترجع بيه 15% مثلًا لو إستخدامك تقيل.
ولكن سرعة الشحن بقى هي الأزمة، شاحن 25 وات بس وكالعادة الشاحن مش جاي في العلبة .. الشاحن الـWireless بسرعة 11 وات بس، وفي شاحن لاسلكي عكسي 4.5 وات بس غالبًا مش هتستخدمه كتير.
الأداء :-
أداء الـZ Fold 3 مُذهل، لإن سامسونج نزلت في مصر نسخة سناب دراجون 888 الداعم لشبكات الجيل الخامس .. ونزلته مع 256 جيجا بالإضافة الى 12 جيجا رام، ومفيش مكان لتركيب كارت ميموري.
سامسونج عاملة Optimization كبير بين المعالج والواجهة هنا في الـZ Fold 3 .. أداء الموبايل ناعم وسريع ومش هيقصر معاك تمامًا، كل حاجه سريعة ولطيفة تليق بأداء جهاز رائد.
بمناسبة اني بقول دائمًا ان SD888 بيسخن أكثر من الطبيعي، فا هو هنا بيسخن برده في الإستخدام القاسي .. السخونية بتظهر عند جزئية الكاميرا الخلفية، ولكن سخونية معقولة مش هتخوفك من الموبايل تمامًا .. والسخونية دي مع الإستخدام القاسي لكن في الإستخدام الطبيعي لأ مش بيسخن.
تجربة الإستخدام :-
أنا في إستخدامي معظم الوقت بستخدم الموبايل بإيد واحدة .. لإني دائمًا بكون على الكمبيوتر او بكون في مشاوير بره .. يعني أقدر أقول ان الـZ Fold 3 مش معمول لإستخدامي، او انا لازم اتأقلم معاه لإن في شاشة كبيرة وهمسك الموبايل بإستخدام إيدي الإثنين وده بصراحة مش سهل تتعود عليه.
المشكلة اللي واجهتني ان الشاشة اللي بره حجمها 6.2 بوصة .. هي كحجم مش صغيرة لكن عرضها قليل وبالتالي مش بتعرض محتوى بالشكل المطلوب .. أقدر أعمل منها مكالمة وأشوف الإشعارات بسهولة، وأقدر اعمل منها حاجه سريعة على اي تطبيق زي الآلة الحاسبة وغيرها.
لكن مش هقدر ابعت رسائل منها مثلًا بشكل سلس لإن الكيبورد بتاعها صغير أوي نتيجة لإن عرض الشاشة الخارجية صغير بسبب مفصلة الشاشة .. بس تقدر تستخدمها لو إيدك صغيرة ومش هيكون عندك مشكلة.
الشاشة الخارجية كويسة كسطوع وكجودة وحلو كمان انها 120 هيرتز فا اداءها سريع وسلسه ومش هتحس منها بأي تقصير.
الشاشة :-
لازم لما هتمسك الـZ Fold 3 هتنبهر بالشاشة .. لو بتستخدم الشاشة الصغيرة وفتحت الشاشة الكبيرة اللي كنت بتعمله على الشاشة الصغيرة هيتنقل تلقائي للشاشة الكبيرة .. اما لو العكس كل حاجه هتقفل.
الشاشة الكبيرة بحجم 7.6 بوصة من نوع Dinamic AMOLED بتردد بيوصل لـ120 هيرتز .. شاشة ألوانها تحفة وسطوعها مُمتاز، بالظبط زي ما تكون معاك تابلت بس جودته ممتازه.
لكن هتقابلك مشكلة التابلت بقى وهي ان ابعاد الشاشة مُربعة أكثر من كونها مُستطيلة .. وبالتالي لو فتحت فيديو على يوتيوب مش هتقدر توصل للشاشة الكاملة من غير ما تقطع جزء كبير من الفيديو .. وكمان لما تفتح انستجرام هتلاقي البوستات بتاخد مساحة أكبر من حجمها بشكل مش مظبوط خالص.
سامسونج ضايفة ميزة في السوفت وير انك تقدر تتحكم في الـAspect Ratio بتاع أي برنامج بحيث تخليه Full Screen على الشاشة كلها او تخليه 16:9 او 4:3 ولكن لما بتعمل بتعمل ابعاد غير دول هتلاقي في مساحة غير مُستغلة يمين وشمال الشاشة .. وبالتالي مش عارف هتستفاد بالشاشة الكبيرة دي في ايه.
تقدر تستفيد بالشاشة الكبيرة دي بجد بإنك تعمل Multitasking اللي يخليك تقدر تفتح 3 تطبيقات جنب بعض وتتحكم في مساحة كل تطبيق وتـScroll بينهم بكل سهولة .. وكمان لو بتحتاج تفتح PDFs او Excel Sheets كتير او بتقرأ كتب اون لاين فا الـZ Fold 3 هيخليك حرفيًا متفتحش اللاب توب بتاعك .. هتستمتع بالشاشة الكبيرة دي أوي.
والحلو كمان في الشاشة الكبيرة انها داعمة للقلم .. اما الشاشة الصغيرة اللي بره مش بتدعم القلم للأسف، فا بتقدر تكتب بكل سهولة على الشاشة الكبيرة أي Notes او ملاحظات سريعة .. وكمان الـFlex Mode بتاع سامسونج اللي بيخليك تقدر تتني الشاشة وتخلي الجزء اللي تحت كيبورد او اداء تحكم او اداء للإختصارات وفوق يعرض المحتوى.
الشاشة الكبيرة ممتعة جدًا طبعًا في الألعاب .. حاجه زي ببجي هتفتحلك على الأبعاد الكاملة للشاشة الكبيرة، وهتقدر تستمتع بتجربة لعب مثالية مع جرافيك Ultra HDR .. هتتبسط أوي بصراحة .. في ناس كتير بتحب تلعب على تابلت بس بيبقوا حاسين انه كبير أوي والتنقل بيه صعب .. الـZ Fold 3 حل المشكلة دي يعتبر.
انما لو فكرت تتني الـZ Fold 3 وتلعب على الشاشة الصغيرة اللي بره هتزعل لإنها صغيرة .. وهتلاقي أبعاد اللعبة مش مظبوطة وهتحس انك بتلعب على شاشة 5 بوصه.
اعتمادية الشاشة :-
بالنسبة لإعتمادية الشاشة الكبيرة .. لو هتمشي ايدك على الحتة اللي في النص اللي في ظهر المُفصلة اللي بتتني الجهاز هتحس بيها جدًا وهتحس انك عايز تبعد عن الحته دي تجنُبًا لأي مشاكل .. علشان كده هتلاقي في أكثر من شكل للكيبورد بيظهرلك كلهم على يمين وشمال الشاشة علشان ايدك متجيش في نصف الشاشة.
لو فتحت حاجه بخلفية فاتحة شوية هتلاقي برده الحته بتاعت المفصلة ظاهرة شوية .. ولكن هتنسى موضوع المفصلة ده لما تفتح محتوى وتتفرج عليه، مش هتاخد بالك منها أوي.
وكمان الشاشة كاملة والسيلفي مختفي تحت الشاشة .. هيظهر معاك في الخلفيت الفاتحة لكن في الخلفيات الغامقة مش هتلاحظة خالص، هو كان لازم وجودة علشان تقدر تعمل Video Call على الشاشة .. ولكن أداء الكاميرا اللي تحت الشاشة مش حلو وهتضطر تستخدم الشاشة الصغيرة.
أتوقع سامسونج هتشتغل جامد على الكاميرا المدفونة أسفل الشاشة في الأجيال القادمة بحيث تخفيها بشكل أحسن وفي نفس الوقت يطلع منها Quality وأداء أفضل.
في النهاية، كإعتمادية فا دي شاشة كبيرة وبتتني، سامسونج مراهنة على الشاشة دي وواثقة فيها جدًا وواثقة في مدى متانتها وقوتها وانها مش هيحصل لها حاجه زي الأجيال اللي فاتت .. وانها بقت أقوى بنسبة 80% عن الأجيال اللي فاتت .. ولذلك الشاشة دلوقتي داعمة للقلم.
التصميم :-
وزن الموبايل 271 جرام .. وتخانته وهو مقفول حوالي 1 سم ونص، مقاوم للماء بشهادة IPX8 لكن غالبًا مش مقاوم للتراب .. الفريم معدني والظهر زجاجي مصنفر ومحمي بطبقة حماية Gorilla Glass Victus .. والجهاز كتقفيل وخامات فا هو محترم لأقصى درجة، أما تمسكه في إيدك هتحس انك شايل حاجه Premium جدًا.
مفصلة الشاشة اللي بتتني الموبايل قوية جدًا وهتحس انها متينة وفيها تكة كده في أخرها بحيث لما تقفل تحسسك انك في التمام والشاشة قفلت بالفعل.
بس الجهاز مش خفيف خالص، لو مسكته أكثر من 10 دقائق بإيدك واحدة فا غالبًا إيدك هتوجعك .. لازم تبقى فاهم ومتقبل ده، الجهاز بيتحط في الجيب عادي لو جيبك كبير بس هيكون متقل الجيب جدًا
عوامل الأمان وعناصر اخرى :-
القلم مش موجود جوه الجهاز هو مكانه بيكون في جراب خارجي .. سامسونج عملت كده علشان تحافظ على حجم الموبايل صغير ورفيع، لكن الجراب بيكبر حجم الجهاز جدًا وبيرخم التجربة.
سامسونج ضايفة البصمة على زرار الباور .. مكان منطقي جدًا نتيجة الشاشات الكتير اللي هنا، وأداء البصمة حلو جدًا .. وطبعًا مفيش منفذ السماعات الـ3.5 مللي.
التجربة الصوتية في Galaxy Z Fold 3 إستثنائية .. الموبايل فيه سماعتين مُمتازين .. الموبايل صوته رهيب جدًا، صوت طالع من لاب توب مش من موبايل .. هتتبسط أوي بالتجربة الصوتية خاصًة لو بتتفرج على محتوى أو بتلعب ألعاب على الشاشة الكبيرة والصوت الـStereo معاك.
بالنسبة لمستشعر التقارب فا هو موجود سوفت وير في الشاشة الخارجية فقط وشغال بشكل مقبول .. اما لو فتحت الـZ Fold 3 مش هتعرف تتكلم غير من الـSpeaker الخارجي لإن أكيد مش هتستخدم الشاشة الكبيرة.
الكاميرات :-
الموبايل بيجي بـ3 كاميرات خلفية .. الأولى 12 ميجا بيكسل F/1.8 فيها مثبت بصري، الثانية 12 ميجا بيكسل F/2.4 وهي عدسة Telephoto للزوم فيها مثبت بصري .. الثالثة 12 ميجا بيكسل F/2.2 وهي Ultra Wide للتصوير بزاوية واسعة .. السيلفي في الشاشة الكبيرة 4 ميجا بيكسل F/1.8 .. والسيلفي في الشاشة اللي بره 10 ميجا بيكسل F/2.2.
مستوى الكاميرا الخلفية في الموبايل قوي جدًا ومُشرَّف من موبايل رائد من سامسونج .. تقدر تعتمد عليه في كل الإضاءات وكل أوضاع التصوير .. الأداء ميوحيش خالص بالأرقام بتاعت الميجا بيكسل.
بالنسبة للكاميرا السيلفي فا الكاميرا المدفونة تحت الشاشة اعتبرها مش موجودة .. مش هتفيدك نهائي وأداءها مش حلو خالص .. متعتمدش عليها في حاجه غير في الـVideo Calls بس ولازم يكون في مستوى إضاءه كويس في المكان علشان اللي انت بتكلمه يعرف يشوفك كويس.
لكن الكاميرا السيلفي اللي في الشاشة اللي بره أداءها ممتاز زي باقي موبايلات سامسونج الرائدة اللي احنا متعودين عليها.
لكن في طريقة الـCover View وهي انك تاخد صور سيلفي وهو انك بتفتح الموبايل وبتفتح الكاميرا الخلفية وبعدين بتقلب الموبايل بحيث الكاميرا الخلفية تبقى عليك وبتشوف نفسك في الشاشة اللي بره .. لانك لما بتفتح الموبايل ظهر الموبايل والشاشة اللي بره بيكونوا في نفس المكان وفي ظهرهم الشاشة الكبيرة.
وبالتالي بتقدر تاخد صور سيلفي بالكاميرا الخلفية عن طريق انك ترفع ايدك قدام الكاميرا وتنزلها وفي خلال ثانيتين الصورة هتتصور لإن مش هيظهرلك زرار تاخد بيه الصورة، وبالتالي هتاخد أداء جبار تقريبًا أحسن صور سيلفي هتطلعها بالطريقة دي .. لكن لازم تاخد بالك لإن ممكن الموبايل يقع منك او ممكن تقفل الكاميرا غصب عنك.
بالنسبة لتصوير الفيديوهات فالعدسة الزوم والأساسية فيهم مثبت بصري وباقي العدسات فيهم مثبت إلكتروني .. وبيدعم تصوير فيديوهات 4K مع 60 فريم بالعدسة الرئيسية .. وبيدعم تصوير 4K مع 30 فريم في العدسة الـUltra Wide والعدسة الـTelephoto بس.
شوف تجربة التصوير بالموبايل ومقارنة بين كل العدسات في فيديو المراجعة
سعر Galaxy Fold 3 :-
- نسخة 256 جيجا مع 12 جيجا رام بسعر 30500 جنية
بينفع تركب شريحتين إتصال من الجيل الخامس لكن مش بيدعم تركيب كارت ميموري.
الرأي النهائي :-
الـZ Fold 3 بعيدًا عن أنه موبايل غالي فا هو مش مناسب لأي حد .. بيحتاج حد بيعمل Multi Tasking كتير وبيحتاج يتابع شغله من تابلت مثلًا .. فا أكيد الـFold 3 هيحلله مشكلته في إنه يمشي بتابلت وموبايل مع بعض .. وممكن يناسب Gamer تقيل لو الفلوس مش فارقة معاه وهياخد تجربة ممتازة.
مميزات Galaxy Z Fold 3 :-
- الشاشة الكبيرة ممتازة
- الأداء قوي جدًا
- الصوت الـStereo تجربته ممتازة
- داعم للقلم بكل مميزاته
- خامات وجودة وتقفيل ممتازين
- مقاوم للماء
- كاميرا خلفية ممتازة جدًا
- التصوير السيلفي بالكاميرا الخلفية رهيب
عيوب Galaxy Z Fold 3 :-
- الشاشة الخارجية عرضها قليل
- البطارية مش الأفضل
- السيلفي الموجود تحت الشاشة أداءه سيء
- مفيش حاجه موجودة مع الموبايل في العلبة
- الـAspect Ratio للتطبيقات لسه محتاج تظبيط
- الوزن قيل جدًا
وأحب أقول في الأخر ان الـZ Fold 3 لقى قبول وطلبات حجز أكثر من اللي سامسونج متوقعاه .. وده هيخلي المستقبل رايح أكثر ناحية الموبايل القابلة للطي لإن فيها تطوير وشغل على عكس الموبايلات العادية اللي زهقنا منها سواء اتفقنا على ده او اختلفنا .. حاجه جميلة ان موبايل زي ده يتوفر بشكل رسمي في مصر مع توفر صيانة وإكسسوارات ليه.
Comments