مراجعة Galaxy Z Fold 4 – موبايل رجال الأعمال بمواصفات فائقة !

لو انت واحد إستخداماتك على الإنترنت كتيره ومعاك موبايل غالي وتابلت غالي .. سامسونج بتقولك انها جمعت بينهم في جهاز واحد .. موبايل Galaxy Z Fold 4 .. ده اغلى موبايل اندرويد متاح حاليًا .. واللي بيوفرلك شاشة موبايل عادية وتقدر تفتحه علشان تلاقي شاشة تابلت محترمة .. والنهارده هنقدملكم مراجعته الكاملة.

التصميم :-

سامسونج اشتغلت على مشاكل تصميم Fold 3 اللي فات وحاولت تقللها على تقدم تجربة أفضل .. لكن بشكل عام لو بصيت على Z Fold 3 و Z Fold 4 من بعيد مش هتعرف تفرقهم من بعض.

سامسونج عملت المفصلة أقوى وأرفع وأخف .. علشان الموبايل يكون أخف وكمان العرض بتاعه يكون أقل حاجه بسيطة .. لكن لسه الموبايل كبير شوية في الإيد .. وتقيل في الجيب لإنه 263 جرام.

الميزة بس انك بتاخد موبايل وتابلت في نفس الوقت .. وكمان الموبايل مُوجه لفئة مُعينة .. وطبعًا مفيش كلام عن الخامات، كلها خامات فاخرة مع شهادة مقاومة للماء والغبار IPX8، وطبقة حماية Gorilla Glass Victus على الموبايل كله.

الشاشة :-

الشاشة الخارجية حجمها 6.2 بوصة .. وابعاد العرض بتاعتها بقت مظبوطة أكثر، ودي محاولة من سامسونج علشان تخلي الشاشة الخارجية قابلة اكثر للإستخدام .. او انك تقدر تستخدم الموبايل بإيد واحدة.

الشاشة الخارجية لسه الجودة بتاعتها حلوه .. نوعها Dynamic AMOLED X2 بتردد من 1 هيرتز لـ120 هيرتز .. والشاشة بقى استخدامها افضل من Galaxy Z Fold 3 اللي فات.

اما عن الشاشة الداخلية فا هي 7.6 بوصة من نوع Dynamic AMOLED X2 بتردد من 1 هيرتز لـ120 هيرتز .. مع ثقب للسيلفي مخفي تحت الشاشة، لو ركزت هتشوفه بس بشكل عام مش واضح وهتاخد تجربة الشاشة الكاملة.

شاشة Galaxy Z Fold 4 أفضل من Galaxy Z Flip 4 بمراحل .. تجربة مشاهدة الفيديوهات ممتازة، لكن لسه مكان مفصلة الشاشة ملحوظ ومحسوس لما ايدك تيجي عليه.

والميزة هنا ان المفصلة بتاعت الشاشة تقيله ومتينة وناشفة بشكل واضح عن الجيل اللي فات .. لدرجة انك تقدر تخلي الشاشة تثبت عند اي زاوية انت حاببها.

الأداء :-

الموبايل بيجي بمعالج كوالكوم سناب دراجون 8+ جين 1 بتكنولوجيا 4 نانو والداعم لشبكات الجيل الخامس .. أداء الموبايل مبهر .. سريع جدًا ومفيش تهنيجات ولا أي تقطيع بيحصل.

السوفت وير متعدل ومخصص بشكل كبير للموبايل .. وأهم إضافة هي الـTaskbar اللي بيخلي إستخدامك للتابلت أسهل .. التنقل بين التطبيقات بيتم بصورة صاروخية .. في برامج ظاهرة وأخر البرامج اللي استخدمتها وكمان في علامة الـMenu علشان تقدر تفتح ابلكيشن تاني بسهولة من غير ما تخرج.

كمان تقدر تعمل Split Screen وتفتح 3 برامج مع بعض في الشاشة الكبيرة .. ولو عايز أكثر من 3 برامج هتفتح برامج أكثر من الـPop Up وتحركها في الشاشة بسهولة وتفتحها اي وقت.

لو حابب تقفل الشاشة الكبيرة وترجع للشاشة الخارجية هيظهرلك خيارات تختار بينها انت عايز تعمل ايه .. لو كنت عايز تكمل اللي بتعمله من الشاشة الخارجية او تقفل.

كمان في الـFlex Mode اللي بيحول الموبايل للاب توب .. عن طريق انك بتخلي المفصلة زاوية 90 درجة وبتقدر تحط الموبايل على المكتب قدامك وتكتب على الكيبورد وقدامك الشاشة فوق .. او تقدر تخلي المساحة اللي تحت Touchpad وتتحكم في المحتوى اللي فوق.

عوامل الأمان وعناصر اخرى :-

البصمة موجودة على زِر الباور وتقدر تخليها بلمسة او بدوسة .. وهي سريعة وعملية جدًا .. عندك عدد 4 ميكروفونات في الموبايل علشان لما تدخل اجتماع صوتك يكون واضح ومعزول حلو.

صوت الموبايل رهيب .. أعلى صوت Stereo هتاخده من موبايل سامسونج .. صوت يليق فعلًا بحجم وقوة الموبايل.

بالنسبة لشبكات الـWi Fi فا هي أحسن حاجه بسيطة من Galaxy S22 Ultra .. بس لسه مش احسن شبكات موجودة.

البطارية :-

نفس البطارية القديمة 4400 مللي امبير .. لكن المعالج موفر أكثر .. الشاشة الخارجية بقت تنزل لحد 1 هيرتز علشان توفر في الإستهلاك .. السوفت وير نفسه بقى أذكى .. تقدر تقول ان الأداء اتحسن بنسبة 15%.

نفس الشاحن البطيء الـ25 وات اللي هيخلي البطارية تشحن في ساعة وتلت تقريبًا .. وبيدعم الشحن اللاسلكي بقدرة 15 وات.

الكاميرات :-

الموبايل فيه 5 كاميرات .. 3 في الظهر منهم الأساسية 50 ميجا بيكسل فتحة عدسة F/1.8 فيها مثبت بصري، الثانية 10 ميجا بيكسل فتحة عدسة F/2.4 فيها مثبت بصري مُخصصة للزوم 3X وبيوصل لـ30X سوفت وير .. الثالثة 12 ميجا بيكسل فتحة عدسة F/2.2 للتصوير الواسع.

كاميرا سيلفي تحت الشاشة الداخلية 4 ميجا بيكسل فتحة عدسة F/1.8 .. وسيلفي في الشاشة الخارجية 10 ميجا بيكسل بفتحة عدسة F/2.2.

الكاميرا ممتازة .. بتقدملك Look لذيذ والـSharpness معقول جدًا .. الأداء قريب جدًا من Galaxy S22 Ultra مع مراعاه التفاصيل الزيادة لصالح S22 Ultra .. لما جربت الزوم لاقيت انه كويس جدًا في الـZ Fold 4 عن الـS22 Ultra بإستثناء التفاصيل الأكثر والمدى الأكبر في الزوم.

التصوير في إضاءه داخلية لو مش مشغل الـNight Mode هتلاقي معظم الصور قريبة من بعض .. بس تفاصيل الـZ Fold 4 أقل حاجه بسيطة عن S22 Ultra .. ولما بتشغل الـNight Mode الأداء بيتحسن كتير.

بالنسبة للسيلفي فا في 3 طرق للسيلفي .. الأسهل هو السيلفي الخارجي وهو أحسن من السيلفي الموجود تحت الشاشة الداخلية .. اما الطريقة الأصعب فهي انك تشغل الشاشة الخارجية وتتصوير بالكامير الخلفية.

لما قارنت السيلفي مع S22 Ultra لاقيت ان السيلفي الخارجي في الفولد أداءه اقل .. لكن لما تصور سيلفي بالكاميرا الخلفية هيطلعلك Look ممتاز .. مقدرش اقول انه احسن من S22 Ultra لكنه ممتاز.

لما الإضاءه تقل تقدر تصور سيلفي بالـNight Mode بالكاميرا الخلفية وده بيقدم تجربة ممتازة احلى كتير عن S22 Ultra.

بالنسبة لتصوير الفيديوهات فالموبايل بيقدر يصور لحد 8K مع 24 فريم في الثانية .. وطبعًا الموبايل فيه ميكروفون اضافي لعزل الضوضاء .. والكاميرا الأساسية وعدسة الزوم فيها مثبت بصري.

سعر Galaxy Z Fold 4 :-

• مصر: نسخة 256 جيجا مع 12 جيجا رام بسعر 46700 جنية مصري
• السعودية: نسخة 512 جيجا مع 12 جيجا رام بسعر 7400 ريال سعودي
• الإمارات: نسخة 512 جيجا مع 12 جيجا رام بسعر 5500 درهم إماراتي

وتقدر تركب شريحتين إتصال من الجيل الخامس لكن متقدرش تركب كارت ذاكرة خارجي.

الرأي النهائي :-

الموبايل Galaxy Z Fold 4 مش لأي حد .. حتى لو الفلوس مش فارقه معاك واستخدامك مفيهوش Multi Tasking كتير ومش محتاج الشاشة الكبيرة دي .. اعتقد تشتري S22 Ultra او iPhone 14 Pro Max افضل.

لكن لو استخدامك تقيل .. فا الموبايل هيوفر عليك انك يكون معاك لاب توب صغير وموبايل وتابلت .. تجربة متكاملة هتخلي المهام أسهل خاصًة انه مُميز في الـMulti Tasking وفيه شاشة داخلية ممتازة، ومعالج قوي وكاميرات يُعتمد عليها.

تجربتي مع Galaxy Z Fold 4 كويسة بس لحد دلوقتي مش هقدر اخليه موبايل أساسي .. بسبب اني بستعمل الشاشة الخارجية أكثر لان معظم استخداماتي بتتم بإيد واحدة فقط.

نقاط مهمة اتمنى من سامسونج تحسنها في الإصدار القادم :-

• القلم الـsPen يكون له مكان داخل الجهاز
• الشاشة الخارجية تقصر أكثر وتعرض أكثر
• ميبقاش في أي تجويف ظاهر لما تقفل الشاشة
• سرعة الشحن تكون أفضل عن كده