جربنا على موبايل Galaxy S21 FE الجديد واجهة سامسونج One UI 4.0 الإصدار الجديد المبنية على أندرويد 12 اللي اتكشف عنها في الخارج من فتره قريبة، واللي بتيجي بمميزات كتير جديدة، والنهارده هنقدملكم مراجعة او إستعراض كده لمميزات الواجهة الجديدة من سامسونج وشرح للمميزات الجديدة دي.
1- Personalisation & Home Screen
اول حاجة ممكن نقدر نلاحظها في التحديث الجديد لواجهة سامسونج هي الـWallpaper وميزة الـColour Palette واللي من خلالها تقدر تظبط ألوان الموبايل من أيقونات النظام والإشعارات على حسب ألوان خلفية الموبايل.
يعني الموبايل بيتعرف على الألوان اللي في الخلفية بتاعتك وبيطلعلك منها ألوان تقدر تطبقها على النظام وكمان تقدر تطبقها على الوان ايقونات التطبيقات .. كمان في الـThemes هتلاقي مجموعة ثيمات كبيرة جدًا إتضافت تقدر تنزل منها .. غير كده مفيش تغييرات كتيرة في شكل الواجهة.
كمان الـWidgets واللي بقيت تقدر توصل لها بسهولة أكتر لما تدوس على الشاشة دوسة طويلة شوية وتختار Widgets .. هتلاقي كل الـWidgets اللي تقدر تضيفها للـHome Screen تحت بعض بشكل مرتب وسهل .. وكمان تقدر تبحث من الشريط اللي فوق.
2- Lock Screen & Always on Display
الـLock Screen إتضاف ليها شوية مميزات لطيفة .. منها لو مشغل أغاني على سماعات خارجية وعايز تغير وتخلي الصوت يشتغل على الموبايل على طول فأنت تقدر تعمل ده على طول من غير ما تفتح الموبايل بأنك تدوس على كلمة Media Output وتختار الصوت يشتغل منين سواء الموبايل او هتوصله على سماعات مثلًا.
تاني حاجة تقدر تعملها انك تدوس مرتين على الساعة هيظهرلك الوقت بالساعة والدقيقة والثانية وتحت بقى هتلاقي أكتر من حاجة زي الـMusic اللي تقدر تشغلها من الـLock Screen على طول لو مقفولة .. كمان هتلاقي الـCalender او التقويم .. وجدول وقتك لو عامل جدول للحاجات اللي عندك.
كمان هتلاقي درجة الحرارة وحالة الطقس ولو فيه Alarm انت ظابطه هيظهرلك .. وتقدر تسجل Voice علطول وهو الموبايل مقفول.
بالنسبة للـ Always on Display فأتضاف ميزة حلوة اوي .. هتوفر كتير في بطارية الموبايل .. وهي ان الشاشة هتفضل مطفية لحد ما يجيلك إشعار فا يشتغل الـAoD وأول ما تفتح الموبايل وتشوف الاشعار الشاشة هتطفي تاني .. وبكدا هتوفر جدا في البطارية !
3- Privacy
تقدر بسهولة تعرف التطبيقات اللي عندك بتستخدم ايه بالظبط من الموبايل زي الكاميرا والميكروفون .. وكمان تمنعهم من إستخدام الحاجات دي بسهولة .. ولو مش عايز أي تطبيق يستخدم الميكروفون او الكاميرا تقدر تلغي كل البرامج من إنها تستخدم الميكروفون والكاميرا من خلال الاعدادات بكل سهولة.
4- Camera App
في تغييرات لطيفة في تطبيق الكاميرا منها لو بتصور في إضاءه ضعيفة مثلًا هيظهرلك على الجنب إنك تستخدم الـNight Mode .. كمان إتضاف ميزة الـDual Record واللي بتخليك تصور بالكاميرا الأمامية والخلفية في نفس الوقت .. والميزة دي موجودة في بعض الموبايلات مش كلها.
ميزة الـSingle Take كانت بتقدملك 15 ثانية فقط، دلوقتي وانت بتصور بيعرض عليك لو حابب تزود 5 ثواني كمان .. كمان الـPortrait Mode بقى بيتعرف على القطط والكلاب وبيعزلهم.
5- Gallery App
تطبيق الـGallery اتضاف ليه مجموعة مميزات لطيفة جدًا .. منها لو عايز تشوف التفاصيل او معلومات عن الصور بتسحب الصوره لفوق بيظهرلك كل الـData بتاعتها زي التاريخ والوقت والمكان، وكمان تقدر ترتب كل الصور على حسب المكان اللي متصورة فيه .. وتقدر تعدل بيانات أي صورة وتغير التاريخ والأسم والمكان بسهولة.
بالنسبة للـEditor اللي في الـGallery هنلاقي ميزة كويسة اتضافت فيه وهي الـLight Balance اللي تقدر منها تظبط إضاءه أي حاجه منورة في الصورة وتقلل الـGlow بتاعها او تزوده براحتك .. وكمان تقدر تضيف Stickers على الصورة .. وتقدر تـSelect حاجه من الصور وتشيل الباقي.
6- Samsung Keyboard
الكيبورد اتعدل واتضاف ليه بعض المميزات ومنها انك تقدر تدمج 2 ايموجيز مع بعض بطريقة عبقرية كده وتبعتهم في أي شات سواء واتس اب او ماسنجر .. لكن مفيش تعديلات جذرية.
7- Battery & Device Care
جزء الـDevice Care بيقدملك معلومات أكثر عن الموبايل وحالته وبيقولك لو في مشاكل في البطارية او الجهاز .. وتقدر تضغط على Optimize Now ويقدملك تقرير عن حالة الموبايل ولو في فيروسات او مشاكل او تطبيقات شغاله في الخلفية بتستهلك الموبايل يقفلها.
وكمان لما تدخل على Protect Battery في إعدادات البطارية هتقدر تخلي الموبايل يشحن البطارية في 85% فقط علشان يحافظ عليها لو بتسيب موبايلك يشحن وانت نايم !
Comments