مقارنة بين موبايل فئة متوسطة مع موبايل رائد.. نتيجة غير مُتوقعة!

النهارده هنقدملكم مقارنة مختلفة من نوعها .. مقارنة هنعرف منها لما بنشتري موبايل رائد او Flagship غالي هناخد ايه زيادة عن لما نشتري موبايل في الفئة المتوسطة العُليا .. والمقارنة هتكون بين Galaxy A52s 5G اللي يعتبر أنجح هواتف الفئة المتوسطة، مع Galaxy S22 Ultra أقوى موبايلات سامسونج.

التصميم :-

الموبايلات الغالية لازم دائمًا تصميمها يبقى مُميز وخامات الخارجية فاخرة .. لإن بشكل أو بأخر معظم الفلوس اللي بتدفعها في موبايل غالي بتبقى علشان الصورة الإجتماعية.

خامات وشكل S22 Ultra أحسن بمراحل من Galaxy A52s 5G .. مسكة الموبايلين في الإيد مُختلفة تمامًا، شكلًا وموضوعًا.

موبايل جالاكسي S22 الترا بيجي بخامات راقية جدًا .. ظهر زُجاجي محمي بـGorilla Glass Victus Plus مع فريم من الألومنيوم القوي .. اما موبايل جالاكسي A52s بيجي بخامات بالكامل من البلاستيم.

مقاومة الماء والغبار موجودة في الموبايلين .. بس في S22 Ultra شهادة IP68 ودي شهادة مقاومة مُعتمدة أقوى وأقوى من الموجودة في Galaxy A52s 5G.

من الأخر، لما تشتري موبايل غالي .. أهم حاجه هتلاقيها هي عنصر التميز إنك ماشي بموبايل رائد، وتاني حاجه هي الخامات الخارجية الفخمة ومستوى التقفيل اللي بيتفوق على أي موبايل متوسط.

الشاشة :-

شاشة Galaxy S22 Ultra واحدة من أفضل الشاشات في العالم .. شاشة Dinamic AMOLED جيل ثاني QHD+ مع تردد مُتعير بيوصل لـ120 هيرتز .. اما A52s 5G بيجي بشاشة Super AMOLED بتردد 120 هيرتز.

لما تشوف الشاشتين جنب بعض هتلاحظ فرق ضخم جدًا بينهم .. من ناحية السطوع والتباين وحدة الألوان وغيرها .. وده بالرغم من ان شاشة A52s 5G ممتازة أصلًا، إلا أن S22 Ultra في مكان تاني.

الموضوع نسبي ومختلف، مش هتحس بيه غير لما تجرب .. ولو مجربتش مش هتحس بأزمة .. لو انت مش واخد على شاشة موبايل رائد فانت هتحس ان شاشة A52s 5G أفضل شاشة انت شوفتها ومش هيكون عندك أزمة.

بالنسبة للـCurves اللي في شاشة S22 Ultra فا عندك Galaxy S22 العادي وكمان Galaxy S22 Plus بشاشات من غير Curves .. وعمومًا هي مفيهاش مشكلة غير مشكلة السكرينات بس.

الأداء :-

جالاكسي S22 الترا بيجي مع أقوى معالج من كوالكوم وهو سناب دراجون 8 جين 1 .. معالج أقوى بكتير من SD778G اللي موجود في A52s 5G .. وكمان مع فرق نوع ذاكرة التخزين والرام اللي أكيد أسرع في S22 Ultra.

سامسونج اهتمت بالسوفت وير بشكل كبير في S22 Ultra وده قدم أداء ممتاز جدًا .. السوفت وير مساعد الهاردوير انه يقدم أقوى تجربة رائدة وبالفعل هتاخد تجربة محترمة جدًا.

على عكس A52s 5G .. اللي بيقدم تجربة قوية وحلوة جدًا في فئته السعرية .. بس برده هتلاقي كل شوية تقطيع او Lag .. وده عمومًا طبيعي في معظم موبايلات الفئة المتوسطة.

كمان الأداء في الموبايلات الرائدة هيبقى مستقر أكثر ولفترة أطول بسبب قوة المعالج واستقرار السوفت وير .. مع تحديثات ودعم مستمر من الشركة المُصنعة للموبايل لفترة أطول.

عوامل الأمان وعناصر اخرى :-

البصمة موجودة تحت الشاشة في الموبايلين .. في S22 Ultra البصمة Ultra Sonic .. أداءها أسرع من ناحية انها مش بتاخد فترة طويلة لحد ما تفتح .. اما A52s 5G بصمة Optical عادية ولازم تاخد فترة طويله علشان يفتح.

طبعًا S22 Ultra موجود في sPen هيساعدك في الإستخدام لو انت بتشتغل على الموبايل.

لما تيجي تقارن الصوت بين الموبايلين .. هتحس ان الفرق مش كبير خالص من ناحية درجة إرتفاع الصوت .. علشان الإثنين Stereo ويمكن A52s 5G من أحسن الموبايلات في الفئة المتوسطة في الصوت .. لكن لما تقارن مع موبايل رائد هتلاقيه الـBass فيه أحسن بكتير والصوت مُجسم أكثر بكتير.

أما بخصوص تجربة الشبكات فالـS22 Ultra معقول لكنه مش ممتاز .. مش بنفس قوة موبايلات هواوي وموبايلات اوبو، لكنه أحسن من A52s 5G في جزئية الشبكة.

البطارية :-

أما تجربة البطارية فهي أحسن بكتير في S22 Ultra اللي مع الوقت الموبايل بيحاول يفهم إستخدامك ويقدملك أحسن أداء من البطارية .. مشكلته ان أخر 10% بيخلصوا بسرعة جدًا.

اما Galaxy A52s 5G فا بطاريته متوسطة الأداء، لو انت مستخدم عنيف هتضطر تشحنها في نص اليوم مثلًا .. صعب يكمل معاك اليوم إلا لو إستخدامك متوسط.

بخصوص سرعات الشحن فا هي كارثية في سامسونج .. يكفي أقولك إن مفيش فرق جوهري حسيته بين سرعة شحن الموبايلين .. مع العلم ان أقصى سرعة شحن للـS22 Ultra هي 45 وات، وللـA52s 5G هي 25 وات .. والفرق الفعلي في زمن الشحن ممكن يبقى 10 دقائق أو أقل.

بس طبعًا S22 Ultra بيدعم الشحن اللاسلكي.

الكاميرات :-

الحاجه اللي الكل متفق عليها هي ان تجربة التصوير في الموبايلات الرائدة بتبقى أحسن بكتير من موبايلات الفئة المتوسطة.

على مستوى الموبايلات الرائدة .. مستوى التصوير في S22 Ultra ممتاز جدًا .. وأكثر ما يميزة التصوير البورترية الـ3X اللي بيخلي الصورة تروح في حته تانيه خالص وتبقى أفضل بفرق ضخم.

بس ده ميمنعش ان A52s 5G ممتاز .. واقتنعت بيه أكثر لما قارنته بالـS22 Ultra .. وده لإن الفرق بينهم مش فرق مهول .. ومع بعض التعديلات في الصورة هتوصل لنتائج قريبة من S22 Ultra عادي.

اللي مش هتقدر تعمله في A52s 5G البورتريه الـ3X وكمان الزوم اللي مش بيخليك تفقد أي تفاصيل في الصورة .. دي الحاجات القوية الواضحة اللي الموبايل الفلاج شيب متفوق فيها.

كمان التصوير الليلي في S22 Ultra أفضل بقرق واضح .. علشان تاخد صورة كويسة بالوضع الليلي في A52s 5G هتتعب شوية علشان توصل لأفضل نتيجة.

أما بالنسبة للسيلفي فا سيلفي S22 Ultra من أجمل وأحلى الكاميرات السيلفي اللي جربتها في موبايلات الأندرويد .. بس لما قارنته مع A52s 5G عرفت قد ايه A52s 5G موبايل مجتهد وبيحاول يطلعلك تفاصيل ممتازة .. لكن معالجة ألوان البشرة مش بتظبط، هتضطر تظبطها انت بنفسك.

بالنسبة لتصوير الفيديوهات فا الموبايلين بيدعموا تصوير فيديوهات بجودة 4K مع 30 فريم في الثانية .. لكن S22 Ultra بيدعم التصوير بجودة 8K.

أسعار الموبايلات :-

سعر Galaxy A52s 5G :-

• نسخة 128 جيجا مع 8 جيجا رام بسعر 8500 جنية
• نسخة 256 جيجا مع 8 جيجا رام بسعر 9500 جنية

سعر Galaxy S22 Ultra :-

• نسخة 256 جيجا مع 12 جيجا رام بسعر 25000 جنية