من خلال مؤتمر Galaxy UNPACKED 2021 كشفت شركة سامسونج عن Galaxy Z Flip 3 و Galaxy Z Fold 3 بشكل رسمي .. وبتيجي الهواتف علشان تقدم الإبتكارات الخاصة بشركة سامسونج لكن بتحسين في الإعتمادية والعمليه والخامات المُستخدمة .. وكان لـ موبيزل حظ اننا نجرب الموبايلات الجديدة .. وهننقل لكم هنا الإنطباعات الأولية.
موبايل Galaxy Z Fold 3 :-
التصميم :-
سامسونج حسنت كتير من قوة تصميم وخامات Fold 3 علشان يبقى أكثر إعتمادية .. ولأول مرة بيتقدم موبايل Fold مقاوم للماء بشهادة مُعتمدة IPX8 .. مقاوم للماء العذب لعمق متر ونصف ولمدة نصف ساعة .. وسامسونج بتأكد انه مقاوم للماء العذب فقط، غير مناسب لمياه البحر او حمام السباحة ومش مقاوم للتراب.
الفريم الألومنيوم المُستخدم بقى أقوى بنسبة 10% عن الجيل اللي فات .. والـFold 3 الجديد بيجي بخامات خارجية محمية بالكامل بطبقة حماية Corning Gorilla Glass Victus .. ووزن الموبايل حاليًا 271 جرام وده وزن أخف من الأجيال اللي فاتت .. وسُمك الموبايل وهو مفتوح 6.4 مم .. لكن وهو مقفول هتلاقي السُمك كبير جدًا.
الموبايل بيتقدم بثلاثة ألوان وهما الأسود والفضي والأخضر .. وأسماء الألوان دي عند سامسونج هي Phantom Black و Phantom Silver و Phantom Green.
الشاشة :-
الشاشة الأساسية الكبيرة بتكون Dynamic AMOLED X2 ضخمة 7.6 بوصة .. بدقة بين1768×2208بيكسل .. ومعدل تحديث 120 هيرتز .. ولأول مره من سامسونج كاميرا سيلفي مدفونه تحت الشاشة علشان تستمتع بتجربة الشاشة الكاملة وانت بتتفرج على فيديوهات من غير ما ثقب السيلفي يدايقك.
استخدامات الشاشة دي في حاجات كتير .. منها الـMultitasking الممتع جدًا واللي تقدر من خلاله تفتح 2 او 3 تطبيقات مع بعض وهتشوفهم كلهم واضحين قدامك عادي .. ولو فاتح الإعدادات على سبيل المثال ودخلت على اعدادات الشاشة هتلاقي الشاشة اتقسمت علشان تقدر تتنقل في الإعدادات بشكل أسرع.
وكمان لو فاتح من متصفح سامسونج وبتعمل Shopping من AMAZON مثلًا .. هتقدر تقسم الشاشة نصفين وتعمل Drag لمنتج على نصف الشاشة علشان تقدر تشوف تفاصيله من غير ما تخرج من صفحة المنتجات اللي انت فيها .. وبالتالي هتوفر وقت وهتقدر تقارن براحتك .. ودي متوفرة على متصفح سامسونج بس حاليًا.
الشاشة محمية بطبقة حماية Corning Gorilla Glass Victus .. وسامسونج بتقول انها بقت أقوى بنسبة 80% عن الجيل اللي فات .. وبقت بتدعم الـsPen كمان .. احنا كنا في مرحلة انك تخاف تلمس الشاشة جامد بالقلم .. دلوقتي الشاشة جايه بتدعم القلم .. فعلًا اعتمادية الموبايل ده بقت أفضل كتير.
الشاشة اللي بره بقى اللي انت بتستخدمها وانت قافل الموبايل .. شاشة 6.2 بوصة Dynamic AMOLED 2X بمعدل تحديث 120 هيرتز .. لكن عرضها مش كبير للأسف .. تقدر تنفذ من خلالها مهام بسيطة من غير ما تحتاج تفتح الشاشة الكبيرة .. وبيكون فيها ثقب للسيلفي في المنتصف فوق .. وللأسف مش بتدعم الـsPen.
استخدامات القلم :-
تقدر مثلًا تاخد سكرين شوت من الـMaps وتكتب عليها بسرعة وتبعتها لأي شات .. وتقدر تكتب بالقلم بدل ما تكتب بإستخدام الـKeyboard لو الموضوع أريح وأسرع في الإستخدام.
الـFold 3 بيدعم نوعين من أنواع الـsPen .. أول نوع هو الـsPen Fold Edition وده بيشتغل على الـFold بس .. يعني مينفعش يشتغل على الـGalaxy Note او الـS-Series .. وكمان مفيهوش بلوتوث وبالتالي مفيهوش Air Action يعني مش هتقدر تتحكم في الشاشة من بعيد من غير ما تلمسها.
وده بيتباع مع جراب علشان بيكون ليه مكان فيه .. بتقدر تشتري الجراب والقلم في Package واحد مع بعض .. زي ما كان بيحصل في الـGalaxy S21 .. وبأكد عليك انك لو معاك قلم sPen من موبايل نوت او S فا هو مش هيشتغل على الـFold .. لازم تشتري الإصدار الخاص بيه.
في نوع تاني بقى هو الـsPen Pro وده بيدعم البلوتوث وبيدعم الـAir Actions .. وده بتشتريه لوحده غير الجراب.
الأداء والبطارية :-
النسخة اللي هتتوفر في مصر هتكون بمعالج كوالكوم سناب دراجون 888 الداعم لشبكات الجيل الخامس .. والموبايل هينزل بنسخة واحدة 256 جيجا مع 12 جيجا رام بذاكرة UFS 3.1 .. وبيدعم الـDual SIM والاتنين 5G .. وبيجي الموبايل بواجهة One UI 3.5 المُعدله للـFold مع نظام Android 11.
البصمة موجودة على زرار الباور .. والصوت Stereo ومفيش منفذ الـ3.5 مللي .. والبطارية بسعة 4400 مللي امبير وسرعة الشحن بتكون 25 وات بس للأسف .. ومفيش شاحن في العلبة كمان .. وبيدعم الشحن اللاسلكي بقوة 11 وات والشحن اللاسلكي العكسي بقوة 4.5 وات.
الكاميرات :-
الموبايل بيتقدم بـ5 كاميرات منهم 3 خلفية و2 كاميرات أمامية .. 3 كاميرات في الظهر كلهم بدقة 12 ميجا بيكسل .. الأساسية بفتحة عدسة F/1.8 بمثبت بصري، الثانية Ultra Wide بفتحة عدسة F/2.2 مفيهاش مثبت .. والثالثة بفتحة عدسة F/2.4 وهي Telephoto بتعمل زوم 2X وفيها مثبت بصري.
كاميرتين سيلفي .. الأولى مخفية أسفل الشاشة بدقة 4 ميجا بيكسل بتعمل دمج بيكسلات وبتكون 16 ميجا بيكسل بفتحة عدسة F/1.8 أقصى جودة في التصوير بيها FHD+ فقط .. والتانيه 10 ميجا بيكسل بفتحة عدسة F/2.2 وبتصور بجودة 4K.
هاردوير كاميرات الـFold 3 متطورش كتير .. في بس شوية مميزات أكتر في سوفت وير الكاميرات علشان تستغل الشاشة العملاقة .. عندك ميزة الـDual Preview علشان تتصور بالكاميرا الخلفية وتظهرلك في شاشة الـCover .. وفي كمان ميزة Capture View اللي بتخليك تشوف الصور اللي صورتها من غير ما تفتحها.
سعر Galaxy Z Fold 3 :-
الموبايل متوفر في أوروبا بسعر 1800 يورو او ما يُعادل 33200 جنية مصري، نتوقع ان يتم تسعيره في مصر بسعر 35 الف جنية للنسخة الوحيدة اللي بتتوفر منه بمساحة تخزين 256 جيجا مع 12 جيجا رام، وهنحدث المقالة بالسعر الرسمي ومواعيد الحجز والإستلام لما يتكشف عنه في السوق المصري.
والموبايل بيدعم تركيب شريحتين إتصال من الجيل الخامس ومش بيدعم تركيب كارت ميموري.
الإنطباع النهائي :-
وفي وجه نظري Fold 3 بقى اعتمادي اكتر عن Fold 2 في الشاشة الأقوى اللي مش هتخاف يحصلها حاجة .. وفي دعم الـsPen .. وفي الحماية ضد الماء .. وسوفت وير سامسونج المُتطور اللي بقى يقدر يستغل الشاشة الكبيرة دي في حاجات كتير .. وأكيد موضوع دعم تركيب شريحتين إتصال.
وكمان سامسونج في مصر بتوفر للـGalaxy Z Fold 3 جرابات جديدة جربناهم، وبتوفر كمان جراب كامل بيدعم الـsPen .. وده معناه ان سامسونج مهتمه بالإعتمادية.
موبايل Galaxy Z Flip 3 :-
التصميم :-
الـFlip هو موبايل عادي لكن بتقدر تطبقه على بعضه او “تتنيه” علشان يبقى حجمه صغير ومتحسش بيه .. وسامسونج برده حسنت من اعتمادية الموبايل ده .. طورت كتير من خامات التصنيع وجودة التصنيع في Flip 3 الجديد .. المفصله بقت أقوى كتير وفتح الموبايل مبقاش سهل لدرجة انك تفتحه بإيد واحدة.
والـFlip 3 برده مقاوم للماء بشهادة IPX8 ووزنه 183 جرام .. وألوانه الأسود المطفي والكريمي اللامع والأخضر الغامق اللامع والبنفسجي اللامع .. وفي جرابات حلوه للموبايل علشان تديلك تجربة أحسن .. منهم مثلًا اللي تقدر تثبته في ايدك وانت بتستخدم الموبايل .. والجرابات دي متوفرة في مصر.
الشاشة :-
شاشة Flip 3 بتيجي من نوع Dynamic AMOLED 2X بحجم 6.7 بوصة بتردد 120 هيرتز وفيها ثقب للسيلفي .. ولو قسمتها لنصفين هتلاقي النصف اللي فوق بيعرض المحتوى واللي تحت بتتحكم فيه .. بمعنى انك ممكن تفتح الـGallery وتقلب بين الصور من الجزء اللي تحت وتعمل Zoom والصور معروضة في الجزء اللي فوق.
لما بتقفل الـFlip بتلاقي شاشة 1.9 بوصة Super AMOLED برده .. تقدر تحط صورة خلفية عليها .. ولو سحبت يمين وشمال هتلاقي الـWidgets وهتشوف الاشعارات اللي بتجيلك .. ومن فوق وتحت هتلاقي ظبط سطوع الشاشة مثلًا .. كنت اتمنى نشوف حاجات تانيه زي الـWi Fi والـMobile Data لإن في مساحة لكدة.
وفي إستخدام كمان مفيد وهو انك ممكن تضغط ضغطتين على زرار الـPower هيفتحلك الكاميرا الخلفية وتقدر تتصور بيها سيلفي وتشوف نفسك في الشاشة الصغيرة اللي بره .. زي ميزة الـDual Preview كده.
الأداء والبطارية :-
موبايل Galaxy Z Flip 3 بيجي بمعالج كوالكوم سناب دراجون 888 الداعم لشبكات الجيل الخامس .. هينزل مصر بنسخة واحدة 256 جيجا مع 8 جيجا رام .. والبصمة موجودة على زِر الباور والصوت Stereo.
البطارية صغيرة شوية .. بتيجي بحجم 3300 مللي امبير .. مش عارف أداءها الفعلي ايه .. لكن الموبايل كمان بيجي بسرعة شحن 15 وات بس ومفيش شاحن في العلبة .. حاجه مش لطيفة بصراحة، وبرده بيدعم الشحن اللاسلكي بقوة 11 وات والشحن اللاسلكي العكسي بقوة 4.5 وات
الكاميرات :-
كاميراتين في الظهر .. الإثنين بدقة 12 ميجا بيكسل .. الأساسية بمثبت بصري فتحة عدسة F/1.8 والتانية Ultra Wide فتحة عدسة F/2.2 من غير مثبت .. والسيلفي في ثُقب بدقة 10 ميجا بيكسل بفتحة عدسة F/2.4.
الكاميرات كده كده كويسة .. لكن سامسونج مركزتش على التطوير في الكاميرات بقدر ما طورت في الموبايل نفسه ومدى إعتماديته ومواصفاته بشكل عام.
سعر Galaxy Z Flip 3 :-
الموبايل هينزل مصر بالنسخة الـ256 جيجا مع 8 جيجا رام، وتم تسعير النسخة دي في أوروبا بسعر 1100 يورو او ما يُعادل 20200 جنية مصري، ونتوقع انه ينزل بسعر 20 الف جنية مصري، هنحدث المقالة بالسعر الرسمي وموعد الحجز وموعد الإستلام وهدايا الحجز المُسبق لما يتكشف عنهم هنا في مصر.
الإنطباع النهائي :-
موبايل Galaxy Z Flip 3 نازل يلفت الأنظار .. موبايل صغي بتصميم شيك ووزن صغير وخامات محترمة وكمان مقاوم للماء وبيقدملك شاشة ممتازة 120 هيرتز ومعالج قوي وصوت Stereo وكاميرات كويسة .. يمكن بس البطارية والشحن متواضعين شوية.
اتوقع تواجد Flip 3 بالسعر ده في مصر هيجذب مُستخدمي الهواتف الرائدة وهيخليهم يبدأوا يفكروا يشتروه لإن الهواتف الرائدة اساسًا مبقاش فيها تطوير .. لكن في الـFlip 3 فكرة الموبايل وشكله هي لوحدها تغيير جذري عن أي موبايل.
Comments