الموبايلات اللي جربناها الفترة الأخيرة بقت كلها شبه بعض، الواحد مستني أي موبايل يقدم تجربة مختلفة شوية .. طيب ايه رأيك في موبايل بشاشة Curved ممتازة تحت الـ5000 جنية ؟ لو أنت بتتفرج على فيديوهات كتير على الموبايل فالموبايل ده مناسب ليك .. الموبايل ده هو TCL 10 Plus .. فيه مميزات، وفيه حاجات عادية، وفيه عيوب.
التصميم :-
شركة TCL مُتبنية شكل الكاميرات اللي مرصوص بالعرض .. هو بصراحة شكلة مُختلف .. لكن حلو ولا وحش دي ممكن نختلف فيها .. فا شوف انت زوقك رايح لأيه .. بس لو عايز إختلاف وتميز .. فأكيد هيكون مُميز معاك.
بالنسبة لخامة الظهر فهي من البلاستيك .. بس مع Finish مط حلو جدًا .. ملمس الموبايل في ايدك كويس جدا مش ملمس موبايل بلاستيك رخيص .. والمُميز كمان في الكاميرات اللي هنا إن مفيش بروز كبير.
كل ده العادي .. اللي مش عادي اللون الأزرق اللي جربناه من الموبايل ده .. حرفيًا تحفة فنية .. معتقدش إن دي ممكن إتنين يختلفوا عليها .. أنا شخصيًا بحب جدًا اللون الأزرق .. وعجبني جدًا درجة اللون بتاعت TCL 10 Plus واللمعة اللي فيه.
الموبايل وزنه خفيف حوالي 172 جرام وأبعاده صغيرة في الإيد .. وأحب اقولك إن ده من أفضل الموبايلات من ناحية المسكة في الإيد .. حاجة كدا زي Oppo Reno 4.
في جراب شفاف في العلبة بيغطي الموبايل بطريقة لطيفة .. ونازل كده شوية من عند الطرف العلوي للشاشة عشان يحميها.
الشاشة :-
حرفيا دي أحسن حاجة في الموبايل .. وأحسن شاشة تحت الـ5000 جنية .. شاشة Super AMOLED بقياس 6.47 بوصة بدقة FHD+ فيها نوتش للسيلفي مع إنحناءات على أطراف الشاشة.
وبكده TCL 10 Plus هيكون أرخص موبايل بيقدملك شاشة Curved .. وبالرغم من ده Quality الشاشة اللي هنا غريب .. الشاشة حرفيًا تحفة .. درجة تشبع الألوان هنا عالية جدًا وكمان تقدر تتحكم فيها براحتك من تطبيق Next Vision.
السطوع عالي بيوصل لـ600 شمعة .. زوايا الرؤية مُمتازة .. وكمان الشاشة بتيجي داعمة للـHDR10 وعليها كمان حماية Corning Gorilla Glass الجيل الخامس.
الحافة السُفلية للشاشة ممكن أتقبلها .. الحافة العلوية كانت محتاجة تقل شوية عن كده حاجة بسيطة .. ومن الأخر الشاشة محترمة جدًا.
الأداء :-
الموبايل جاي بمعالج كوالكوم سناب دراجون 665 .. معالج متواضع شويتين تلاته .. الموبايل مُناسب لإستخدام سوشيال ميديا وفيديوهات أكتر .. الموبايل مش جاي بمعالج Gaming يعني .. لإنه مش موجه للفئة دي.
أداء الموبايل مش سريع أوي .. ومش بطيء برده .. حاجة معقولة في النص .. وأعتقد اللي هيشتري الموبايل ده مش هيبقى همه الأداء أوي.
ولكن في ميزة بقى .. الموبايل جاي بمساحة 256 جيجا مع 6 جيجا رام .. حلو موضوع المساحة ده .. حط فيديوهات على الموبايل زي ما انت عايز واتفرج براحتك في أي وقت.
كلنا عارفين أداء الـSD665 .. ببجي على بتشتغل على Medmium .. كول اوف ديوتي على Very High .. والأداء الرسومي معقول .. الطبيعي بتاع الـ665 والسخونية معقولة برده الموبايل مش بيسخن أوي.
عوامل الأمان وعناصر اخرى :-
البصمة مُدمجة بالشاشة .. سرعتها مقبولة .. مش طيارة ومش بطيئة .. كويسة .. وكمان البصمة بتفضل نشطة علطول يعني الموبايل لو محطوط على مكتب من غير ما تحركة حط صباعك في مكان البصمة هيفتح، بس طبعا مكان البصمة بيبقى مظلم .. لو عايزه ينور حرك الموبايل أو إلمس الشاشة، والـOptions دي بتظبطها من Settings البصمة.
بالحديث عن الـOptions .. فالسوفت وير هنا هو TCL UI-Vision 2 مبني على اندرويد 10 .. وبما أننا أول مرة نراجع موبايل من شركة TCL فا لازم نتكلم شوية عن Options الـSoftware.
- أولًا في زرار جانبي على شمال الموبايل إسمه Smart Key والزرار ده تقدر تخصص الدوسة تعمل أيه والدوستين ورا بعض والدوسة المطولة.
- تقدر تخصص برنامج معين يفتح .. أو الكاميرا تفتح أو حتى تفتح على السيلفي .. أو كمان حاجات في السوفت وير زي إنك تمسح الـNotifications مثلا .. عجبني الزرار اللي هنا، ليه لازمة .. وهو كمان لونه رمادي مختلف ومُميز عن زرار الباور الموجود على اليمين تحت أزرار الصوت عادي.
- وكمان البصمة نفسها تقدر تتحكم فيها بحيث لما تفتح الموبايل وتفضل دايس على مكان البصمة يظهرلك قائمة سريعة لشوية إختصارات أنت برده اللي محددها على مزاجك.
- في Edge Panel تقدر تحط فيها Shortcuts للبرامج المفضلة عندك .. Option لذيذ برده.
- في Option عمل نسختين من برامج التواصل الاجتماعي علشان في ناس بتسأل دايمًا على الميزة دي.
- الـDouple Tab To Wakeup موجود برده .. وأكيد الـDark Mode موجود وممتاز لإن Quality الشاشة الـAMOLED اللي هنا ممتازة.
- الميزة اللي لاقيتها هنا وعجبتني ومش موجودة في شركات الموبايلات تانية كتير .. هي الـSpilt Screen اللي بتقسم الشاشة بين برنامجين.
- وعلشان تظهر الإشعارات على الشاشة المطفية عندك Always On Display وعندك كمان أشكال لذيذة للساعة اللي بتظهرلك.
عندي بس تعليقين على السوفت وير ده .. الـAnimations بتاعته مش لطيفه اوي .. تاني حاجة الشكل بتاع قائمة الإشعارات العلوية حاسه قديم نسبيًا على سنة 2020.
الموبايل داعم لخاصية الـNFC وهي الخاصة بالدفع الـلا تلامُسي .. خلصنا السوفت وير .. المُستشعرات كلها موجودة .. ضوء، تقارب، جيروسكوب.
صوت الموبايل جاي من سماعة واحدة تحت على اليمين وصوتها عالي ومحترم .. وخلي بالك مدخل سماعات الأذن هنا من فوق مش من تحت جنب المايك الإضافي الموجود لعزل الضوضاء .. والعلبة بيجي فيها سماعات أذن.
وأخيرًا بالنسبة لقوة الشبكات والـWiFi .. فـ متقلقش خالص الموبايل هنا ممتاز.
البطارية :-
بطارية معقولة بتيجي بحجم 4500 مللي أمبير .. ولكن بصراحة أدائها معجبنيش اوي .. يدوبك 5 ساعات شاشة مفتوحة .. هل علشان أنا دايمًا كنت بستخدمه بأعلى إضاءة الشاشة وأستمتع بالشاشة دي .. مش عارف.
منفذ الشحن USB Type C والشاحن المرفق بقوة 18 واط، متواضع شوية .. شحن معايا في حوالي ساعتين و10 دقايق .. وده وقت طويل شوية بالنسبة للمنافسين .. البطارية والشاحن متواضعين شوية في الموبايل ده.
الكاميرات :-
الموبايل جاي بـ4 كاميرات في الظهر .. الأساسية 48 ميجا بيكسل فتحة عدسة F/1.8 والتانية 8 ميجا بيكسل للتصوير الواسع فتحة عدسة F/2.2 والتالتة 2 ميجا بيكسل ماكرو والرابعة 2 ميجا بيكسل للعزل.
والسيلفي الموجود في نوتش الشاشة بيجي بدقة 16 ميجا بيكسل فتحة عدسة F/2.2.
سوفت وير الكاميرا بسيط وسهل .. هتلاقي Auto ده اللي هو Photo عادي .. وهتلاقي Portrait وSuper Night Mode بيشتغل في الكاميرا الخلفية الرئيسية بس.
في تجربة الموبايل ده انا كان معايا Realme 7 .. الإتنين سعرهم قريب جدًا من بعض فا علشان كده انا قولت أقارن بينهم .. جربت أصور في الشمس وده الوضع الوحيد اللي TCL 10 Plus فرد فيه عضلاته وقدر يعمل عزل بطريقة أفضل .. وفيه كمية تفاصيل محترمة مقارنتًا مع ريلمي 7.
تاني وضع جربته هو Portrait في الظل .. ولاقيت Realme 7 تفاصيله أكتر ولكن TCL 10 Plus معالجة الصورة أحسن فيه شوية .. الـDinamic Range فيها افضل.
بس مُجملا التفاصيل مش كتير في TCL 10 Plus .. لما تيجي تصور مبنى مثلًا وتعمل زوم هتلاقي تفوق واضح لـ ريلمي 7.
في إضاءة داخلية الأداء بتاع الـTCL 10 Plus معجبنيش .. الصور معظم الوقت بتطلع مهزوزة ولو طلعت مظبوطة هتلاقي التفاصيل قليلة شوية .. وبرده الـNight Mode أفضل في ريلمي 7 عن الـTCL 10 Plus.
بالنسبة بقى للسيلفي فا الـTCL 10 Plus مفيش HDR في السيلفي وبالتالي لو بتتصور في شمس فالخلفية وراك بتتعزل تماما وبالتالي عاجبني هنا اكتر Realme 7 .. ريلمي 7 قدر يعالج الصور بشكل أحسن من الصور الكرتونية في TCL 10 Plus.
وطبعًا TCL 10 Plus مفيهوش Night Mode في السيلفي .. ودي هتبقى نقطة تفوق في Realme 7.
بالنسبة بقى لتصوير الفيديوهات فالموبايل ده بيقدر يصور فيديوهات 2160p على 30 فريم في الثانية .. والموبايل فيه مُثبت إلكتروني بالجودة الـ4K دي .. هو اه موجود بس مش أحسن ثبات ممكن تاخدة من فيديو 4K، بس بشكل عام مقبول جدًا .. الموبايل كمان فيه ميكروفون اضافي لعزل الضوضاء.
شوف صور وفيديوهات متصورة بالموبايل ده في فيديو المراجعة !
سعر الموبايل :-
- نسخة واحدة 256 جيجا مع 6 جيجا رام بسعر رسمي 4444 جنية.
والموبايل بيدعم تركيب شريحتين إتصال من الجيل الرابع او شريحة واحدة مع كارت ميموري بحجم 256 جيجا .. كده كده مش هتحتاج كارت ميموري مع المساحة دي.
الرأي النهائي :-
مميزات TCL 10 Plus :-
- حجم ومسكة ممتازين في الإيد
- تصميم خارجي مُتميز ولون أزرق شيك
- شاشة AMOLED ممتازة جدًا Curved
- مساحة تخزين 256 جيجا ضخمة جدًا
- سوفت وير بمميزات كتيرة جدًا
- صوت عالي كويس جدًا
- فيه مثبت إلكتروني في تصوير الفيديوهات لحد 4K
عيوب TCL 10 Plus :-
- معالجة الصور من الكاميرات مش الأفضل
- معالج ضعيف مش مناسب للإستخدام التقيل
- بطارية بأداء فعلي سيء
- شاحن مش الأسرع في الفئة دي
Comments