سلسلة أفضل موبايلات في عام 2020 بإختيارات متابعين موقع موبيزل !

في خلال الـ10 أيام اللي فاتوا .. نشرنا على موقع موبيزل إستفتاء علشان نعرف اراء زوار ومتابعين موقع موبيزل لـ أفضل موبايلات في عام 2020 في جميع الفئات السعرية ونعرف بعض المعلومات التانية زي أفضل شركة قدمت موبايلات وأفضل شركة من حيث الشبكة وما الى ذلك .. وشارك في الاستطلاع أكتر من 207 الف مستخدم والنهارده هنعلن نتيجة إختيارات متابعين موبيزل في 2020.

نتيجة إستفتاء موقع موبيزل

إختيارات أفضل موبايلات في عام 2020

  • أفضل موبايل فئة إقتصادية
  • أفضل موبايل فئة إقتصادية عُليا
  • أفضل موبايل فئة متوسطة
  • أفضل موبايل فئة متوسطة عُليا
  • أفضل موبايل فئة عُليا
  • أفضل موبايل Flagship ( موبايل رائد )
  • أفضل براند موبايلات
  • أفضل ماركة في إستقبال الشبكات
  • أفضل واجهة تشغيل

أفضل موبايل فئة إقتصادية في 2020

أفضل موبايل فئة إقتصادية :-

كسب موبايل Redmi 9 عن أقرب مُنافسينه بفرق حوالي 2100 صوت علشان يكون أفضل موبايل فئة إقتصادية .. وده بسبب تقديم Package مواصفات ممتازة من معالج قوي مناسب للألعاب وبطارية كبيرة وشاشة ممتازة .. كل ده بالإضافة لعدم وجود أي مشاكل او شكاوى نتاجة عن إستخدام الموبايل وإستقرار ممتاز في الواجهة.


أفضل موبايل فئة إقتصادية عُليا في 2020

أفضل موبايل فئة إقتصادية عُليا :-

موبايل Redmi Note 9S كسب عن أقرب مُنافسية بفرق حوالي 2600 صوت علشان يكون هو أفضل موبايل فئة إقتصادية عُليا .. الموبايل ده بيقدم أفضل خامات في الفئة دي بأفضل معالج مع أقوى كاميرات وبيقدم بطارية ضخمة مع شحن سريع بالإضافة للشاشة الكبيرة بدقة مُمتازة.


أفضل موبايل فئة متوسطة في 2020

أفضل موبايل فئة متوسطة :-

فاز موبايل Realme 7 بلقب أفضل موبايل فئة متوسطة .. الموبايل بيقدم معالج قوي جدًا بأداء ممتاز في الألعاب مع شاشة بمعدل تحديث 90 هيرتز .. وأهم ميزة في الموبايل ده هي الشاحن السريع الـ65 وات .. ده أسرع شحن في الفئة المتوسطة على الإطلاق!


أفضل موبايل فئة متوسطة عُليا في 2020

أفضل موبايل فئة متوسطة عُليا :-

بكل تأكيد وبسهولة تامة كسب موبايل Mi 10T بلقب أفضل موبايل فئة متوسطة عُليا بفرق حوالي 4100 صوت عن أقرب مُنافسية .. موبايل بيقدم أقوى معالج في العالم بسعر لم يتخطى 7 الاف جنية مع شاشة كويسة وتجربة كاميرات كويسة وخامات خارجية Premium جدًا .. طبيعي ياخد اللقب بكل سهولة.


أفضل موبايل فئة عُليا في 2020

أفضل موبايل فئة عُليا :-

هنا كسب موبايل Mi 10T Pro بلقب أفضل موبايل فئة عُليا بفرق حوالي 3000 صوت عن أقرب مُنافسية .. وده لإن الموبايل بيقدم نفس المعالج ( أقوى معالج في العالم من كوالكوم حاليًا ) مع تحسن ضخم في تجربة الكاميرات والإحتفاظ بنفس الخامات الفخمة المُتميزة وتجربة الصوت القوية وتواجد كل المستشعرات.


أفضل موبايل Flagship في 2020

أفضل موبايل Flagship ( موبايل رائد ) :-

هنا برده المنافسة أصعب وأصعب .. كسب موبايل Galaxy Note 20 Ultra بلقب أفضل Flagship في 2020 بفرق حوالي 450 صوت بينه وبين أقرب مُنافسيه .. الموبايل بيقدم Package كويسة بدايًة من تجربة الكاميرات الممتازة ثم الشاشة الضخمة القوية جدًا ثم التصميم المُتميز الفخم والخامات الخارجية الممتازة.


أفضل شركة موبايلات في 2020

أفضل براند موبايلات :-

المنافسة بين ريلمي وشاومي على لقب أفضل شركة موبايلات في مصر 2020 كانت شرسة جدًا .. الفرق بينهم لا يذكر .. لشركتين كويسين بصراحة سواء شاومي أو ريلمي الاتنين ممتازين!

إحصائيات موبيزل 2020: موقع موبيزل يُقدم جوائز لـ أفضل شركات الهواتف في مصر 2020 !

أفضل موبايلات في إستقبال الشبكات في 2020

أفضل ماركة في إستقبال الشبكات :-

الخناقة المُعتادة بتاعت الشبكات .. لكن في 2020 وبعد ما قدمنالكم مراجعات الهواتف اللي نزلت مصر كلها تقريبًا .. لاحظنا تحسن في شبكات كتير من الموبايلات .. لكن اللي كسبت هي شركة ريلمي بفرق حوالي 1700 صوت عن أقرب منافس ليها وهي شركة شاومي واللي غريبة إنها طلعت مركز تاني في إستفتاء أفضل الشبكات.


أفضل واجهة تشغيل في 2020

أفضل واجهة تشغيل :-

برده دي خناقة كبيرة في الجروبات وبين المُستخدمين .. لكن سامسونج خدت اللقب ده وبصراحة تستحقة .. كسبت سامسونج بفرق وصل لـ240 صوت بس عن أقرب مُنافس ليها .. سامسونج في واجهة الـOne UI تستحق اللقب ده بسبب إنها جمعت بين التصميم المتميز والمميزات الكتيرة وإحتفظت بالسرعة والسلاسة.


موقع موبيزل

كنا معاكو في موبيزل من بداية سنة 2017 .. وفي خلال سنة 2020 راجعنا تقريبًا كل الموبايلات المهمة اللي نزلت طول السنة .. وقدمنا ليكم أكتر من 120 فيديو مراجعة على قناة اليوتيوب ومعاهم 120 مقالة مراجعة مكتوبة في قسم مراجعات الموبايلات على موقع موبيزل.

بالإضافة لإننا من خلال قسم أخبار الموبايلات على موقع موبيزل غطينا تقريبًا كل المؤتمرات اللي اتعملت في السوق المصري وكل الأخبار المحلية اللي نزلت .. وكمان غطينا كل الأخبار العالمية اللي عليها علاقة بالأسواق المصرية .. وكمان من خلال انبوكس صفحة موبيزل على فيس بوك ردينا على كل إستفسارات وأسئلة الناس.

دي إنجازاتنا في سنة 2020 .. في سنة 2021 اللي جاية الإنجازات هتزيد وهتتضاعف وهتلاحظوا تطورات ضخمة بإذن الله في محتوى موبيزل سواء الموقع او قناة اليوتيوب او فيس بوك .. وشكرًا ليكم!

قد يعجبك أيضا...

Comments

جاري التحميل...