أول موبايل بسيلفي مدفون بالشاشة + حرب بين شاومي و ريلمي !

انا عارف انك زهقت من الموبايلات لانها بقت كلها شبه بعضها بطريقة غريبة، بص .. انسى كل الموبايلات الي انت تعرفها .. النهاردة معانا موبايل من المستقبل .. موبايل مفيهوش زراير والسيلفي مدفون تحت الشاشة .. والي كان المفروض يبقى الاعلان عنه حدث ضخم في مؤتمر MWC في برشلونة .. بس للأسف المؤتمر اتغلى .. وفي المقاله دي هتعرف الـFlagships الجديده من ريلمي وشاومي .. واخر اخبارهم كمان في مصر.

1- Vivo APEX 2020

اول موبايل في الخبر معانا هو Vivo APEX 2020 .. اولًا لازم تبقا عارف ان سلسلة Apex من فيفو هو للمنظرة فقط لا غير .. يعني الموبايل ده مش بينزل في خط انتاج ويتحطله سعر عالمي ويتباع والكلام ده كله، لأ .. برغم اني شايف ان ديه خطوة مش لطيفة حاليا .. كانت السنة الي فاتت اوكيه .. انما دلوقتي بنشوف الفولد بيتباع عادي .. بس مش مشكلة .. التكنولوجيا بتاعته اكيد هتتنقل لموبايلات فيفو و شركات BBK التانيه عمومًا بس واحدة واحدة.

اول انبهار في الموبايل ده الشاشة الـ6.45 بوصة من نوع اموليد بدقة FHD+ .. كل ده عادي جدا .. الإنبهار الحقيقي بقى في حاجتين !

اولهم الشاشة المنحنية بزاوية 120 درجة .. زاوية تخلي الشاشة واصلة لظهر الموبايل .. وديه ليها وظيفة هنتكلم عنها كمان شوية، والانبهار التاني والأهم .. ان مفيش نوتش ومفيش سلايدر .. اومال فين يعم السيلفي ؟!

السيلفي موجود تحت الشاشة .. او بمعنى أصح مدفون تحت الشاشه .. بيكسلات بتطفي وتعدي الضوء للعدسة علشان تتصور سيلفي بحيث تقدر تاخد تجربة الشاشة الكاملة من غير ما يكون في خرم او ثقب او نوتش او تتقل وزن الموبايل بـ سلايدر.

فكرة صايعة وحلوة جدا .. بس هل يا ترى جودة السيلفي فعلا كويسة .. السيلفي اللي هنا 16 ميجا بيكسل .. وفيفو بتقول ان اداء السيلفي قريب من اي سيلفي تاني .. وطبعا احنا مش هنجرب الموبايل .. فخلينا نصدقهم وخلاص لحد اما نشوف التكنولوجيا ديه في موبايلات تانية سواء من فيفو او اي شركة تانية.

خلصنا انهبار بالشاشة ؟ نبص على الكاميرا الخلفية الموجوده في الفريم المدور ده .. هنلاقي كاميرتين رئيسية 48 ميجا بيكسل وعدسة زوم 16 ميجا بيكسل .. وبرده الكاميرا الخلفية فيها انبهارين !

اول انبهار .. وهو الزوم .. بص حوارات الزوم الـDigital اللي بتوصل لـ100 اكس والكلام ده كله دعايا يا باشا .. زوم ديجتال كله .. تفاصيل بتتمسح والسوفت وير هو المسؤل الاول والاخير عن كوالتي الزوم .. لان اخر اي عدسة في الزوم في الموبايلات الي قبل كدا 5x حقيقي Optical.

انما فيفو المرة ديه عملت فكرة العدسة الزوم اللي بتتحرك في الموبايل .. علشان هي ضايفة 4 عدسات في الكاميرا منهم 2 بيتحركوا بحيث يغيروا البعد البؤري، بص سيبك من التعقيدات ديه .. المهم في الموضوع انك هتقدر تاخد زوم اوبتيكال حقيقي لحد 7.5 اكس .. وديه حاجة اول مرة نشوفها.

تاني انبهار معانا هو الثبات البصري .. الـOIS يعني .. اللي كان بيعتمد على انك وانت بتصور فيديو مثلا بتحاول تثبت ايديك وتمشي .. السينسور بيقدر يعالج اي حركة في البعد الثنائي يعني فوق تحت يمين شمال .. انما فيفو ضافتلك بُعد كمان وهو قدام و ورا .. بحيث كدا تاخد ثبات في تصوير الفيديوهات اكتر بـ200 في المية من المثبت القديم.

خلصنا انبهارات ؟ .. لا لسه يباشا شوية !

زي ما قولت فوق .. مفيش ازرار جانبيه ولا اي فتحات في الموبايل ده .. فيفو مستخدمة انحناء الشاشة الشديد ده علشان تلمس كدا اكنك بتدوس على زراير الصوت والباور.

طبعا مفيش مخرج صوت ولا مخرج شحن ولا مدخل سماعات .. الصوت بيطلع من الشاشة بتكنولوجيا Screen Sound Cast .. بحيث تديك صوت ستريو طالع من تحت الشاشة .. وشوفنا القصه دي قبل كده في P30 Pro.

والشحن هنا Wireless فقط .. وبقوة 60 واط ونوعه Super Flash Charger .. بتشحن 2000 مللي امبير في 20 دقيقة .. طيب هي كام اصلا البطارية .. لا منعرفش مهو Concept بقى.

طبعا مش محتاج اكلمك عن ان الموبايل اكيد جاي بمعالج كوالكوم سناب دراجون 865 اعلى معالج في العالم دلوقتي .. بدعم شبكات الجيل الخامس .. ومساحة 256 جيجا ورام 12 جيجا .. وكل الكلام ده.

زي ما قولتلك متسألنيش عن سعر لان ده كونسبت .. هو بس حاجة كدا بتقولك الدنيا رايحة فين وايه مستقبل الموبايلات .. بعض الشركات ماشية في الاتجاة ده زي الـApex من فيفو والـMi Mix Alpha من شاومي .. والبعض التاني ماشي في اتجاه الفولد .. زي سامسونج وهواوي.

خلصنا بقى الحاجات الكونسبت اللي مش بتنزل .. تعالوا نشوف بقى ريلمي وشاومي وصلوا لفين .. الناس ديه يجماعة شاطرين جدا انهم يقدموا فلاج شيب حقيقي بنص سعر فلاج شيب سامسونج وابل.

الفترة الي فاتت .. شاومي اعلنت عن الـMi 10 Pro .. وده مبني ومعتمد على الـMi Note 10 الي راجعناه من فتره بس بيعالج النواقص بتاعته علشان يبقى فلاج شيب حقيقي من كل الزوايا.

وريلمي بعدها اعلنت عن Realme X50 Pro .. وده برده تطوير ومعالجه لنواقص الـX50 علشان يبقى فلاج شيب حقيقي .. فخلينا نتكلم كدا عن كل واحد ايه الجديد الي قدمه.

2- Mi 10 Pro

زي ما انت عارف .. ده فلاج شيب .. فأكيد جاي من الزجاج وفريم معدن وحماية كورنينج جورلا جلاس والكلام ده كلو .. فمفيش اي انبهارات واختلافات حقيقية في نقطة التصميم عن الـMi Note 10.

الشاشة بقت اكبر .. بقت بحجم 6.67 بوصة من نوع Super AMOLED بدقة FHD+ .. كان نفسي اشوف دقة اعلى .. بس بردة الشركات الصينية عندها شوية تحفظات على دقة الشاشة العليا.

والمميز هنا حاجتين .. اولًا السيلفي مزنوق كدا في ثقب صغير للسيلفي .. مش واخد شكل النوتش زي الـ مي نوت 10 .. وكمان الشاشة جاية بـ 90 هرتز مش 60 هيرتز زي الـMi Note 10.

الاختلاف الحقيقي والواضح بقا في نقطة الاداء .. لان الـMi 10 جاي بمعالج سناب دراجون 865 بدعم شبكات الجيل الخامس وده بيقدم افضل اداء موجود حاليًا واكيد احسن بكتير من سناب دراجون 730G نقطة النقص القوية الي كانت موجودة في المي نوت 10.

نوع الذاكرة كمان بقا UFS 3.0 وده اسرع بفرق ملحوظ عن UFS 2.1 الموجود في النوت 10 .. وكمان الذاكرة هنا بتوصل لـ512 جيجا .. نص تيرا من شاومي Mi 10 Pro .. وكمان الرام من نوع DDR5 وبيوصل لحد 12 جيجا رام .. والموبايل جاي بدون مدخل كارت ميموري .. وانت اكيد مش هتحتاجه يعني .. فالناس بصراحة عاملين الي عليهم وزيادة.

الموبايل جاي بصوت ستريو .. يعني سماعة المكالمات بتشتغل معاك مع السماعة الي تحت وبيديك تجربة صوتيه محترمة .. بس شالوا مدخل الـ3.5 مللي بتاع سماعات الاذن اللي كان موجود في الـMi Note 10.

البطارية كانت في الـNote 10 لو تفتكر 5260 مللي أمبير .. خلوها دلوقتي 4500 مللي أمبير في Mi 10 Pro بس الشحن بقى اسرع .. الشحن هنا بقوة 50 واط بدل ما كان 30 واط بس .. وكمان بقى بيدعم شحن Wireless بقوة 30 واط.

الكاميرات بقى .. اربع كاميرات .. الرئيسية دقتها 108 ميجا بيكسل والتانية 8 ميجا بيكسل للزوم والتالتة 12 ميجا بيكسل للعزل والبورتريه والاخيرة 20 ميجا بيكسل للتصوير الواسع .. شالوا العدسة الخامسة بتاعت الماكرو اللي كانت في المي نوت 10 علشان الزحمة بتاعت الكاميرات في الظهر تقل شوية .. والسيلفي في الثقب 20 ميجا بيكسل فتحة عدسة F/2.0.

الكاميرات الخلفية اصلا كانت جامدة جدا جدا في الـMi Note 10 .. الي يعتبر نفس الارقام بتاعت الـMi 10 Pro .. بس الي هيختلف هو طريقة وسرعة معالجة الصور بسبب استخدام معالج رائد حرفيًا .. فاتوقع اداء جامد جدا من الكاميرات .. وطبعا اهم اختلاف هو جودة تصوير الفيديوهات لإن الـMi 10 Pro بيصور فيديوهات 8k زي سلسلة سامسونج Galaxy S20 !

الليلة ديه كلها سعرها بيبدأ من 715 دولار او حوالي 11200 جنية للنسخة 256 جيجا مع 8 جيجا رام وبتوصل لحد 860 دولار او 13500 جنية للنسخة 512 جيجا مع 12 جيجا رام.

ممكن انت تشوف بقى الاسعار ديه كتير شوية على موبايل من شاومي .. بس انا بصراحة مش شايف كدا خالص .. الموبايل فعلا مفيهوش اي تقصيرات ويقدر ينافس ويسد مثلا مع الـS20 Plus الي تقريبا سعره أزيد حوالي 70% من سعر Mi 10 Pro.

3- Realme X50 Pro

الموبايل الفلاج شيب بقى اللي ريلمي اعلنت عنه هو Realme X50 Pro ..تعالوا نشوف ده ايه دنيته .. بص هو الموبايل كشكل مفيهوش جديد .. نفس رصة كاميرات موبايلات ريلمي المعروفة .. هو الجديد بس هنا لون الموبايل .. الاحمر الطوبي والاخضر الغامق .. يعني مغيرش حاجة ف التصميم الزجاجي والفريم المعدن .. في مقابل انه يديلك الوان جديدة.

الشاشة حجمها 6.44 بوصة سوبر اموليد بدقة FHD+ .. والشاشة شغالة بـ 90 هرتز وديه حاجة كويسة جدا .. مفيش نوتش .. في ثقبين للسيلفي على الشمال .. يعجبك شكل الثقبين او لا .. ديه حاجة ترجعلك .. انا شخصيًا مش بحبهم وشايف ان كفاية ثقب واحد وبلاها العدسة الـWide بتاعت السيلفي.

وبردة الموبايل جاي بأعلى معالج سناب دراجون 865 زي الـMi 10 Pro بالظبط بدون اي فروقات .. بس اعلى نسخة ف الـX50 Pro بمساحة 256 جيجا مع 12 جيجا رام مش 512 جيجا زي شاومي .. وبردة نفس نوع الذاكرة UFS 3.0 والرام DDR5.

البطارية بقى .. 4200 مللي أمبير .. مش ديه قصتنا .. الفكرة في الشاحن الجديد الـ65 واط اللي ريلمي ركزت اوي معاه .. بيشحن البطارية بالكامل في اقل من نص ساعة .. حاجة جامدة جدا وبتفكرني بشاحن الـRealme X2 Pro الي كان سريع اوي و50 واط بس.

الكاميرات بقا زعلتني .. نفس سينسور الـRealme XT وX2 Pro .. الـ64 ميجا بيكسل بمستشعر سامسونج GW1 .. وفي عدسة زوم 12 ميجا بيكسل وعدسة Wide Angle للتصوير الواسع 8 ميجا بيكسل والرابعة 2 ميجا بيكسل ملهاش لازمة.

الكاميرات الخلفية ديه مش هتقدر تسد خالص بصراحة مع وحوش الكاميرات دلوقتي زي الـMi 10 Pro .. وكمان الـX50 Pro اخره في تصوير الفيديوهات 4k بس.. وكمان مفيش اي كلام عن OIS او تثبيت بصري في كاميرات ريلمي X50 برو.

السيلفي بقى مزدوج في ثقبين في الشاشة .. الاساسية 32 ميجا بيكسل فتحة عدسة F/2.5 والتانية 8 ميجا بيكسل فتحة عدسة F/2.2 للتصوير الواسع.

بص ارقام السيلفي كفتحة عدسة ضيقة شوية ممكن تضايقك بليل .. بس اما نشوف معالجة الصور بالمعالج الرائد والـNight Mode الجامد جدا بتاع ريلمي هيعمل ايه في جودة السيلفي .. لسه هنجرب !

ارخص نسخة من الـX50 Pro بسعر 550 دولار او حوالي 8 الاف جنية 128 جيجا مع 8 جيجا رام .. واعلى نسخة بـ625 دولار او 10 الاف جنية للنسخة 256 جيجا مع 12 جيجا رام.

طبعا واضح ان فلاج شيب شركة ريلمي ارخص من شاومي .. بس حقيقي شاومي متفوقة بشكل واضح عن ريلمي في نقطة الكاميرا الخلفية .. والشحن الـWireless وان في نسخة 512 جيجا طبعا .. اما نشوف مين فيهم هيشرف مصر قريب.

وبخصوص الكلام عن مصر بقى .. فـ Realme C3 الي اتكلمنا عنه قبل كدا نازل مصر في شهر مارس ان شاء الله هو وRealme 6 .. وان شاء الله نعملكم فيديوهات كتير عنهم .. ولسه شاومي امورها مش واضحة في مصر هتنزل ايه ومش هتنزل ايه.

بس يا سيدي .. ديه كانت نشرة اخبار كدا سريعة علشان تبقا عارف رأسك من رجليك .. هنعمل ان شاء الله فيديو على قناتنا على يوتيوب نجاوب فيه عن اهم اسئلتكم قريب جدا وهيكون هو الفيديو الي فيه الجيفاوي بامر الله.

الفيديو :-